Baby Bag

მე მირჩევნია ტრენინგი მასწავლებელმა ჩაატაროს, ვიდრე მასწავლებლის სახლის ტრენერმა - ბერიკა შუკაკიძე

მე მირჩევნია ტრენინგი მასწავლებელმა ჩაატაროს, ვიდრე მასწავლებლის სახლის ტრენერმა - ბერიკა შუკაკიძე

პედაგოგთა ტრენინგებთან დაკავშირებით,  მას­წავ­ლე­ბელ­თა პრო­ფე­სი­უ­ლი გან­ვი­თა­რე­ბის ეროვ­ნუ­ლი ცენ­ტ­რის დი­რექ­ტორ­მა, ბე­რი­კა შუ­კა­კი­ძემ გადაცემაში „ჩვენი სკოლა“ ისაუბრა. 

მისი თქმით,  პირველ რიგში, მასწავლებლის საუნივერსიტეტო განათლებას უნდა მიექცეს ყურადღება და მხოლოდ ამის შემდეგ არის ტრენინგი ეფექტური:

„ტრენინგი ეს არის, ასე ვთქვათ, დესერტი.  პირველ რიგში,  ჩვენ უნდა მივხედოთ მასწავლებლის საუნივერსიტეტო განათლებას, რომელიც უნდა იყოს მაღალი დონის. ამის შემდეგ არის ტრენინგი ეფექტური. რაც შეეხება დეცენტრალიზაციას, მასწავლებლის სახლის ტრენერს (ტრენერებს შეურაცხყოფას არ ვაყენებ) მე მირჩევნია, მაგალითად, გორის რომელიმე სკოლაში ვიპოვო კარგი მასწავლებელი, რომელმაც კარგად იცის კონკრეტულად გორის სკოლის საჭიროებები, ვიდრე მასწავლებლის სახლიდან მივლენილმა ტრენერმა. ამიტომ ჩვენ უნდა მივხედოთ მასწავლებლის სკოლის ბაზაზე პროფესიულ განვითარებას, უნდა მივხედოთ მასწავლებლის სოციო-ეკონომიკური სტატუსის ამაღლებას, რათა ეს პროფესია გახდეს პოპულარული მაღალი სააზროვნო უნარების მქონე სტუდენტებში და ისინი შეუერთდნენ ამ პროფესიას. ჩვენ ვიწყებთ მაღალი დონის სოციალურ კამპანიას. ჩემთვის პატრიოტობა არის ტყიბულის რაიონის სოფელ მუხურაში (მთის სკოლაა) მასწავლებლად მუშაობის დაწყება. ახალგაზრდა პატრიოტმა თავისი პატრიოტობა იქ მუშაობით უნდა გამოავლინოს,“ - აღნიშნა ბერიკა შუკაკიძემ.  

შეიძლება დაინტერესდეთ

„ბავშვების ცხოვრებაში მარტო სწავლა არ არის, სწავლა ცხოვრების ერთი პატარა ნაწილია, ბავშვს მარტო სწავლით ნუ შევზღუდავთ,“ - შალვა ამონაშვილი

პედაგოგი შალვა ამონაშვილი „იმედის დღეში“ თანამედროვე ბავშვებთან მოძველებული პედაგოგიური მიდგომების გამოყენების არაეფექტიანობაზე საუბრობს და აცხადებს, რომ ავტორიტარული პედაგოგიკა თანამედროვე მოსწავლეებს ვერ გაუძლებს:

„ბავშვები ​ჰიპერაქტიურები კი არ არიან, მასწავლებლები არიან ჰიპერპასიურები. ბავშვი ახალია და პედაგოგიკა ძველია. რა ხდება ამ დროს? ბავშვი დაიშლება. არც მოსმენა უნდა, არც მასწავლებელი უყვარს. ეს ხდება ყველა კლასში. ​ავტორიტარული პედაგოგიკა ვერ გაუძლებს ამ ბავშვებს. უნდა შეიცვალოს მასწავლებლის ცნობიერება. ჩვენს სამინისტროს უნდა, რომ რეფორმები მოახდინოს, ხომ? სკოლაში არანაირი რეფორმა არ მოხდება, გინდა ათასი სახელმძღვანელო და პროგრამა შეცვალე, რეფორმა მასწავლების თავში უნდა მოხდეს. თუ მასწავლებლის თავში გარდასახვა არ მოხდა, გინდ კარგი წიგნი მიეცი და გინდ ცუდი.“

