Baby Bag

„ამ ვირუსისგან ყველაფერს უნდა ველოდოთ, მან შეიძლება ყველა სისტემის მხრივ მოგვცეს თავისი გამოვლინება,“ - პედიატრი ინგა მამუჩიშვილი

„ამ ვირუსისგან ყველაფერს უნდა ველოდოთ, მან შეიძლება ყველა სისტემის მხრივ მოგვცეს თავისი გამოვლინება,“ - პედიატრი ინგა მამუჩიშვილი

პედიატრი ინგა მამუჩიშვილი კოვიდ-19-ით ინფიცირების დროს ბავშვებში ყველაზე საგანგაშო და საყურადღებო სიმპტომების შესახებ საუბრობს. მისი თქმით, შეუპოვარი ტემპერატურა და ხველა აუცილებლად მოითხოვს მედიკოსების მეთვალყურეობას:

„შემოდგომა-ზამთრის პერიოდი ზოგადად გამოირჩევა მწვავე რესპირატორული ინფექციებით. ​ამის გამავრცელებლები ყოველთვის იყვნენ ჩვენი ბავშვები. ბავშვებში განსაკუთრებული ნიშნები, რაც შეიძლება გამოვყო, ეს არის ცხვირის გაჭედვა, ტემპერატურა. გრიპისგან განსხვავებით არ არის მაღალი ცხელება დამახასიათებელი, ტემპერატურა უფრო 38,5 გრადუსამდეა ხოლმე. გვხვდება დიარეა, პირღებინება. ბოლოს მნიშვნელოვნად გახშირდა კონიუქტივიტები და სტომატიტები ბავშვთა ასაკში. ბავშვები პოსტკოვიდურ პერიოდში დაჰყავთ სხვადასხვა კვლევებზე. ეს ნამდვილად არ არის საჭირო. ნუ შეაწუხებენ კოაგულოგრამების, D-დიმერების ანალიზებით. მსუბუქი და საშუალო ფორმების შემთხვევაში, შეგვიძლია გადავაკონტროლოთ მხოლოდ სისხლის საერთო ანალიზი.“

ინგა მამუჩიშვილის თქმით, მოზარდებში სიმპტომატიკა უფრო მრავალფეროვანია:

„მოზარდებში შემიძლია გამოვყო ნევროლოგიური სიმპტომატიკა, როგორიც არის თავის ტკივილი, წელის ტკივილი, მიალგია, რევმატიული ნიშნები, როგორიც არის ძვლებისა და სახსრების ტკივილი. კოვიდი იმდენად მრავალფეროვანია თავისი კლინიკური გამოვლინებით, რომ მისგან ყველაფერს უნდა ველოდოთ, მე ასე ვამბობ ხოლმე ხშირად. მან შეიძლება ყველა სისტემის მხრივ მოგვცეს თავისი გამოვლინება. ყოველთვის უნდა მივაქციოთ ყურადღება ბავშვის ზოგად მდგომარეობას. თუ ბავშვი სწრაფად იღლება, თუ ის ლეთარგიულია, თუ სითხეს არ სვამს, ​აქვს შეუპოვარი ცხელება, 39-40 გრადუსი, არ ემორჩილება მედიკამენტებს რამდენიმე დღის განმავლობაში, თუ ხველა არის შეუპოვარი, იწყება ქოშინი, სუნთქვაში ნეკნებს შორის არის მონაწილეობა, ნესტოების ბერვა, ასეთ შემთხვევაში სასწრაფოდ უნდა მივმართოთ 112-ს ან ოჯახის ექიმს და გადავიყვანოთ ბავშვი კლინიკაში.“

კოვიდის გადატანის შემდგომ ფილტვის ჯანმრთელობაზე ზრუნვის მნიშვნელობის შესახებ საუბრობს ​პულმონოლოგი კახა ვაჭარაძე:

