Baby Bag

„ქალების უმრავლესობა გადასულია ვეგეტარიანულ კვებაზე, აღარ ვლაპარაკობ მკაცრ ვეგანობაზე. ორსულობისას იწყება ტირილი: ბავშვს ხომ არ დაემართება რამე?“ - ნანა ლოლაშვილი

„ქალების უმრავლესობა გადასულია ვეგეტარიანულ კვებაზე, აღარ ვლაპარაკობ მკაცრ ვეგანობაზე. ორსულობისას იწყება ტირილი: ბავშვს ხომ არ დაემართება რამე?“ - ნანა ლოლაშვილი

ჰემატოლოგი ნანა ლოლაშვილი გადაცემაში „პირადი ექიმი“ ანემიის და ვიტამინების დეფიციტის პრობლემის შესახებ საუბრობს. მისი თქმით, ანემია უმეტესად ქალბატონებს აწუხებთ:

„ყველა ასაკობრივი ჯგუფისთვის, სხვადასხვა პათოლოგიისა თუ ფიზიოლოგიური მდგომარეობისთვის, როდესაც მომატებულია რკინაზე მოთხოვნილება, მხოლოდ კვებით ამ საკითხს ვერ გადავწყვეტთ. თუ უკვე არის დაავადება, აქ აუცილებლად პრეპარატებია საჭირო. ამ საკითხს დიდი სიფრთხილით უნდა მიდგომა. პირველ რიგში, პაციენტების დიდი ნაწილი არის ქალები, ანემია დაკავშირებულია სისხლის ჭარბად დაკარგვასთან. მამაკაცები ბუასილის კვანძებიდან სისხლის დენის დროს, სანამ არ წაიქცევიან, მანამდე არ მოდიან ჩვენთან. ამ დროს შეიძლება უბრალოდ აბების მიღება და პრობლემა გადაწყდება.“

ნანა ლოლაშვილის თქმით, ორსულებისთვის მნიშვნელოვანია ხორცის მიღება და ვეგეტარიანული კვება მათ ბევრ პრობლემას უქმნის:

„ორსულობა არის ფიზიოლოგიური პროცესი. თუ ქალი რკინის და ვიტამინ B 12-ის ნორმალური რაოდენობით შედის ორსულობაში, მას მთელი ორსულობის განმავლობაში ვიტამინებიც, რკინაც - ყველაფერი ეყოფა. მერე მას სჭირდება ორი წელიწადი, რომ ყველაფერი აღიდგინოს, მაგრამ რას ვხედავთ ჩვენ? ქალების უმრავლესობა გადასულია ვეგეტარიანულ კვებაზე, აღარ ვლაპარაკობ მკაცრ ვეგანობაზე. ეს არ არის სოციალურ პირობებთან დაკავშირებული. ქალები ხშირად ამბობენ: „ხორცი არ მიყვარს, არ ვჭამ.“ მერე იწყება ტირილი: „ბავშვს ხომ არ დაემართება რამე?“ ელემენტარული რამ მაინც არის საჭირო, რომ ორსულობამდე სისხლის საერთო ანალიზი მაინც გაკეთდეს. მივაღწიეთ იმას, რომ პირველი ტრიმესტრის შემდეგ კეთდება ანალიზები, რომ დრო დაგვრჩეს პრობლემის მოსაგვარებლად. ამას ერთ კვირაში ვერ გამოასწორებ. რკინადეფიციტური ანემია აქამდეც ხშირი იყო და დღემდე პრობლემად რჩება, მაგრამ ამას დაემატა B12. ადრე ითვლებოდა, რომ B12-ის დეფიციტი ასაკოვანი ადამიანების დაავადება იყო. ეს დაავადება რომ განვითარდეს, შვიდი წელი არ უნდა მიიღო ხორცი, კვერცხი, ცილა.“

ნანა ლოლაშვილი აცხადებს, რომ ორსულისთვის დაუშვებელია ვიტამინების თვითნებურად მიღება:

