როგორია D ვიტამინის პროფილაქტიკური დოზა ზრდასრულებსა და ბავშვებში? - აღნიშნულ თემაზე ბავშვთა ენდოკრინოლოგმა ნინო ხელაძემ საქართველოს პირველი არხის გადაცემაში „პირადი ექიმი - მარი მალაზონია“ ისაუბრა.
,,D ვიტამინი არ არის მხოლოდ ვიტამინი, ეს არის მნიშვნელოვანი ჰორმონი, რომელიც ადრე ეგონათ, რომ მხოლოდ ძვლის და კალციუმისთვის იყო აუცილებელი, თუმცა ახლა დამტკიცდა, რომ მას აქვს ძალიან მნიშვნელოვანი როლი იმუნური სისტემის გაძლიერებისთვის, ალერგიების პრევენციისთვის, სიმსუქნის შემთხვევაში, გულსისხლძარღვთა სისტემის და დიაბეტის პრევენციისთვის (პირველი ტიპის დიაბეტის პრევენციისთვისაც კი), ონკოლოგიური დაავადებების საწინააღმდეგოდ და ბევრი სხვა. აღმოჩნდა, რომ D ვიტამინის რეცეპტორები თავის ტვინშიც კი არის. ამიტომ ყველა უჯრედისა და ორგანოთა სისტემისთვის არის ძალიან აუცილებელი.
ჩვენთან არის სახელმწიფო გაიდლაინი, სტანდარტი, რომლის მიხედვითაც ყველა ბავშვმა, არა აქვს მნიშვნელობა ძუძუთი იკვებება, თუ ხელოვნურზეა, ორ წლამდე უნდა მიიღოს D ვიტამინის პროფილაქტიკური დოზა, 2 წლის შემდეგ, მათ შორის მოზრდილების ჩათვლით, მნიშვნელოვანია და უკვე აქტუალური ხდება, რომ D ვიტამინი მივიღოთ სეზონურად, როცა მზე ვერ იქნება ამ ვიტამინის აქტიური წყარო.
არის გარკვეული საკვები, რომელიც შეგვივსებს მის დანაკლისს, თუმცა ეს საკმაოდ რთულია, რადგან ამ საკვების დიდი რაოდენობით მიღებაა საჭირო. მაგალითად, 10-15 კვერცხი უნდა მიიღოს ბავშვმა, რომ შეივსოს იმ დღის ნორმა D ვიტამინი, რაც წარმოუდგენელია. ამიტომ ხდება აქტუალური, რომ დანამატის სახით მიიღოს ბავშვმა ასაკის გათვალისწინებით შერჩეული დოზა. ეს ეხება ყველა ჯანმრთელ ბავშვს სეზონურად,'' - აღნიშნა ნინო ხელაძემ.
,,გახშირებული სუნთქვა, ცხვირ-ტუჩის გარშემო სილურჯე, ძილიანობა - ყველაფერი ეს მძიმე მდგომარეობის მანიშნებელია" - ივანე ჩხაიძე
არსებული ვირუსების პირობებში, რა შემთხვევაში უნდა მიმართოს მშობელმა ექიმს და როდის არის საჭირო მცირეწლოვანის გადაყვანა კლინიკაში - ამის შესახებ პედიატრმა, ივანე ჩხაიძემ ,,შუადღის" ეთერში საუბრისას განმარტა.
,,5 წლამდე ასაკობრივ ჯგუფში უფრო დიდი რისკით გამოირჩევა ორ წლამდე ასაკი. რაც უფრო მცირეა ბავშვის ასაკი, მით უფრო მეტია გართულებების რისკი. 5 წლამდე ასაკის შემთხვევაში, აუცილებლად, მაღალი ტემპერატურის პირველივე დღიდანვე საჭიროა ექიმის ჩართვა ბავშვის მართვის პროცესში. ექიმმა უნდა გადაწყვიტოს, მან უნდა შეაფასოს. ეს არ უნდა იყოს სატელეფონო საუბარი. აუცილებლად უნდა მოხდეს ბავშვის გასინჯვა. ყველაზე მეტად ჩვენ რისიც გვეშინია, ეს არის ფილტვების ანთება. ამ დიაგნოზის დასმა გარკვეული მანძილის პირობებში შეუძლებელია. ამიტომ, ფილტვების მოსმენა, სატურაციის შეფასება და ა.შ. არის მართლაც აუცილებელი, განსაკუთრებით - 2 წლამდე ასაკის ბავშვებისთვის. აქ უკვე საკითხი ხდება მნიშვნელოვანია - არის თუ არა საჭირო ბავშვის გადაყვანა საჭირო სამედიცინო დაწესებულებაში. მაგალითად, 15 წლის ბავშვის მართვა, უმეტესად, შესაძლებელია სახლის პირობებში - იქნება ეს ტემპერატურის კონტროლი თუ სხვა. მაგრამ თუ ბავშვი მცირე ასაკის არის, უმჯობესია, შეაფასოს ექიმმა. სითხის მიღების შეუძლებლობა - და არა საკვების, ძალიან გახშირებული სუნთქვა, ცხვირ-ტუჩის გარშემო სილურჯე, ძილიანობა - ყველაფერი ეს მძიმე მდგომარეობის მანიშნებელია. ამ ნიშნების შემთხვევაში, პირდაპირ უნდა მიმართოთ კლინიკას", - აღნიშნა ჩხაიძემ.