Baby Bag

„გაწუხებს მშრალი ხველა? აი, როგორ მოაგვარო,“ - გიორგი ღოღობერიძის რჩევები

„გაწუხებს მშრალი ხველა? აი, როგორ მოაგვარო,“ - გიორგი ღოღობერიძის რჩევები

ექიმმა გიორგი ღოღობერიძემ ადამიანებს, რომლებსაც მშრალი ხველა აწუხებთ ხველის დასამარცხებლად საინტერესო რჩევები მისცა. მისი თქმმით, ხველის საწინააღმდეგო მედიკამენტების უდიდესი ნაწილი ეფექტიანი არ არის:

„კოვიდის მერე ბევრს აწუხებს ეს სიმპტომი, ხველა, რომელიც არის მშრალი. ასეთ ხველას ნახველი არ ახლავს და არის საკმაოდ შემაწუხებელი. საქართველოში გამოყენებული ხველის საწინააღმდეგო მედიკამენტების უმრავლესობა ხველაზე მაინცდამაინც ეფექტიანი არ არის. ​მე გიყვებით მხოლოდ კოვიდის დროს არსებულ ხველაზე. თუ ხველა კოვიდის დროს დაგეწყო და პირველ თვეს არ აგილაგდა, მაშინ ალბათობა იმისა, რომ ის კიდევ დიდხანს დაგრჩეს, ძალიან მაღალია. შეიძლება ეს ხველა კიდევ 6-9 თვე იყოს.“

გიორგი ღოღობერიძემ მშრალი ხველის დასამარცხებლად მარტივი გამოსავალი შემოგვთავაზა:

„მშრალი ხველის დროს ძალიან მარტივი გამოსავალი არსებობს. პირველი, უნდა მიიღო სითხეები. როდესაც ორგანიზმს ტემპერატურა მაღალი აქვს, ამ დროს სითხე ორთქლდება. სითხე რომ ორთქლდება,​ სასუნთქი გზები შრება, რაც იწვევს ხველას. მშრალი სასუნთქი გზები არის მიზეზი ხველის, ამიტომ სითხეები უნდა გაზარდო. მეორე რჩევა არის ორთქლის ინჰალაციის ჩატარება. მაღალი ტემპერატურის ორთქლის ინჰალაცია იდეალური გზაა და უფრო ეფექტიანია, ვიდრე ხველის დამთრგუნავი მედიკამენტები.“

„მედიკამენტებზე ეფექტიანი საშუალება, რომელსაც არც კი სჭირდება რეცეპტი, არის თაფლი. ​შეგიძლია ჩაი შეავსო თაფლით​ და თაფლიანი ჩაი მიიღო. არ დაგავიწყდეს, რომ თაფლის მიღება წლამდე ასაკის ბავშვებში არ შეიძლება.თუ გინდა, რომ თაფლიანი ჩაი კიდევ უფრო ეფექტიანი იყოს, შეგიძლია დაამატო პიტნა. ლიმონსაც თუ დაამატებ, საერთოდ იდეალური იქნება. აჰა, შენ კოქტეილი, რომელიც გამოგადგება მშრალი ხველის წინააღმდეგ,“ - აღნიშნა გიორგი ღოღობერიძემ.

წყარო: ​Usmle მოსამზადებელი ცენტრი

არ დაგავიწყდეთ !!!

Momsedu.ge-მ თქვენთვის შექმნა ახალი სივრცე. გაწევრიანდით ჯგუფში ჯანმრთელობა

ხველის გაჩერება 3 წამში - გიორგი ღოღობერიძის რჩევები
როგორ შევაჩეროთ ხველა 3 წამში - ექიმ რეზიდენტ გიორგი ღოღობერიძის რჩევები. ნახეთ ვიდეო ☝️ წყარო: Usmle მოსამზადებელი ცენტრი - Ghoghoberidze, M.D.

შეიძლება დაინტერესდეთ

5 რამ, რაც ბავშვის ფსიქიკური ჯანმრთელობისთვის მნიშვნელოვანია

5 რამ, რაც ბავშვის ფსიქიკური ჯანმრთელობისთვის მნიშვნელოვანია

საყოველთაოდ ცნობილია, რომ ბავშვის ფიზიკური ჯანმრთელობისთვის აუცილებელია მას სახლი, საკვები და ტანისამოსი ჰქონდეს. გაცილებით რთულია იმის გარკვევა, თუ რა ახდენს ყველაზე დადებით ზეგავლენას ბავშვის ფსიქიკურ ჯანმრთელობაზე. კლინიკური ფსიქოლოგებისა და მედიცინის ექსპერტთა უმრავლესობა თანხმდება, რომ ბავშვს ფსიქიკური ჯანმრთელობისა და ემოციური სტაბილურობისთვის 5 მნიშვნელოვანი რამ ესაჭიროება.