„ორსულებში არ არის პრობლემა B12-ის განსაზღვრა, რკინის განსაზღვრა. ახლა სრულებით შეცვლილია დამოკიდებულება ვიტამინების მიმართ. პირველ ტრიმესტრში B ჯგუფის ვიტამინები, ფოლიუმის მჟავის გარდა არ უნდა დაინიშნოს. მსოფლიო ჯანდაცვის ორგანიზაციის რეკომენდაციებში კატეგორიულად არის მითითებული, რომ თუ ორსულს ვიტამინის დეფიციტი არ აქვს, არ შეიძლება მისთვის ვიტამინების მიცემა. მხოლოდ ერთი ვიტამინი შეიძლება დაინიშნოს ყოველგვარი განსაზღვრის გარეშე მწეველებში. სამწუხაროდ, გვყავს ასეთი ორსულებიც. ამ დროს ბევრი C ვიტამინი იხარჯება. ბევრი ორსული ამბობს: „ვერ დავანებებ თავს მოწევას.“ ასეთი დედების ბავშვები ბრონქიალური ასთმის განვითარების საშიშროების წინაშე არიან. იმ რეგიონებში, სადაც D ვიტამინის ნაკლებობაა, ისიც შეიძლება დაინიშნოს. დანარჩენი ვიტამინები უნდა განისაზღვროს.“

ნანა ლოლაშვილის თქმით, ვიტამინ B12 -ის დეფიციტი ძალიან ბევრ ორსულს აწუხებს, რის გამოც მეცნიერები და ექიმები მცენარეულ კვებასთან შედარებით უკვე ხორცის მირთმევის უპირატესობებზე ღიად საუბრობენ:

„ფოლიუმის მჟავის დეფიციტი ასე თუ ისე დავძლიეთ. პირველი ტრიმესტრის განმავლობაში თითქმის ყველა ორსული იღებს ამას, თუმცა არის რეგიონები სადაც ეს დეფიციტი გამოხატულია. ეს ის რეგიონებია, სადაც ორსულები გვიან მიდიან მეანთან, უკვე სამი თვის ორსულობის შემდეგ. B12 ძალიან სერიოზული პრობლემაა. მოდიან და ამბობენ: „ერთი კვირაა უკვე ვჭამ ხორცს.“ ეს არ არის საკმარისი. სამწუხაროდ, იყო პერიოდი, როდესაც მეცნიერები და ექიმები წერდნენ, რომ გადავსულიყავით მცენარეულ საკვებზე. ბოლო წლების შრომები ისევ ხორცისკენ იხრება. B12 მარტო ხორცსა და კვერცხში შედის. ძალაუნებურად უნდა მიიღო ეს პროდუქტები, ამას დიდი კვლევები არ სჭირდება. ახლა წამოვიდა ნაშრომები, სადაც კატეგორიულად ამბობენ, რომ ცილის გარეშე დაორსულება კატეგორიულად არ შეიძლება.“

ნანა ლოლაშვილი იმ ძირითად სიმპტომს ასახელებს, რომელიც ანემიის უტყუარ ნიშანს წარმოადგენს და მისი გამოვლენის შემთხვევაში დიაგნოზის დასმა მარტივად შეიძლება:

„ის ორსულებიც კი, რომლებმაც იციან, რომ წინა ორსულობაზე ჰქონდათ ანემია, შემდეგი ორსულობის წინ ანალიზებს არ იკეთებენ. ანემიის ერთ-ერთი მთავარი სიმპტომი, რომელიც ქალებს და ბავშვებს ხშირად აქვთ, არის გაუკუღმართებული გემოვნება. ამას არ აქცევენ ხოლმე ყურადღებას. პაციენტები მიირთმევენ ყინულს, ქაღალდის ხელსახოცებს, ცარცს, ყავის მარცვლებს, შეუძლიან მთლიანი ფორთოხალი და ლიმონი კანიანად შეჭამონ, რომელიმე მწვანილი მიირთვან გაუთავებლად. არის ყნოსვის გაუკუღმართებაც, მაგრამ ამას სხვა დაავადებებიც იწვევს. თუ ეს სიმპტომი აქვს ვინმეს, უფრო ქალებს და ბავშვებს აწუხებთ, დიაგნოზიც არ სჭირდება ამას, ეს არის რკინადეფიციტური ანემია. ეს არის დაავადება, რომელიც ადვილად მოსარჩენია და სხვა ბევრი დაავადების განვითარებას უწყობს ხელს.“

„მოზარდებს უფრო მეტი რკინა სჭირდებათ, ვიდრე სხვა პერიოდში. რკინა იხარჯება კუნთების წარმოქმნაზე. ამით ვიყოლიებ ბავშვებს, ვეუბნები: „ხომ უნდა გაიზარდოთ.“ ამისთვის აუცილებელია რკინა,“ - აღნიშნავს ნანა ლოლაშვილი.

