როგორ მივხდეთ ჩვილს საკვები ჰყოფნის თუ არა? - აღნიშულ თემაზე პედიატრმა ნანა რურუამ ისაუბრა.
„სულერთია ბავშვი ძუძუზეა თუ ხელოვნურ კვებაზე, ძუძუზე მით უფრო, არ არის აუცილებელი ბავშვის აწონვა, რომ გავიგოთ ჰყოფნის თუ არა საკვები. უნდა დააკვირდეთ რამდენჯერ უცვლით პამპერსს, ანუ რამდენს შარდავს და რამდენჯერ გადის კუჭში. თუ ბავშვი შარდავს და კუჭში გადის ადეკვატურად, ანუ დღეში 5-6 პამპერსს უცვლით მოსაშარდად, ეს ნიშნავს, რომ მას რძე ჰყოფნის. რას ეფუძნება ეს ლოგიკა? - ბავშვს აქვს თანდაყოლილი გადარჩენის უნარი. ჭამით აკეთებს რას? ძალიან ჭკვიანურად იქცევიან ჩვილები, ჯერ შეივსებს თავის მოთხოვნილებას და თუ რამე მორჩება, ამ შემთხვევაში მოშარდავს ან კუჭში გავა. ჩვილი ზედმეტს იშორებს მხოლოდ. პრაქტიკულად არ არსებობს, რომ მოშივდეს და ამ დროს მოშარდოს კარგად. ძალიან მარტივი ლოგიკაა, თუ ბავშვს დღეში 5-6 ჯერ ან 7-8 ჯერ უცვლით პამპერსს, ეს ნიშნავს, რომ მას საკვები ჰყოფნის.
ბავშვმა ყოველთვის იცის, როდის შია. ერთი მნიშვნელოვანი ფაქტორია გასათვალისწინებელი, ბავშვებს ყოველთვის არ შიათ თანაბრად. ყოველდღე ერთნაირად არ შიათ. მათი ზრდის ტემპი განსხვავდება ყოველდღიურად, არსებობს ზრდის პიკი, თვეში, რამდენიმე დღის განმავლობაში უფრო სწრაფად იზრდება'' - აღნიშნულ თემაზე ნანა რურუამ ტელეკომპანია „რუსთავი 2“-ის გადაცემაში „სხვა შუადღე“ ისაუბრა.
„ამჟამად ბავშვებში რამდენიმე ვირუსია გავრცელებული ერთმანეთის პარალელურად,“ - პედიატრი ნანა რურუა რესპირატორული ვირუსების გააქტიურების შესახებ
პედიატრმა ნანა რურუამ ბავშვებში რესპირატორული ვირუსების გააქტიურების შესახებ ისაუბრა. მისი თქმით, ამ ეტაპზე ქვეყანაში რამდენიმე რესპირატორული ვირუსია აქტიური:
„მთელი ორი წლის განმავლობაში ჩვენ მხოლოდ კორონავირუსის არსებობა გვახსოვდა. სინამდვილეში სხვა ვირუსებიც არსად წასულა. მას შემდეგ, რაც გაიხსნა ყველაფერი, ამ ვირუსების რაოდენობამ მოიმატა. ეს არ არის ერთი რომელიმე კონკრეტული ვირუსი. არის გრიპის შემთხვევებიც. კლინიკური სურათი, შესაძლოა, იყოს სხვადასხვანაირი, მაგალითად: კონიუნქტივიტი, სურდო, ხველა, სუნთქვის გაძნელება, ფაღარათი, ცხელება. ამჟამად ბავშვებში რამდენიმე ვირუსია გავრცელებული ერთმანეთის პარალელურად. ამის მიხედვით კლინიკური სურათი განსხვავებულია. ყველასთვის დამახასიათებელია ცხელებით მიმდინარეობა, სურდოს და ხველის თანხლებით, რომელიც საშუალოდ 3-5 დღე გრძელდება და წესით მკურნალობის გარეშე თავისით უნდა დამთავრდეს.
პედიატრები სულ ვცდილობთ მშობელს დავასწავლოთ გაარჩიოს, სად არის რთული და სად მსუბუქი შემთხვევა. რესპირაციული ვირუსების დროს საყურადღებო ნიშნებია ქოშინი, სუნთქვის გაძნელება და ზოგადი მდგომარეობის გაუარესება. 39 სიცხე არ არის საშიში ცხელება. შესაძლოა, ბავშვს არ ჰქონდეს მაღალი ცხელება, მაგრამ მისი ზოგადი მდგომარეობა იყოს ცუდი. ეს უფრო საშიშია. მხოლოდ ცხელება არ განიხილება საგანგაშო ნიშნად. კიდევ ერთი, რაც შეიძლება ძალიან საყურადღებო იყოს, არის სითხის მიღების შეუძლებლობა.
ვირუსების უფრო მძიმე პიკი ყოველთვის იყო ხოლმე გაზაფხულზე. უჩვეულო არ არის მარტსა და აპრილში ვირუსების რაოდენობის მომატება,“- აღნიშნულ საკითხზე ნანა რურუამ საქართველოს პირველი არხის გადაცემაში „ახალი დღე“ ისაუბრა.