Baby Bag

რა გავლენას ახდენს გოგონას სქესობრივ მომწიფებაზე წონა? - ენდოკრინოლოგი ირაკლი ფაღავა

რა გავლენას ახდენს გოგონას სქესობრივ მომწიფებაზე წონა? - ენდოკრინოლოგი ირაკლი ფაღავა

​​ენდოკრინოლოგმა ირაკლი ფაღავამ მოზარდებში წონის უეცარი ცვლილების პრობლემებზე ისაუბრა და მისი შესაძლო მიზეზებიც დაასახელა:

„წონაში უეცარი კლება, შესაძლოა, იყოს, ნივთიერებათა ცვლის უეცარი და გამოხატული აჩქარების შედეგი. ამის მიზეზი შეიძლება იყოს მოჭარბებული ფიზიკური დატვირთვა. ფიზიკურ დატვირთვას საზოგადოდ მივესალმები, მაგრამ ზოგჯერ ზედმეტი მოსდით მშობლებსაც და მწვრთნელებსაც. შესაძლოა, ნივთიერებათა ცვლის აჩქარება იყოს ფარისებრი ჯირკვლის მიზეზით. ყველაზე ხშირი მიზეზი არის ფსიქოლოგიური. მოზარდები, განსაკუთრებით გოგონები დიეტობენ. ისინი ფაქტობრივად შიმშილობენ და მათი დიეტა არ არის ჯანსაღი დიეტა. ეს შეზღუდული კვებაა და ისინი სასარგებლო ნუტრიენტებს იზღუდავენ.“

ირაკლი ფაღავას თქმით, წონა იზოლირებულად არ ფასდება, არამედ სიმაღლესთან ერთად:

„წონას ჩვენ იზოლირებულად არ ვაფასებთ. წონა ყოველთვის უნდა შეფასდეს სიმაღლესთან ერთად. ამისთვის მოწოდებულია სხეულის მასის ინდექსი. სიმაღლის შეფასებისას გასათვალისწინებელია მშობლების სიმაღლე. პრიმიტიული გაზომვები და აწონვა უნდა წარმოებდეს რეგულარულად. თუ ექვს თვეში ერთხელ არა, წელიწადში ერთხელ მაინც. ​მაშინ თვალსაჩინოა ყველანაირი ცვლილება. მრუდები უცებ ახტება ზემოთ ან ჩამოვა დაბლა.“

„ქალიშვილს მენსტრუალური ციკლი რომ დაეწყოს და მოწესრიგებულად გაუგრძელდეს, მას რაღაც რაოდენობით ცხიმოვანი ქსოვილი უნდა ჰქონდეს. ცხიმოვანი ქსოვილი რამდენიმე ჰორმონს გამოიმუშავებს. ეს არ არის უბრალოდ ენერგიის მარაგი. ეს არის ცალკე ორგანო. როგორც ცალკეული ორგანოს ამოკვეთის შემთხვევაში გარკვეული პრობლემები ჩნდება, ასევე ცხიმის სრული ამოღება დიეტობის გამო, ზემოქმედებს ციკლზე, ის რასაკვირველია, იგვიანებს. ​თუ გოგონას 15 წლის ასაკისთვის არ აქვს ციკლი, აუცილებელია, რომ გამოკვლეულ იქნას. ციკლის დაწყებას საშუალოდ ორი წლით ადრე წინ უსწრებს მკერდის გზა. 13 წლისთვის მაინც, თუ გოგონას მკერდი არ აქვს წამოსული რაღაც დონეზე მაინც, ის გამოსაკვლევია. გოგონას სქესობრივი მომწიფება უნდა დაეწყოს ჯერ მკერდის ზრდით,“ - აღნიშნულ საკითხზე ირაკლი ფაღავამ საქართველოს პირველი არხის გადაცემაში „პირადი ექიმი - მარი მალაზონია“ ისაუბრა.

წყარო: ​„პირადი ექიმი - მარი მალაზონია“


არ დაგავიწყდეთ !!!

