Baby Bag

ბავშვის კვების 7 პრინციპი ევგენი კომაროვსკისგან

ბავშვის კვების 7 პრინციპი ევგენი კომაროვსკისგან

ცნობილი პედიატრი ევგენი კომაროვსკი მშობლებს ბავშვის კვების 7 მთავარ პრინციპს აცნობს:

1. ნუ შექმნით კვების კულტს. უმადო ბავშვის კვება უსარგებლოა და შესაძლოა, საზიანოც იყოს მისი ჯანმრთელობისთვის. ყველაზე ხშირად ბავშვი უმადობას იმის გამო გრძნობს, რომ ენერგია სათანადოდ არ დაუხარჯავს. ბავშვის მადის გასაძლიერებლად მისი დღის ორგანიზება იმგვარად უნდა მოხდეს, რომ მან მეტად იაქტიუროს და მეტი ენერგია დახარჯოს.

2. გაითვალისწინეთ ბავშვის მხრიდან საკვებზე უარის თქმის მიზეზები. შესაძლოა, ამის უკან კბილის ტკივილი, ცუდი განწყობა ან სხვა მიზეზი დგას. უყურადღებოდ არ დატოვოთ ბავშვის ფიზიკური თუ მენტალური მდგომარეობა, რომელიც უმადობას იწვევს.

3. თუ ბავშვი ავადაა, როგორც წესი, ის კვებაზე უარს ამბობს. ეს ბუნებრივია და ნუ დააძალებთ მას საკვების მიღებას. ორგანიზმი ამ გზით ენერგიას ზოგავს, რათა ინფექციას გაუმკლავდეს. ის ცდილობს, რომ ენერგია საკვების გადამუშვებაზე არ დახარჯოს.

4. კვების რეჟიმი აუცილებლად უნდა არსებობდეს, თუმცა ის არა დროის მიხედვით, არამედ ბავშვის მადისა და საკვების მომზადების განრიგის თანახმად უნდა განსაზღვროთ.

5. ნუ აიძულებთ ბავშვს წვნიანის ჭამას. არაფერი ამყარებს მშობლების მტკიცებას, რომ აუცილებელია ბავშვმა დღეში ერთხელ მაინც მიირთვას ცხელი, წვნიანი კერძი. ათობით ქვეყანაში წვნიანს საერთოდ არ მიირთმევენ, თუმცა ბავშვები ჯანმრთელები იზრდებიან.

6. ბავშვმა ყველაზე უკეთ იცის, როდის და რამდენი უნდა მიირთვას.

7. მივცეთ თუ არა ბავშვს ტკბილეული? ბავშვს ტკბილეულის ზომიერად მიღების შესაძლებლობა უნდა მივცეთ. ტკბილის ჭარბად სიყვარული პანკრეასს საფრთხეს უქმნის ნახშირწყლების სწრაფი დაშლის გამო, თუმცა არ უნდა დაგვავიწყდეს, რომ ტკბილეული ენერგიისა და სიხარულის წყაროა. როდესაც ბავშვს ნაყინს ან სხვა ტკბილეულს აძლევთ, უნდა იფიქროთ იმაზე, თუ როგორ დახარჯავს ის მიღებულ ენერგიას.

წყარო:​ tuapsevesti.ru 

შეიძლება დაინტერესდეთ

5 მავნე მითი წონაში კლებასთან დაკავშირებით, რომელიც ზიანს გვაყენებს - ზაზა თელია

5 მავნე მითი წონაში კლებასთან დაკავშირებით, რომელიც ზიანს გვაყენებს - ზაზა თელია

დერმატო-ვენეროლოგმა ზაზა თელიამ წონაში კლებასთან დაკავშირებით გავრცელებული 5 მავნე მითი დაასახელა, რომელიც არ უნდა დავიჯეროთ:

