გრიპი, გაციება თუ კოვიდი? როგორ განვასხვავოთ და როგორ ვუმკურნალოთ? - აღნიშნულ თემაზე ექიმი გიორგი ღოღობერიძე საუბრობს.
მისი თქმით, ტესტის გაკეთებას აზრი აქვს ინფიცირებულთან კონტაქტიდან 3-5 დღეში. რაც შეეხება გაციებისა და კოვიდის განსხვავებას, მათი გარჩევა დროის მიხედვით შეიძლება:
,,ტესტის გარეშე ამ ორის ერთმანეთისგან განსხვავება საკმაოდ რთულია, მაგრამ არსებობს ერთი ნიშანი და ეს არის დრო. თუ ეს არის გაიციება, გაციებულ ადამიანთან კონტაქტიდან 1 ან 2 დღეში უკვე დაეწყება ადამიანს ნიშნები, იშვიათად რომ 3-4 დღეში გამოვლინდეს, ხოლო კოვიდის დროს თუ ინფიცირებულთან კონტაქტიდან საშუალოდ 5 დღეა გასული და ნიშნები გამოვლინდა, მაშინ ეს დიდი ალბათობით კოვიდია,'' - აღნიშნავს გიორგი ღოღობერიძე.
რაც შეეხება მკურნალობას (კოვიდის და გაციების დროს), სიცხის სამართავად მხოლოდამხოლოდ ორი მედიკამენტია გამართლებული - იბუპროფენი და პარაცეტამოლი. ორივე მედიკამენეტი მიიღება დღეში 3-4 ჯერ და დოზებს შორის ინტერვალი უნდა იყოს 4-6 საათი.
თუ დარწუმებული ხართ, რომ გრიპი გაქვთ და მძიმე ფორმით გივლინდებათ, პირველ 48 საათში უნდა მიიღოთ ანტივირუსული მედიკამენტი, მერე მათ მიღებას აზრი არა აქვს, რადგან ეფექტურობა ძალიან დაბალია:
,,ძალიან ბევრი გაციებისა და კოვიდის დროს სვამს ლიმონიან ჩაის. მე გირჩევთ, რომ ჩაი ცალკე დალიოთ და ლიმონი წყალში ჩააგდოთ, რადგან C ვიტამინი ცხელ წყალში (სითბომგრძნობიარე ვიტამინია) იშლება. ლიმონიან წყალში შეგიძლიათ, თაფლიც ჩაამატოთ, ეს ხველისთვისაც კარგია.''
კოვიდის შემთხვევაში 10 დღის მერე იზოლაცია აღარ არის საჭირო.
,,შეჯამების სახით რომ ვთქვათ, კოვიდი და გაციება იმართება ერთნაირად - საჭიროა სიცხის დამწევი, სასურველია პაციენტმა მიიღოს ბევრი სითხე, იყოს აქტიური. საპანიკო არაფერია, გაციება მარტივად იმართება, ასევეა კოვიდი თუ განწყობა კარგი გაქვთ და მხნედ ხართ. ყელის ტკივილის დროს გამოიყენეთ პარაცეტამოლი, ასევე შესაძლოა გამოიყენოთ საწუწნი აბები,'' - აღნიშნავს გიორგი ღოღობერიძე.
„არ არის სწორი, რომ მუტაციის შემდეგ კორონავირუსი გახდა ბავშვებისთვის უფრო მეტად აგრესიული ან მძიმე დაავადების გამომწვევი,“ - პედიატრი ივანე ჩხაიძე
პედიატრი ივანე ჩხაიძე კორონავირუსის ახალ შტამთან დაკავშირებით საზოგადოებაში გავრცელებულ მცდარ ინფორმაციას გამოეხმაურა. მისი თქმით, ახალი შტამი ნამდვილად არის ძველთან შედარებით მეტად გადამდები, თუმცა რამდენად გაზრდის ის ლეტალობის მაჩვენებელს, ამის შესახებ მედიკოსებს ინფორმაცია ჯერ არ აქვთ:
„ჯერჯერობით არის მოლოდინი იმისა, რომ ახალი შტამი ნამდვილად არის უფრო მეტად გადამდები, მაგრამ უფრო მეტად გადამდებლობა შეიძლება თუ არა გამოიხატოს შემდეგ მეტ ლეტალობის მაჩვენებელში, უფრო მეტ ჰოსპიტალიზაციაში, ამ ინფორმაციას ამერიკის დაავადებათა კონტროლის ცენტრი არ გვაწვდის.“
ივანე ჩხაიძის თქმით, ბავშვებისთვის ახალი შტამი მეტად აგრესიული ან მძიმე დაავადების გამომწვევი არ არის:
„ასევე ინფორმაცია ბავშვებთან დაკავშირებით, ის კვლევები, რომლებიც ჩატარებულია და მონაცემები, რომლებიც დღეისთვის არსებობს, არ მიუთითებს, რომ კორონავირუსის ეს მუტაცია გახდა ბავშვებზე უფრო მეტად ორიენტირებული და საშიში ბავშვებისთვის. თუ იმ ფაქტს გავითვალისწინებთ, რომ 40-70% -ით მეტად არის გადამდებლობა, ახალი შტამი ასევე გამოიწვევს ბავშვებში შემთხვევების მატებას, ეს ნამდვილად ასეა, ლოგიკურია. ის, რომ კორონავირუსმა მუტაციის შემდეგ შეიცვალა ხასიათი და გახდა ბავშვებისთვის უფრო მეტად აგრესიული ან მძიმე დაავადების გამომწვევი, ეს არ არის სწორი.“
„არავინ არ ამბობს, რომ კორონავირუსის ახალი შტამი გახდება უფრო მეტად მძიმე დაავადების გამომწვევი. არ არის ეს ინფორმაცია სწორი. იმის გამო, რომ ახალი შტამის ერთი შემთხვევა დაფიქსირდა საქართველოში, ავტომატურად ჩავთვალოთ, რომ ამას მოჰყვება მძიმე შემთხვევების მატება, დაგვჭირდება საწოლების და სუნთქვის აპარატების დამატება, ეს არის სრული დეზინფორმაცია,“ - აცხადებს ივანე ჩხაიძე.
