მედიაპორტალი MomsEdu.ge ტრადიციულ რუბრიკას - ენდოკრინოლოგის რეკომენდაციებს წარმოგიდგენთ. ამჯერად ენდოკრინოლოგი თინათინ კაჭარავა ბოლო დროს აქტუალურ თემაზე - ინტერვალურ შიმშილზე მოგაწვდით კომპეტენტურ ინფორმაციას. რა არის „ინტერვალური შიმშილი“, რას გულისხმობს კვების ეს ტიპი, რა დადებითი და უარყოფითი მხარეები აქვს მას და რეკომენდებულია თუ არა აღნიშნული კვების რეჟიმის დაცვა ყველასთვის, - სწორედ ამ საკითხებს შეიტყობთ დღევანდელი სტატიიდან.
„ინტერვალური შიმშილი“ ეს არის კვების ტიპი, რომელიც ყოველდღიურად უფრო და უფრო დიდი პოპულარობით სარგებლობს. ინტერვალური კვების სხვადასხვა სახეობა არსებობს, მაგრამ ჩვენ ამჯერად მის ყველაზე გავრცელებულ ვარიანტზე - 16-საათიან შიმშილზე ვისაუბრებთ. უფრო გასაგებად რომ ვთქვათ, ამ მეთოდის დროს ადამიანი დღისით 8 საათის განმავლობაში იკვებება, ხოლო შემდეგ 16 საათის განმავლობაში არაფერს არ მიირთმევს. ამ დროს ჩვენს ორგანიზმში ხდება ჰორმონალური ბალანსის აღდგენა, რითაც თავის მხრივ, ჩქარდება მეტაბოლიზმი და შენახული ცხიმი უფრო ხელმისაწვდომი ხდება გასახარჯად. დეტალურად: ორგანიზმში მატულობს ზრდის ჰორმონის დონე, რაც ხელს უწყობს ცხიმის წვას და კუნთური მასის მატებას. ორგანიზმში იკლებს ჰორმონ ინსულინის დონეც (ინსულინი აძლიერებს მადას და არის მაშენებელი ჰორმონი) და რეგულირდება მის მიმართ მგრძნობელობა, რაც თავის მხრივ ხელს უწყობს მეტაბოლიზმის მოწესრიგებას. „ინტერვალური შიმშილის“ დადებითი მხარეებია:
წონაში კლება, განსაკუთრებით, მუცლის არეში
ინსულინის მიმართ მგრძნობელობის აღდგენა
იმუნიტეტის ამაღლება
„ცუდი“ ქოლესტერინის დონის შემცირება
ანტი კანცეროგენული (კიბოს საწინააღმდეგო) პროცესების გააქტიურება
აღსანიშნავია ისიც, რომ კვების ასეთი რეჟიმის დროს იზრდება ადამიანის სიცოცხლის ხანგრძლივობაც.
რაც შეეხება უარყოფით მხარეებს, თუ კვებისთვის გამოყოფილ პერიოდში რაციონი მდიდარი არ არის ვიტამინებით და მინერალებით, შეიძლება, ამან ადამიანის ორგანიზმის გამოფიტვაც კი გამოიწვიოს. ამიტომ ძალიან მნიშვნელოვანია, რომ იმ 8 საათის განმავლობაში კვება იყოს ჯერადი, დაბალანსებული, მრავალფეროვანი და სასურველია, წახემსებების გარეშე. დაბალანსებული კვება თავის მხრივ რას გულისხმობს, მკითხველისთვის ჩვენი ყოველკვირეული რუბრიკის წინა თემაში უკვე დეტალურად განვმარტეთ. უნდა გვახსოვდეს, რომ დაბალანსებული კვება რეკომენდებულია ასევე დაკლებული კილოგრამების შესანარჩუნებლადაც, რადგან დაკლებული კილოგრამების ხელახლა დაბრუნების რისკს მინიმუმამდე ჯანსაღი ცხოვრების წესი ამცირებს.
