Baby Bag

„ძალიან მნიშვნელოვანია გვიყვარდეს შვილიშვილებისა და შვილების წახალისება, მაგრამ არა ტკბილეულით,“- ნუტრიციოლოგი მარი მალაზონია

„ძალიან მნიშვნელოვანია გვიყვარდეს შვილიშვილებისა და შვილების წახალისება, მაგრამ არა ტკბილეულით,“- ნუტრიციოლოგი მარი მალაზონია

ნუტრიციოლოგმა მარი მალაზონიამ ბავშვებში სწორი კვებითი ჩვევების ჩამოყალიბების მნიშვნელობაზე ისაუბრა:

„ძალიან მნიშვნელოვანია გვიყვარდეს შვილიშვილებისა და შვილების წახალისება, მაგრამ არა იმ ტკბილეულით, რომლის გადაჩვევასაც მერე ვცდილობთ ხოლმე. ჩვენ დავაჩვევთ ამას და მერე ვცდილობთ გადავაჩვიოთ. დაჯილდოვება და წახალისება ხდება სხვა ფორმითაც, არ არის საჭირო, რომ ეს გავაკეთოთ მხოლოდ ტკბილეულით. როდესაც ვლაპარაკობთ, რომ რაღაც უყვარს ბავშვს და ვერ გადავაჩვიე, აუცილებლად გავიხსენოთ, იქნებ ჩვენ გავასინჯეთ ეს პროდუქტი, რომელიც თვითონაც ვიცოდით, რომ არც ისე ჯანსაღია, მაგრამ გემრიელია. ბავშვის საგემოვნო ადაპტაცია მოხდა ჩვენი დამსახურებით. ასეთ შემთხვევაში ჩვენი პასუხისმგებლობა აუცილებლად უნდა გავიხსენოთ. თავიდანვე ნუ შევთავაზებთ ბავშვებს იმ პროდუქტს, რომელთანაც მერე იძულებით განშორება ძალიან მტკივნეული იქნება.

როდესაც ჩვენ ვეუბნებით ჩვენს შვილებს, რომ რაღაც პროდუქტი კარგია და რაღაც ცუდია, ამის მაგალითები, პირველ რიგში, ჩვენ ვართ. თუ ჩვენ არაჯანსაღ პროდუქტებს ხშირად მივირთმევთ, ეს აუცილებლად არის ცუდი მაგალითი. ჩვენ გვაქვს ოჯახში დიდი პასუხისმგებლობა. ჩვენი კვებითი ჩვევები, მაგალითად, მარილიანობის ჩვენი აღქმა, შეიძლება ოჯახისთვის ცუდი ტვირთი იყოს. თუ მუდმივად ჭარბად ვამარილებთ კერძს, ოჯახის წევრები ეჩვევიან ამას და მოთხოვნილება უჩნდებათ, რომ ასეთი პროდუქტები მიირთვან,“- მოცემულ საკითხზე მარი მალაზონიამ ტელეკომპანია „იმედის“ გადაცემაში „იმედის დღე“ ისაუბრა.

წყარო: ​„იმედის დღე“

შეიძლება დაინტერესდეთ

„დედა არის მთავარი მოქმედი პირი და ოჯახში ამის ხაზგასმა აუცილებელია,“ - ფსიქოლოგი ირმა კვაჭაძე

„დედა არის მთავარი მოქმედი პირი და ოჯახში ამის ხაზგასმა აუცილებელია,“ - ფსიქოლოგი ირმა კვაჭაძე

ფსიქოლოგმა ირმა კვაჭაძემ ქალებში მშობიარობის შემდგომი დეპრესიისა და სტრესის შესახებ ისაუბრა. მან აღნიშნა, რომ ახალბედა დედებისთვის ყველაზე მნიშვნელოვანი ახლობლების მხარდაჭერაა:

„დეპრესია არის ღრმა კლინიკური მდგომარეობა. ამ დროს არის ირაციონალური ფიქრები, რომ არ გადამივარდეს ფანჯრიდან ბავშვი, ჩემთან იყოს. დედას ორი უკიდურესობა აქვს, ან საერთოდ არ ეკარება ბავშვს, ან არავის არ აძლევს. მას ძილის რეჟიმი მთლიანად დარღვეული აქვს. ემოციური ფონის მომატების დროს არ ეძინება. ​დედას დარღვეული აქვს კვების რუტინაც. როდესაც მისი ემოციური მდგომარეობა და ქცევა უკონტროლოა, დიახ, ეს არის დეპრესია.“

ირმა კვაჭაძის თქმით, დედებში ხასიათის ცვლილებას ჰორმონალური დისბალანსი იწვევს:

„ხასიათის ცვლილება ჰორმონალური დისბალანსით არის გამოწვეული. საგანგაშო მდგომარეობა არის პირველი ორი კვირის ფარგლებში. ბავშვის რიგითობას არანაირი მნიშვნელობა არ აქვს. პირველი ბავშვია, თუ მესამე, დეპრესია მაინც შეიძლება განვითარდეს.“

„პირველი, რაც დედას სჭირდება, არის მხარდაჭერა, მისი პერსონის ხაზგასმა. როდესაც ოჯახში უფროსი თაობა ამბობს: „შენ რა იცი, ჩემი აზრი უნდა გაითვალისწინო,“ დედას უჩნდება განცდა, რომ მისი როლი დაკნინებულია. დედის როლის ხაზგასმა არის აუცილებელი. დედა არის მთავარი მოქმედი პირი და ამის ხაზგასმა არის ძალიან მნიშვნელოვანი მისი მხარდაჭერისთვის. ​პრობლემაა, როდესაც დედას ყველა ეხმარება თავისი შეხედულებისამებრ. დედას უნდა გამოუყონ სივრცე, მისცენ ძილის საშუალება, დაეხმარონ სახლის საქმეების კეთებაში. ბავშვთან ისეთი შეხება უნდა ჰქონდეთ, როგორიც დედას უნდა. დედისთვის ბავშვთან შეხება ყველაზე საკრარული მომენტია,“ - აღნიშნულ საკითხზე ირმა კვაჭაძემ ტელეკომპანია „რუსთავი 2“-ის გადაცემაში „სხვა შუადღე“ ისაუბრა.

წყარო: ​„სხვა შუადღე“

წაიკითხეთ სრულად