Baby Bag

კითხვები, რომლებიც ვაქცინაციამდე უნდა დაისვას - ნანა გეგეჭკორისა და ზურაბ გურულის რეკომენდაციები

კითხვები, რომლებიც ვაქცინაციამდე უნდა დაისვას - ნანა გეგეჭკორისა და ზურაბ გურულის რეკომენდაციები
ექიმები ნანა გეგეჭკორი და ზურაბ გურული, რომლებიც ამერიკაში მოღვაწეობენ, საქართველოში ვაქცინაციასთან დაკავშირებით სოციალურ ქსელში საინფორმაციო პოსტს აქვეყნებენ, რომელსაც ​MomsEdu.ge უცვლელად გთავაზობთ:

,,საქართველოში ვაქცინაციის პროცესთან ამჟამად მიმდინარე მოვლენებთან დაკავშირებით ჩვენ, ნანა გეგეჭკორმა და ზურაბ გურულმა, გადავწყვიტეთ საჯაროდ გამოგვეხატა ჩვენი აზრი და შემოგვეთავაზებინა სპეციალური რჩევა-რეკომენდაცია.

მოგეხსენებათ, მედიცინის განვითარების ისტორიაში არაერთი ფაქტია ცნობილი, როდესაც ტრაგიკულმა შემთხვევითობამ და მისგან გამოტანილმა სწორმა ანალიზმა უამრავი ადამიანის სიცოცხლე იხსნა. ასეთი იყო მაგალითად 2001 წელს, მსოფლიოს ერთ-ერთ ყველაზე პრესტიჟულ კლინიკაში, ჯონს ჰოპკინსის ჰოსპიტალში მომხდარი შემთხვევა, როდესაც სამედიცინო პერსონალს შორის არასრულყოფილი კომუნიკაციის გამო წლინახევრის პატარა, ჯოზი კინგი დაიღუპა. ამ შემთხვევამ არაერთი სპეციალური პროტოკოლისა და გზამკვლევის განვითარებას მისცა დასაბამი, რამაც ამერიკული კლინიკების უსაფრთხოების სისტემა არსებითად შეცვალა. ასე ვითარდება მსოფლიო მედიცინა და ასე მოქმედებენ ცივილიზებული ქვეყნების პროფესიონალები.

საქართველო და ქართული მედიცინა ამჟამად მნიშვნელოვანი გამოწვევის წინაშე დგას. კორონა-პანდემიამ არაერთი ადამიანის სიცოცხლე იმსხვერპლა და კიდევ იმსხვერპლებს. მსოფლიოს წამყვანი ქვეყნების უნივერსალური შეთანხებითა და უპირობო კონსენსუსით, ვაქცინაცია არის მიჩნეული პანდემიის დამარცხებისა და დარღვეული სოციალური, ეკონომიკური და პოლიტიკური ბალანსის აღსადგენ უმთავრეს იარაღად.

ვაქცინაციის პროცესი მრავალი ობიექტური თუ სუბიექტური მიზეზის გამო საქართველოში მნიშვნელოვანი პრობლემებით დაიწყო. ამ პროცესის დაყოვნებას, არასრულყოფილად წარმართვას და ჩაშლას უზარმაზარი უარყოფითი შედეგის მოტანა შეუძლია ქვეყნისათვის, რაც არაერთი ადამიანის სიცოცხლეს, ჯანმრთელობასა და სოციალურ კეთილდღეობას შეიწირავს.