Momsedu.ge-მ თქვენთვის შექმნა ახალი სივრცე. გაწევრიანდით ჯგუფში ჯანმრთელობა

როდის უნდა მივიყვანოთ გოგონა გინეკოლოგთან?
დღეს ხუთშაბათია და მედიაპორტალი MomsEdu.ge ტრადიციულ რუბრიკას - მეან-გინეკოლოგის რეკომენდაციებს წარმოგიდგენთ. როდის უნდა მივიყვანოთ გოგონა გინეკოლოგთან? - ამჯერად მეან-გინეკოლოგი და ქირურგი...

შეიძლება დაინტერესდეთ

„ძალიან მნიშვნელოვანია, რომ ქალის ფსიქიკურ ჯანმრთელობას ყურადღება მიექცეს, რადგან ეს დიდ გავლენას ახდენს ნაყოფისა და ბავშვის განვითარებაზე,“- ფსიქოლოგი სალომე კაკაბაძე

ფსიქოლოგმა სალომე კაკაბაძემ პერინატალური დეპრესიის შესახებ ისაუბრა და ქალის ფსიქიკურ ჯანმრთელობაზე ზრუნვის მნიშვნელობას გაუსვა ხაზი:

„პერინატალური პერიოდი გულისხმობს ორსულობის მზადებიდან, ორსულობასა და ორსულობის შემდგომ პერიოდს ერთი წლის ჩათვლით. ეს პერიოდი ხშირად არის შიშის, შფოთვის, დაბნეულობის გამომწვევი. ამ დროს ქალი ძალიან დიდი გამოწვევების წინაშე დგება. ხშირად უფრო მეტად ქალი, ბუნებრივია, თავის ფიზიკურ ჯანმრთელობას აქცევს ყურადღებას. ძალიან მნიშვნელოვანია, რომ ქალის ფსიქიკურ ჯანმრთელობასაც ყურადღება მიექცეს. ეს არანაკლებ გავლენას ახდენს, როგორც ქალის, ასევე ნაყოფისა და ბავშვის განვითარებაზე.

ყველასთვის ცნობილია მშობიარობის შემდგომი დეპრესია, მაგრამ ნაკლებად ვსაუბრობთ ორსულობის პერიოდში დეპრესიულ მდგომარეობაზე, რაც ძალიან ხშირია, იმიტომ, რომ მოლოდინები, მით უმეტეს, თუ პირველი შვილია, ქალისთვის შეიძლება ძალიან ამაღელვებელი იყოს. ამ დროს ქალისთვის გუნება-განწყობის ცვლილება, შესაძლოა, იყოს ბუნებრივი. როდესაც ეს ძალიან ინტენსიურ ხასიათს იღებს და დიდხანს გრძელდება, ამ შემთხვევაში შეგვიძლია ვივარაუდოთ, რომ ეს აღარ არის ნორმა.

პერინატალური დეპრესიის ნიშნებია გუნება-განწყობის ხშირი ცვლილება, დაქვეითება, აპათიური მდგომარეობა, ქალის იზოლირება ადამიანებისგან, კომუნიკაციის სურვილის დაკარგვა, მომატებული შფოთვა. ასეთ დროს ძალიან ხშირია ძილის პრობლემები, სისუსტე, უმადობა, დაღლილობის შეგრძნება.

დამოკიდებულება, რომ „ვიღაცებს 3-4 შვილი ჰყავთ გაჩენილი და მსგავსი სირთულეები არ გამოუვლიათ,“ არის მითი და სტიგმა. არ არსებობს, რომ ოთხი შვილის დედას გარკვეული სირთულეები და გამოწვევები არ ჰქონოდა, რასაც ქალი ამ პერიოდში გადის. აქ ლაპარაკი გვაქვს იმაზე, რამდენად საუბრობს ამაზე ქალი. ძალიან ხშირად ამაზე ვერ ან არ საუბრობენ. ზოგჯერ ჰგონიათ, რომ ეს ბუნებრივი მდგომარეობაა, ეს ასეც უნდა იყოს. ზოგჯერ აქვთ დანაშაულის გრძნობა, რომ თუ ეს თქვეს, ცუდ დედად აღიქვამენ. ხშირად ოჯახის წევრებიც არ არიან ხოლმე მხარდაჭერები და ქალებს უჭირთ ამაზე ხმამაღლა საუბარი.

