Baby Bag

რატომ არის გასაბერი აუზი ბავშვის სიცოცხლისთვის სახიფათო?

რატომ არის გასაბერი აუზი ბავშვის სიცოცხლისთვის სახიფათო?

ზაფხულში მშობლები ბავშვების გასაგრილებლად გასაბერ საცურაო აუზებს ხშირად ყიდულობენ. პედიატრები ფიქრობენ, რომ პატარა აუზები ბავშვების სიცოცხლისთვის საფრთხის შემცველია და უფროსებს ურჩევენ მათი შეძენისგან თავი მაქსიმალურად შეიკავონ.

გასაბერი აუზები უმეტესწილად ეზოში თავსდება. მშობლები წყალს თვალს არ აშორებენ და ბავშვებს ყურადღებით აკვირდებიან, მაგრამ, მიუხედავად ამისა, აუზზე უბედური შემთხვევები მაინც ხდება. მსგავსი უბედური შემთხვევის მსხვერპლი ერთ-ერთი ბავშვის მშობლებმა სპეციალური ორგანიზაციაც კი დააარსეს, რომელშიც მშობლებს 6 წლამდე ასაკის ბავშვებისთვის უსაფრთხო ცურვისა და ბანაობის წესებს აცნობენ. მცირეწლოვანი ბავშვი, საშუალოდ, 40 სანტიმეტრი სიმაღლის წყალშიც კი შეიძლება დაიხრჩოს. უბედური შემთხვევების 70% მაშინ ხდება, როდესაც ცურვის პროცესი უკვე დასრულებულია.

უსიამოვნებებისა და ლეტალური გამოსავალის თავიდან ასაცილებლად მშობლებმა შემდეგი რეკომენდაციები უნდა გაითვალისწინონ:

  • ერთი ადამიანი აუცილებლად უნდა ადევნებდეს თვალს ბავშვის ცურვის პროცესს და აუზს ერთი წამითაც არ უნდა მოშორდეს.
  • არასდროს დატოვოთ ბავშვი აუზში მარტო, რამდენიმე წამითაც კი.
  • როდესაც ბავშვი აუზში ცურვას დაასრულებს, წყალი მაშინვე გადმოღვარეთ და აუზი დააცარიელეთ.

მშობლები აუზს წყლისგან იშვიათად ცლიან. ისინი არ ითვალისწინებენ, რომ მეზობლის ეზოდან, შესაძლოა, ბავშვი გადმოვიდეს და წყლით სავსე აუზთან მარტო მივიდეს, რაც, შეიძლება, ძალიან ცუდი შედეგით დასრულდეს. ერთ-ერთი საუკეთესო გამოსავალი აუზის მეთვალყურის შერჩევაა, რომელიც წყალს ყურადღებით დააკვირდება, ტელეფონზე არ ისაუბრებს და მთლიანად ბავშვზე იქნება კონცენტრირებული. რა თქმა უნდა, ეს საკმაოდ რთული საქმეა და ყურადღების გაფანტვისგან დაზღვეული არავინ არის. სწორედ ამიტომ, უმჯობესია, თუ უფროსები აუზის მეთვალყურის როლს შეითავსებენ და ერთმანეთს პოსტზე ყოველ 15 წუთში ჩაანაცვლებენ.

მომზადებულია ​abc13.com-ის მიხედვით

თარგმნა ია ნაროუშვილმა

არ დაგავიწყდეთ !!!

Momsedu.ge-მ თქვენთვის, ქალებისთვის შექმნა ახალი სივრცე, სადაც ყველაზე მცოდნე დედები იყრიან თავს. ჯგუფის დასახელებაც სწორედ ასეა - „მცოდნე დედების ჯგუფი“, რომლის საშუალებით დედები ერთმანეთს საკუთარ გამოცდილებას გაუზიარებენ. (ჯგუფში გასაწევრიანებლად ნახეთ ბმული - „მცო​დნე დედების ჯგუფი“)

მოცურავე ჩვილები დროულად და ზოგჯერ თანატოლებზე უფრო ადრეც იწყებენ ჯდომას, ხოხვას, სიარულს
რატომ არის სასარგებლო ცურვა ჩვილისათვის? - ამის შესახებ პედიატრი თამარ ობგაიძე ​​საუბრობს​. გთავაზობთ მის ნათქვამს სიტყვა-სიტყვით:„ევოლუციის პროცესს თუ გავიხსენებთ, იმ ფაქტს, რომ სიცოცხლე წყ...

