როგორია D ვიტამინის პროფილაქტიკური დოზა ზრდასრულებსა და ბავშვებში? - აღნიშნულ თემაზე ბავშვთა ენდოკრინოლოგმა ნინო ხელაძემ საქართველოს პირველი არხის გადაცემაში „პირადი ექიმი - მარი მალაზონია“ ისაუბრა.
,,D ვიტამინი არ არის მხოლოდ ვიტამინი, ეს არის მნიშვნელოვანი ჰორმონი, რომელიც ადრე ეგონათ, რომ მხოლოდ ძვლის და კალციუმისთვის იყო აუცილებელი, თუმცა ახლა დამტკიცდა, რომ მას აქვს ძალიან მნიშვნელოვანი როლი იმუნური სისტემის გაძლიერებისთვის, ალერგიების პრევენციისთვის, სიმსუქნის შემთხვევაში, გულსისხლძარღვთა სისტემის და დიაბეტის პრევენციისთვის (პირველი ტიპის დიაბეტის პრევენციისთვისაც კი), ონკოლოგიური დაავადებების საწინააღმდეგოდ და ბევრი სხვა. აღმოჩნდა, რომ D ვიტამინის რეცეპტორები თავის ტვინშიც კი არის. ამიტომ ყველა უჯრედისა და ორგანოთა სისტემისთვის არის ძალიან აუცილებელი.
ჩვენთან არის სახელმწიფო გაიდლაინი, სტანდარტი, რომლის მიხედვითაც ყველა ბავშვმა, არა აქვს მნიშვნელობა ძუძუთი იკვებება, თუ ხელოვნურზეა, ორ წლამდე უნდა მიიღოს D ვიტამინის პროფილაქტიკური დოზა, 2 წლის შემდეგ, მათ შორის მოზრდილების ჩათვლით, მნიშვნელოვანია და უკვე აქტუალური ხდება, რომ D ვიტამინი მივიღოთ სეზონურად, როცა მზე ვერ იქნება ამ ვიტამინის აქტიური წყარო.
არის გარკვეული საკვები, რომელიც შეგვივსებს მის დანაკლისს, თუმცა ეს საკმაოდ რთულია, რადგან ამ საკვების დიდი რაოდენობით მიღებაა საჭირო. მაგალითად, 10-15 კვერცხი უნდა მიიღოს ბავშვმა, რომ შეივსოს იმ დღის ნორმა D ვიტამინი, რაც წარმოუდგენელია. ამიტომ ხდება აქტუალური, რომ დანამატის სახით მიიღოს ბავშვმა ასაკის გათვალისწინებით შერჩეული დოზა. ეს ეხება ყველა ჯანმრთელ ბავშვს სეზონურად,'' - აღნიშნა ნინო ხელაძემ.
რა იწვევს სიმძიმის შეგრძნებას ფეხებში და როგორ ავირიდოთ პრობლემის გამწვავება თავიდან? - გიორგი ღორობერიძის რჩევები
ექიმმა გიორგი ღოღობერიძემ ფეხებში სიმძიმის შეგრძნების პრობლემასა და მისი მოგვარების გზებზე ისაუბრა:
„ეს ძალიან შემაწუხებელი ჩივილია, რომელიც განსაკუთრებით თვალშისაცემი ხდება საღამოს საათებში. მიხვალ სახლში, გეგონება ფეხებზე ორკილოგრამიანი სიმძიმე გაქვს მობმულიო. როგორც კი წამოწვები უკვე გრძნობ შვების განცდას. რა შეიძლება იყოს ქვედა კიდურებში სიმძიმის მიზეზი? პირველი ეს არის მდედრობითი სქესი. ქალების შემთხვევაში ეს პრობლემა ხშირია. ამის მიზეზი უნდა იყოს ჰორმონი ესტროგენი. როდესაც ორგანიზმში ესტროგენის ჰორმონის შემცველობა იკლებს, სისხლძარღვების კედლები თხელდება, სარქვლები უფრო მიდრეკილი ხდება დაზიანებისკენ და ვითარდება ქვედა კიდურებში სიმძიმის გრძნობა.“
გიორგი ღოღობერიძის თქმით, ფეხებში სიმძიმის შეგრძნებას ასაკის მატებაც იწვევს:
„მეორე მიზეზი შეიძლება იყოს ასაკი. 50 წელს ზემოთ ადამიანებში ასაკის გამო ვენების კედლები სუსტდება და სისხლისთვის ქვედა კიდურებში დაგუბება იოლია, ამიტომ ადამიანს აქვს სერიოზული სიმძიმის განცდა. მესამე მიზეზი შეიძლება იყოს მწეველობა. მეოთხე მიზეზი არის ხანგრძლივად ფეხზე დგომა და ხანგრძლივი ჯდომა. კიდევ ერთი მიზეზი შეიძლება იყოს ძალიან მაღალქუსლიანი ფეხსაცმელი. როდესაც ადამიანი დგას ძალიან მაღალქუსლიან ფეხსაცმელზე, კანჭის კუნთები ძალიან დაჭიმულია. ამავე პრობლემის წინაშე არიან ის ადამიანები, რომლებსაც აცვიათ უქუსლო ფეხსაცმელი.“
„ვენური უკმარისობა შეიძლება გართულდეს ტროპიკული წყლულებით. ეს წყლულები ძალიან პრობლემურია, იმიტომ, რომ მათი განკურნება ძალიან, ძალიან რთულია. ძალიან ბევრს ასევე აწუხებს კრუნჩხვები ქვედა კიდურებში. ეს მდგომარეობა ქირურგამდე რომ არ მივიყვანოთ, ამიტომ რამოდენიმე წესი დავიცვათ. პირველი და მნიშვნელოვანი არის წონის კორექცია, მეორე არის მოწევისთვის თავის დანებება ან მაქსიმალურად შემცირება. თუ ხანგრძლივად ვდგავართ ფეხზე, შევეცადოთ, რომ ვიმოძრაოთ. ამერიკელებს აქვთ ასეთი ჩვევა, თუ მათ უწევთ ფეხზე დგომა, ისინი ყოველ ნახევარ საათში იწყებენ ათწუთიან ვარჯიშებს. ქალები უნდა მოერიდონ ძალიან მოტკეცილ ტანსაცმელს, ძალიან მაღალქუსლიან ან უქუსლო ფეხსაცმელს. ბოლო რჩევა იქნება ის, რომ როდესაც მივალთ სახლში, დაწოლის დროს ქვედა კიდურები გვქონდეს უფრო მაღლა, ვიდრე გვაქვს გული,“ - აღნიშნულ საკითხზე გიორგი ღოღობერიძემ ტელეკომპანია „მთავარი არხის“ გადაცემაში „მთავარი დიაგნოზი“ ისაუბრა.
