Baby Bag

კითხვები, რომლებიც ვაქცინაციამდე უნდა დაისვას - ნანა გეგეჭკორისა და ზურაბ გურულის რეკომენდაციები

კითხვები, რომლებიც ვაქცინაციამდე უნდა დაისვას - ნანა გეგეჭკორისა და ზურაბ გურულის რეკომენდაციები
ექიმები ნანა გეგეჭკორი და ზურაბ გურული, რომლებიც ამერიკაში მოღვაწეობენ, საქართველოში ვაქცინაციასთან დაკავშირებით სოციალურ ქსელში საინფორმაციო პოსტს აქვეყნებენ, რომელსაც ​MomsEdu.ge უცვლელად გთავაზობთ:

,,საქართველოში ვაქცინაციის პროცესთან ამჟამად მიმდინარე მოვლენებთან დაკავშირებით ჩვენ, ნანა გეგეჭკორმა და ზურაბ გურულმა, გადავწყვიტეთ საჯაროდ გამოგვეხატა ჩვენი აზრი და შემოგვეთავაზებინა სპეციალური რჩევა-რეკომენდაცია.

მოგეხსენებათ, მედიცინის განვითარების ისტორიაში არაერთი ფაქტია ცნობილი, როდესაც ტრაგიკულმა შემთხვევითობამ და მისგან გამოტანილმა სწორმა ანალიზმა უამრავი ადამიანის სიცოცხლე იხსნა. ასეთი იყო მაგალითად 2001 წელს, მსოფლიოს ერთ-ერთ ყველაზე პრესტიჟულ კლინიკაში, ჯონს ჰოპკინსის ჰოსპიტალში მომხდარი შემთხვევა, როდესაც სამედიცინო პერსონალს შორის არასრულყოფილი კომუნიკაციის გამო წლინახევრის პატარა, ჯოზი კინგი დაიღუპა. ამ შემთხვევამ არაერთი სპეციალური პროტოკოლისა და გზამკვლევის განვითარებას მისცა დასაბამი, რამაც ამერიკული კლინიკების უსაფრთხოების სისტემა არსებითად შეცვალა. ასე ვითარდება მსოფლიო მედიცინა და ასე მოქმედებენ ცივილიზებული ქვეყნების პროფესიონალები.

საქართველო და ქართული მედიცინა ამჟამად მნიშვნელოვანი გამოწვევის წინაშე დგას. კორონა-პანდემიამ არაერთი ადამიანის სიცოცხლე იმსხვერპლა და კიდევ იმსხვერპლებს. მსოფლიოს წამყვანი ქვეყნების უნივერსალური შეთანხებითა და უპირობო კონსენსუსით, ვაქცინაცია არის მიჩნეული პანდემიის დამარცხებისა და დარღვეული სოციალური, ეკონომიკური და პოლიტიკური ბალანსის აღსადგენ უმთავრეს იარაღად.

ვაქცინაციის პროცესი მრავალი ობიექტური თუ სუბიექტური მიზეზის გამო საქართველოში მნიშვნელოვანი პრობლემებით დაიწყო. ამ პროცესის დაყოვნებას, არასრულყოფილად წარმართვას და ჩაშლას უზარმაზარი უარყოფითი შედეგის მოტანა შეუძლია ქვეყნისათვის, რაც არაერთი ადამიანის სიცოცხლეს, ჯანმრთელობასა და სოციალურ კეთილდღეობას შეიწირავს.

მოგეხსენებათ, საქართველოში ამჟამად შემოტანილ „ასტრაზენეკას“ ვაქცინას უკავშირებენ თრომბოზების გარკვეულ რისკს; მიუხედავად იმისა, რომ ობიექტური მონაცემების თანახმად, ჯერჯერობით ეს ვერ დამტკიცდა, რაც ევროპის წამლების სააგენტომ ოფიციალურად დაადასტურა. შესაბამისად, ვაქცინაციის პროცესი განახლდა ევროპის წამყვან ქვეყნებში. ქართულ მედიაში უკვე გაჟღერდა ინფორმაცია, რომ საქართველოში მომხდარ ტრაგიკულ შემთხვევას გარკვეული კავშირი ჰქონდა თრომბოზულ გართულებასთან, რაც თავისთავად იძლევა მითქმა-მოთქმისა და ვაქცინაციის მიმართ შიშის საფუძველს. ამ შემთხვევის ობიექტურ, გამჭვირვალე გამოძიებას უდიდესი მნიშვნელობა აქვს და ექნება საქართველოსათვის, რადგან სწორად გაკეთებული ექსპერტ-ანალიზი და დასკვნები პოტენციურად არაერთი ადამიანის სიცოცხლესა და ჯანმრთელობას იხსნის.

