Baby Bag

15-დღიანი ჯანსაღი დიეტა, რომელიც არაჩვეულებრივ შედეგს მოგცემთ - ბიძინა კულუმბეგოვის რეკომენდაცია

15-დღიანი ჯანსაღი დიეტა, რომელიც არაჩვეულებრივ შედეგს მოგცემთ - ბიძინა კულუმბეგოვის რეკომენდაცია

ალერგოლოგ-იმუნოლოგმა ბიძინა კულუმბეგოვმა 15-დღიანი დღეგამოშვებითი ინტერვალური შიმშილის პროგრამის შესახებ ისაუბრა, რომელიც წონაში კლების მსურველებისთვის ძალიან კარგი შედეგების მომტანია:

„მსოფლიოში ორი მოსაზრება არსებობს შიმშილთან დაკავშირებით. პირველი გახლავთ ის, რომ თუ ადამიანი საუზმეს არ მიირთმევს, წონის კლება და ჯანსაღი დიეტა შეუძლებელია. ეს არ შეესაბამება სიმართლეს. როდესაც კვლევები ჩაატარეს და შეადარეს ადამიანები, რომლებიც საუზმობდნენ და ადამიანები, რომლებიც არ საუზმობდნენ, მათში წონის კლება არაფრით არ განსხვავდება ერთმანეთისგან. ამიტომ ეს მოსაზრება არ შეესაბამება სიმართლეს.

არსებობს მეორე მოსაზრებაც, რომ მეტაბოლიზმის პროცესი ნელდება შიმშილობის დროს. ესეც არ შეესაბამება სიმართლეს, რადგან ცნობილია, რომ თუ ადამიანი შიმშილობს, ხუთჯერ მეტია მეტაბოლიზმის პროცესი, იმიტომ, რომ ცხიმის წვა ამ დროს ძლიერდება. ჩვენ შიმშილობის დროს მკვეთრად გვიუმჯობესდება მეტაბოლიზმი.

მე შევეცდები გასწავლოთ 15-დღიანი პროგრამა, რომლის დასრულების შემდეგ დარწმუნებული ვარ ყველანი კმაყოფილი დარჩებით. ეს არის ინტერვალური შიმშილის მეთოდი, როდესაც ერთი დღის განმავლობაში 16-საათიან შიმშილს ვაწესებთ. აუცილებელია, რომ იმ რვა საათში, როდესაც ვიკვებებით, ცილის რაოდენობა იყოს არაუმეტეს 25 გრამისა დღის განმავლობაში. ეს დაახლოებით 4 კვერცხს შეესაბამება. შესაძლებელია ბოსტნეულის მირთმევაც, წვნიანების მირთმევა, მაგრამ ცილის რაოდენობა უნდა იყოს შეზღუდული. 16-საათიანი შიმშილის შემთხვევაში მეორე დღეს ჩვეულებრივ ვიკვებებით. ვთქვათ, ორშაბათს ჩვეულებრივ ვიკვებებით, სამშაბათს ვიცავთ 16-საათიან ინტერვალურ შიმშილს, ოთხშაბათს ისევ ჩვეულებრივ ვიკვებებით. ეს არის დღეგამოშვებითი ინტერვალური შიმშილი. 15 დღის შემდგომ გექნებათ არაჩვეულებრივი შედეგი, ამაში თქვენ თვითონ დარწმუნდებით,“- მოცემულ საკითხზე ბიძინა კულუმბეგოვმა ტელეკომპანია „ფორმულას“ გადაცემაში „ჯანმრთელობის ფორმულა“ ისაუბრა.

