Baby Bag

რატომ არის ყურსასმენები საშიში მოზარდებისთვის? - ოტორინოლარინგოლოგი მელანო ჯანხოთელი აქტუალური პრობლემის შესახებ

ოტორინოლარინგოლოგი მელანო ჯანხოთელი „პოსტ ალიონში“ ყურსასმენების გამოყენების ნეგატიურ ასპექტებზე საუბრობს და აღნიშნავს, რომ სასმენი აპარატების გამოყენების გამო ახალგაზრდებს სმენის პრობლემები ხშირად ექმნებათ:

„დღეს ყურსასმენები ჩვენი მოზარდების ცხოვრების განუყოფელი ნაწილია. მათი მოხმარების გახშირება ონლაინ სწავლების მოთხოვნამაც გამოიწვია. ყურსასმენებს არამხოლოდ თინეიჯერები და ახალგაზრდები, ზრდასრულებიც იყენებენ აუდიო წიგნების გამოსვლის გამო. ყველა მოწინავე ქვეყნის წამყვანი მეცნიერების კვლევებით დადასტურებულია, რომ ახალგაზრდებსა და მოზარდებში სმენის პრობლემების 2/3 სწორედ ყურსასმენების გამოყენებით არის გამოწვეული. ეს უზარმაზარი პროცენტია, ძალიან დიდი. საერთოდ იმის უარყოფა, რომ ყურსასმენები კომფორტულია, კომფორტულია საყვარელი მუსიკის მოსმენა, ძალიან ძნელია, მაგრამ ჩვენ უნდა ვიცოდეთ, როგორ გავაკეთოთ ეს სწორად. როგორ მოვიქცეთ ისე, რომ არ დავიზიანოთ სმენა.“

მელანო ჯანხოთელის თქმით, მუსიკის ხმამაღლა მოსმენა არც ისე უწყინარი გართობაა, როგორც ეს ერთი შეხედვით ჩანს:

„თითქოს უწყინარი გართობაა ხმამაღლა მუსიკის მოსმენა, მაგრამ ხმაური სმენისთვის ძალიან საშიშია. საერთოდ ხმაური დეციბილებში იზომება. 10-15 დეციბილი არის ნიავი, მსუბუქი ფოთლების შრიალი, 20-25 დეციბილით იზომება ჩურჩულის დონე, 30-35 დეციბილი ჩვეულებრივი ხმაურის დონეა, 60 დეციბილი არის უკვე ყვირილის დონე და ის უკვე დისკომფორტს გვიქმნის. საერთოდ სმენისთვის ძირითადად საშიშია 85-90 დეციბილიდან ზემოთ ბგერები, რომელსაც ნებისმიერი სასმენი აპარატი ძალიან მარტივად გამოსცემს, იმგვარად არის ისინი შექმნილი.“

მელანო ჯანხოთელი აცხადებს, რომ ახალგაზრდები ძირითადად ხმაურიან მუსიკას უსმენენ:

„ახალგაზრდებს ძალიან მოსწონთ როკ-ჯგუფების სიმღერები, მეც ძალიან მიყვარდა ახალგაზრდობაში და ვუსმენდი, რა თქმა უნდა, ხმამაღლა, მაგრამ მაშინ არ იყო ასეთი ყურსასმენები და ამიტომ ჩვენს თაობას მსგავსი პრობლემები არ აწუხებდა. როკ-ჯგუფის კონცერტის ხმიანობა შეესაბამება 100-120 დეციბილის დონეს. ეს იგივეა, რომ რეაქტიული ძრავის ხმაური თქვენგან ათ მეტრში მოისმინოთ.“

„ჩვენ გვაქვს მიმღები და თავის ტვინის ცენტრალური ნაწილი, რომელიც ახდენს გარედან მოსმენილი ბგერების აღქმას და დიფერენცირებას. არსებობს სხვადასხვა სახის სასმენი აპარატები, ზოგიერთი იდგმება ყურში და ზოგი გარედან კეთდება. განსაკუთრებით საშიშია ყურში ჩასადები ყურსასმენები. გარდა იმისა, რომ ის გარეთა სასმენი მილის კანს აღიზიანებს, მისი გამოყენებისას ბგერა პირდაპირ, დამუშავების გარეშე ეცემა დაფის აპკზე. როგორც ყველაფერ სხვას, დაფის აპკის მუშაობასაც აქვს თავისი სარზღვრები. ის გათვლილია ბუნებრივ ხმაურზე, რომელიც გარედან უნდა მიიღოს და არა ხელოვნურზე. როდესაც ახალგაზრდა ყურსასმენებში ძალიან უწევს ხმას, ის დამანგრეველ ზემოქმედებას ახდენს სმენაზე,“ - აღნიშნავს მელანო ჯანხოთელი.

