დღეს სამშაბათია და მედიაპორტალი MomsEdu.ge ტრადიციულ რუბრიკას - ენდოკრინოლოგის რეკომენდაციებს წარმოგიდგენთ. ამჯერად ენდოკრინოლოგ-ნუტრიციოლოგი თინათინ კაჭარავა მოგაწვდით კომპეტენტურ ინფორმაციას საზამთროსა და ნესვზე, რომლეთა გარეშეც ფაქტობრივად წარმოუდგენელია ზაფხული.
საზამთროს 87% შეადგენს წყალი, დანარჩენი კი არის უჯრედისი, ვიტამინები და მიკრო-მაკრო ელემენტები, როგორებიცაა: C და B ჯგუფის ვიტამინები, PP ვიტამინი, მაგნიუმი, კალიუმი, ნატრიუმი, კალციუმი და სხვა. საზამთრო ასევე შეიცავს მცირე ოდენობით შაქარს.
რაც შეეხება ნესვს, მასში შაქრის შემცველობა მეტია, ვიდრე საზამთროში, ამიტომ დიაბეტით დაავადებული ადამიანები მეტად ფრთხილად უნდა იყვნენ ნესვთან მიმართებაში. ნესვიც მდიდარია წყლით, უჯრედისით, მიკრო-მაკრო ელემენტებით და ვიტამინებით: თუთია, კალციუმი, რკინა, ნატრიუმი, კალიუმი, A, B ჯგუფის და C ვიტამინები. ორივე მათგანი დადებითად მოქმდებს ადამიანის ნივთიერებათა ცვლაზე, გუნება-განწყობილებაზე, იმუნიტეტზე.
პრაქტიკულად ჯანმრთელ ადამიანს შეუძლია დღის მანძილზე მიიღოს 300 გრ. ნესვი და 500 გრ. საზამთრო (თავი უნდა შეიკავონ ნაღვლის ბუშტის, კუჭ-ნაწლავის ტრაქტის დაავადებების მქონე ადამიანებმა, განსაკუთრებით, წყლულოვანი დაავადება). როგორც ზოგადად ხილთან მიმართებაში, აქაც გავითვალისწინოთ, რომ საზამთრო და ნესვი მიირთვით, როგორც დამოუკიდებელი კვება, დღის პირველ ნახევარში.
ბევრს აინტერესებს, ზაფხულში როდიდან არის რეკომენდებული და სასურველი საზამთროსა და ნესვის დაგემოვნება? - ოპტიმალურ პერიოდად შეიძლება, მივიჩნიოთ ივლისის თვე.
გისურვებთ ჯანმრთელობას!
არ დაგავიწყდეთ !!!
Momsedu.ge-მ თქვენთვის შექმნა ახალი სივრცე. გაწევრიანდით ჯგუფში ჯანმრთელობა