მანამ კი, სანამ საბოლოო დასკვნა დაიდება, არსებული მონაცემების გათვალისწინებითა და გაანალიზებით ჩვენ ვთვლით, რომ პრევაქცინაციურ სკრინინგს უნდა დაემატოს რამდენიმე მნიშვნელოვანი შეკითხვა, რაც შესაძლებლობას მოგვცემს წინასწარ გამოვყოთ მაღალი პროთრომბოზული რისკების მქონე ადამიანები და მათი ვაქცინაცია ამ რისკების გათვალისწინებით დაიგეგმოს. ცხადია, პროთრომბოზული რისკ-ფაქტორების არსებობა არ ნიშნავს, რომ ადამიანთა ამ ჯგუფის აცრა არ შეიძლება. უფრო პირიქით, ვინაიდან თავად კორონა-ვირუსი ატარებს თრომბოზების ძალიან მაღალ რისკს და მისი პრევენცია განსაკუთრებით მნიშვნელოვანია პაციენტთა აღნიშნულ სპექტრში. ასეთ შემთხვევებში რისკების წინასწარ ცოდნა და გათვლა მათ ადექვატურ მართვაში დაგვეხმარება. საბედნიეროდ, მსგავსი რისკ-ფაქტორები პოპულაციის მხოლოდ ძალიან მცირე ნაწილს აღენიშნება და მათზე ინდივიდუალურად მორგებული გადაწყვეტილებები დაგვიცავს თუნდაც უკიდურესად იშვიათი უბედური შემთხვევებისგან.

პროთრომბოზული რისკებიდან განსაკუთრებული მნიშვნელობა აქვს სისხლის შედედების ფაქტორებში არსებული მუტაციების შედეგად განვითარებულ პათოლოგიებს, რომელთა შესახებაც ადამიანმა შეიძლება მხოლოდ მაშინ შეიტყოს, როცა პირველი თრომბოზული გართულება მოხდება. მათი ამოცნობა სპეციალური კვლევების გარეშე შეუძლებელია, თუმცა, ანამნეზიდან ამოკრეფილი დეტალებით დროულად ეჭვის მიტანა და შესაძლო გართულებების თავიდან აცილება სრულიად რეალურია.

მაღალი პროთრომბოზული რისკებით გამოირჩევიან:
• ანტიფოსპოლიპიდური სინდრომი
• შედედების მეხუთე ფაქტორის (ლეიდენის) მუტაცია
• „C“ პროტეინის დეფიციტი
• „S“ პროტეინის დეფიციტი
• ანტითრომბინის დეფიციტი
• ავთვისებიანი სიმსივნეები
• ჩანაცვლებითი ჰორმონული თერაპია
• ჩასახვის საწინააღმდეგო მედიკამენტები
• იმობილიზაცია
ცხადია, ვაქცინაციის წინ ყველა ამ დაავადებებზე კვლევების ჩატარება საჭირო არ არის. სამაგიეროდ, შესაძლებელია ვაქცინაციის პროცესისათვის შექმნილ კითხვარს დაემატოს რამდენიმე მნიშვნელოვანი შეკითხვა, რაც დაგვეხმარება შესაძლო თრომბოზული გართულების რისკების მქონე ადამიანების წინასწარ გამოცნობაში და შესაბამისი ზომების მიღებაში.

ჩვენი აზრით, პრევაქცინაციურ სკრინინგს უნდა დაემატოს შემდეგი კითხვები:

1. ხომ არ გაქვთ ვენური და არტერიული თრომბოზების პერსონალური ისტორია?

2. ქალებში - ხომ არ გქონდათ წარსულში სპონატანური აბორტის ისტორია? (სპონტანური აბორტები ხშირად მიუთითებს ჰიპერკოაგულაციური რისკების მაღალ ალბათობაზე)

3. ქალებში - ხომ არ იტარებთ ჩასახვის საწინააღმდეგო ჰორმონულ თერაპიას ?

4. ხომ არ იტარებთ ჩანაცვლებით ჰორმონულ თერაპიას (იგულისხმება ნაადრევი მენოპაუზისას გამოყენებული ჰორმონული თერაპია)?