მოგეხსენებათ, საქართველოში ამჟამად შემოტანილ „ასტრაზენეკას“ ვაქცინას უკავშირებენ თრომბოზების გარკვეულ რისკს; მიუხედავად იმისა, რომ ობიექტური მონაცემების თანახმად, ჯერჯერობით ეს ვერ დამტკიცდა, რაც ევროპის წამლების სააგენტომ ოფიციალურად დაადასტურა. შესაბამისად, ვაქცინაციის პროცესი განახლდა ევროპის წამყვან ქვეყნებში. ქართულ მედიაში უკვე გაჟღერდა ინფორმაცია, რომ საქართველოში მომხდარ ტრაგიკულ შემთხვევას გარკვეული კავშირი ჰქონდა თრომბოზულ გართულებასთან, რაც თავისთავად იძლევა მითქმა-მოთქმისა და ვაქცინაციის მიმართ შიშის საფუძველს. ამ შემთხვევის ობიექტურ, გამჭვირვალე გამოძიებას უდიდესი მნიშვნელობა აქვს და ექნება საქართველოსათვის, რადგან სწორად გაკეთებული ექსპერტ-ანალიზი და დასკვნები პოტენციურად არაერთი ადამიანის სიცოცხლესა და ჯანმრთელობას იხსნის.

მანამ კი, სანამ საბოლოო დასკვნა დაიდება, არსებული მონაცემების გათვალისწინებითა და გაანალიზებით ჩვენ ვთვლით, რომ პრევაქცინაციურ სკრინინგს უნდა დაემატოს რამდენიმე მნიშვნელოვანი შეკითხვა, რაც შესაძლებლობას მოგვცემს წინასწარ გამოვყოთ მაღალი პროთრომბოზული რისკების მქონე ადამიანები და მათი ვაქცინაცია ამ რისკების გათვალისწინებით დაიგეგმოს. ცხადია, პროთრომბოზული რისკ-ფაქტორების არსებობა არ ნიშნავს, რომ ადამიანთა ამ ჯგუფის აცრა არ შეიძლება. უფრო პირიქით, ვინაიდან თავად კორონა-ვირუსი ატარებს თრომბოზების ძალიან მაღალ რისკს და მისი პრევენცია განსაკუთრებით მნიშვნელოვანია პაციენტთა აღნიშნულ სპექტრში. ასეთ შემთხვევებში რისკების წინასწარ ცოდნა და გათვლა მათ ადექვატურ მართვაში დაგვეხმარება. საბედნიეროდ, მსგავსი რისკ-ფაქტორები პოპულაციის მხოლოდ ძალიან მცირე ნაწილს აღენიშნება და მათზე ინდივიდუალურად მორგებული გადაწყვეტილებები დაგვიცავს თუნდაც უკიდურესად იშვიათი უბედური შემთხვევებისგან.

პროთრომბოზული რისკებიდან განსაკუთრებული მნიშვნელობა აქვს სისხლის შედედების ფაქტორებში არსებული მუტაციების შედეგად განვითარებულ პათოლოგიებს, რომელთა შესახებაც ადამიანმა შეიძლება მხოლოდ მაშინ შეიტყოს, როცა პირველი თრომბოზული გართულება მოხდება. მათი ამოცნობა სპეციალური კვლევების გარეშე შეუძლებელია, თუმცა, ანამნეზიდან ამოკრეფილი დეტალებით დროულად ეჭვის მიტანა და შესაძლო გართულებების თავიდან აცილება სრულიად რეალურია.

მაღალი პროთრომბოზული რისკებით გამოირჩევიან:
• ანტიფოსპოლიპიდური სინდრომი
• შედედების მეხუთე ფაქტორის (ლეიდენის) მუტაცია
• „C“ პროტეინის დეფიციტი
• „S“ პროტეინის დეფიციტი
• ანტითრომბინის დეფიციტი
• ავთვისებიანი სიმსივნეები
• ჩანაცვლებითი ჰორმონული თერაპია
• ჩასახვის საწინააღმდეგო მედიკამენტები
• იმობილიზაცია
ცხადია, ვაქცინაციის წინ ყველა ამ დაავადებებზე კვლევების ჩატარება საჭირო არ არის. სამაგიეროდ, შესაძლებელია ვაქცინაციის პროცესისათვის შექმნილ კითხვარს დაემატოს რამდენიმე მნიშვნელოვანი შეკითხვა, რაც დაგვეხმარება შესაძლო თრომბოზული გართულების რისკების მქონე ადამიანების წინასწარ გამოცნობაში და შესაბამისი ზომების მიღებაში.