„ძალიან დიდი მნიშვნელობა აქვს პაციენტის პოსტკოვიდურ მართვას. პაციენტებს თვეების განმავლობაში მიჰყვებათ ისეთი სინდრომები, როგორიცაა: ნერვული აშლილობები, ​ტკივილი გულ-მკერდის არეში, ხველა, ქოშინი, რაც ყველაზე საშიშია. გაცილებით უფრო ხანგრძლივად რჩება გულ-მკერდის არეში ტკივილი, ჰაერის უკმარისობა და ქოშინი. ფილტვი მეტ-ნაკლებად ყველა პაციენტთან ზიანდება.“

„გართულებების გამოსავლენად უპირატესია ტომოგრაფიული კვლევა, რომლის ჩატარება კვირაში ერთხელ არ შეიძლება. აუცილებელია, რომ ის გაკეთდეს დასაწყისში, აუცილებლობის შემთხვევაში ორი კვირის შემდეგ და ექვსიდან-რვა კვირის შემდეგ. ეს უნდა გაკეთდეს ექიმის დანიშნულებით. პაციენტებმა არ უნდა დაიწყონ თვითშემოქმედება და თვითმკურნალობა. შემდგომში აუცილებელია გაკეთდეს ​კოაგულაციური სისტემის კონტროლი, ანთების მარკერები: ეს არის სისხლის საერთო ანალიზი, D-დიმერი. თუ გვაქვს ბაქტერიული და ვირუსული ფონის გადაჯვარედინება, დიდი სიფრთხილითაა მიდგომა საჭირო. აქ წყდება ანტიბიოტიკოთერაპია დავიწყოთ თუ არა პაციენტთან,“ - აღნიშნულ საკითხებზე მედიკოსებმა ტელეკომპანია რუსთავის ორის გადაცემაში „თქვენი კლინიკა“ ისაუბრეს.

წყარო: ​თქვენი კლინიკა

არ დაგავიწყდეთ !!!

დაემატეთ ჯგუფში საბავშვო რეცეპტები

„მედარდებიან ჩვენი ბავშვები, მოზარდები, მათი ფსიქოსომატური მდგომარეობა... სახლებში გამოკეტ...
ამის შესახებ სოციალურ ქსელში პედიატრი, მედიცინის მეცნიერებათა დოქტორი ინგა მამუჩიშვილი წერს.

შეიძლება დაინტერესდეთ

„ხშირად მეუბნებიან მშობლები, რომ ბავშვი ოფლიანობს და ამას მიაწერენ ხოლმე D ვიტამინის ნაკლებობას. აღმოჩნდება, რომ ბავშვი უბრალოდ თბილად არის ჩაცმული და ამიტომ ოფლიანობს“ - ინგა მამუჩიშვილი

„ხშირად მეუბნებიან მშობლები, რომ ბავშვი ოფლიანობს და ამას მიაწერენ ხოლმე D ვიტამინის ნაკლებობას. აღმოჩნდება, რომ ბავშვი უბრალოდ თბილად არის ჩაცმული და ამიტომ ოფლიანობს“ - ინგა მამუჩიშვილი

შემოდგომის სუსხიანი დღეების დადგომისთანავე მშობლები იწყებენ ბავშების ჩაფუთვას როგორც სახლში, ასევე გარეთ გაყვანისას. როგორ ჩავაცვათ პატარებს ამ სეზონზე და რა აუცილებელი რეკომენდაციები უნდა გავითვალისწინოთ? - ამ და სხვა აქტუალურ თემებზე Momsedu.ge-ს ცნობილი პედიატრი, მედიცინის მეცნიერებათა დოქტორი ინგა მამუჩიშვილი ესაუბრა.

- ქალბატონო ინგა, რამდენად სწორია ბავშვების ჩაფუთვნა? როგორ უნდა ეცვას ბავშვს ამ სეზონზე სახლში და გარეთ?

