Baby Bag

„როგორ შევარჩიოთ კარგი სკოლა?“ - გია მურღულიას საინტერესო პასუხი

„როგორ შევარჩიოთ კარგი სკოლა?“ - გია მურღულიას საინტერესო პასუხი

ფილოლოგიის დოქტორმა გია მურღულიამ ბავშვის აღზრდაში სკოლის როლისა და დანიშნულების შესახებ ისაუბრა. მან აღნიშნა, რომ სკოლამ ბავშვს ნებისყოფა, შრომისმოყვარეობა და მიზანსწრაფულობა უნდა ასწავლოს:

„ადამიანს ნებისყოფა თუ არ აქვს, წასულია იმის საქმე. ის პიროვნებადაც ვერ შედგება. ვერცერთ საქმეს ვერც ბოლომდე განახორციელებს, ვერც ხარისხიანად გააკეთებს. შრომისმოყვარეობა, უნდა ისწავლებოდეს თუ არა ეს? რა თქმა უნდა, უნდა ისწავლებოდეს. ნებისყოფა, შრომისმოყვარეობა, მიზანსწრაფულობა, ალგორითმის გააზრების უნარი, ​ეს უნდა მასწავლოს მე სკოლამ, ოჯახმაც უნდა მასწავლოს. არანაკლებ მნიშვნელოვანია ღირებულებათა სისტემის ჩამოყალიბება ჩემში. ეს დედამ და მამამ უნდა მასწავლოს, პირველ რიგში, რომ კარგი ადამიანი ვიყო, არ შევეცადო სხვისი უბედურების ხარჯზე შევქმნა ჩემი ბედნიერება, არ ვიყო მიმტაცებელი, მომხვეჭელი. ეს მაგალითებით, ლიტერატურით, ისტორიით უნდა მასწავლონ. ეს საგნები რისთვის არის, რისთვის ისწავლება? ყველა საგანს თავისი ფუნქცია აქვს.“

გია მურღულიამ საინტერესო პასუხი გასცა კითხვას, თუ როგორ უნდა შევარჩიოთ კარგი სკოლა ბავშვისთვის:

„ხანდახან მეკითხებიან: „როგორ შევარჩიოთ კარგი სკოლა?“ მიდი და პირველ რიგში, ეს იკითხე: „როგორია თქვენს სკოლაში აღზრდის სისტემა?“ ეს არის პირდაპირი ნიშანი იმისა, რამდენად ხარისხიანია ეს სკოლა. მარტო ჩემზე რომ იყოს დამოკიდებული, ყველა სკოლის შესასვლელში მივაწერდი გურამიშვილის სიტყვებს: „ყმაწვილი უნდა სწავლობდეს საცნობლად თავისადაო: ვინ არის, სიდამ მოსულა, სად არის, წავა სადაო.“ ​სამივე დროში უნდა მოააზრებინო ბავშვს თავისი თავი, როგორც თვითონაც სამსახოვანს. ნებისმიერი ჩვენგანი ინდივიდია, მეორე თქვენგანი არც აქამდე ყოფილა, არც დაიბადება. თქვენ ხართ განუმეორებელი. მეორე მხრივ, თქვენ წარმოადგენთ ჩვენს ქვეყანას, ხართ ქართველი, მესამე მხრივ, თქვენ ხართ ზოგადად ადამიანი, კაცობრიობის შვილი ხართ. სამივე ამ განზომილებაში თქვენ უნდა გაიაზროთ ვინ ხართ თქვენ, საიდან მოდიხართ, სად ხართ და საით მიდიხართ.“

გია მურღულიას თქმით, პასუხისმგებლობა აღზრდაში გადამწყვეტ ფუნქციას ასრულებს:

