Baby Bag

გაიცანით ქართველი მშობლები, შალვა და ქეთი ტაბატაძეები, რომლებიც 10 შვილს ძიძის გარეშე ზრდიან

გაიცანით ქართველი მშობლები, შალვა და ქეთი ტაბატაძეები, რომლებიც 10 შვილს ძიძის გარეშე ზრდიან

შალვა და ქეთი ტაბატაძეები 10 შვილის მშობლები არიან. ელენეს, ანტონის, ილიას, ანდრიას, იოანეს, ელისეს, აბრააბის, ანას, ელისაბედისა და ენუქის მშობლებს ბავშვების მოსავლელად ძიძა არ აუყვანიათ. ისინი ყველაფერს დამოუკიდებლად უმკლავდებიან. თავისი დიდი და ბედნიერი ოჯახის შესახებ შალვა და ქეთი ტაბატაძეებმა ტელეკომპანია „იმედის“ გადაცემაში „ჩვენი ოჯახი“ ისაუბრეს. შალვა ტაბატაძის თქმით, უფროსი ბავშვები უმცროსებზე განსაკუთრებულად ზრუნავენ:

„მრავალშვილიან ოჯახში არის ეს ზრუნვა. უფროსი დედმამიშვილები ზრუნავენ პატარებზე, ასეირნებენ სუფთა ჰაერზე, უცვლიან საფენებს, ხელითაც აჭმევენ ხოლმე, როდესაც ჩვენ ვთხოვთ. შეიძლება უფროსებმა ბაღიდან გამოიყვანონ პატარები. უფროსი 16 წლის ხდება. მე 45 წლის ვარ. ხუთი ბავშვი მიდის დილით სკოლაში. ჩვენ ვიღვიძებთ დაახლოებით 9 საათისთვის. სამს ვამზადებთ საბავშვო ბაღისთვის. სულ პატარაც მაშინ იღვიძებს. ორი ადამიანი ვცდილობთ გავუმკლავდეთ ამდენი ბავშვის ჩაცმას, საუზმეს. ბაღში რამე არ უნდა დაგავიწყდეს: პირსახოცი, საფენი. დღიურად დაახლოებით 7 პური გვჭირდება. ზოგჯერ ხდება ხოლმე, რომ ვახშამზე არ გვაქვს პური და ყველას გვეზარება წასვლა. მერე მაინც ვიღაც მიდის.“

„ყოველთვის მეგონა, რომ მშვიდი არ ვიყავი. ზოგადად ძალიან ცოცხალი და ენერგიული ვარ. ვფიქრობ, რომ ბავშვებიც ძალიან მგვანან ამ კუთხით, მაგრამ როგორც ჩანს, მშვიდი ვყოფილვარ. ამაში წონასწორობა იგულისხმება. მაქვს უნარი, რომ თავი გავაკონტროლო. ალბათ, ამიტომაც მყავს ამდენი შვილი, ვარ მშვიდი. საქმეები გადანაწილებული გვაქვს. როდესაც ამდენი შვილი გყავს, სხვანაირად არ შეიძლება. მარტო გაზრდა ხომ არ არის, მნიშვნელოვანია აღზრდა. მომავალში მშობელმა შვილებს უნდა გაატანოს კარგი ჩვევები. ვცდილობთ მოწესრიგებულობას, განათლებას შევაჩვიოთ ბავშვები. მორიგეობა აქვთ ბავშვებს დღეების მიხედვით, ვინ რას აკეთებს. დროშაც გვაქვს ოჯახის. ელენე, ელისაბედი, ანდრია კარგად ხატავენ. მღერიან ბავშვები, სპორტით კავდებიან, რაგბიზე, კალათბურთზე დადიან. ვცდილობთ ეკლესიური ცხოვრებით ვიცხოვროთ. ვფიქრობდით, რომ რამდენ შვილსაც ღმერთი გვაჩუქებს, იმდენ შვილს ვიყოლიებდით. როდესაც შინაგანი მზაობა გაქვს, რომ ბევრი შვილი გეყოლება, მშვიდად ხვდები ყოველ მომდევნო შვილს,” - აღნიშნა ქეთი ტაბატაძემ.

წყარო: ​„ჩვენი ოჯახი“

შეიძლება დაინტერესდეთ

„არანაირი პრობლემა არ არის, რომ ბავშვმა ხოხვა გამოტოვა და პირდაპირ დაიწყო დგომა,“ - ბავშვთა ნევროლოგი სოფო ტატიშვილი

„არანაირი პრობლემა არ არის, რომ ბავშვმა ხოხვა გამოტოვა და პირდაპირ დაიწყო დგომა,“ - ბავშვთა ნევროლოგი სოფო ტატიშვილი

ბავშვთა ნევროლოგმა სოფო ტატიშვილმა ბავშვის განვითარებისთვის ხოხვის მნიშვნელობაზე ისაუბრა. მან აღნიშნა, რომ ხოხვის გამოტოვება ბავშვისთვის პრობლემას არ წარმოადგენს:

„არანაირი პრობლემა არ არის, როდესაც ხოხვა გამოტოვა და პირდაპირ ​დაიწყო დგომა ბავშვმა. მერე სიარულიც რომ დაიწყოს 10 თვის ასაკისთვის, აბსოლუტურად არანაირი პრობლემა არ არის. არც დეფორმაცია იქნება, თუ უკვე ბავშვი მზად არის იმისთვის, რომ დაიწყოს დამოუკიდებლად სიარული.“

სოფო ტატიშვილის თქმით, არ არის აუცილებელი, რომ კონკრეტულ ასაკში მხოლოდ ასაკობრივად მნიშვნელოვანი უნარების განვითარებაზე ვიზრუნოთ:

„ისევ მიდგომებს რომ დავუბრუნდეთ და ინტერვენციას, აქაც კიდევ ერთხელ ვიტყვი, რომ ადრე იყო მიდგომა, რომ აუცილებლად ნეიროგანვითარების ტექნიკები უნდა გამოგვეყენებინა. იერარქიულად რომელი უნარიც უწევდა, იმ უნარებზე უნდა გემუშავა აუცილებლად. კონკრეტული ასაკისთვის მხოლოდ თავის ჭერაზე უნდა გემუშავა, ​ექვსი თვის ასაკისთვის მხოლოდ ჯდომაზე. აღმოჩნდა, რომ ეს არაფერ გაუმჯობესებას არ გვაძლევს არც აქტივობებში და არც ჩართულობაში.“

„შეიძლება ბავშვი თავსაც ვერ იჭერდეს, მაგრამ მუშაობენ ერთდროულად ჯდომაზეც, გადაბრუნებაზეც, დგომაზეც და ა.შ. რა თქმა უნდა, ძალიან ფართო დიაპაზონს არ ვგულისხმობ. ყველა უნარზე მეტ-ნაკლებად მუშაობენ ერთდროულად. შესაბამისად, ის, რომ ბავშვმა ხოხვა გამოტოვა, ეს არანაირი პრობლემა არ არის. ისიც არ არის პრობლემა, რომ ათი თვის ასაკისთვის ბავშვი იწყებს სიარულს,“ – აღნიშნულ საკითხზე ​სოფო ტატიშვილმა საქართველოს პირველი არხის გადაცემაში „პირადი ექიმი - მარი მალაზონია“ ისაუბრა.

წყარო: ​„პირადი ექიმი - მარი მალაზონია“

წაიკითხეთ სრულად