ტყუილის ფსიქოლოგია ბავშვებში - ამ თემაზე ფსიქოლოგმა ზურა მხეიძემ ისაუბრა. როგორც მან აღნიშნა, თუ რაიმეს გარკვევა გსურთ, ბავშვებისგან ინფორმაცია არ აიღოთ:
„გირჩევთ, თუ არკვევთ, რაიმე სიმართლეა თუ არა, ბავშვებისგან ინფორმაცია არ აიღოთ. ბავშვებს ფანტაზია აქვთ ძალიან განვითარებული, არასწორი ინფორმაცია შეიძლება აიღოთ. ეცადეთ, რომ ბავშვებს ტყუილზე ინფორმაცია საერთოდ არ გამოართვათ, ან თუ სხვა გზა არ გაქვთ და მაინც და მაინც ბავშვისგან გინდათ, არასდროს არ უნდა უკარნახოთ მას არაფერი. მაგალითად, არ უნდა უთხრა, ქურთუკი ეცვა? არც ერთი თქვენი შეკითხვა არ უნდა შეიცავდეს არანაირ მინიშნებას“, - აღნიშნა ზურა მხეიძემ.
მან საკუთარი მაგალითიც მოიყვანა. მიუხედავად იმისა, ბავშვებში ტყუილის ფსიქოლოგია კარგად იცის, შეცდომა მაინც დაუშვა:
„ბავშვი იყო 3 თუ 4 წლის, სახლში დავკარგეთ ტელევიზორის პულტი. როგორ იწყება? ვეკითხები მეუღლეს, - არ აუღია. ვეკითხები ბავშვს - არ მპასუხობს. აი, შეცდომა რა არის - ვეკითხები, ხომ არ გადააგდე? ბავშვი მეუბნება, კიო. სად გადააგდე-მეთქი, გამიყვანა აივანზე და გადამახედა. არაფერი არ ჩანდა. ვიყიდეთ ახალი პულტი და ძველი აღმოვაჩინეთ საწოლებს შორის ჩავარდნილი. მე რომ ვუთხარი მეუღლეს, შვილს გადაუგდია აივნიდან-მეთქი, მერე როცა ჩემმა მეუღლემ ჰკითხა ბავშვს, რა უყავი - მან წაიყვანა და აჩვენა (აივნიდან გადავაგდეო). ბავშვმა ის ისტორია უკვე შექმნა. არ გადაუგდია“.
ზურა მხეიძის თქმით, დიდი მანიპულატორები არიან და ცოლ-ქმარს შორის ურთიერთობის დაძაბვა შეუძლიათ:
„ბევრი ფაქტია, როდესაც ბავშვების ჩვენების გამო არის ვიღაცა დაჭერილი. ბავშვებმა შეიძლება ცოლ-ქმარს შორის დაძაბონ ურთიერთობა, ტყუილებს ლაპარაკობენ. მამას მიუტანს ამბავს დედაზე, დედას - მამაზე. ძალიან დიდი მანიპულატორები არიან. თუ დაიჭირა, რომ თქვენ რეაქციები გაქვთ და მას უჯერებთ, მერე ნახეთ რა დღეში შეუძლიათ, რომ ჩაგაგდოთ,“ - აღნიშნა ზურა მხეიძემ. წყარო: აზროვნების აკადემია
გააზიარეთ პოსტი
არ დაგავიწყდეთ !!!
Momsedu.ge-მ თქვენთვის, ქალებისთვის შექმნა ახალი სივრცე, სადაც ყველაზე მცოდნე დედები იყრიან თავს. ჯგუფის დასახელებაც სწორედ ასეა - „მცოდნე დედების ჯგუფი“, რომლის საშუალებით დედები ერთმანეთს საკუთარ გამოცდილებას გაუზიარებენ. (ჯგუფში გასაწევრიანებლად ნახეთ ბმული - „მცოდნე დედების ჯგუფი“)
„პირველ ხანებში მიჯაჭვულობა მაინც უნდა ჩამოყალიბდეს დედასთან, ამიტომ სჯობს, პირველ რიგში, დედა იყოს ბავშვთან,“ - მაია ხერხეულიძე
პედიატრმა მაია ხერხეულიძემ ბავშვის აღზრდაში დედისა და მამის მნიშვნელოვან როლზე ისაუბრა. მან აღნიშნა, რომ მამის ჩართულობა ბავშვთან ურთიერთობის პროცესში აუცილებელია:
„რაც შეეხება გენდერულ თანასწორობას, როდესაც ჩვენ ამის შესახებ ვსაუბრობთ, ისევ ვამბობ, რომ ერთი მიჯაჭვულობა ვითარდება ერთ ძირითად მშობელთან. რა თქმა უნდა, ყოველთვის უკეთესია, რომ ეს იყოს დედა, თუმცა მამა აუცილებლად უნდა იყოს ჩართული ბავშვთან ურთიერთობის პროცესში.“
მაია ხერხეულიძის თქმით, მამა ბავშვთან ურთიერთობაში გარეშე პირის პოზიციას არ უნდა იკავებდეს:
„მამა არ უნდა იყოს გარეშე პირის პოზიციაში. ძალიან ხშირად, სამწუხაროდ ასეა, რომ თითქოს მამა არის გარეთ მდგომი ადამიანი, რომელიც ძირითადად ხდება დამსჯელი. ის ასრულებს დამსჯელ ფუნქციას ბავშვისთვის. დედა ბავშვს ეუბნება: „აი, მოიცადე, მამა მოვა და ნახე რას გიზამს!“ არ არის ეს სწორი, იმიტომ, რომ ასეთ შემთხვევაში ბავშვთან ასოციაცია ხდება არასწორი.“
„აუცილებლად ბავშვზე ზრუნვაში დედასთან ერთად მამა უნდა იყოს ჩართული. მამა უნდა სთავაზობდეს ბავშვს სხვადასხვა თამაშს. მამა არის ძალიან სერიოზული ავტორიტეტი ბავშვისთვის, განსაკუთრებით ვაჟისთვის. ძალიან მნიშვნელოვანია, რომ მისი ფუნქცია სწორად იყოს ჩართული. რა თქმა უნდა, მიმაჩნია, რომ პირველ ხანებში მიჯაჭვულობა მაინც უნდა ჩამოყალიბდეს დედასთან. ამას ყველაზე დიდი მნიშვნელობა აქვს, ამიტომ, რა თქმა უნდა, სჯობს, რომ პირველ რიგში, დედა იყოს ბავშვთან,“ - აღნიშნულ საკითხებზე მაია ხერხეულიძემ საზოგადოებრივი რადიოს ეთერში ისაუბრა.