„როგორ ფიქრობთ, ​სიტყვა „პასუხისმგებლობა“ აღზრდაში რა ფუნქციას ატარებს?! ძალიან დიდსაც და გადამწყვეტსაც, იმიტომ, რომ რაღაც იცოდე, ერთია და ამ შენი ცოდნის მიხედვით იცხოვრო, ეს სულ სხვა რამ არის. ღმერთმა სამყარო რომ შექმნა, შექმნა წესრიგი. შენი ცოდნა უნდა გაძლევდეს შესაძლებლობას, რომ მიხვდე, რა არის ეს წესრიგი. ეს ნახევარია საქმის. მეორე ნახევარი არის ის, რომ შენ თვითონ შექმნა შენი ცხოვრებით შენი საკუთარი წესრიგი. შენს ცხოვრებას გამართლება აქვს მხოლოდ მაშინ, თუ შენ ყველაფერს დაძლევ და იმაში ჩაერთვები, რისთვისაც დაიბადე ამ ქვეყანაზე.“

​ყველა მასწავლებელს აქვს შეცდომა ან ფიქრი შესაძლო შეცდომაზე. მე მქონია მარცხი და მიფიქრია, რა დავაკელი ამ ბავშვს?! დიდი მნიშვნელობა აქვს ბევრ გარემოებას: რა ოჯახში იზრდება ბავშვი, როგორი გარემოა ამ ოჯახში, როგორია ურთიერთობა მშობლებს შორის, როგორია მისი ბუნება. ფრანგი განმანათლებლები ამბობდნენ, რომ აღზრდით ყველაფრის შეცვლა შეიძლება. ზოგიერთები ფიქრობდნენ და ახლაც ფიქრობენ, რომ ადამიანის ბუნება ზოგჯერ შეუძლებელს ხდის იმას, რომ აღზრდა შედეგიანი იყოს,“ - აღნიშნულ საკითხებზე გია მურღულიამ საქართველოს პირველი არხის გადაცემაში „დღის კოდი“ ისაუბრა.

​„დღის კოდი“ 

არ დაგავიწყდეთ !!!

დაემატეთ ჯგუფში საბავშვო რეცეპტები

„ყველაფრის სათავე ის არის, ადამიანში ადამიანი აღზარდო“ - გია მურღულია
​ამის შესახებ ფილოლოგი, პედაგოგი გია მურღულია სოციალურ ქსელში წერს

შეიძლება დაინტერესდეთ

„მუცელზე წოლა ერთ-ერთი არასასურველი პოზაა, ამ დროს ზეწოლა ხდება სისხლძარღვებზე,“ - თერაპევტი ლია ჭანტურიძე

„მუცელზე წოლა ერთ-ერთი არასასურველი პოზაა, ამ დროს ზეწოლა ხდება სისხლძარღვებზე,“ - თერაპევტი ლია ჭანტურიძე

თერაპევტმა ლია ჭანტურიძემ სხვადასხვა პოზიციაში ძილის დადებით და უარყოფით მხარეებზე ისაუბრა. მისი თქმით, ყველაზე გავრცელებული პოზიცია ზურგზე წოლაა, რომელიც ერთ-ერთ საუკეთესო პოზად ითვლება ხერხემლისთვის:

„ყველაზე გავრცელებული პოზიცია არის ზურგზე წოლა, როდესაც ადამიანი წევს ზურგზე, გამართული ხელებით და ფეხებით. ის განიხილება, როგორც ერთ-ერთი საუკეთესო პოზა ხერხემლისთვის. ეს კისრისთვის და მხრებისთვის არის კარგი დასვენება. ამ დროს უმჯობესდება თავის ტვინის სისხლის მიმოქცევა, რაც ამცირებს თავის ტკივილის რისკს. ქალბატონებისთვის არის ეს საინტერესო, რადგან აუმჯობესებს მკერდის სიმკვრივეს. ეს პოზა კურნავს უძილობას.​ ამ პოზას აქვს თავისი გვერდითი მხარეები. შეიძლება, გამოიწვიოს წელის ტკივილი. ამის შესამსუბუქებლად შეგვიძლია ბალიში გამოვიყენოთ და მუხლების ქვეშ ამოვიდოთ. ასეთი პოზა ამწვავებს ხვრინვას, განსაკუთრებით იმ ადამიანებში, ვისაც აწუხებს ძილის აპნოე. მათთვის სასურველია გვერდზე წოლა. მათთვის ვისაც აქვს რეფლუქს ეზოფაგიტი, ზურგზე წოლა არ არის რეკომენდებული.“

