Baby Bag

„ბავშვს ტკბილის სახით შეიძლება მივცეთ სახლში მომზადებული ორცხობილა, კექსი, სხვა პროდუქტი კრემის გარეშე,“- პედიატრი ინგა მამუჩიშვილი

„ბავშვს ტკბილის სახით შეიძლება მივცეთ სახლში მომზადებული ორცხობილა, კექსი, სხვა პროდუქტი კრემის გარეშე,“- პედიატრი ინგა მამუჩიშვილი

პედიატრმა ინგა მამუჩიშვილმა ბავშვის იმუნური სტატუსის გაძლიერებისთვის მშობლებს საინტერესო რჩევები მისცა:

„როგორ ავუმაღლოთ ბავშვს იმუნური სისტემა? ბავშვს ჯერ არ აქვს ჩამოყალიბებული იმუნური სისტემა. მას აქვს მხოლოდ გარკვეული ელემენტები, რომელიც ჩვენ უნდა გავაღვივოთ. მშობლები ხშირად სვამენ კითხვას: „რატომ ავადობს ჩემი შვილი? ჩემი შვილი ავადობს ხშირად და მისი სუსტი წერტილი არის ყელი.“ არავითარ შემთხვევაში! უბრალოდ ხახის და ცხვირის ლორწოვანზე ხდება პირველი შეხვედრა იმუნოპრეზენტატორი უჯრედებისა და გამომწვევების, რომლებიც ორგანიზმში შეიჭრნენ. შეხვედრის ადგილზე, სადაც ისინი ხვდებიან, ხდება ლორწოვანის შეშუპება, გადიდება, შესქელება. ეს არ არის სუსტი ყელი. ეს არის შეხვედრის ადგილი, რომელიც შემდგომში ხვეწს და აძლიერებს იმუნიტეტს.

ჩვენ ბავშვის იმუნური სტატუსის გაძლიერებასა და ჩამოყალიბებას ხელი უნდა შევუწყოთ სწორი კვებით. ბავშვს მენიუში აუცილებლად უნდა ჰქონდეს ბურღული, ხორცი, ვიტამინები ხილის და ბოსტნეულის სახით, რძემჟავა ბაქტერიების შემცველი რძემჟავა პროდუქტები. ბავშვს აუცილებლად სჭირდება რაღაც, რასაც ითხოვს დღის განმავლობაში. ეს განსაკუთრებით შეიძლება ორი წლის ზემოთ ასაკის ბავშვებისთვის. სახლში მომზადებული ორცხობილა, კექსი თუ სხვა პროდუქტი კრემის გარეშე შეიძლება მივცეთ ბავშვს ტკბილის სახით. შეიძლება ბავშვი ოდნავ წავახემსოთ ასეთი პროდუქტითაც. ეს ზოგჯერ აუცილებელი ხდება, მერწმუნეთ, იმიტომ, რომ ბავშვები ამას კატეგორიულად ითხოვენ. ამას ითხოვს ზოგადი სუფრა, როდესაც სუფრაზეა რაღაც და ბავშვები ამას უყურებენ. ეს რომ არ გადავიდეს ბავშვისთვის პრინციპზე: „აკრძალული ხილია და აკრძალული ხილი გემრიელია,“ მან არ დაიწყოს ამის ჩუმად მოპარვა, ჩუმად გემოს გასინჯვა, ჩვენ შეგვიძლია დოზირებულად, ძალიან მცირედ ეს მივაწოდოთ,“- აღნიშნულ საკითხზე ინგა მამუჩიშვილმა ტელეკომპანია „პულსის“ ეთერში ისაუბრა.

წყარო: ​ტელეკომპანია „პულსი“

შეიძლება დაინტერესდეთ

თუ ბავშვი მაღაზიაში ისტერიკას გიწყობთ, სიმშვიდე შეინარჩუნეთ და მისი მოთხოვნები არ შეასრულოთ

თუ ბავშვი მაღაზიაში ისტერიკას გიწყობთ, სიმშვიდე შეინარჩუნეთ და მისი მოთხოვნები არ შეასრულოთ

ბავშვები ყველაზე ხშირად სწორედ სასურსათო მაღაზიებში ჭირვეულობენ. ზოგიერთი მათგანი იწყენს, ნაწილი კი განათებებისა და ხმაურის გამო ძალიან აღგზნებულია. მთავარი მიზეზი, რის გამოც პატარები მაღაზიებში კონტროლს კარგავენ, დახლებზე მოთავსებული პროდუქტებია, რომლებიც მათ ძალიან უყვართ.