წყარო: ​პირადი ექიმი - მარი მალაზონია

არ დაგავიწყდეთ !!!

დაემატეთ ჯგუფში საბავშვო რეცეპტები

​რა არის ვიტამინი B12 და როგორ ვლინდება მისი დეფიციტი?
დღეს სამშაბათია და მედიაპორტალი MomsEdu.ge ტრადიციულ რუბრიკას - ენდოკრინოლოგის რეკომენდაციებს წარმოგიდგენთ. ამჯერად ენდოკრინოლოგ-ნუტრიციოლოგი თინათინ კაჭარავა B12 ვიტამინის შესახებ მოგაწვდით კომპ...

შეიძლება დაინტერესდეთ

ორსულობის პერიოდის 21 მნიშვნელოვანი მოვლენა

ორსულობის პერიოდის 21 მნიშვნელოვანი მოვლენა

ორსულობა ქალის ცხოვრებას მთლიანად ​ცვლის. მომავალი დედები ცხრა თვის მანძილზე ხშირად განიცდიან სიხარულსა და მღელვარებას. ჩვენს სტატიაში იმ 21 მნიშვნელოვან მოვლენაზე გესაუბრებით, რომელთა დავიწყება ორსული ქალბატონებისთვის შეუძლებელია.

• ორსულობის ტესტის დადებითი პასუხი
ორსულობის ტესტის დადებითი პასუხი იმ ქალბატონებსაც კი სასიამოვნო ჟრუანტელს გვრის, რომლებიც ორსულობას გეგმავდნენ და აღნიშნული სიახლე მათთვის დიდ სიურპრიზს არ წარმოადგენს. თუ ტესტი დადებით პასუხს გიჩვენებთ, შესაძლოა, ურთიერთგამომრიცხავი შეგრძნებები დაგეუფლოთ. ზოგიერთი ქალბატონი მოულოდნელი სიახლით აღფრთოვანებულია, ზოგს შიში იპყრობს, ნაწილი თვლის, რომ ორსულობისთვის მზად არ იყო, ნაწილს კი ბედნიერებისგან ორ ფეხზე მყარად დგომა უჭირს. შესაძლოა, ზემოთ დასახელებული ყველა შეგრძნება ერთდროულად დაგეუფლოთ, რაც არ უნდა გაგიკვირდეთ. ორსულობა ქალის ცხოვრებაში უმნიშვნელოვანესი მოვლენაა, რის გამოც ის მდედრობითი სქესის წარმომადგენლებში დიდ მღელვარებას იწვევს.
• ორსულთა გულისრევის შეგრძნება
ორსულობის ადრეულ ეტაპზე ქალბატონებს გულისრევა ხშირად აწუხებთ. როდესაც უსიამოვნო შეგრძნება მათ პირველად ეუფლებათ, ისინი ძალიან ღელავენ. მუცლის არეში ყრუ ტკივილი და ხშირი გულისრევა ორსულ ქალბატონებს ტესტის დადებითი პასუხის უტყუარობაში არწმუნებს.
• პირველი ვიზიტი გინეკოლოგთან
სახლის პირობებში ჩატარებული ტესტი მეტ-ნაკლებად სანდოა, თუმცა ქალბატონებს ზუსტი პასუხის გასაგებად გინეკოლოგთან მისვლა მაინც სჭირდებათ. როდესაც ექიმი ტესტის პასუხს დაგიდასტურებთ, სიხარულის წარმოუდგენელი განცდა გეუფლებათ, რადგან ამჯერად დარწმუნებით შეგიძლიათ თქვათ, რომ ორსულად ხართ.
• ახლობელი ადამიანისთვის ორსულობის ამბის გამხელა