5. ხომ არ გაქვთ დადგენილი ავთვისებიანი სიმსივნე და იტარებთ თუ არა ქიმიოთერაპიას ამჟამად? (წარსულში მსგავსი პრობლემა, რომელიც ამჟამად რემისიაშია, რისკ-ფაქტორს არ წარმოადგენს).

6. უახლოესი პერიოდის განმავლობაში ხომ არ იყავით იმობილიზირებული რაიმე მიზეზით? (ტრავმა, ქირურგიული ჩარევა, ჰოსპიტალიზაცია)

7. ხომ არ გაქვთ სისხლის უკვე ცნობილი თანდაყოლილი პათოლოგიები? (ანტიფოსფოლიპიდური სინდრომი, ლეიდენის შედედების მეხუთე ფაქტორის მუტაცია, „C“ პროტეინის დეფიციტი, „S“ პროტეინის დეფიციტი, ანტითრომბინის დეფიციტი).

ამ შეკითხვებზე დადებითი პასუხების შემთხვევაში, ასაცრელი პირი შეიძლება (და უნდა) დამატებით გამოიკითხოს თრომბოზული რისკების შემცველი დაავადებების კლინიკურ გამოვლინებებზე და მხოლოდ ინდივიდუალურად მორგებული გადაწყვეტილების საფუძველზე, განსაკუთრებული სიფრთხილის დაცვით დაიგეგმოს მათი ვაქცინაცია,'' - აღნიშნავენ ნანა გეგეჭკორი და ზურაბ გურული. 


არ დაგავიწყდეთ !!!

Momsedu.ge-მ თქვენთვის, ქალებისთვის შექმნა ახალი სივრცე, სადაც ყველაზე მცოდნე დედები იყრიან თავს. ჯგუფის დასახელებაც სწორედ ასეა - „მცოდნე დედების ჯგუფი“, რომლის საშუალებით დედები ერთმანეთს საკუთარ გამოცდილებას გაუზიარებენ. (ჯგუფში გასაწევრიანებლად ნახეთ ბმული - „მცოდნე დედების ჯგ​უფი“)

შეიძლება დაინტერესდეთ

კორონავირუსის სიმპტომების გამოვლენის შემთხვევაში იბუპროფენი არ მიიღოთ - ჯანდაცვის მსოფლიო ორგანიზაციის ოფიციალური რეკომენდაცია

კორონავირუსის სიმპტომების გამოვლენის შემთხვევაში იბუპროფენი არ მიიღოთ - ჯანდაცვის მსოფლიო ორგანიზაციის ოფიციალური რეკომენდაცია
ჯანდაცვის მსოფლიო ორგანიზაციის ახალი ოფიციალური რეკომენდაციის მიხედვით, ადამიანებმა, რომლებსაც კორონავირუსის სიმპტომები გამოუვლინდებათ, იბუპროფენი არ უნდა მიიღონ. აღნიშნულ რეკომენდაციას წინ უძღოდა საფრანგეთის ჯანდაცვის სამინისტროს განცხადება. ფრანგი მედიკოსები ვარაუდობენ, რომ იბუპროფენის მიღებას პაციენტებში კორონავირუსის მიმდინარეობის დამძიმება შეუძლია.

საფრანგეთის ჯანდაცვის მინისტრმა, ოლივერ ვერანმა გამაფრთხილებელი განცხადება სამედიცინო ჟურნალ „The Lancet”-ში გამოქვეყნებულ კვლევაზე დაყრდნობით გააკეთა. უახლესი კვლევით დადგინდა, რომ იბუპროფენის მიღება ორგანიზმში ფერმენტებს ააქტიურებს, რომლებიც Covid-19-ის განვითარების პოტენციურ ხელშემწყობად გვევლინებიან.

არ დაგავიწყდეთ !!!

Momsedu.ge-მ თქვენთვის, ქალებისთვის შექმნა ახალი სივრცე, სადაც ყველაზე მცოდნე დედები იყრიან თავს. ჯგუფის დასახელებაც სწორედ ასეა - „მცოდნე დედების ჯგუფი“, რომლის საშუალებით დედები ერთმანეთს საკუთარ გამოცდილებას გაუზიარებენ. (ჯგუფში გასაწევრიანებლად ნახეთ ბმული - „მცოდნე დედების ჯგუფი“)


ჯანდაცვის მსოფლიო ორგანიზაციის პრესსპიკერის კრისტიან ლინდმაიერის განცხადებით ექსპერტები აღნიშნულ საკითხთან დაკავშირებით უახლესი რეკომენდაციების შემუშავებაზე აქტიურად მუშაობენ. ლინდმაიერის თქმით, უმჯობესია, თუ ადამიანები თვითმკურნალობისას იბუპროფენის ნაცვლად უპირატესობას პარაცეტამოლს მიანიჭებენ. პრესსპიკერმა ისიც აღნიშნა, რომ მედიკოსებს პაციენტებისთვის იბუპროფენის გამოწერის უფლება კვლავ აქვთ და მსგავსი გადაწყვეტილებები მათ თავად უნდა მიიღონ.