„დალევასთან დაკავშირებით ძალიან პოპულარულია მითი, რომ წყლის მიღება არ შეიძლება ჭამის დროს და მის შემდეგ. ეს, რა თქმა უნდა, არ შეესაბამება სიმართლეს. წყალი აუცილებელია საჭმლის მონელებისთვის. ის ​ხელს უწყობს პირის ღრუს გათავისუფლებას საჭმლის ნარჩენებისგან, მის გადადევნას საყლაპავში და შემდეგ კუჭში გადამუშავებას. მითია, რომ წყალი არ უნდა მივიღოთ კვების დროს ან კვების შემდეგ.“

ზაზა თელიას თქმით, მითია, რომ დილით ვარჯიში წონაში კლებისთვის ეფექტიანი არ არის:

„ერთ-ერთი ყველაზე პოპულარული მითია, რომ დილის ვარჯიში არ არის კარგი ჯანმრთელობისთვის. რა თქმა უნდა, ეს არ შეესაბამება სიმართლეს. დილის ვარჯიში ყველაზე ეფექტიანია. მითია ასევე მოსაზრება, რომ სწრაფად გახდომა კარგია. წონის კლება არ უნდა იყოს ძალიან სწრაფი. მაგალითად, ადამიანმა რომ ერთი კვირის განმავლობაში ხუთი კილოგრამი დაიკლოს, ეს, რა თქმა უნდა, არ არის კარგი.​ რეკომენდებულია, რომ ადამიანმა ნელ-ნელა დაიკლოს წონაში, მაქსიმუმ 1-2 კილოგრამი კვირის განმავლობაში. კვლევებით დადგენილია, რომ ადამიანები, რომლებიც ნელ-ნელა იკლებენ წონაში, უკეთეს შედეგს აღწევენ, ვიდრე ის ადამიანები, ვინც სწრაფად იკლებს წონაში.“

ზაზა თელიამ აღნიშნა, რომ საკვები დანამატების მიღების ეფექტიანობა და უსაფრთხოება მეცნიერულად დასაბუთებული არ არის:

„საკვებ დანამატებზე მათი ეფექტიანობის დამადასტურებელი მტკიცებულება არ არსებობს. მათი მიღება არ არის რეკომენდებული არცერთი სამედიცინო საზოგადოების მიერ. ისინი საფრთხის შემცველებიც არიან, რადგან არცერთ ქვეყანაში ეს დანამატები არ მოწმდება სახელმწიფო სტრუქტურებისგან. ბაზარზე არსებობს რამდენიმე ნივთიერება, რომელსაც ანოტაციაში უწერია, რომ არის ცხიმის მწველი, ჯერჯერობით არ არსებობს სამეცნიერო მტკიცებულება, რომ რომელიმე ნივთიერება ხელს უწყობდეს ცხიმის კატაბოლიზმს.“

„დიეტები ძალიან პოპულარულია.​ ბოლო პერიოდში პოპულარული გახდა კეტო დიეტა, რომელიც გულისხმობს ნახშირწყლების შეზღუდვას. ამერიკის შეერთებული შტატების ნაციონალური ჯანმრთელობის ინსტიტუტის მიერ არცერთი დიეტა არ არის რეკომენდებული წონის კლების მიზნით. წონის კლება უნდა მოხდეს ბალანსირებული, ჯანსაღი კვების ხარჯზე და არა რომელიმე კონკრეტული დიეტის დაცვით. შესაძლოა, დიეტის ხარჯზე ადამიანმა ეფექტი მიიღოს, თუმცა დაამთავრებს თუ არა დიეტას, კარგ ვარიანტში დაუბრუნდება იმავე წონას, ცუდ ვარიანტში მიიღებს უფრო მეტს,“ - აღნიშნულ საკითხებზე ზაზა თელიამ რადიო თავისუფლების ეთერში ისაუბრა.

წყარო: ​რადიო თავისუფლება

წაიკითხეთ სრულად