ექიმის მიერ ტესტის პასუხის დადასტურების შემდეგ, თქვენ ახლობელი ადამიანებისთვის სიმართლის თქმას მოისურვებთ. ცხადია, თავად უნდა გადაწყვიტოთ, თუ ვის გაუმხელთ თქვენს „საიდუმლოს“ პირველად. როდესაც თქვენ მიერ შერჩეულ ადამიანთან მიხვალთ და სასიამოვნო სიახლით მის გახარებას დააპირებთ, იგრძნობთ, რომ რაღაც ძალიან მნიშვნელოვანი ხდება. ახლობლებისა და საყვარელი ადამიანის რეაქცია თქვენთვის აუცილებლად ამაღელვებელი იქნება. არ აქვს მნიშვნელობა, ისინი მოულოდნელ სიახლეს სიხარულით შეხვდებიან თუ ემოციების გამოხატვას მოერიდებიან, ეს წუთები არასდროს დაგავიწყდებათ.
• პირველი ტრიმესტრის დასასრული
პირველი ტრიმესტრის დასრულება ორსულებს სიმშვიდის მოპოვებაში ეხმარება. სამთვიანი ეტაპის გადალახვასთან ერთად ნაყოფის უნებლიედ დაკარგვის რისკები მნიშვნელოვნად მცირდება, რაც ქალბატონებს განტვირთვაში ძალიან ეხმარება. გარდა ამისა, პირველი ტრიმესტრის დასრულების შემდეგ გულისრევის უსიამოვნო შეგრძება და ყოველდღიური სისუსტე ნელ-ნელა ქრება, რაც ორსულობით ტკბობის შესაძლებლობას გაძლევთ.
• ბავშვისთვის პირველი ნივთის შეძენა
ზოგიერთ ოჯახში ბავშვის დაბადებამდე მისთვის ნივთებისა და ტანსაცმლის შეძენას კატეგორიულად ეწინააღმდეგებიან. ზოგიერთ ორსულს კი საყიდლებზე სიარული ძალიან ხიბლავს და ცრურწმენების ნაკლებად სწამს. თუ თქვენ ბავშვისთვის ნივთების ყიდვას ნაადრევად დაიწყებთ, საკუთარ თავს წარმოუდგენელ სიხარულს მიანიჭებთ. მომავალი შვილისთვის პირველი ნივთის შეძენა დაუვიწყარი მოგონებაა. მისი ოთახის მორთულობაზე ზრუნვა და ჩვილის ტანსაცმლის შეძენა ორსულ ქალბატონს უსაზღვროდ აბედნიერებს.
• ბავშვის გულისცემის მოსმენა
ორსულ ქალბატონებში ბავშვის გულისცემის პირველად მოსმენა საოცრად ფაქიზ და სასიამოვნო შეგრძნებებს იწვევს. ეს საოცარი და განსაკუთრებული ხმა მომავალ დედებს არწუნებს, რომ ყველაფერი რიგზეა, ბავშვი ჯანმრთელია და ორსულობა კარგად მიმდინარეობს. თუ ბავშვის გულისცემის მოსასმენად პირველად მიდიხართ, მარტო ნუ წახვალთ. თქვენი სიხარული და აღფრთოვანება საყვარელ ადამიანსაც უნდა გაუზიაროთ.
• საორსულო ტანსაცმლის ტარება
საორსულო ტანსაცმლის ტარება ორსული ქალისთვის განსაკუთრებული მოვლენაა. ქალბატონებს, რომლებიც პირველ ბავშვს ელოდებიან, საორსულო ტანსაცმლის მორგება ძალიან ეჩქარებათ. მათ სურთ დარწმუნებულები იყვნენ, რომ ნამდვილად ორსულად არიან. ისინი დიდი რაოდენობით საორსულო კაბებს ყიდულობენ და ერთი სული აქვთ, როდის გაეზრდებათ მუცელი, რათა განსაკუთრებული სამოსის ტარება შეძლონ.
• უცხო ადამიანის მიერ თქვენი ორსულობის შემჩნევა
ორსულ ქალბატონებს ძალიან უხარიათ, როდესაც მათ განსაკუთრებულ მდგომარეობას სრულიად უცხო ადამიანი ამჩნევს. თუ თქვენთვის უცნობი პირი ინტერესდება, პატარას როდისთვის ელოდებით ან როგორ მიდის თქვენი ორსულობა, განსაკუთრებული სიხარულის შეგრძნება გეუფლებათ. მსგავსი შემთხვევები გაცილებით სასიხარულოა იმ ქალბატონებისთვის, რომლებიც ორსულად პირველად არიან.
