პედიატრი თამარ ობგაიძე კურდღლის ხორცის სასარგებლო თვისებებეზე საუბრობს და მშობლებს გემრიელ რეცეპტსაც სთავაზობს.
როგორც პედიატრი აღნიშნავს, კურდღლის ხორცის ცილოვანი შემადგენლობა უნიკალურია, შეიცავს ყველა შეუცველელ ამინომჟავას და რაც მთავარია, ადვილად შეითვისება პატარა ორგანიზმის მიერ. ცილა კი ორგანიზმის მთავარი საშენი მასალაა, რაც ბავშვს ზრდისა და განვითარებისათვის განსაკუთრებით სჭირდება. კურდღლის ხორცი სხვა სახის ხორცთან შედარებით ეკოლოგიურად სუფთაა.
თამარ ობგაიძის თქმით, იმის გამო, რომ კურდღლის ხორცი არ შეიცავს ალერგიულ ნივთიერებებს, ყველაზე ალერგიულ პატარებსაც შეიძლება გაასინჯოთ.
კურდღლის ხორცი საუკეთესო ვარიანტია 6,5 - 7 თვის ასაკიდან.
„დასაწყისისათვის საკმარისია დღეში 50 გრ ხორცი, 10-11 თვისათვის კი 70 გრ-მდე შეგიძლიათ გაზარდოთ, ხოლო 1 წლის ზემოთ 80-100 გრამი ხორცი დღიურად სრულიად საკმარისია ბავშვის მოთხოვნილებების დასაკმაყოფილებლად,“ - აღნიშნავს თამარ ობგაიძე.
კურდღლის ხორცის მომზადება ბრინჯთან ან ბოსტნეულთან ერთად შეგიძლიათ.
ექიმით რეკომენდაციით, კურდღლის ხორცი სჯობს მდუღარ წყალში ჩადოთ და ისე მოხარშოთ. ასე ის ყველა სასარგებლო ინგრედიენტს შეინარჩუნებს.
კურდღლის ხორცს მოხარშვისათვის 30-40 წთ სჭირდება. მისი დიდხანს ხარშვა სასარგებლო ნივთიერებების დაშლას და ხორცის სტრუქტურის შეცვლას გამოიწვევს - რეზინივით დრეკადი ხდება.
იხილეთ რეცეპტი, რომლითაც თქვენს პატარას გემრიელ სადილს მოუმზადებთ.
გუფთა ბრინჯით, ბოსტნეულით და ყველით 10 თვის ასაკიდან:
მასალა - ¼ ჭიქა გარჩეული, გარეცხილი ბრინჯი, 0,5 კგ გატარებული კურდღლის ხორცი, 1 ცალი გახეხილი სტაფილო და 2-3 ნაჭერი ყაბაყი, რამდენიმე ღერი ოხრახუში, 1 კვერცხის გული.
ბრიჯი მოამზადეთ ორთქლზე ბოსტნეულთან ერთად. ხორცი მოხარშეთ მწვანილთან ერთად და გაატარეთ ხორცსაკეპ მანქანაში. ფარში შეურიეთ მომზადებული ბრინჯისა და ბოსტნეულის მასას, დაამატეთ კვერცხის გული. გააკეთეთ მომცრო ზომის გუნდები. დაალაგეთ ცხიმწასმულ ტაფაზე, მოაყარეთ გახეხილი ყველი და შედგით ჰაერღუმელში.
გემრიელად მიირთვით 💜