ლინდმაიერის ჟურნალისტებთან საუბარს წინ უძღოდა საფრანგეთის ჯანდაცვის მინისტრის, ოლივერ ვერანის პოსტი, რომელიც მან ტვიტერზე გამოაქვეყნა. ვერანი ადამიანებს ურჩევს, რომ ტემპერატურის მატების შემთხვევაში პარაცეტამოლი დალიონ, რადგან იბუპროფენი და სხვა ანთების საწინააღმდეგო პრეპარატები, შესაძლოა, კორონავირუსით დაავადებული ადამიანების ჯანმრთელობის მდგომარეობისთვის დამამძიმებელ ფაქტორად იქცეს.

საფრანგეთის ჯანდაცვის მინისტრი იმ ადამიანებს, რომლებმაც სიცხის დასაწევად იბუპროფენი უკვე გამოიყენეს, ექიმისთვის დაუყოვნებლივ მიმართვისკენ მოუწოდებს. აუცილებელია, რომ პარაცეტამოლის მიღებისას ნებადართულ დოზას არ გადააჭარბოთ, რადგან აღნიშნული პრეპარატის ჭარბი დოზებით მიღება ღვიძლს მნიშვნელოვნად აზიანებს.

კორონავირუსი პაციენტების უმრავლესობაში მსუბუქი სიმპტომებით მიმდინარეობს. გართულების შემთხვევაში კი ის პნევმონიას და ორგანოთა უკმარისობას იწვევს, რაც ფატალური შედეგით სრულდება.

საფრანგეთის ჯანდაცვის სამინისტრო იბუპროფენის მოხმარების წინააღმდეგ კორონავირუსის გავრცელებამდეც გამოდიოდა. სამინისტროს წარმომადგენლების თქმით, იბუპროფენი და მისი სხვადასხვა ბრენდული ვარიაცია (ნუროფენი, ადვილი ) სერიოზულ ინფექციურ გართულებებს იწვევს.

ნუროფენის მწარმოებელი ბრიტანული ფარმაცევტული კომპანიის Reckitt Benckiser-ის წარმომადგენლის განცხადებით, კორონავირუსის სიმპტომების სამკურნალოდ ანთების საწინააღმდეგო სტეროიდული და არასტეროიდული მედიკამენტების გამოყენებასთან დაკავშირებული საფრთხეების შესახებ გავრცელებული ინფორმაცია მათთვის სიახლეს არ წარმოადგენს.

„მომხმარებლის უსაფრთხოებაზე ზრუნვა ჩვენი უმთავრესი პრიორიტეტია. იბუპროფენი ძლიერი პრეპარატია, რომელსაც ბოლო 30 წლის მანძილზე ადამიანები სიცხის დამწევი და ტკივილგამაყუჩებელი მოქმედების გამო ძალიან ხშირად იყენებენ, მათ შორის ვირუსული ინფექციებით დაინფიცირების დროსაც. არ არსებობს რაიმე სახის მეცნიერული მტკიცებულება, რომელზე დაყრდნობითაც კორონავირუსის სიმპტომების გამოვლენის შემთხვევაში იბუპროფენის გამოყენებას უნდა მოერიდოთ.“ - ნათქვამია Reckitt Benckiser-ის ოფიციალურ განცხადებაში. კომპანიის წარმომადგენელმა ასევე აღნიშნა, რომ Reckitt Benckiser-ს ჯანდაცვის მსოფლიო ორგანიზაციასთან რეგულარული კავშირი აქვს, რათა აღნიშნულ საკითხთან დაკავშირებით ყველა დეტალი სიღრმისეულად შეისწავლოს. ორგანიზაციის მფლობელები გვარწმუნებენ, რომ უახლოეს მომავალში მათი პროდუქტის უსაფრთხო გამოყენების შესახებ დამატებით რეკომენდაციებს აუცილებლად მოგვაწვდიან. 

მომზადებულია ​sciencealert.com-ის მიხედვით
თარგმნა ია ნაროუშვილმა 
წაიკითხეთ სრულად