Baby Bag

როგორ ვასწავლოთ ბავშვს მოთმინება?

როგორ ვასწავლოთ ბავშვს მოთმინება?

მოთმინება ერთ-ერთი ყველაზე მნიშვნელოვანი უნარია, რომლის შეძენა ბავშვისთვის ადრეული ასაკიდანვე საჭიროა. მისი დახმარებით ადამიანები არამხოლოდ კარიერულ წინსვლას, არამედ ჯანმრთელობის შენარჩუნებას და ჯანსაღი ურთიერთობების ჩამოყალიბებასაც ახერხებენ. მართალია, ბავშვისთვის მოთმინების უნარის გამომუშავება საკმაოდ რთული საქმეა, თუმცა არსებობს გარკვეული სტრატეგიები, რომელთა დახმარებით მიზნის მიღწევას აუცილებლად შეძლებთ.

  • პოზიტიური გამოცდილების დახმარებით ბავშვი მოთმინებას სწავლობს

ბავშვებს გამოუცდელობის გამო უჭირთ იმის გააზრება, თუ რა სარგებლობა მოაქვს მათთვის მოთმინების უნარის განვითარებას. ისინი კარგად ვერ აცნობიერებენ დროის მნიშვნელობას და ვერ ხვდებიან, რას ნიშნავს, როდესაც გარკვეული მსხვერპლის ფასად ჯილდოს იღებ. როდესაც ბავშვს დაპირდებით, რომ მას ტკბილეულს უყიდით, ან მგზავრობისას ეტყვით, რომ მალე პარკს მიუახლოვდებით, ბავშვი ძალიან ბევრჯერ გკითხავთ, მალე უყიდით თუ არა ტკბილეულს, ან მალე მიხვალთ თუ არა პარკთან. მის კითხვებს ყოველთვის თბილად და მოთმინებით უპასუხეთ, თუნდაც მან ერთი და იგივე კითხვა ოცჯერ დაგისვათ. როდესაც ბავშვი კითხვას განმეორებით გისვამთ, ის ამით ეგოიზმს არ ავლენს, არამედ ცნობისმოყვარეობას გამოხატავს. მას უბრალოდ არ ესმის დროის მნიშვნელობა და ვერ ხვდება, რამდენი დრო დარჩა თქვენ მიერ მიცემული პირობის შესრულებამდე. თუ ბავშვს უხეშად უპასუხებთ ან ფიზიკურად დასჯით იმის გამო, რომ მან ბევრი კითხვა დაგისვათ, ის ჩათვლის, რომ ლოდინი ნეგატიური გამოცდილებაა. თუ მას თბილად უპასუხებთ, ბავშვი გადაწყვეტს, რომ ლოდინი ცუდი სულაც არ არის.

  • ბავშვმა დროის მსვლელობა უნდა იგრძნოს

თანამედროვე ბავშვები დროის უდიდეს ნაწილს ეკრანთან ატარებენ. ისინი თამაშობენ ან ფილმებს უყურებენ, რის გამოს დროის მსვლელობას საერთოდ ვერ გრძნობენ. ბავშვს ისეთი გასართობი გამოუძებნეთ, რომელიც მას რეალურ დროსთან კავშირს არ გააწყვეტინებს. ბავშვმა სიამოვნებაც უნდა მიიღოს და დროის მსვლელობაც უნდა იგრძნოს, რათა მოთმინების სწავლა შეძლოს.

  • ბავშვისთვის მიცემული დაპირებები ყოველთვის უნდა შეასრულოთ

მშობლები ბავშვებს დაპირებებს აძლევენ და იმედოვნებენ, რომ ბავშვი მიცემულ პირობას დაივიწყებს. პატარები კი ყველაფერს იმახსოვრებენ. ისინი ელოდებიან, როდის შეასრულებს მშობელი დაპირებას, რის გამოც ფიქრობენ, რომ დრო ძალიან ნელა გადის. მათ ლოდინის პროცესი არ სიამოვნებთ და ნეგატიურ გამოცდილებას იღებენ. ბავშვი, რომელიც ელოდა, რომ დედა ათ წუთში ტკბილეულს უყიდიდა, თვეობით ელის პირობის შესრულებას, რის გამოც ის თვლის, რომ ლოდინი ძალიან ხანგრძლივი და მოსაწყენი პროცესია. როდესაც ბავშვს პირობას აძლევთ, რომ რამეს გაუკეთებთ, დანაპირები უნდა შეასრულოთ.

  • ბავშვი ინფორმირებული უნდა იყოს

ბავშვი თუ გეკითხებათ, რამდენ ხანში მიხვალთ გასართობ ცენტრში, მას ინფორმირებული პასუხი უნდა გასცეთ. თქვენს შვილს არ უთხრათ, რომ მალე მიხვალთ. პასუხი უფრო ზუსტი და ბავშვისთვის გასაგები უნდა იყოს. თქვენს შვილს აუხსენით, რომ გასართობ ცენტრამდე მისვლას იმდენი დრო სჭირდება, რამდენიც მისი საყვარელი მულტფილმის ყურებას. ბავშვი ასე უკეთ გაიგებს, რამდენ ხანში მივა დანიშნულების ადგილამდე და ზედმეტი კითხვებითაც არ შეგაწუხებთ.