1. უსაფრთხო ოჯახური გარემო

პოზიტიური და უსაფრთხო ოჯახური ატმოსფერო ბავშვის ემოციურ სტაბილურობასა და ფსიქიკურ ჯანმრთელობაზე დიდ ზეგავლენას ახდენს. მშობლების გარკვეული ნაწილი ვერ აცნობიერებს, რომ ​უსაფრთხო გარემო მხოლოდ ფიზიკური და ემოციური ძალადობისგან თავისუფალ გარემოს არ გულისხმობს (თუმცა ეს ორი ასპექტი ძალიან მნიშვნელოვანია). პოზიტიურ გარემოში ბავშვებს ასწავლიან, როგორ გაუმკლავდნენ პრობლემებს ჯანსაღი გზების გამოყენებით. მშობლებმა ბავშვს უნდა შეუქმნან უსაფრთხო გარემო, სადაც ისინი თავისუფლად შეძლებენ საკუთარ პრობლემებზე საუბარს და შიშის გარეშე გამოთქვამენ თავიანთ მოსაზრებებს. მშობლებმა შვილებს უნდა მისცენ მაგალითი, როგორ უნდა ისაუბროს ადამიანმა თავის ემოციებსა და გრძნობებზე და როგორ გადალახოს დაბრკოლებები ჯანსაღი გზებით.

2. წინამძღოლობა და დისციპლინა

ბავშვებს მშობლებისა და უფროსების მხრიდან თანმიმდევრული, მუდმივი სწავლება და დისციპლინა ესაჭიროებათ. მათ უნდა იცოდნენ, რომელი სახის ქცევაა მისაღები და მიუღებელი სოციუმში.​ ეს ბავშვს ეხმარება ჩამოიყალიბოს გარკვეული ჩარჩო, რომლის ფარგლებში ის თავს კომფორტულად და თავდაჯერებულად იგრძნობს. მშობელმა ბავშვს უნდა ასწავლოს, როგორი ნეგატიური გავლენა აქვს ნეგატიურ ქცევას გარშემომყოფებზე. უფროსი და-ძმა და მშობელი ბავშვისთვის უნდა იყოს მაგალითი იმისა, თუ როგორი ქცევა ითვლება მისაღებად ოჯახში. დისციპლინა ბავშვს სხვადასხვა სფეროში წარმატების მიღწევაში ეხმარება.

3. რეგულარული თამაში

ბავშვებისთვის თამაში გართობაა, რაც მათ სიხარულს ანიჭებს. გარდა ამისა, თამაშს ბავშვის ფსიქიკურ ჯანმრთელობაზე მრავალმხრივი დადებითი გავლენის მოხდენა შეუძლია. თამაშის დახმარებით ბავშვები პრობლემის გადაჭრის უნარებს იძენენ, კრეატიულ აზროვნებას სწავლობენ და საკუთარი ქცევის კონტროლსაც ეჩვევიან. წყვილებში თამაში ბავშვს სოციალური უნარების განვითარებას და თანამშრომლობას ასწავლის. ბავშვი ჯგუფში ყოფნას ეჩვევა და ბავშვებთან ჯანსაღ ურთიერთობას სწავლობს.

4. თავდაჯერება

მშობელი ბავშვს თავდაჯერების შეძენაში თუ ეხმარება, ის მის ფსიქიკურ ჯანმრთელობაზე ძალიან დადებით ზეგავლენას ახდენს. თავდაჯერების მატებისთვის მხოლოდ კომპლიმენტების თქმა და ბავშვის შექება საკმარისი არ არის. ​ბავშვი მხოლოდ მაშინ უნდა შეაქოთ, როდესაც ის ამას რეალურად იმსახურებს. უმჯობესია, ბავშვი წარმატების მიღწევისთვის შეაქოთ და არა მისი გარეგნობის გამო.

5. უპირობო სიყვარული

უპირობო სიყვარული ბავშვის ფსიქიკური ჯანმრთელობისთვის ძალიან მნიშვნელოვანია. ბავშვი გრძნობს, რომ ის უყვართ, მას უსაფრთხოების და მიკუთვნებულობის განცდა ეუფლება. ბავშვი აცნობიერებს, რომ ოჯახის წევრების სიყვარული არ არის დამოკიდებული მის მიღწევებზე, გარეგნულ მახასიათებლებსა და უნარებზე. ეს ყოველივე ბავშვს უდიდეს მოტივაციას სძენს. ​ბავშვი ხვდება, რომ შეცდომები და უკუსვლა მის ცხოვრებას საბოლოოდ არ ანგრევს და ყველაფრის გამოსწორება შესაძლებელია, რადგან ის უყვართ.

მომზადებულია ​moms.com - ის მიხედვით

წაიკითხეთ სრულად