საქართველოს განათლების, მეცნიერების, კულტურისა და სპორტის სამინისტრომ სკოლებს დოკუმენტი გაუგზავნა, სადაც მომავალი სასწავლო წლისთვის გაკვეთილების ჩატარების სხვადასხვა ფორმატს სთავაზობს, სკოლები კი თავად გადაწყვეტენ, თუ რომელ ვარიანტს აირჩევენ.
როგორც დოკუმენტშია აღნიშნული, თითოეულმა სკოლამ უნდა შეიმუშაოს მის შესაძლებლობებსა და საჭიროებებზე მორგებული საგაკვეთილო ცხრილი.
შესაძლოა, ერთცვლიანი სკოლები გადავიდნენ 2 ცვლაზე და სხვადასხვა საფეხურის მოსწავლეებმა იარონ ცვლების მიხედვით.
დოკუმენტის მიხედვით, სასწავლო წლის პირველი კვირა უნდა დაეთმოს ჰიგიენისა და უსაფრთხოების წესების გაცნობას მოსწავლეებისა და მშობლებისთვის; წესები შეიძლება გააცნონ დამრიგებლებმა, მანდატურებმა და/ან უსაფრთხოებაზე პასუხისმგებელმა პირებმა.
ცვლილება იქნება მოსწავლეთა შეფასებაში, კერძოდ, უპირატესობა უნდა მიენიჭოს კომპლექსური დავალებების კეთებას, რაც იძლევა საშუალებას, გაკვეთილების ნაცვლად ზოგჯერ დაინიშნოს საკონსულტაციო საათები დისტანციურად;
ცვლილება უნდა შევიდეს ესგ-ს იმ ნაწილში, სადაც საუბარია შეფასების სავალდებულო კომპონენტებზე (საკლასო, საშინაო და შემაჯამებელი). სკოლას უნდა მიეცეს შესაძლებლობა, მოსწავლეები შეაფასოს მხოლოდ შემაჯამებელი შეფასებით, საკლასო და საშინაო დავალების კომპონენტები იყოს სკოლის სურვილის მიხედვით (რომელიმე კლასში ან კლასებში, ერთ საგანში ან საგნებში).
,,აღნიშნული დოკუმენტი პირველადი ვარიანტია, რომელსაც კიდევ დაემატება ალტერნატივები დასაბოლოოდ, სკოლებიდან მიღებული უკუკავშირის შემდეგ, შეირჩევა საუკეთესო ვარიანტები სკოლების შესაძლებლობებიდან და საჭიროებებიდან გამომდინარე,'' - აღნიშნავენ რესურსცენტრების წარმომადგენლები.
გააზიარეთ პოსტი
თუ გინდათ, რომ განათლების სფეროში მიმდინარე სიახლეების შესახებ ინფორმირებულები იყოთ, მოიწონეთ გვერდი „მასწავლებლების სანდო წყარო“
საქართველოს სკოლებში საერთაშორისო საგანმანათლებლო პროგრამა GLOBE-ის განხორციელება იწყება
საქართველოში საერთაშორისო გარემოსდაცვითი სამეცნიერო-საგანმანათლებლო პროგრამა GLOBE დაინერგება. პროგრამის ოფიციალური გახსნის მიზნით, 22 აპრილს, დედამიწის საერთაშორისო დღეს, საქართველოს განათლების, მეცნიერების, კულტურისა და სპორტის სამინისტროსა და CENN – კავკასიის გარემოსდაცვითი არასამთავრობო ორგანიზაციების ქსელს შორის ურთიერთთანამშრომლობის მემორანდუმი ონლაინ რეჟიმში გაფორმდა. მემორანდუმს ხელი მინისტრმა მიხეილ ჩხენკელმა და CENN-ის აღმასრულებელმა დირექტორმა ნანა ჯანაშიამ მოაწერეს.
პროგრამა GLOBE ავსტრიის თანამშრომლობა განვითარებისათვის / Austrian Development Cooperation (ADC) ფინანსური მხარდაჭერით განხორციელდება. 2019-2020 სასწავლო წლის ბოლომდე პროგრამის საპილოტედ განხორცილებისთვის 5-მდე სკოლა შეირჩევა, ხოლო 2020-2021 სასწავლო წლისთვის 10 სკოლა გადამზადდება GLOBE-ში მონაწილეობის მისაღებად. სასწავლო მოდულებისა და ქართულ ენაზე თარგმნილი სასწავლო მასალების გამოყენება ნებისმიერ მსურველ მასწავლებელს შეეძლება. აღსანიშნავია ისიც, რომ GLOBE ფლობს ონლაინ სწავლების არაერთ მნიშვნელოვან ინსტრუმენტს.
მიხეილ ჩხენკელი: „სიმბოლურია, რომ დედამიწის საერთაშორისო დღეს საქართველოსთვის უაღრესად მნიშვნელოვანი პროგრამის დაწყებას ჩაეყარა საფუძველი, რისთვისაც განსაკუთრებულ მადლობას ვუხდი ორგანიზაციას ავსტრიის თანამშრომლობა განვითარებისათვის, NASA-სა და კავკასიის გარემოსდაცვითი არასამთავრობო ორგანიზაციების ქსელს. პროგრამა GLOBE ძალიან საინტერესო თემებს მოიცავს, რომელთა ცოდნა, ვფიქრობ, აუცილებელია ყველა განათლებული ადამიანისათვის. აღსანიშნავია ისიც, რომ GLOBE-ის ონლაინ ინსტრუმენტები, საბოლოო ჯამში, საქართველოს ყველა სკოლის დაფარვის შესაძლებლობას მოგვცემს. ონლაინ სწავლება კი მსოფლიო პანდემიის ფონზე განსაკუთრებულად აქტუალურია. დარწმუნებული ვარ, რომ პროგრამა დიდი წარმატებით განხორციელდება.“
ონლაინ კონფერენციის მონაწილეებს მისასალმებელი სიტყვით მიმართა ავსტრიის რესპუბლიკის სრულუფლებიანმა ელჩმა საქართველოში – არად ბენკომ და პროგრამა GLOBE-ის საქართველოში დანერგვის მნიშვნელობაზე ისაუბრა.
პროგრამა GLOBE-ის ადმინისტრირება გლობალურ დონეზე NASA-ს მიერ ხორციელდება. საერთაშორისო ქსელი აერთიანებს სხვადასხვა სასკოლო საფეხურის მოსწავლეებს, მასწავლებლებსა და მეცნიერებს გლობალური გარემოს შესასწავლად. პროგრამა მოიცავს სწავლას, ეკოლოგიური კვლევებისა და დაკვირვების განხორციელებას და სასარგებლო ინფორმაციის გაზიარებას ერთმანეთთან და საერთაშორისო სამეცნიერო საზოგადოებასთან.
GLOBE-ის არაფორმალური გარემოსდაცვითი განათლების წარმატებული საერთაშორისო პლატფორმის დანერგვა საქართველოში ხელს შეუწყობს: სამეცნიერო და სასწავლო პრაქტიკის ფართო შესაძლებლობების შექმნას საჯარო და კერძო სკოლებში; წარმატებული სკოლებისა და ადამიანების დაკავშირებას საერთაშორისო პროგრამებთან; ახალი აკადემიური ცოდნის შექმნასა და საინფორმაციო მასალების მომზადებას; მოსახლეობის ინფორმირებას გლობალური თუ ადგილობრივი გარემოსდაცვითი გამოწვევებისა და მათი გადაჭრის გზების შესახებ.