ჩვენი აზრით, პრევაქცინაციურ სკრინინგს უნდა დაემატოს შემდეგი კითხვები:

1. ხომ არ გაქვთ ვენური და არტერიული თრომბოზების პერსონალური ისტორია?

2. ქალებში - ხომ არ გქონდათ წარსულში სპონატანური აბორტის ისტორია? (სპონტანური აბორტები ხშირად მიუთითებს ჰიპერკოაგულაციური რისკების მაღალ ალბათობაზე)

3. ქალებში - ხომ არ იტარებთ ჩასახვის საწინააღმდეგო ჰორმონულ თერაპიას ?

4. ხომ არ იტარებთ ჩანაცვლებით ჰორმონულ თერაპიას (იგულისხმება ნაადრევი მენოპაუზისას გამოყენებული ჰორმონული თერაპია)?

5. ხომ არ გაქვთ დადგენილი ავთვისებიანი სიმსივნე და იტარებთ თუ არა ქიმიოთერაპიას ამჟამად? (წარსულში მსგავსი პრობლემა, რომელიც ამჟამად რემისიაშია, რისკ-ფაქტორს არ წარმოადგენს).

6. უახლოესი პერიოდის განმავლობაში ხომ არ იყავით იმობილიზირებული რაიმე მიზეზით? (ტრავმა, ქირურგიული ჩარევა, ჰოსპიტალიზაცია)

7. ხომ არ გაქვთ სისხლის უკვე ცნობილი თანდაყოლილი პათოლოგიები? (ანტიფოსფოლიპიდური სინდრომი, ლეიდენის შედედების მეხუთე ფაქტორის მუტაცია, „C“ პროტეინის დეფიციტი, „S“ პროტეინის დეფიციტი, ანტითრომბინის დეფიციტი).

ამ შეკითხვებზე დადებითი პასუხების შემთხვევაში, ასაცრელი პირი შეიძლება (და უნდა) დამატებით გამოიკითხოს თრომბოზული რისკების შემცველი დაავადებების კლინიკურ გამოვლინებებზე და მხოლოდ ინდივიდუალურად მორგებული გადაწყვეტილების საფუძველზე, განსაკუთრებული სიფრთხილის დაცვით დაიგეგმოს მათი ვაქცინაცია,'' - აღნიშნავენ ნანა გეგეჭკორი და ზურაბ გურული. 


არ დაგავიწყდეთ !!!

Momsedu.ge-მ თქვენთვის, ქალებისთვის შექმნა ახალი სივრცე, სადაც ყველაზე მცოდნე დედები იყრიან თავს. ჯგუფის დასახელებაც სწორედ ასეა - „მცოდნე დედების ჯგუფი“, რომლის საშუალებით დედები ერთმანეთს საკუთარ გამოცდილებას გაუზიარებენ. (ჯგუფში გასაწევრიანებლად ნახეთ ბმული - „მცოდნე დედების ჯგ​უფი“)

შეიძლება დაინტერესდეთ

სახლიდან ეფექტურად მუშაობის 5 ოქროს წესი

სახლიდან ეფექტურად მუშაობის 5 ოქროს წესი

კორონავირუსის პანდემიის გამო ადამიანების დიდი ნაწილი იძულებულია სახლიდან იმუშაოს. თანამედროვე სამყაროში დისტანციური სამუშაოს შესრულება არც ისე რთულია და მსგავს პირობებში ძალიან ბევრი დასაქმებული მუშაობს. თუ თქვენ სამსახურეობრივი მოვალეობის შესრულება დისტანციურად პირველად გიხდებათ, ჩვენ მიერ შემოთავაზებულ რჩევებს ყურადღებით გაეცანით, რათა ხარისხიანად და ეფექტურად მუშაობა გაგიმარტივდეთ.

