Baby Bag

4 აკრძალული პროდუქტი წლამდე ასაკის ბავშვისთვის

4  აკრძალული პროდუქტი წლამდე ასაკის ბავშვისთვის

წლამდე ასაკის ბავშვის საჭმლის მომნელებელი სისტემა სრულფასოვნად ჩამოყალიბებული არ არის. არსებობს გარკვეული საკვები პროდუქტები, რომელთა გადამუშავება წლამდე ასაკის ბავშვის კუჭ-ნაწლავს არ შეუძლია. ჩვენს სტატიაში 4 ასეთ პროდუქტს გაგაცნობთ.

1. თაფლი

წლამდე ასაკის ბავშვისთვის თაფლის მირთმევა არ შეიძლება, რადგან ეს ჩვილებში ბოტულიზმის განვითარების რისკებს ზრდის, რაც კვლევებითაც დადასტურებულია. ჩვილის ორგანიზმი ამ პრუდუქტს სათანადოდ ვერ გადაამუშავებს, რამაც შესაძლოა ორგანიზმში პათოგენური ბაქტერიების მოგროვებას შეუწყოს ხელი. ზრდასრულებისთვის თაფლი ამ მხრივ რისკს არ წარმოადგენს, თუმცა წლამდე ასაკში ის საშიშ პროდუქტად მიიჩნევა.

2. თხილეული

თხილეული მცირეწლოვანი ბავშვისთვის ადეკვატური პროდუქტი არ არის. მისი ფორმისა და ზომის გამო ის დახრჩობის რისკს ზრდის. კვების რაციონში თხილეულის ნაადრევად შეტანა ზრდის ალერგიებისა და აუტოიმუნური დაავადებების განვითარების რისკებს.

3. ძროხის რძე

ძროხის რძე ხარისხიანი საკვები პროდუქტია, რომელსაც მაღალი კვებითი ღირებულება აქვს, თუმცა ბავშვის სიცოცხლის პირველ წელს მისი მიღება რეკომენდებული არ არის. იმ შემთხვევაში, თუ დედას რძე არ აქვს, ბავშვი სპეციალური ფორმულით უნდა გამოკვებოს, რომლის მონელება ჩვილის ორგანიზმს არ გაუჭირდება.

4. შაქარი

წლამდე ასაკის ბავშვის რაციონში შაქრის ჩართვისგან თავი შეიკავეთ! შაქარმა, შესაძლოა, მეტაბოლური პათოლოგიები და პანკრეასის ზედმეტი გადატვირთვა გამოიწვიოს. შაქარი ბავშვის გემოვნების აღქმასაც ცვლის, რამაც, შესაძლოა, სამომავლოდ მის კვებით ჩვევებზე გავლენა მოახდინოს.

როგორც ხედავთ, წლამდე ასაკის ჩვილებისთვის არსებობს აკრძალული საკვები პროდუქტები, რომელიც მათ რაციონში არავითარ შემთხვევაში არ უნდა იყოს. წინააღმდეგ შემთხვევაში, გაიზრდება ჯანმრთელობის სერიოზული პრობლემების განვითარების რისკი, უმჯობესია ამ დროს უპირატესობა მიანიჭოთ ძუძუთი კვებას და ეტაპობრივად შემოიტანოთ დამატებითი კვება.

წყარო: ​youaremom.com

შეიძლება დაინტერესდეთ

„ორი წლის ასაკში ბავშვს უნდა ჰქონდეს დაახლოებით 50-80 ან 100 სიტყვამდე მარაგი,“ - ლიკა მერაბიშვილი

„ორი წლის ასაკში ბავშვს უნდა ჰქონდეს დაახლოებით 50-80 ან 100 სიტყვამდე მარაგი,“ - ლიკა მერაბიშვილი

ფსიქოლოგიის დოქტორმა ლიკა მერაბიშვილმა ბავშვებში მეტყველების განვითარების შეფერხების პრობლემის შესახებ ისაუბრა. მან აღნიშნა, რომ ბავშვის მეტყველების განვითარება მუცლადყოფნის ეტაპზე იწყება:

„მეტყველების განვითარება მუცლადყოფნის ეტაპზე იწყება, როდესაც გარშემომყოფების საუბარი ესმის ნაყოფს. როდესაც ბავშვი იბადება, ორი თვის ასაკში რა ხმასაც გამოსცემს, ამას ეძახიან ღუღუნს. ოთხი თვის ასაკში ბავშვი გამოთქვამს ბგერებს: „და-და“ და ა.შ. ამას ჰქვია უკვე ტიტინი. რვა თვის ასაკიდან შეიძლება, რომ წამოისროლოს სიტყვები. ეს სიტყვები არის არამიზანმიმართული. ერთი წლის ასაკიდან ბავშვს უნდა შეეძლოს მიზანმიმართული სიტყვების თქმა. ორი წლის ასაკში ბავშვს უნდა ჰქონდეს დაახლოებით 50-80 ან 100 სიტყვამდე მარაგი. ​ოთხი წლის ასაკიდან ბავშვი ზმნებით საუბრობს, გრამატიკა შემოდის, ზედსართავი სახელები, ემოციური საუბარი.“

ლიკა მერაბიშვილმა იმ შემთხვევებზეც ისაუბრა, როდესაც მშობელმა ბავშვი სპეციალისტს უნდა აჩვენოს:

​როდის უნდა დაპანიკდეს მშობელი და მიაკითხოს სპეციალისტს? თუ ხედავს, რომ წლინახევრის ასაკში ბავშვი არ საუბრობს, ეს საყურადღებოა. არ საუბრობს არ ნიშნავს, რომ სიტყვებს არ ამბობს. თუ ეუბნებით, სად არის ცხვირი და ცხვირზე იდებს ხელს, სად არის ბურთი და ბურთისკენ იშვერს ხელს, თუ კომუნიკაციაში შემოდის, შესაბამისად, უკვე მეტყველებს და არ არის საგანგაშო. ძველ თაობაში ასეთი მითი იყო: „მეც გვიან დავიწყე საუბარი და ჩემი შვილის გვიან დაიწყებს საუბარს.“ გარშემომყოფები ამბობენ: „ზარმაცია და ალბათ, ოდესმე დაიწყებს საუბარს." რეალურად უმჯობესია, რომ სპეციალისტმა ნახოს. წლინახევრიდან უკვე რეკომენდებულია, რომ მშობლებმა მიმართონ სპეციალისტს, თუ კომუნიკაციაში არ შემოდის ბავშვი.“

​თუ დედას არ სცალია, მამას არ სცალია, გარშემომყოფებს არ სცალიათ, ბავშვთან კომუნიკაციას ვერავინ ვერ ამყარებს. რაც უნდა ვილაპარაკოთ, რომ ბავშვები მოვარიდოთ ტელევიზორს, ტექნიკა ნაკლებად ჩავრთოთ, რეალურაც ცხოვრებაში მეც მქონია შემთხვევა, რომ დამისვამს ბავშვი ტელევიზორთან. ამ დროს ეს ძალიან ცუდია. ვეცადოთ, რომ მიზანმიმართულად გამოვიყენოთ გაჯეტები,“- აღნიშნულ საკითხებზე ლიკა მერაბიშვილმა ტელეკომპანია „რუსთავი 2“-ის გადაცემაში „დილა მშვიდობისა საქართველო“ ისაუბრა.

წყარო: ​„დილა მშვიდობისა საქართველო“

წაიკითხეთ სრულად