ოჯახის წევრებმა მაქსიმალური ემპათია უნდა გამოიჩინონ ქალის მდგომარეობის მიმართ. კარგი იქნება, თუ მამა აღზრდისა და მხარდაჭერის მხრივ მაქსიმალურად ჩაერთვება. ოჯახის წევრებმა ემოციური მხარდაჭერა აგრძნობინონ ქალს, არ გააუფასურონ ქალის ის ემოციური მდგომარეობა, რომელშიც ის იმყოფება. ამაში ვგულისხმობ არასტაბილურ გუნება-განწყობას. ოჯახის წევრები გაგებით უნდა მოეკიდონ ამას.

ქალები უნდა შეეცადონ, რომ იყვნენ შემწყნარებლები საკუთარი თავის მიმართ. ისინი ხშირად იდანაშაულებენ თავს, რომ რაღაცას კარგად ვერ აკეთებენ. ამ დროს არ დავადანაშულოთ ჩვენი თავი, იმიტომ, რომ ეს არ წაგვადგება. ძალიან დიდ გამოწვევასთან გვაქვს საქმე. მინდა, ვურჩიო ქალებს, რომ გამოუყონ საკუთარ თავს დრო. ძალიან რთულია, რა თქმა უნდა, მაგრამ შევეცადოთ, რომ ყოველდღიურად 15 წუთი მაინც გამოვუყოთ საკუთარ თავს. ამ დროს ქალი საკუთარ თავს უნდა ეკუთვნოდეს და აკეთოს ის საქმე, რაც მას სიამოვნებას ანიჭებს. პერინატალური დეპრესიის დროს ქალებს არ აქვთ ძალა, რომ საკუთარ თავს ჰიგიენური კუთხითაც მიხედონ. ამ პატარა ფიზიკურ ცვლილებებს დიდი ცვლილებების გამოწვევა შეუძლიათ. ქალებმა ჰიგიენას ყურადღება უნდა მიაქციონ, მიუხედავად იმისა, გადიან გარეთ თუ არა. უნდა შევეცადოთ, რომ მოწესრიგებულად ვიყოთ, ისევ ჩვენი თავისთვის.

შევეცადოთ, რომ ჩავრთოთ ოჯახის წევრები და მოვითხოვოთ მხარდაჭერა მათი მხრიდან. მთავარია, ამაზე ლაპარაკის არ შეგვეშინდეს. გავბედოთ, რომ ვისაუბროთ ჩვენს ემოციურ მდგომარეობაზე. მნიშვნელოვანია, რომ ქალი დააკვირდეს საკუთარ ემოციურ მდგომარეობას, როგორ გრძნობს თავს, რა სიამოვნებს, რა უქმნის დისკომფორტს. კარგია გუნება-განწყობის დღიურის წარმოება. თუ ქალი ატყობს, რომ მისი ემოციური ფონი ყოველდღიურ საქმიანობაში ხელს უშლის და ის ვეღარ აკეთებს ეფექტიანად საქმეებს, ძალიან მნიშვნელოვანია, რომ სპეციალისტს მიმართოს. ხშირად ფიქრობენ, რომ ეს ბუნებრივია და გაივლის, მაგრამ, სამწუხაროდ, არ გაივლის ასე მარტივად. ეს მდგომარეობა შეიძლება ერთი წელი ან მეტი გაგრძელდეს,“- მოცემულ საკითხზე სალომე კაკაბაძემ რადიო „ფორტუნას“ ეთერში ისაუბრა.

წყარო: ​რადიო „ფორტუნა“

წაიკითხეთ სრულად