  • ბავშვის დასამშვიდებლად წამზომისა და ვიზუალური რეპრეზენტაციის გამოყენება შეგიძლიათ

შორ გზაზე თუ მიდიხართ და ბავშვის კითხვებზე ყოველწამიერად პასუხის გაცემას ვერ ახერხებთ, შეგიძლიათ წამზომი გამოიყენოთ. ბავშვს აუხსენით, რომ წამზომის დახმარებით ის თავად გაიგებს, როდის მივა დანიშნულების ადგილამდე. უმჯობესია, თუ მანქანაში რუკაც გექნებათ, რომლის დახმარებითაც თქვენს შვილს ვიზუალურად აჩვენებთ, რა გზა გაქვთ გასავლელი და რა დრო დაგჭირდებათ მანძილის დასაფარად.

მომზადებულია​ kidsvillage.com - ის მიხედვით

თარგმნა ია ნაროუშვილმა

არ დაგავიწყდეთ !!!

დაემატეთ ჯგუფში საბავშვო რეცეპტები

შეიძლება დაინტერესდეთ

რომელია ბავშვის სიმაღლეში ზრდისთვის საუკეთესო პროდუქტები? - პედიატრ ნინო თოთაძის რეკომენდაციები მშობლებს

რომელია ბავშვის სიმაღლეში ზრდისთვის საუკეთესო პროდუქტები? - პედიატრ ნინო თოთაძის რეკომენდაციები მშობლებს

პედიატრმა ნინო თოთაძემ იმ პროდუქტების შესახებ ისაუბრა, რომლებიც ბავშვი სიმაღლეში ზრდას ყველაზე მეტად უწყობს ხელს. მისი თქმით, არსებობს რამოდენიმე განსაკუთრებული პროდუქტი, რომელიც უშუალო ზეგავლენას ახდენს სიმაღლეში ზრდაზე:

„თანამედროვე მიდგომით ითვლება, რომ ​არსებობს რამოდენიმე გამორჩეული პროდუქტი , რომელიც უშუალოდ მოქმედებს სიმაღლეში ზრდასთან დაკავშირებით. პირველი, ეს არის ისპანახი, რომელიც არის უმნიშვნელოვანესი პროდუქტი თავისი შემადგენლობით. დამატებითი კვების დაწყებისას ის ბავშვის კვებაში უნდა ჩაერთოს. ისპანახი არის ვიტამინებით მდიდარი და ერთ-ერთ იდეალურ პროდუქტად არის აღიარებული.“

ნინო თოთაძემ აღნიშნა, რომ სიმაღლეში ზრდისთვის ერთ-ერთი ყველაზე ეფექტიანი პროდუქტი სტაფილოა:

„უმნიშვნელოვანესია სტაფილო, რომელიც A ვიტამინით ძალიან მდიდარია. ამ შემთხვევაში არ არის აუცილებელი ვისაუბროთ, რომ მხოლოდ კოქტეილი იყოს. ​ეს შეიძლება იყოს ცოცხლად მისაღები პროდუქტიც, როგორებიცაა: სტაფილო, ისპანახი, ბროკოლი. მესამე მნიშვნელოვანი პროდუქტი არის რძე და რძის პროდუქტები, განსაკუთრებით იოგურტი. ასევე გარკვეულწილად მნიშვნელოვანია მარცვლეულიც. ძირითადად ამ პროდუქტებიდან უნდა მოხდეს ვიტამინების ათვისება. განსაკუთრებით D ვიტამინი ბავშვმა უნდა მიიღოს რძის პროდუქტებიდან.“

ნინო თოთაძემ ხაზი გაუსვა ხილისა და ბოსტნეულის მიღების აუცილებლობას ბავშვის სიმაღლეში ნორმალური ზრდისთვის:

„უმნიშვნელოვანესია სხვა ყველა ვიტამინის შემადგენლობა ხილისა და ბოსტნეულის საშუალებით მიიღოს ბავშვმა. ​ასევე მნიშვნელოვანია ბურღულეული. არ უნდა გამოგვრჩეს პროწეულიც. ეს ყველაფერი არის ზამთრის არაჩვეულებრივი ხილი. სასურველია ეს პროდუქტები ყოველდღიურად მიიღონ. ის მითი, რომ აუცილებლად მხოლოდ სტაფილოს და ჭარხლის კოქტეილი დაგვეხმარება ზრდაში, არ არის სწორი. ეს მითია. განსაკუთრებით დადებითი პროდუქტია სტაფილო. რა თქმა უნდა, ეს გამომდინარეობს, თუ რამდენად კარგ ნიადაგზეა მოყვანილი. დამერწმუნეთ, თუ მას ცოცხლადაც მივიღებთ ყოველდღიურად, ის იმავეს შეძლებს.“

„რაც შეეხება დოზირებას, უმნიშვნელოვანესია პროდუქტი არ იყოს დღეში რამდენჯერმე მიღებული. ულუფები სწორად უნდა იყოს განსაზღვრული. ​კოქტეილი უნდა იყოს 100-150 მილილიტრამდე. ამასთან, არ უნდა დაგვავიწყდეს, რომ კოქტეული აუცილებლად მიღების წინ უნდა იყოს დამზადებული,“ - აღნიშნულ საკითხზე ნინო თოთაძემ ტელეკომპანია „რუსთავი 2“ - ის გადაცემაში „დილა მშვიდობისა საქართველო“ ისაუბრა.

წყარო:​ „დილა მშვიდობისა საქართველო“

წაიკითხეთ სრულად