თუმცა ორგანიზმში მიმდინარე დადებითი ცვლილებების მიუხედავად, „ინტერვალური შიმშილის“ კვების ტიპი არ არის ყველასთვის განკუთვნილი. მისი დაცვა არ არის რეკომენდებული ქალებისთვის, რომლებიც გეგმავენ ორსულობას, ან არიან ორსულად ან იმყოფებიან ლაქტაციის პერიოდში. ასევე არ არის რეკომენდებული იმ პაციენტებისთვის, რომელთაც ანამნეზში აქვს კვებითი დარღვევების რომელიმე ტიპი (ანორექსია, გადაჭარბებული კვება ან ბულიმია, ნევროზი) ან მათ, ვისაც დიაგნოსტირებული აქვთ შაქრიანი დიაბეტი. „ინტერვალური შიმშილს“ რეჟიმს უნდა მოერიდონ ასევე დაბალი წნევის მატარებლები და კუჭ-ნაწლავის ტრაქტის გამოხატული დაავადებების მქონე ადამიანები. მაგალითად, თუ ამ კვების რეჟიმის დაცვის დროს წარმოიქმნა განსაკუთრებული დისკომფორტი კუჭ-ნაწლავის ტრაქტში, როგორიცაა: გულისრევა, შებერილობა, კუჭის ტკივილი, ტკივილის შეგრძნება ნაღვლის ბუშტის საპროექციო არეში, რეკომენდებულია „ინტერვალური შიმშილის“ შეწყვეტა. გარდა ამისა, უკუჩვენებად ითვლება ბავშვთა და მოზარდთა ასაკი.
უნდა გვახსოვდეს, რომ ყველა ორგანიზმი არის ინდივიდუალური და გააჩნია მისთვის დამახასიათებელი ნივთიერებათა ცვლა, ამიტომ აუცილებელია აღინიშნოს, რომ ნებისმიერი კვების ტიპის არჩევისას რეკომენდებულია ორგანიზმის ზოგადი მდგომარეობის შეფასება, რათა წონაში კლების პროცესი სწორად წარიმართოს და ამით ორგანიზმს ზიანი არ მიადგეს.
,,ალკოჰოლის მოხმარებით ხელოვნურად ვიწვევთ ორგანიზმის გამოფიტვას" - დავით ვადაჭკორია
,,მშობელს რაც შეეხება, ყოველთვის შემწყნარებლური დამოკიდებულება, რომ ბავშვია, რა მოხდა, ყველა ასე ერთობა, მეც ასე ვიყავი - ეს, სამწუხაროდ, არის ძალიან მძიმე დანაშაული მოზარდის წინაშე - როდესაც სარისკო ქცევას ყურადღების გარეშე ტოვებს მშობელი. ეს შეიძლება, მას მომავალში ყოველთვის ძვირად დაუჯდეს", - ამის შესახებ ნარკოლოგმა, პროფესორმა დავით ვადაჭკორიამ ,,პირველი არხის" გადაცემაში ,,პირადი ექიმი მარი მალაზონია" ისაუბრა.
,,აქედან გამომდინარე, მშობელს უნდა ახსოვდეს, რომ როდესაც მოზარდთან გვაქვს საქმე, როდესაც ჯერ კიდევ ჩამოუყალიბებელ ცენტრალურ ნერვულ სისტემასთან გვაქვს საქმე, ნებისმიერი ზედმეტი დატვირთვა, ნებისმიერი ზედმეტი დარტყმა ცენტრალურ ნერვულ სისტემაზე, იწვევს ისეთ ფსიქიკურ, ფსიქოლოგიურ პრობლემებს, რომლებიც შესაძლოა, წლების განმავლობაში ვერ ვმართოთ და მივიღოთ მძმე შედეგები.
რა არის ალკოჰოლი, რა ხდება ალკოჰოლის მოხმარების შემთხვევაში მოზარდთან მიმართებით - ის იწვევს ბედნიერების ჰორმონის ხელოვნურ განლევას, მოზარდს ხდის მიდრეკილს დეპრესიული აშლილობების მიმართ. ალკოჰოლი და დეპრესია ძალიან მჭიდრო კავშირშია ერთმანეთთან. დღეს მსოფლიო მოსახლეობის 7-8 %, განსაკუთრებით, კორონაინფექციის შემდეგ, იტანჯება დეპრესიით. ალკოჰოლის მოხმარებით ხელოვნურად ვიწვევთ ორგანიზმის გამოფიტვას, ორგანიზმი კი უფრო ხშირად გვთხოვს ალკოჰოლის მიღებას, რათა ბალანსი შევავსოთ. აქედან გამომდინარე, ყოველთვის უნდა გვახსოვდეს, რომ ჩვენ დარტყმებს ვაყენებთ ისეთ ცენტრებს, რომლებმაც შესაძლოა, შემდგომ პერიოდში სერიოზული პრობლემები შეუქმნას ახალგაზრდას", - აღნიშნა ვადაჭკორიამ.