შეიძლება დაინტერესდეთ

„ბრონქიოლიტის დროს ნახევარ საათში შეიძლება მდგომარეობა მკვეთრად შეიცვალოს,“- პედიატრი ნუგზარ უბერი

„ბრონქიოლიტის დროს ნახევარ საათში შეიძლება მდგომარეობა მკვეთრად შეიცვალოს,“- პედიატრი ნუგზარ უბერი

პედიატრმა ნუგზარ უბერმა ომიკრონით გამოწვეული ბრონქიოლიტის მკურნალობის მეთოდების შესახებ ისაუბრა:

„ბრონქიოლიტიც არის ვირუსით გამოწვეული. ამ ვირუსს ჰქვია რესპირატორულ-სინციტიური ვირუსი. წვრილი ბრონქების ანთება იშვიათად რთულდება ფილტვების ანთებით. ომიკრონის დროს უფრო ხშირად გვაქვს ტრაქეიტი, გაორმაგებული და გასამმაგებულია ვირუსული კრუპის სინდრომი, არაიშვიათად გვაქვს ბრონქიოლიტი და ამით კლინიკებში ბავშვები წვანან. რადგან ბრონქიოლიტის მიმდინარეობის თავისებურება არის სტვენითი ხმიანობა, ამდენად ეს ხელს უწყობს, რომ წვრილი ბრონქების ანთება არ გადავიდეს ფილტვების ანთებაში.“

ნუგზარ უბერის თქმით, პაციენტები ხშირად აპროტესტებენ, როდესაც ბროქნიოლიტის გამო კლინიკაში უხდებათ მკურნალობა:

„პაციენტებისგან ხშირად გამიგია: „ჩვენ თვითონ მოვუვლით ამ წვრილი ბრონქების ანთებას.“ არამც და არამც ასეთი მიდგომა მედიცინაში არ არსებობს. მიუხედავად იმისა, რომ ბრონქიოლიტი თვითგანკურნებადი დაავადება გახლავთ, მიმდინარეობს მსუბუქად, უფრო ხშირად საშუალო სიმძიმისაა, მაგრამ მას მაინც, გასნსაკუთრებით ექვს თვემდე ასაკში, სჭირდება ჰოსპიტალიზაცია. ამას ჩვენ ვახერხებთ რამოდენიმე დღის მკურნალობით.“

„მშობლები ხშირად ამბობენ: „რადგან ფილტვების ანთება არ აქვს ბავშვს და ანტიბიოტიკს არ იღებს, გაგვიშვით სახლში. ამ ინჰალაციას მეც გავუკეთებ სახლის პირობებში.“ თუ ბავშვმა საკვების მიღება შეწყვიტა, ის აუცილებლად უნდა მოთავსდეს ჰოსპიტალში. ომიკრონის დროს ხშირია ბრონქიოლიტი. როდესაც მშობელი კითხულობს: „რატომ წევს ჩემი შვილი ამ დიაგნოზით საავადმყოფოში?“ ბავშვს მონიტორინგი სჭირდება იმიტომ, რომ შესაძლო გართულებები მოსალოდნელია. ბრონქიოლიტის დროს ხანმოკლე დროში კლინიკური გამოვლინებების არასტაბილურობაა. ამ წუთას შეიძლება ხველა იშვიათი იყოს, სუნთქვის უკმარისობის გამოვლინება ნაკლები იყოს, მაგრამ ნახევარი საათის განმავლობაში მდგომარეობა მკვეთრად შეიცვალოს. ამ სიფრთხილის გამო ჩვენ ვურჩევთ ჰოსპიტალიზაციას, სწორ, კორექტულ მკურნალობას,“- აღნიშნულ საკითხზე ნუგზარ უბერმა საქართველოს პირველი არხის გადაცემაში „პირადი ექიმი - მარი მალაზონია“ ისაუბრა.

წყარო: ​„პირადი ექიმი - მარი მალაზონია“

წაიკითხეთ სრულად