მშობლების დიდი ნაწილი, შვილის მხრიდან ისტერიკის მოწყობის შიშით, ბავშვს სასურსათო მაღაზიებში აღარ ატარებს, რაც დიდი შეცდომაა. იმისთვის, რომ ბავშვმა მაღაზიაში ისტერიკების მოწყობა სამუდამოდ შეწყვიტოს, მშობლებმა გარკვეული რეკომენდაციები უნდა დაიცვან. შვილის სახლში დატოვება გამოსავალი არ არის და პრობლემის მოგვარებაში ვერ დაგეხმარებათ.

ბავშვის საჯარო სივრცეში გაყვანამდე გარკვეული წესები შეიმუშავეთ. პატარებმა უნდა იცოდნენ, რა სახის ქცევებია მისაღები, როდესაც ისინი მაღაზიაში იმყოფებიან. თქვენს შვილს აუხსენით, რომ სათამაშო მოედანზე ყვირილი და სირბილი სავსებით ნორმალური მოვლენაა, თუმცა სურსათის მაღაზიაში მსგავსი ქცევა მოსაწონი არ არის. ბავშვს განუმარტეთ, რომ მაღაზიაში ყოველთვის თქვენთან ერთად უნდა იყოს, არ ირბინოს და თაროებიდან პროდუქტები დაუკითხავად არ აიღოს. თქვენს შვილს აუხსენით, რა შედეგები მოჰყვება მის დადებით და უარყოფით ქცევას.

ნეგატიური ქცევის პრევენციას უდიდესი მნიშვნელობა აქვს. ვიდრე ბავშვს მაღაზიაში წაიყვანთ, დარწმუნდით, რომ ის კარგად არის გამოძინებული და დანაყრებული. თუ ბავშვი დაღლილი ან გაღიზიანებულია, მასთან ერთად პროდუქტების შესაძენად ნუ წახვალთ.

მაღაზიაში რომ შეხვალთ, ბავშვი აუცილებლად რამით დაასაქმეთ. თუ ის თავს დაკავებულად იგრძნობს, აღარ იჭირვეულებს. თაროებიდან აღებული პროდუქტები თქვენს შვილს მიაწოდეთ და უთხარით, რომ კალათაში ჩაალაგოს.

ბავშვის ნეგატიურ ქცევას ყოველთვის ერთი და იმავე მეთოდებით უნდა უპასუხოთ. თუ ბავშვი სირბილს დაიწყებს, გარეთ გამოიყვანეთ და უთხარით, რომ შესვენება გაქვთ. მას მაღაზიაში დაბრუნების უფლება მანამ არ უნდა მისცეთ, სანამ არ დამშვიდდება. თუ თქვენი შვილი ისტერიკას გიწყობთ და მოითხოვს, რომ მისთვის გარკვეული პროდუქტი შეიძინოთ, მის ქცევას ყურადღება არ მიაქციოთ. ბავშვების უდიდესმა ნაწილმა იცის, რომ ყვირილით და ტირილით მშობლებს საჯარო სივრცეში უხერხულ მდგომარეობაში აყენებენ, რის გამოც ისტერიკას ისინი იარაღად იყენებენ. არასდროს უყიდოთ ბავშვს პროდუქტი, როდესაც ის ამას დაჟინებით მოითხოვს. მან უნდა იცოდეს, რომ ტირილით ან ყვირილით ვერასდროს მიიღებს იმას, რაც სურს.

ბავშვი აუცილებლად წახალისეთ, როდესაც კარგად იქცევა. თუ ის მაღაზიაში მშვიდად დაგყვებათ, არ ტირის და არაფერს ითხოვს, საჩუქრად საყვარელი ტკბილეული უყიდეთ ან კარგი ქცევისთვის შეაქეთ.

ბავშვი მაღაზიაში ხშირად ატარეთ, მაშინად კი, როდესაც მხოლოდ ერთი ან ორი პროდუქტის შესაძენად მიდიხართ. თქვენი შვილის ქცევას დააკვირდით და მას მაღაზიაში მისაღები ქცევის წესების შესწავლაში დაეხმარეთ.

მომზადებულია​ verywellfamily.com-ის მიხედვით

თარგმნა ია ნაროუშვილმა 

წაიკითხეთ სრულად