- ზოგადად, როგორც ბავშვი, ისე მოზრდილი უნდა იყოს ჩაცმული სეზონის შესაბამისად, მაგრამ არავითარ შემთხვევაში არ შეიძლება ბავშვების ჩაფუთვნა. მშობელმა ეს ყოველთვის უნდა აკონტროლოს, გარეთ გაყვანის შემთხვევაშიც და სახლშიც. ხშირად სახლშიც ჩაფუთნულები ჰყავთ. თუ ბავშვი სახლშია, ტემპერატურა უნდა იყოს 20-22 გრადუსამდე, მეტი არ შეიძლება. ხშირად მეუბნებიან მშობლები, რომ ბავშვი ოფლიანობს და ამას მიაწერენ ხოლმე D ვიტამინის ნაკლებობას და აღმოჩნდება, რომ ბავშვი უბრალოდ თბილად არის ჩაცმული და აქედან გამომდინარეა ეს ოფლიანობაც. როგორც კი შესაბამისად ჩააცმევ, ეს პრობლემა გვარდება. ბავშვის ჩაფუთვნა ხელს უშლის ნორმალურ თერმორეგულაციას და აქედან გამომდინარე, თავისთავად ცხადია, ნორმალური იმუნური სისტემის ჩამოყალიბებასაც, მოქმედებს ნერვულ სისტემაზეც. უნდა ვეცადოთ, რომ ბავშვს ასაკის და სეზონის შესაბამისად ჩავაცვათ, ზოგადად, როგორც ჩვენ ვიცმევთ, როგორც ჩვენ გვესიამოვნებოდა ჩაცმა, ასე უნდა ჩავაცვათ ბავშვსაც. ასევე, არ სჭირდება ბავშვს შალის წინდები, განსაკუთრებით, შიშველ ფეხზე, რეიტუზები შემდეგ შარვალი... ეს შეიძლება იყო ძალიან სერიოზული ყინვების დროს, როცა ბავშვი გაგვყავს გარეთ, მაგრამ ჩვენს ქვეყანაში არ არის ის ტემპერატურა, რომ ბავშვს ასეთი ჩაფუთვნა დასჭირდეს, ჩვენ არ ვართ ჩრდიოლოეთის ქვეყანა.
- ახალშობილის ჩაცმულობასთან დაკავშირებითაც რომ გვითხრათ.
რა თქმა უნდა, ამინდისა და ტემპერატურის შესაბამისად. სახლში ხშირად ჰყავთ ბავშვები ძალიან თბილად ჩაცმულები. მოკლემკლავიანი, გრძელმკლავიანი შემდეგ შალი, თავზე ქუდი და ასე შემდეგ, რომლებიც არავითარ შემთხვევაში საჭირო არ არის. 1 წლამდე ბავშვს დაბანვის შემდეგ 2 საათის განმავლობაში (თუ ოთახის ტემპერატურა არის 20-22 გრადუსი), შეგვიძლია დავახუროთ ქუდი, შემდეგ კი მოვხადოთ. ხშირად 3 თვემდე პატარებს ცხვირზე ადებენ ხოლმე ხელს, ასევე ხელებსა და ფეხებზე და ამ ზონების მოყინვით განსაზღვრავენ ხოლმე, სცივა თუ არა პატარას. ეს არ არის სწორი, რადგან ამ პერიოდში ორგანიზმში სისხლის მიმოქცევა არ არის ბოლომდე ჩამოყალიბებული და შეიძლება ცხვირის წვერი ცივი ჰქოდეს ბავშვს. უნდა შეეხოთ ხოლმე მუცელზე, თუ მუცელი თბილი აქვს, ე.ი. იქ პრობლემა არ არის. თავიდანვე როგორც შევაჩვევთ ბავშვს, ისე გაიზრდება, ისეთივე მოთხოვნილებები ექნება მის ორგანიზმს და მის თერმორეგულაციის ცენტრებს და იმუნურ სისტემას. ამიტომ შევეცადოთ, რომ ყოველთვის სეზონის შესაბამისად ჩავაცვათ ბავშვებს.
- რადგან ახალშობილებზე ვსაუბრობთ, გკითხავთ, რომელი კვირიდან გავიყვანოთ გარეთ სასეირნოდ და რამდენი ხნით? ქარიან ამინდში თუ შეიძლება ახალშობილის გასეირნება?

