როგორ მოვუაროთ ზამთარში ბავშვის კანს? - აღნიშულ თემაზე MomsEdu.ge დერმატო-ვენეროლოგ ზაზა თელიას ესაუბრა.
- ზამთარში, სიცივისგან ბავშვებს ხშირად უწითლდებათ და უუხეშდებათ კანი, როგორ მოვუაროთ ამ პერიოდში პატარების კანს?
- ზოგადად, ბავშვებს უფრო თხელი კანი აქვთ და შესაბამისად, ისინი უფრო მეტად რეაგირებენ გარემო გამაღიზიანებელ ფაქტორებზე, როგორებიცაა: ტემპერატურის ცვლილება, წყალთან ხშირი შეხება, სიცივე, სიცხე და ასე შემდეგ. შესაბამისად, მარტივი რჩევა, რითაც კანს დავიცავთ, არის მისი სწორად დატენიანება. დამატენინებელი საშუალება არა მარტო ატენიანებს და ბოჭავს წყალს, არამედ ის ქმნის დამცავ ბარიერულ შრეს კანზე და შესაბამისად, კანი უფრო ნაკლებად ღიზიანდება და ნაკლები ეფექტი ექნება მასზე სიცივესა და სიცხეს.
- საჭიროა თუ არა ბავშვს დამატენიანებელი მთელ ტანზე წავუსვათ?
- შესაძლებელია, მთელ სხეულზე მოხდეს დატენიანება. ეს დამოკიდებულია იმაზე, როგორი ტიპის კანი აქვს ბავშვს. თუ მიდრეკილება აქვს სიმშრალისკენ, რა თქმა უნდა, აქ რეკომენდებულია „აგრესიული“ დატენინება. განსაკუთრებით ბანაობის შემდეგ დაუყონებლივ უნდა მოხდეს დატანიანება. დროის გასვლის შემდეგ, თუნდაც ერთი წუთის მერე თუ დავატენიანებთ, სამწუხაროდ, აზრს კარგავს, რადგან როგორც ვთქვით, დამატენინებელი ბარიერს ქმნის, რომ კანიდან წყლის აორთქლება არ მოხდეს. შესაბამისად, თუ ბავშვს კანის სიშრალისკენ აქვს მიდრეკილება, უფრო „აგრესიულად“ უნდა დავატენიანოთ, თუ არ აქვს სიმშრალისკენ მიდრეკილება, შესაძლებელია უფრო მსუბუქი დამატენიანებელი საშუალებების გამოყენება და უფრო იშვიათად დატენიანება.
- რა რჩევას მისცემთ მშობლებს, სახლის პირობებში რა ბუნებრივი საშუალება შეიძლება, გამოიყენონ ბავშვის გამომშრალი და გაღიზიანებული კანისთვის?
- საუკეთესო დამატენიანებელი და ასევე ყველაზე იაფი საშუალება არის თეთრი ვაზელინი. სუფთა თეთრი ვაზელინი გამოიყენება არა მარტო კანის დასატენიანებლად, არამედ დამცავი ეფექტიც გააჩნია და მეტსაც გეტყვით, თეთრი ვაზელინის გამოყენება ასევე ძალიან ეფექტურია მცირე ჭრილობებზე, როდესაც ბავშვი წაიქცევა და კანს გადაიტყავებს. ამ შემთხვევაში, თეთრი ვაზელინი ეხმარება და უზრუნველყოფს შეხორცების პროცესს, აჩქარებს და ამცირებს ნაწიბურის განვითარების ალბათობის რისკს.
Momsedu.ge-მ თქვენთვის, ქალებისთვის შექმნა ახალი სივრცე, სადაც ყველაზე მცოდნე დედები იყრიან თავს. ჯგუფის დასახელებაც სწორედ ასეა - „მცოდნე დედების ჯგუფი“, რომლის საშუალებით დედები ერთმანეთს საკუთარ გამოცდილებას გაუზიარებენ. (ჯგუფში გასაწევრიანებლად ნახეთ ბმული - „მცოდნე დედების ჯგუფი“)
გულმა რომ არასდროს შეგვაწუხოს... - არითმოლოგ როინ რეკვავას რეკომენდაციები
არითმოლოგმა როინ რეკვავამ გულის დაავადებების თავიდან აცილების მიზნით საინტერესო რჩევები შემოგვთავაზა:
„გულის პრობლემებს იწვევს გენეტიკური ფაქტორები და ჩვენზე დამოკიდებული ფაქტორები: არასწორი ცხოვრების წესი, მაღალი არტერიული წნევა, თამბაქოს მოხმარება, ბიორიტმის დარღვევა, ჭარბი მარილის მოხმარებაც კი ვნებს გულს.“
როინ რეკვავამ ის ფაქტორები დაასახელა, რომლებმაც გულის დაავადებების გაახალგაზრდავება გამოიწვია:
„გულის პრობლემების გაახალგაზრდავება გამომდინარეობს ცხოვრების წესის ცვლილებიდან. ადამიანის დაბერებასთან დაკავშირებული პრობლემები გვაქვს საერთოდ. ჭარბი წონა და თამბაქოს მოხმარება აახალგაზრდავებს ნებისმიერ გულის პრობლემას. რას უნდა მიაქციოს პაციენტმა ყურადღება? ადამიანი ამბობს, რომ თითქოს ამომივარდა გული. მსგავსი შეგრძნება თუ გაქვთ, აუცილებლად უნდა მიაქციოთ ყურადღება. ერთხელ ყველას ექნება არითმია. ამის გარანტიას ყველას ვაძლევ. ეს რეგულარულ ხასიათს რომ მიიღებს, აუცილებლად უნდა მივმართოთ ექიმს.“
„არითმიებს ვხვდებით 0-დან 100 წლამდე. ბავშვებს უფრო თანდაყოლილი არითმიები გამოუვლინდებათ. მოზარდებს და მოზრდილებს უფრო შეძენილი სახის არითმიები. პარკუჭოვანი ტაქიკარდია ჰქვია არითმიის სახეს, რომელმაც შეიძლება გამოიწვიოს უეცარი სიკვდილი. ყველაზე გავრცელებული არითმია, რომელიც არის შენელებული ბომბი, ეს არის მოციმციმე არითმია. სამ თვეში ერთხელ ადამიანმა სასურველია ჩაიტაროს ესა თუ ის კვლევა. განსაკუთრებით გულის კვლევა. ეს არ არის ბევრი კვლევა. ესენია: ექოკარდიოგრაფია და 24-საათიანი ჰოლტერი,“ - აღნიშნულ საკითხზე როინ რეკვავამ ტელეკომპანია „რუსთავი 2“-ის გადაცემაში „დილა მშვიდობისა საქართველო“ ისაუბრა.