Baby Bag

„7-8 წლამდე მნიშვნელოვანია თამაში, ამ ასაკში ბავშვი და მისი ძვალ-სახსროვანი სისტემა ვითარდება თამაშით,“ - ბავშვთა ორთოპედი ნინო ჭოლოკავა

ბავშვთა ორთოპედი ნინო ჭოლოკავა ბავშვებში ძვალ-სახსართა სისტემის პრობლემების გამომწვევ მიზეზებზე საუბრობს და აცხადებს, რომ აღნიშნული სისტემის ნორმალური განვითარებისთვის მოძრაობა უმნიშვნელოვანესი ფაქტორია:

„თუ ვილაპარაკებთ ძვალზე და ძვალ-სახსართა სისტემის ჯანმრთელობაზე, ამას ძალიან ბევრი ფაქტორი განაპირობებს: თვითონ პიროვნება, მისი კვების რეჟიმი, მიდრეკილებები, ცხოვრების სტილი. ეს, მით უმეტეს, მნიშვნელოვანია ბავშვთა ასაკში, იმიტომ, რომ მან ძირითადი დეპოზიტი უნდა შექმნას თავიდანვე მინერალური ცვლის, ვიტამინების, პროტეინების. ამ ყველაფერს ძალიან დიდი მნიშვნელობა აქვს ბავშვის ზრდისთვის. პანდემიის დროს, ალბათ, უნდა ვთქვათ, რომ ძალიან მნიშვნელოვანია მოძრაობა. იმისთვის, რომ სწორად ჩამოყალიბდეს და არ გვქონდეს რაიმე პრობლემები ძვალ-სახსართა სისტემასთან დაკავშირებით, უნდა გავიაზროთ, რომ მოძრაობა არის ერთ-ერთი მნიშვნელოვანი ფაქტორი ამ სისტემის სწორი ჩამოყალიბებისთვის.“

ნინო ჭოლოკავა ბავშვებში ეკრანმიჯაჭვულობის პრობლემაზე საუბრობს და აღნიშნავს, რომ ეკრანთან ხანგრძლივად ყოფნა ბავშვებს სახსრების პრობლემებს უქმნის:

„პრობლემები წარმოიშვა ეკრანმიჯაჭვულობასთან დაკავშირებით. ბოლო მონაცემებით, თუ ბავშვები დღეში 4 საათს ან მეტს ატარებენ ეკრანთან, მათ 65 %-ს აღენიშნება სახსრის ტკივილები, ჩივილები, რომელსაც შემდგომ მკურნალობა სჭირდება. მშობელმა თავიდანვე უნდა გაიაზროს, რომ როდესაც იზოლაციაში ან შეზღუდვის რაიმე ფორმაზე გადავდივართ, ჩვენი ყოველდღიური ცხოვრებიდან ვარდება აქტივობა. ყოველდღიურ ცხოვრებაში ჩვენ გავდივართ სადარბაზოდან, მივდივართ ლიფტთან, გაჩერებაზე, მაღაზიაში. ამ ყველაფერს არ ვაქცევთ ყურადღებას. ეს მცირე მოძრაობები უმნიშვნელო გვგონია. როდესაც სახლში ვიკეტებით, ეს ფუნდამენტალური ხდება. ძალიან მნიშვნელოვანია, რომ მშობლებმა დაგეგმონ სწავლის რეჟიმი. ბავშვს ჰქონდეს ხშირი შესვენებები ეკრანთან ყოფნისას. მშობელმა უნდა დაგეგმოს ბავშვის აქტივობა გარეთ, რამდენადაც პანდემია იძლევა ამის საშუალებას.“

„სეირნობა, ველოსიპედით ან ფეხით გასეირნება ძალიან მნიშვნელოვანია. რა თქმა უნდა, გასათვალისწინებელია ასაკობრივი ჭრილებიც. 7-8 წლამდე მნიშვნელოვანია თამაში. ბავშვს როგორმე მოუწყვეთ სივრცე, სადაც ის ბევრს ითამაშებს. ამ ასაკში ბავშვი და მისი ძვალ-სახსროვანი სისტემა ვითარდება თამაშით. უფრო მოზრდილისთვის ეცადეთ დაგეგმოთ რაიმე სახის სპორტული აქტივობა. სასურველია ამაში მშობელიც ჩაერთოს, რადგან ეს პრობლემა უფროსებისთვისაც მნიშვნელოვანია. მართალია, ბავშვთა ორთოპედი ვარ, მაგრამ ასაკოვან ადამიანებსაც ვურჩევ, დაგეგმონ დრო ისე, რომ დღის განმავლობაში ნაკლებად ხალხმრავალ ადგილას გაისეირნონ. ეს მათი ფიზიკური და ფსიქოლოგიური ჯანმრთელობისთვის ძალიან მნიშვნელოვანია,“ - აცხადებს ნინო ჭოლოკავა.

წყარო: ​პირადი ექიმი - მარი მალაზონია 

არ დაგავიწყდეთ !!!