ლია ჭანტურიძის თქმით, ხერხემლისთვის კიდევ ერთ საუკეთესო პოზად ე.წ. „მორის პოზა“ ითვლება:

„არის ასეთი „მორის პოზა.“ ეს არის გვერდზე წოლა, მარჯვენა ან მარცხენა მხარეს, გამართული ფეხებით და ხელებით. ესეც განიხილება, როგორც ერთ-ერთი იდეალური პოზა ხერხემლისთვის. ის აგვაცილებს ზურგის, კისრის და თავის ტკივილს. ამ პოზასაც აქვს თავისი გვერდითი ეფექტები. ის იწვევს ტკივილს ბარძაყის და მხრის მიდამოში, რადგან ხდება ხანგრძლივი ზეწოლა. ამის შესამსუბუქებლად შეგვიძლია ბალიში ამოვიდოთ თეძოს ქვეშ, ფეხებს შორის. გვერდით როდესაც ვწევართ,​ ამ დროს თავის ტკივილები არ არის, თუ, რა თქმა უნდა, კომფორტული ბალიში გვაქვს. სასურველია ანატომიური ბალიში გამოვიყენოთ, რომელიც შეავსებს ადგილს კისერსა და საწოლს შორის, რაც აგვარიდებს თავის ტკივილს. გვერდზე წოლამ შეიძლება გაგვიჩინოს ნაოჭები სახეზე, გამოიწვიოს ცალი მკერდის დეფორმაცია. გვერდზე წოლა იდეალური პოზაა ორსულებისთვის. ამ დროს ნაყოფის სისხლის მიმოქცევა უმჯობესდება. ის ხვრინვას ამცირებს, ამიტომ სასურველია, ვიწვეთ გვერდზე.“

ლია ჭანტურიძემ ემბრიონის პოზაზეც ისაუბრა. მისი თქმით, ასეთ პოზიციაში ძილი კომფორტულია ორსული ქალბატონებისთვის:

„ემბრიონის პოზაც გვერდზე წოლაა. ამ დროს მუხლები და ხელები უფრო მოხრილი გვაქვს. ეს პოზაც კარგია ზურგისთვის. ​ის ამცირებს რეფლუქსს, ხვრინვას, კომფორტულია ორსულებისთვისაც. ამ პოზასაც ახასიათებს მკერდის დეფორმაცია, შეიძლება გამოიწვიოს კისრის ტკივილი.“

„მუცელზე წოლა ერთ-ერთი არასასურველი პოზაა. ეს მთლიანად ხერხემლისთვის არის დატვირთვა. როდესაც ვწევართ მუცელზე, თავი შეტრიალებული გვაქვს ან მარჯვნივ, ან მარცხნივ. ​ამ დროს ზეწოლა ხდება სისხლძარღვებზე, რომლებიც გაივლის ხერხემლის მალებს შორის. სისხლი კარგად არ მიედინება თავისკენ, კვება ვერ ხდება კარგი, დილით ვიღვიძებთ თავის ტკივილით. შეიძლება გავიღვიძოთ შეშუპებით, რადგან ვენური სისხლის უკუდინებაც არ ხდება კარგად. განსაკუთრებით არ არის რეკომენდებული ასეთი ძილი ადამიანებში, რომლებსაც აქვთ სისხლძარღვების პრობლემები, ათეროსკლეროზი და ოსტეოქონდროზი,“ - აღნიშნულ საკითხზე ლია ჭანტურიძემ ტელეკომპანია რუსთავი 2-ის გადაცემაში „დილა მშვიდობისა საქართველო“ ისაუბრა.

წყარო: ​„დილა მშვიდობისა საქართველო“

წაიკითხეთ სრულად