• ბავშვის მოძრაობის შეგრძნება
ბავშვის მოძრაობის პირველი შეგრძნება დედისთვის დაუვიწყარი მოგონებაა. რამდენიმე დღის მანძილზე ორსული ქალბატონები მუცელში გაჩენილ უცნაურ შეგრძნებებს ეჭვის თვალითაც უყურებენ. ისინი დარწმუნებულები არ არიან, რომ ის, რასაც ისინი გრძნობენ, ბავშვის მოძრაობაა. ზოგიერთი ნაყოფის უნებლიე მოძრაობებს შედარებით მძაფრად აღიქვამს, ზოგი კი - ნაკლებად, თუმცა სასიამოვნო ბიძგების შეგრძნება ნებისმიერ შემთხვევაში სიხარულის მომნიჭებელია.
• მადის მოზღვავება და გემოვნების ცვლილება
ორსულების დიდი ნაწილი მადის საოცარ მოზღვავებას განიცდის. მათ გემოვნებაც საოცრად ეცვლებათ და გარკვეული საკვები პროდუქტების მიმართ აკვიატებული დამოკიდებულებები უჩნდებათ. ახალბედა ორსულებს საჭმლისადმი არანორმალური მიდრეკილების შეგრძნება ძალიან აოცებთ. ზოგიერთი მადის ძლიერ მატებას განიცდის და ცდილობს, თავი მაქსიმალურად შეიკავოს. მსგავსი ცვლილებების გამო ნუ დაიტანჯებით. ეცადეთ, ორსულობის ყოველი წუთით ისიამოვნოთ.
• ბავშვის სქესის დადგენა
არ აქვს მნიშვნელობა ბავშვის სქესს ორსულობის ადრეულ ეტაპზე იგებთ, თუ უშუალოდ მშობიარობის დროს. არც იმას აქვს მნიშვნელობა, გოგო გეყოლებათ თუ ბიჭი. ნებისმიერ შემთხვევაში სქესის გაგება თქვენს ცხოვრებას სამუდამოდ შეცვლის.
• ბავშვის მოძრაობის შემჩნევა სხვა ადამიანის მიერ
ბავშვის მოძრაობის შემნევა დედას უფრო უადვილდება ვიდრე სხვა ადამიანებს. მას შემდეგ, რაც მუცელში სასიამოვნო ბიძგებს იგრძნობთ, დაახლოებით ერთი თვე უნდა გავიდეს, რათა ბავშვის მოძრაობის აღქმა სხვებმაც შეძლონ. თქვენთვის ამაღელვებელი და განსაკუთრებული შეგრძნების სხვისთვის გაზიარება წარმოუდგენელ სიხარულს მოგანიჭებთ.
• მშობელთა სკოლაში სიარული
მშობელთა სკოლაში ქალბატონებს ორსულობის, მშობიარობისა და ბავშვის მოვლისთვის სათანადოდ ამზადებენ. თქვენ სკოლაში სიარულს, სავარაუდოდ, მეორე ტრიმესტრის დასაწყისში დაიწყებთ და მესამე ტრიმესტრში დაასრულებთ. სკოლაში მისვლა სერიოზული ნაბიჯია, რომელიც თქვენი ცხოვრების უმნიშვნელოვანეს მოვლენასთან შესახვედრად გამზადებთ. სკოლის დასრულება კი გარწმუნებთ, რომ ბავშვთან შეხვედრამდე ძალიან ცოტა დრო რჩება.
• მესამე ტრიმესტრის დასაწყისი
მომავალ დედებს 9 თვე დროის ძალიან დიდ მონაკვეთად ეჩვენებათ. როდესაც მესამე ტრიმესტრი იწყება, ისინი აცნობიერებენ, რომ ორსულობის 2/3 უკვე ჩავლილია და მშობიარობის დრო ახლოვდება. ცხადია, ეს აღმოჩენა მომავალი დედების მღელვარებას ზრდის.
• BaBy Shower-ის წვეულების გამართვა