თავი მოიწესრიგეთ


ადამიანების დიდი ნაწილი თვლის, რომ სახლიდან მუშაობა ხალათში გამოწყობილსაც შეუძლია. როგორც აღმოჩნდა, სამუშაოს შესრულებისთვის სათანადო მზაობა უფრო მეტად იმ დასაქმებულებს აქვთ, რომლებიც თავს სრულფასოვნად იწესრიგებენ და მუშაობას ამის შემდეგ იწყებენ. დილით ბანაობა და შემდეგ საგარეო ტანისამოსის ჩაცმა არამხოლოდ გაფხიზლებთ, არამედ სამუშაოდაც განგაწყობთ. თუ თქვენ ოფისში კლასიკურად იმოსებოდით, ჩაცმულობის სტილი არც სახლიდან მუშაობის დროს შეცვალოთ. ეს განსაკუთრებით მნიშვნელოვანია, თუ ვიდეო ზარებს ახორციელებთ. რესპექტაბელური სამოსის ტარება თქვენს მოტივაციას გაზრდის. როდესაც საქმიანობას დაასრულებთ, შეგიძლიათ საშინაო ტანისამოსში გამოეწყოთ, რაც მიგახვედრებთ, რომ სამუშაო დღე დასრულებულია.

არ დაგავიწყდეთ !!! Momsedu.ge-მ თქვენთვის, ქალებისთვის შექმნა ახალი სივრცე, სადაც ყველაზე მცოდნე დედები იყრიან თავს. ჯგუფის დასახელებაც სწორედ ასეა - „მცოდნე დედების ჯგუფი“, რომლის საშუალებით დედები ერთმანეთს საკუთარ გამოცდილებას გაუზიარებენ. (ჯგუფში გასაწევრიანებლად ნახეთ ბმული - „მცოდნე დედების ჯგუფი“)


დააწესეთ საზღვრები

კომპანიებში დასაქმებულ ადამიანებს მკაცრად განსაზღვრული სამუშაო გრაფიკი აქვთ. თუ თქვენ დისტანციურ მუშაობაზე გადადიხართ, აღნიშნულ გრაფიკს პატივი უნდა სცეთ. სამუშაო დღის დაწყება და დამთავრება სტანდარტულ გრაფიკს ზუსტად უნდა დაამთხვიოთ. აღნიშნული ოქროს წესის დასაცავად აუცილებელია, რომ ღამით ადრე დაიძინოთ, რათა დილით კარგად გამოძინებულმა დაიწყოთ მუშაობა. როდესაც ყოველდღიურად ერთსა და იმავე რეჟიმში ცხოვრობთ, გარკვეული რუტინა გიყალიბდებათ. მთავარია, დისტანციურად მუშაობის პირველი კვირა და მასთან დაკავშირებული სირთულეები წარმატებით გადალახოთ. სამუშაო დღის დასრულების შემდეგ კომპიუტერი გამორთეთ და მაგიდა მოაწესრიგეთ. სახლში აუცილებლად გამოყავით სივრცე, სადაც საოფისე ატმოსფეროს შექმნით, რათა სამუშაო განწყობა აიმაღლოთ. თუ თქვენ სახლში მარტო არ ცხოვრობთ, სამუშაოს შესრულების დროს აუცილებლად უნდა განცალკევდეთ. არ არის აუცილებელი, რომ თქვენს თანამშრომლებს აგრძნობინოთ, თუ რა რთულ პირობებში გიწევთ მუშაობა. ოჯახის წევრებთან ჭარბი კომუნიკაცია ან ჰიპერკომპენსაციის მძლავრი მექანიზმის ამუშავება ნაყოფიერ მუშაობაში ხელს შეგიშლით. თუ გსურთ, რომ პროდუქტიულად იმუშაოთ, თქვენი სამუშაო სივრცე მაქსიმალურად განაცალკევეთ და მუშაობის დროს ოჯახის წევრებს მკაცრი საზღვრები დაუწესეთ.

