Baby Bag

„დილით, სანამ ბავშვი საუზმეს მიირთმევს, სასურველია, დავუჭრათ ბულგარული წიწაკა და სტაფილო და წავახემსოთ,“ - პედიატრი ინგა მამუჩიშვილი

„დილით, სანამ ბავშვი საუზმეს მიირთმევს, სასურველია, დავუჭრათ ბულგარული წიწაკა და სტაფილო და წავახემსოთ,“ - პედიატრი ინგა მამუჩიშვილი

პედიატრმა ინგა მამუჩიშვილმა ბავშვთა კვებაში კომბოსტოსა და ბულგარული წიწაკის გამოყენების მნიშვნელობაზე ისაუბრა:

„ძალიან მნიშვნელოვანი ელემენტია სელენი, რომელსაც დიდი რაოდენობით შეიცავს ბროკოლი, ყვავილოვანი კომბოსტო, ე.წ. ბრიუსელის კომბოსტო, რომელიც ასევე შეიცავს ანტიოქსიდანტურ ვიტამინებს. ხშირად მშობლები კომბოსტოს არ იყენებენ ბავშვთა კვებაში, თითქოს კომბოსტო დისკომფორტს შეუქმნის ბავშვის კუჭ-ნაწლავს. კომბოსტოს აქვს ძალიან მნიშვნელოვანი სასარგებლო თვისებები, რომელიც აუცილებლად უნდა იყოს გამოყენებული.

ძალიან კარგია ბულგარული წიწაკა. სხვათა შორის, მაქვს ინფორმაცია იმასთან დაკავშირებით, რომ დილით, სანამ ბავშვი მიირთმევს საუზმეს და მიირთმევს ფაფას, სანამ ეს ყველაფერი გამზადდება (ძირითადად ფაფას აჭმევენ ხოლმე ბავშვებს), სასურველია, ბავშვს დავუჭრათ ცოტა ბულგარული წიწაკა და სტაფილო ცოცხლად და მცირეოდენით წავახემსოთ. ეს აღძრავს მადას, გარდა იმისა, რომ აქვს კაროტინი. ეს უნდა მოხდეს სეზონურად. პროდუქტი უნდა იყოს ქართული. მშობელმა ძალიან უნდა იზრუნოს შვილის კვებაზე და თითოეულ დეტალს უნდა მიაქციოს ყურადღება, რომ ჯანსაღი პროდუქტი მიაწოდოს ბავშვს,“- მოცემულ საკითხზე ინგა მამუჩიშვილმა ტელეკომპანია „პულსის“ ეთერში ისაუბრა.

წყარო: ​„პულსი“

შეიძლება დაინტერესდეთ

„ბავშვმა არ უნდა იგრძნოს, რომ დაღლილ დედას ან დაღლილ მამას არ ვუყვარვარ... დაღლილზეც შეიძლება, რომ სიყვარული გასცე,“- ფსიქოლოგი მზიკო დალაქიშვილი

ფსიქოლოგმა მზიკო დალაქიშვილმა მშობელსა და ბავშვს შორის ინტერაქციის მნიშვნელობაზე ისაუბრა:

„თუ მშობელი გასულია და მთელი დღე არ არის ბავშვთან, მე ვურჩევდი, რომ თუნდაც ტელეფონით ჰქონდეს ურთიერთობა, დაურეკოს, მოიკითხოს. ჩემი შვილი ხშირად ურეკავს მამას და სიგიჟემდე მიყვარხარო, ეუბნება. თვითონ აკეთებს ამას. მამაც, რა თქმა უნდა, ასეთ რამეს რომ მოისმენს შვილისგან, სულ რომ ჩაკეტილი ჰქონდეს გული, ეს ძალიან გაუხარდება. ბავშვი თუ მშობელთან ღიაა, მშობელიც სწავლობს მისგან ამ ღიაობას. ყველა ბავშვი ხომ მეტად თავისუფალია და ეს თავისუფლება, შეიძლება ბავშვისგან ისწავლოს მშობელმა.

რაც შეეხება თამაშის წესებს და რიტუალს, რაც უნდა დაღლილი მოვიდეს მშობელი სახლში, თუ ბავშვს იმ ემოციას გადასცემს, რომ მისი ნახვა გაუხარდა, ეს მნიშვნელოვანია. დაღლილმაც შეიძლება რაღაც ეთამაშოს ბავშვს, წამოწვეს და ითამაშონ. ბავშვები გიჟდებიან, როდესაც ვითომ აწვალებენ მშობელს თამაშ-თამაშით. მთავარია მათი ინტერაქცია და ურთიერთობა. არ არის აუცილებელი, ეს თამაში იყოს ის, რომ მაინდამაინც კუბიკები ააშენონ.

ბავშვის მთავარი ბაზისური მოთხოვნილება არის, რომ მიიღოს ყურადღება, აღიარონ. ამის გაკეთება არ არის რთული, როდესაც შენც გიხარია ბავშვის ნახვა. ბავშვის წესებით თამაშს რაც შეეხება, ეს ძალიან კარგია, რადგან ბავშვი გრძნობს, რომ ის მნიშვნელოვანია. დედა, მამა და ბავშვი ერთად - ეს არის ძალიან მნიშვნელოვანი! ეს ბავშვისთვის იმხელა ძალის მიმცემია, როდესაც ამ მთლიანობას განიცდის ბავშვი. სხვანაირად ბედნიერები არიან ბავშვები, როდესაც ამ ერთობას გრძნობენ. ბავშვმა არ უნდა იგრძნოს, რომ დაღლილ დედას არ ვუყვარვარ, დაღლილ მამას არ ვუყვარვარ. დაღლილზეც შეიძლება, რომ სიყვარული გასცე,“- მოცემულ საკითხზე მზიკო დალაქიშვილმა საპატრიარქოს ტელევიზიის გადაცემაში „ზღვარი მარინა კაჭარავასთან ერთად“ ისაუბრა.

წყარო: ​„ზღვარი მარინა კაჭარავასთან ერთად“

წაიკითხეთ სრულად