​შალვა ამონაშვილი აცხადებს, რომ მასწავლებელი მისი საქმიანობის შემოქმედებითობაში უნდა დავარწმუნოთ:

„მასწავლებელს უნდა შთავაგონოთ, რომ ის შემოქმედებითი არსებაა, პედაგოგიკა ხელოვნებაა. არც კი იცი, ბავშვი რას იზამს და შენ რითი უნდა უპასუხო. თუ მასწავლებელს ინსტრუქციები მივეცით და ის შეზღუდული იქნება, ბავშვი ინსტრუქციაში ვერ ჩაეტევა. მასწავლებელს უნდა მივცეთ კლასიკური იდეები, გოგებაშვილი, კორჩაკის იდეა ჩავუნერგოთ და არა რაღაც შტამპური ფსიქოლოგია და შტამპური გაგება გაკვეთილების. თუ ​მასწავლებელი ამას გაიგებს, ბევრი მათგანი, რა თქმა უნდა, აქეთკენ გადმოიხრება.“

შალვა ამონაშვილის თქმით, ბავშვების ცხოვრება მხოლოდ სწავლისგან არ შედგება, რის გამოც მშობელმა მისი ყოველდღიურობა სწვალით არ უნდა შემოფარგლოს:

„ბავშვების ცხოვრებაში მარტო სწავლა არ არის, სწავლა ცხოვრების ერთი პატარა ნაწილია. თავად ცხოვრება ძალიან მდიდარი გარემოა. ბავშვს მარტო სწავლით ნუ შევზღუდავთ. მე მინდა მივმართო ქართველ მშობლებს, რომლებსაც დიდ პატივს ვცემ და მიყვარს, რომ გითხრათ ბავშვი გიყვარდეთ-მეთქი, ეს ცოტაა. ​მშობლებს ბავშვი უნდა უყვარდეთ ნაზად, ბავშვის სიყვარულს ცოდნა უნდა. არ შეიძლება ყვირილით გიყვარდეს ბავშვი, დასჯით გიყვარდეს, მუქარით გიყვარდეს. საჩუქრებითაც არ შეიძლება ბავშვი გიყვარდეს. საჩუქრით მოსყიდვას ბავშვი მიჰყავს გარეთ, ჩვენ კი არ გვიახლოვებს. ბავშვი ნდობით, ალერსით თუ გიყვარს, იმედით თუ გიყვარს, თუ გიყვარს ბავშვი იმით, რომ დროს ნახულობ მასთან სათამაშოდ, ახერხებ მასთან ერთად იყო სადმე, ეს სიყვარული სხვანაირი სიყვარული იქნება.“

​ჩვენ საჩუქრებში ვახრჩობთ ბავშვს, სათამაშოებში, ნებივრობებში და გვგონია, რომ ამოვწურეთ ჩვენი სიყვარული. თუ განსხვავებულად გვეყვარება, ბავშვი ჩვენი სულის ნაწილი გახდება, ახლა ხორცის ნაწილია. როდესაც დედა ეტყვის: „შვილო, შენი ჭირიმე, ერთად რამე გავაკეთოთ, გავისეირნოთ, მამას დავეხმაროთ,“ ბავშვი დედის სიტყვას დაიჯერებს და დაჯდება. ამ დროს აკადემიური მოსწრებაც უკეთესი იქნება. მოტივი უჩნდება ბავშვს. ჩვენ რასაც ვაკეთებთ, ხალისით ვაკეთებთ, თუ მოგვწონს. თუ მოტივი იძულებითია, მაშინ ხარისხიანი არ გამოდის. ბავშვიც ასეა, როდესაც უყვარს მასწავლებელი, დაჯდება და გააკეთებს სიყვარულით,“ - აღნიშნავს შალვა ამონაშვილი.

წყარო: ​იმედის დღე

წაიკითხეთ სრულად