​- ახალშობილი ბავშვი სასეირნოდ გარეთ უნდა გავიყვანოთ უკვე სამშობიაროდან გამოსვლიდან მეორე დღესვე. თუ ჰაერის ტემპერატურა - 5 გრადუსზე დაბალია, ასეთ შემთხვევაში არ გაგვყავს, რა თქმა უნდა, და თუ ქარი და წვიმაა. დანარჩენ შემთხვევაში გაგვყავს სასეირნოდ. ვიწყებთ 15 წუთიდან და თანდათან ვუმატებთ დროს (თუ არ არის ქარი, წვიმა და არის მშვიდი ამინდი), აუცილებლად უნდა გავიყვანოთ ყოველდღიურად და ასევე ყოველდღიურად მოვუმატოთ 15-15 წუთი ისე, რომ სადღაც უკვე 1 თვის თავზე 1 საათი გვყავდეს ბავშვი გარეთ. აი, ამ პირობებში და ამ სეზონზე ბავშვი შეგვიძლია გვყავდეს გარეთ, მზეზე და შევაფიცხოთ შუადღის მზეს, ეს ძალიან კარგია, რადგან ამით ხელს ვუწყობთ D ვიტამინის გამომუშავებას. მე ძალიან მიხარია, რომ ჩვენი თანამედროვე ახალგაზრდა მშობლები ძალიან კარგად იცავენ ამ წესებს, აი ჩაცმასთან დაკავშირებითაც, არ უყვართ ბევრი ტანსაცმლის ჩაცმა და ბავშვების გადახურება. გარდა ამისა, ჰაერზეც გაჰყავთ და საკმაოდ დიდ ხანსაც. თუმცა შევეცადოთ, რომ ეპიდსიტუაციის გამო არავინ შევახოთ ბავშვს, დავიცვათ დისტანცია, ​არ მოვაკიდინოთ უცხოებს ხელი ლოყებზე, ხელებზე... ზოგადადაც საჭიროა დისტანცირება.

​ქარიან ამინდშიც შეიძლება რატომაც არა, თუმცა ქარიან ამინდში მეტია შანსი, რომ მტვერი მოხვდეს ბავშვს თვალებზე და ამან ალერგიული რეაქცია გამოიწვიოს, გადაციების შანსიც არის. ამიტომ ქარსაც გააჩნია, ნიავზე შეიძლება, მაგრამ თუ ქარი ძლიერია, რა თქმა უნდა, არ შეიძლება.

​- საინტერესოა, არის თუ არა პრობლემა, როდესაც ბავშვები უარს ამბობენ ოთახის ჩუსტების ჩაცმაზე?

​- არანაირი პრობლემა არ არის, სხვათა შორის, ორთოპედები რეკომენდაციასაც უწევენ ტერფის ჩამოყალიბებისთვის ფეხშიშველი სიარულს ოთახში. ძალადობა არ გვინდა, თუ ბავშვი არ იცვამს ფეხზე, ეს არანაირ პრობლემას არ წარმოადგენს, იაროს ფეხშიშველმა. ფეხშიშველი სიარული სჯობია უხარისხო ოთახის ჩუსტებით სიარულს, რომლებიც იწვევს ბავშვის ტერფის გაოფლიანებას, გადახურებას. ამას სჯობს, ამოვაცვათ ბავშვებს წინდა ფეხზე და ასე იაროს. ისიც შეიძლება, რომ, სადაც ბავშვია, იქ შევქმნათ პირობა, რომ იატაკი ცივი არ იყოს, რომ არ მოხდეს ფეხების გადაციება, თორემ სხვა მხრივ ტერფის ჩამოყალიბების თვალსაზრისით ფეხშიშველი სიარული ძალიან კარგია და მივესალმები.

​ესაუბრა თამთა შერმაზანაშვილი

წაიკითხეთ სრულად