დაემატეთ ჯგუფში საბავშვო რეცეპტები

როდის არის ბავშვის ფეხის წვერებზე სიარული საშიში და რა შემთხვევაში უნდა მივმართოთ ექიმს?
​ბავშვები სიარულის სწავლისას ფეხის წვერებზე ხშირად დადიან. მოგვიანებით, როდესაც ისინი დამოუკიდებლად გადაადგილებას ახერხებენ, მიწაზე ტერფს სრულად დგამენ და თავისუფლად მოძრაობენ. მცირეწლოვანი ბავშვების...

შეიძლება დაინტერესდეთ

,,ჭარბთმიანობის უკან შესაძლებელია იმალებოდეს ჯანმრთელობის სერიოზული პრობლემები''

,,ჭარბთმიანობის უკან შესაძლებელია იმალებოდეს ჯანმრთელობის სერიოზული პრობლემები''

დღეს სამშაბათია და მედიაპორტალი MomsEdu.geტრადიციულ რუბრიკას - ენდოკრინოლოგის რეკომენდაციებს წარმოგიდგენთ. ჰირსუტიზმზე, ანუ ჭარბთმიანობაზე ენდოკრინოლოგ-ნუტრიციოლოგი თინათინ კაჭარავა მოგაწვდით კომპეტენტურ ინფორმაციას.

ჰირსუტიზმი (ჭარბთმიანობა) არის მდგომარეობა, როდესაც ქალებში ხდება მამაკაცური ტიპით ჭარბი თმის ზრდა: 
  • სახეზე 
  • მკერდზე
  • მუცლის ზედა ნაწილზე
  • ზურგზე
უმეტესობას მიაჩნია, რომ ჭარბთმიანობა არის მხოლოდ კოსმეტიკური პრობლემა, რაც სიმართლეს არ შეესაბამება. ჭარბთმიანობის უკან შესაძლებელია იმალებოდეს ჯანმრთელობის სერიოზული პრობლემები. 

ჰირსუტიზმის (ჭარბთმიანობა) გამომწვევი მიზეზები შესაძლებელია გამოიყურებოდეს შემდეგნაირად:

  • პოლიკისტოზური საკვერცხის სინდრომი. ეს მდგომარეობა, ხშირად სქესობრივი მომწიფების დროს იწყება, იწვევს სასქესო ჰორმონების დისბალანსს, ინსულინის მიმართ რეზიზტენტობას. ამ სინდრომმა შეიძლება გამოიწვიოს ჭარბი თმის ზრდა, არარეგულარული მენსტრუალური ციკლი, სიმსუქნე, უნაყოფობა და ზოგჯერ მრავლობითი კისტა საკვერცხეებზე.
  • კუშინგის სინდრომი - თირკმელზედა ჯირკვლის დაავადება , როდესაც ხდება ჰორმონ კორტიზოლის დიდ რაოდენობით წარმოქმნა ან შესაძლებელია გამოიწვიოს ისეთი მედიკამენტის ხანგრძლივად მიღებამ როგორიცაა პრედნიზოლონი.
  • თირკმელზედა ჯირკვლის თანდაყოლილი ჰიპერპლაზია (გადიდება). ეს მემკვიდრეობითი მდგომარეობა ხასიათდება თირკმელზედა ჯირკვლების მიერ სტეროიდული ჰორმონების, მათ შორის კორტიზოლისა და ანდროგენების (მამაკაცური ჰორმონები) პათოლოგიურად ჭარბი ოდენობით წარმოქმნით.
  • სიმსუქნე - ჭარბი წონის დროს შესაძლებელია მოხდეს სასქესო ჰორმონებს შორის დისბალანსი.
  • სიმსივნეები - იშვიათად, საკვერცხეებში ან თირკმელზედა ჯირკვლებში ანდროგენწარმომქმნელმა (მამაკაცების ჰორმონი) სიმსივნემ შეიძლება გამოიწვიოს ჰირსუტიზმი (ჭარბთმიანობა)
  • მედიკამენტები - ზოგიერთმა მედიკამენტმა შეიძლება გამოიწვიოს ჭარბთმიანობა.

ხშირად ჰირსუტიზმის გამომწვევი მიზეზის გამოვლენა ვერ ხდება.

ყველაზე ხშირი ფაქტორები, რომლებმაც შეიძლება გავლენა მოახდინოს ჭარბთმიანობის განვითარების ალბათობაზე გამოიყურება შემდეგნაირად:

1. გენეტიკური წინასწარგანწყობა 
2. რასა - მეტად ვითარდება აზიურ რასაში 
3. სიმსუქნე

ჭარბთმიანობის დროს რეკომენდებულია გამოირიცხოს ენდოკრინოლოგიური პათოლოგიები, განსაკუთრებით კი ისეთ დროს, როცა ადამიანები მიმართავენ ლაზერული ეპილაციის სხვადასხვა სახეობებს, მაგრამ უშედეგოდ. უნდა გვახსოვდეს, რომ ეს არ არის მხოლოდ კოსმეტოლოგიური პრობლემა და შესაძლებელია მის უკან იმალებოდეს სერიოზული ჰორმონალური დისბალანსი.

წაიკითხეთ სრულად