Baby Shower-ის წვეულების გამართვას თუ გეგმავთ, მშობიარობისთვის პოზიტიური განწყობის შექმნა არ გაგიჭირდებათ. ახლობლებთან და მეგობრებთან ერთად კარგი დროის გატარება, მათთვის თქვენი ემოციების, განცდების, მოლოდინებისა და შიშების გაზიარება მღელვარებას მნიშვნელოვნად შეგიმსუბუქებთ. წვეულების გამართვა კიდევ ერთხელ დაგარწმუნებთ იმაში, რომ თქვენი ცხოვრების ყველაზე მნიშვნელოვანი მოვლენისთვის ემზადებით.
• ბავშვის ოთახის მომზადება
ზოგიერთ ოჯახში ბავშვს ინდივიდუალური საძინებელი აქვს, მშობლების ნაწილი კი ბავშვის საწოლს თავის საძინებელში უჩენს ადგილს. ბავშვის ოთახის მოწყობა და გალამაზება მშობლებისგან ხშირად იმაზე მეტ ძალისხმევას მოითხოვს, ვიდრე წარმოუდგენიათ. ჩვილის კუთხის მოწესრიგება მომავალ დედას საოცარ ბედნიერებას ანიჭებს.
• შუაღამისას ნაყინის ჭამა
ორსულ ქალბატონებს მოულოდნელი გადაწყვეტილებების მიღება ხიბლავთ. საყვარელ ადამიანთან ერთად შუაღამით ნაყინის ჭამა და მომავალ შვილზე საუბარი ერთ-ერთი საუკეთესო რამაა, რისი გაკეთებაც ორსულობის განმავლობაში შეგიძლიათ. მოულოდნელი თავგადასავლები თქვენი ცხოვრების ამ უმნიშვნელოვანეს ეტაპს დაუვიწყარ თავგადასავლად აქცევს.
• ექიმთან ყოველკვირეულ ვიზიტებზე სიარული
ორსულობის 36-ე კვირიდან თქვენი მეან-გინეკოლოგი ყოველკვირეულ ვიზიტებზე დაგიბარებთ, რადგან მშობიარობის თარიღი მოახლოვდება. გახშირებული ვიზიტები ორსული ქალბატონების დიდ ნაწილს აფორიაქებს, რადგან ბავშვთან შეხვედრამდე უფრო ცოტა დრო რჩება. ექიმთან ვიზიტი ყოველთვის წინასწარ დაჯავშნეთ, რათა კრიტიკულ ვითარებაში დახმარების გარეშე არ დარჩეთ.
• მშობიარობის გეგმის შემუშავება
მშობიარობის თარიღის მოახლოვებასთან ერთად თქვენ სამშობიარო გეგმის შემუშავებაზე უნდა იზრუნოთ. თქვენ მიერ შედგენილი გეგმა შეგიძლიათ ახლობელ ადამიანებს აჩვენოთ და გაუზიაროთ. გეგმის შედგენა დაგარწმუნებთ, რომ ბავშვი ძალიან მალე დაიბადება.
• მშობიარობის თარიღის მოახლოვება
მშობიარობის სავარაუდო თარიღის მოახლოვება აუცილებლად უნდა აღნიშნოთ. 40 კვირიანი მოლოდინის შემდეგ ამას ნამდვილად იმსახურებთ. მართალია, ხშირად მშობიარობის სავარაუდო თარიღი არც ისე ზუსტია და ორსულებს ერთი-ორი კვირით ლოდინი უწევთ, მაგრამ ბავშვის დაბადებამდე ძალიან ცოტა დრო რჩება. თქვენი პატარა ნებისმიერ დღეს შეიძლება მოევლინოს ქვეყანას. ეცადეთ მშობიარობის სავარაუდო თარიღის მოახლოვება მეგობრებთან ერთად აღნიშნოთ და თქვენს მომავალ შვილთან შესახვედრად მოემზადოთ.

მომზადებულია verywellfamily.com-ის მიხედვით
თარგმნა ია ნაროუშვილმა 
წაიკითხეთ სრულად