სუფთა ჰაერზე გაისეირნეთ (თუ თვითიზოლაციაში არ იმყოფებით)

სახლიდან მუშაობა არ გაიძულებთ, რომ მთელი დღის მანძილზე ოთხ კედელს შორის დარჩეთ და მზის სხივებს დაემალოთ. დღის განმავლობაში ერთხელ მაინც გაისეირნეთ სუფთა ჰაერზე. ბუნებასთან ურთიერთობა ახალი პერსპექტივების აღმოჩენაში დაგეხმარებათ, რაც სამსახურთან დაკავშირებული რთული ამოცანების გადაჭრაში შეგიწყობთ ხელს. სახლიდან გასხვლა ისეთ შეგრძნებას გაგიჩენთ, თითქოს სამსახურში მიგეჩქარებათ. ზოგიერთ ადამიანს მსგავსი განწყობა აუცილებლად ესაჭიროება, რათა ნაყოფიერად იმუშაოს. ბევრი მათგანი კომპიუტერში ისეთ ვიდეორგოლებს რთავს, რომლებშიც მატარებლის, ქუჩაში მოსიარულე ადამიანების და ტრანსპორტის ხმები ისმის. აღნიშნული ხმები სამუშაო პროცესს ფონად გასდევს, რაც დისტანციურად დასაქმებულ ადამიანებს თავს ოფისში აგრძნობინებს, რაც მათ მოტივაციის ამაღლებაში ძალიან ეხმარება.

მეგობრებს ტელეფონით გაესაუბრეთ

ოფისში დასაქმებული ადამიანები ერთმანეთთან რეგულარულად ურთიერთობენ. ინტერაქცია მათ განტვირთვაში ეხმარება. როდესაც თქვენ სახლიდან მუშაობთ, მთელი დღის განმავლობაში საქმეში ხართ ჩაფლული, რაც რელაქსაციაში ხელს გიშლით. იმის ნაცვლად, რომ მხოლოდ ოფიციალური შეტყობინებების გაგზავნით შემოიფარგლოთ, უმჯობესია, ტელეფონი მოიმარჯვოთ და მეგობრებს შეეხმიანოთ. ადამიანებთან საუბარი თქვენს მოტივაციას გაზრდის და განწყობის ამაღლებაში ძალიან დაგეხმარებათ. აუცილებელია, რომ დღეში 30 წუთი მაინც დაუთმოთ ადამიანებთან საუბარს. წინააღმდეგ შემთხვევაში თქვენ რობოტივით მუშაობა მოგიწევთ. სოციალური ურთიერთობების შენარჩუნება ძალიან მნიშვნელოვანია. მეგობარს იმ შემთხვევაშიც დაურეკეთ, თუ სასაუბროდ აუცილებელი მიზეზი არ გაქვთ. ახლობლებთან ლაპარაკი იზოლაციის ტვირთს მნიშვნელოვნად შეგიმსუბუქებთ.

მოიწყვეთ რეგულარული შესვენებები

სახლიდან მუშაობა არც ისე რთულია, თუმცა თუ სამუშაო მონოტონურ ხასიათს იღებს, ძალიან გაგიჭირდებათ. მთელი დღის მანძილზე კომპიუტერის ეკრანს არ უნდა უყურებდეთ. შესვენება აუცილებლად აიღეთ. ოთახში გაისეირნეთ და განიტვირთეთ. სამსახურში ყველა ადამიანი ასე იქცევა. კვლევებით დასტურდება, რომ დღის განმავლობაში ხანმოკლე, მაგრამ ხშირი შესვენებები განტვირთვაში იმაზე მეტად გეხმარებათ, ვიდრე ერთი, მაგრამ ხანგრძლივი შესვენების აღება. ძალიან კარგია, თუ ყოველი 25 წუთიანი სამუშაო პერიოდის შემდეგ, 5 წუთიან შესვენების ინტერვალს მოიწყობთ. ადექით, გაწელვის ვარჯიშები შეასრულეთ, ფეხით გაისეირნეთ და განიტვირთეთ. შესვენების გარეშე მუშაობა თქვენს მოტივაციას ამცირებს, რადგან ენერგიის მარაგი გეწურებათ, იღლებით და დასახული მიზნის შესრულება გიჭირთ. აღნიშნული გართულებების თავიდან ასაცილებლად, შესვენებისთვის დრო აუცილებლად გამოყავით. 

მომზადებულია ​​bbc.com​-ის მიხედვით

თარგმნა ია ნაროუშვილმა 

წაიკითხეთ სრულად