გრიპი, გაციება თუ კოვიდი? როგორ განვასხვავოთ და როგორ ვუმკურნალოთ? - აღნიშნულ თემაზე ექიმი გიორგი ღოღობერიძე საუბრობს.
მისი თქმით, ტესტის გაკეთებას აზრი აქვს ინფიცირებულთან კონტაქტიდან 3-5 დღეში. რაც შეეხება გაციებისა და კოვიდის განსხვავებას, მათი გარჩევა დროის მიხედვით შეიძლება:
,,ტესტის გარეშე ამ ორის ერთმანეთისგან განსხვავება საკმაოდ რთულია, მაგრამ არსებობს ერთი ნიშანი და ეს არის დრო. თუ ეს არის გაიციება, გაციებულ ადამიანთან კონტაქტიდან 1 ან 2 დღეში უკვე დაეწყება ადამიანს ნიშნები, იშვიათად რომ 3-4 დღეში გამოვლინდეს, ხოლო კოვიდის დროს თუ ინფიცირებულთან კონტაქტიდან საშუალოდ 5 დღეა გასული და ნიშნები გამოვლინდა, მაშინ ეს დიდი ალბათობით კოვიდია,'' - აღნიშნავს გიორგი ღოღობერიძე.
რაც შეეხება მკურნალობას (კოვიდის და გაციების დროს), სიცხის სამართავად მხოლოდამხოლოდ ორი მედიკამენტია გამართლებული - იბუპროფენი და პარაცეტამოლი. ორივე მედიკამენეტი მიიღება დღეში 3-4 ჯერ და დოზებს შორის ინტერვალი უნდა იყოს 4-6 საათი.
თუ დარწუმებული ხართ, რომ გრიპი გაქვთ და მძიმე ფორმით გივლინდებათ, პირველ 48 საათში უნდა მიიღოთ ანტივირუსული მედიკამენტი, მერე მათ მიღებას აზრი არა აქვს, რადგან ეფექტურობა ძალიან დაბალია:
,,ძალიან ბევრი გაციებისა და კოვიდის დროს სვამს ლიმონიან ჩაის. მე გირჩევთ, რომ ჩაი ცალკე დალიოთ და ლიმონი წყალში ჩააგდოთ, რადგან C ვიტამინი ცხელ წყალში (სითბომგრძნობიარე ვიტამინია) იშლება. ლიმონიან წყალში შეგიძლიათ, თაფლიც ჩაამატოთ, ეს ხველისთვისაც კარგია.''
კოვიდის შემთხვევაში 10 დღის მერე იზოლაცია აღარ არის საჭირო.
,,შეჯამების სახით რომ ვთქვათ, კოვიდი და გაციება იმართება ერთნაირად - საჭიროა სიცხის დამწევი, სასურველია პაციენტმა მიიღოს ბევრი სითხე, იყოს აქტიური. საპანიკო არაფერია, გაციება მარტივად იმართება, ასევეა კოვიდი თუ განწყობა კარგი გაქვთ და მხნედ ხართ. ყელის ტკივილის დროს გამოიყენეთ პარაცეტამოლი, ასევე შესაძლოა გამოიყენოთ საწუწნი აბები,'' - აღნიშნავს გიორგი ღოღობერიძე.
„თუ ბავშვი ჯანმრთელია, მისთვის გამოცდაზე ნიღბის გაკეთება პრობლემას არ წარმოადგენს,“ - პულმონოლოგი თამაზ მაღლაკელიძე
მედიცინის მეცნიერებათა დოქტორი, პულმონოლოგი თამაზ მაღლაკელიძე გადაცემაში „პირადი ექიმი“ ერთიან ეროვნულ გამოცდებზე ნიღბის ტარების აუცილებლობის შესახებ საუბრობს:
„თუ ბავშვი ჯანმრთელია, მისთვის გამოცდაზე ნიღბის გაკეთება პრობლემას არ წარმოადგენს. აბიტურიენტს მეორე ნიღაბიც უნდა ჰქონდეს, რადგან ცხელა, პირბადე ადვილად სველდება, ოფლი გამოიყოფა, ბავშვიც ღელავს, სუნთქვა უხშირდება და ჰიპერვენტილაცია აწუხებს. თუ ბავშვი ბრონქოსპაზმისკენ, ანუ ბრონქების შევიწროვებისადმი, არის მიდრეკილი და აქვს ბრონქიალური ასთმა, შესაძლოა, ნიღბის ხაგრძლივმა ტარებამ ბრონქოსპაზმი გამოიწვიოს. თუ ბავშვს მსგავსი პრობლემები აქვს, მას ექიმისგან ცნობა უნდა ჰქონდეს, რათა გამოცდაზე პრობლემა არ შეექმნას.“
„აბიტურიენტებს შორის დისტანცია დაცული უნდა იყოს, თუ ეს ვერ ხერხდება, რისკ-ჯგუფში შემავალი ბავშვები ცალკე უნდა დასვან, სადაც დისტანციას დაიცავენ. გამორიცხულია, რომ პირბადის გამო კომა განვითარდეს. თუ ბავშვი ღელავს, შესაძლოა, მას თავის ტკივილებიც ჰქონდეს, ეს ემოციური მომენტია. აბიტურიენტი გამოცდაზე ზედმეტად რომ არ დაიძაბოს, აჯობებს, წინასწარ სახლშიც გაიკეთოს ხოლმე ნიღაბი, რომ შეეჩვიოს. სხვანაირად არ გამოდის, დახურულ სივრცეში, სადაც სიმჭიდროვეა, პირბადე აუცილებელია, მით უმეტეს, როდესაც უცხო ადამიანების გარემოცვაში ხარ. ახლობლების წრეში ამდენად არ ღელავ, მაგრამ ხალხმრავლობის დროს სიფრთხილის გამოჩენაა საჭირო. ბრონქიალური ასთმის მქონე აბიტურიენტებს გამოცდის წინა დღეებში აეროზოლის გამოყენება შეუძლიათ, რომელიც ბრონქებს აფართოებს,“ - აღნიშნავს თამაზ მაღლაკელიძე.