წყარო:​ პოსტ ალიონი

არ დაგავიწყდეთ !!!

დაემატეთ ჯგუფში საბავშვო რეცეპტები

8 საბავშვო პროდუქტი, რომელსაც გამოცდილი მშობლები არასდროს ყიდულობენ
​​გამოცდილი მშობლებიარასდროს ყიდულობენ ისეთ საბავშვო პროდუქტებს, რომლებიც ბავშვებისთვის უსაფრთხო არ არის. ჩვენს სტატიაში სწორედ იმ პროდუქტებს გაგაცნობთ, რომელთა შეძენისგან თავი მაქსიმალურად უნდა შეიკა...

შეიძლება დაინტერესდეთ

„ეს სამი წერტილი მიანიშნებს იმაზე, რომ ბავშვს ეწყება ხერხემლის გამრუდება,“ - რეაბილიტოლოგი დავით ბალხამიშვილი

„ეს სამი წერტილი მიანიშნებს იმაზე, რომ ბავშვს ეწყება ხერხემლის გამრუდება,“ - რეაბილიტოლოგი დავით ბალხამიშვილი

რეაბილიტოლოგმა დავით ბალხამიშვილმა ხერხემლის პათოლოგიების გამომწვევი მიზეზების შესახებ ისაუბრა. მისი თქმით, აღნიშნული პათოლოგიების მიზეზი, შესაძლოა, ნაყოფის არასწორი განვითარებაც იყოს:

„ხერხემლის პათოლოგიების მიზეზი შეიძლება იყოს მუცლად ყოფნის პერიოდში ნაყოფის არასწორი განვითარება, შემდგომში ინფექციური დაავადებები, რომელიც შეიძლება ბავშვმა გადაიტანოს, თუ მან​ დააზიანა ძვალსახსროვანი სისტემა. შემდეგ მოდის უკვე პასიური ცხოვრების რეჟიმი, დიდხანს ჯდომა, ძლიერი ფიზიკური აქტივობა, მაგალითად, როდესაც სამშენებლო კომპანიაში მუშაობს ადამიანი."

დავით ბალხამიშვილმა სქოლიოზით გამოწვეული გართულებების შესახებაც ისაუბრა და ბავშვებში ხერხემლის გამრუდების გამომწვევი ძირითადი მიზეზებიც დაასახელა:

„ხერხემლის გამრუდება, იგივე სქოლიოზი, შემდგომში იწვევს ისეთ გართულებებს, როგორებიცაა: ოსტეოქონდროზი, ხერხემლის თიაქარი და ა.შ. ბავშვებში სქოლიოზის გამომწვევი მიზეზი შეიძლება იყოს ნაყოფის არასწორი ჩამოყალიბება. ასევე მოზარდობის პერიოდში, როდესაც ბავშვი პასიურია, იხრება, არასწორად ზის, ​სიმძიმეებს ატარებს, როდესაც კუნთოვანი სისტემა არ ვითარდება, ეს იწვევს სქოლიოზის განვითარებას.“

„ძალიან მარტივია, რომ მშობელმა ეს გააკონტროლოს. ​მშობელმა ფეხზე უნდა გახადოს ბავშვს, დააყენოს სწორად, გახადოს ზემოდან. ბავშვს შიშველ ტანზე ზურგიდან თუ შეხედავს, შეამჩნევს, რომ თუ გამრუდება მიდის, ერთი მხარე უფრო ქვემოთ არის ჩაწეული, ვიდრე მეორე. უკანა მხარეს ბეჭიც უფრო ჩაწეულია. მკერდსაც თუ შეხედავს, იმ მხარეს, რომელიც დაწეულია, მკერდიც დაწეულია. ეს სამი წერტილი მიანიშნებს იმაზე, რომ ბავშვს ეწყება ხერხემლის გამრუდება. ეს არის უკვე სიგნალი, რომ მიაკითხონ სპეციალისტს,“ - აღნიშნულ საკითხებზე დავით ბალხამიშვილმა ტელეკომპანია „რუსთავი 2“ - ის გადაცემაში „დილა მშვიდობისა საქართველო“ ისაუბრა.

წყარო: ​„დილა მშვიდობისა საქართველო“

წაიკითხეთ სრულად