წყარო: ​„ჯანმრთელობის ფორმულა“

შეიძლება დაინტერესდეთ

„როდესაც ბავშვი ამბობს: „მცივა,“ უმეტეს შემთხვევაში ამაში მშობელია დამნაშავე," - ევგენი კომაროვსკის რეკომენდაციები მშობლებს

„როდესაც ბავშვი ამბობს: „მცივა,“ უმეტეს შემთხვევაში ამაში მშობელია დამნაშავე," - ევგენი კომაროვსკის რეკომენდაციები მშობლებს

პედიატრმა ევგენი კომაროვსკიმ სოციალურ ქსელში პოსტი გამოაქვეყნა, რომელშიც მშობლებს ურჩია, რომ თავი შეიკავონ ბავშვის ზედმეტად შეფუთვისგან, როდესაც ის სასეირნოდ მიჰყავთ:

​ბავშვი სასეირნოდ თუ მიგყავთ, მას მინიმალური რაოდენობის, მაგრამ ტემპერატურის შესანარჩუნებლად საკმარისი ტანსაცმელი ჩააცვით. ბავშვს დამოუკიდებლად ჩაცმის უნარები განუვითარეთ, რათა მან თავად შეარჩიოს ტანსაცმლის ის რაოდენობა, რომელიც მისთვის სასურველია. გაციების მიზეზი უმეტესად არა სიცივე, არამედ ჭარბი ტანსაცმლის ტარების გამო გამოწვეული ძლიერი ოფლიანობაა.“

ევგენი კომაროვსკიმ მშობლებს ურჩია არ დაიჯერონ გავრცელებული მითი იმის შესახებ, რომ გარეთ უქუდოდ სიარული მენინგიტს იწვევს:

„აზრი იმის შესახებ, რომ ქუდის გარეშე სიარული მენინგიტს იწვევს, ხალხური ზღაპრის ერთ-ერთი ნათელი მაგალითია. მენინგიტი ​მწვავე ინფექციური დაავადებაა. შემთხვევათა 99 %-ში ის გამოწვეულია მიკრობით, რომელსაც მენინგოკოკი ეწოდება. აღნიშნული მიკრობის ორგანიზმში მოხვედრა საერთოდ არ არის დამოკიდებული იმაზე, თქვენ თავზე რამე გახურავთ თუ არა.“

ევგენი კომაროვსკიმ მშობლებს რეკომენდაცია მისცა ბავშვთან ერთად სეირნობისას მეტი იმოძრაონ და სხვადასხვა აქტივობით დაკავდნენ, ნაცვლად იმისა, რომ ბავშვი მეტისმეტად თბილად ჩაცმული გაიყვანონ გარეთ:

„როდესაც ბავშვი ამბობს: „მცივა,“ უმეტეს შემთხვევაში ამაში მშობელია დამნაშავე. რა თქმა უნდა, გაცილებით მარტივია ბავშვს სამი ქურთუკი ჩააცვა, თავად კი მეგობრებს გაესაუბრო, ვიდრე ​ბავშვთან ერთად ისეირნო, აქტიურად იმოძრაო, მასთან ერთად ითამაშო.“

„ყველაზე მთავარია, რომ ბავშვის ორგანიზმში მიმდინარე პროცესები სწორად დაინახოთ. ორგანიზმში ნივთიერებათა ცვლის პროცესს თან ახლავს სითბოს გამოყოფა. ​ბავშვის ორგანიზმში ნივთიერებათა ცვლა გაცილებით ინტენსიურად მიმდინარეობს, ვიდრე ზრდასრულებთან. ერთსა და იმავე დროს, ერთსა და იმავე ადგილას ბავშვის ორგანიზმი მეტ სითბოს გამოჰყოფს, ვიდრე ზრდასრულის. აქედან გამომდინარე, როდესაც ზრდასრულს სცივა, ბავშვი თავს ნორმალურად გრძნობს, თუ გარემოში ზრდასრულისთვის ნორმალური ტემპერატურაა, ბავშვისთვის თბილა, თუ ზრდასრული გრძნობს, რომ თბილა, ასეთ გარემოში ბავშვს სცხელა,“ - აღნიშნა ევგენი კომაროვსკიმ.

​წყარო

თარგმნა ია ნაროუშვილმა

წაიკითხეთ სრულად