Baby Bag

5 ყველაზე გავრცელებული სიმსივნე ბავშვებში - სიმპტომები, რომლებიც მშობლებს არ უნდა გამოეპაროთ

5 ყველაზე გავრცელებული სიმსივნე ბავშვებში - სიმპტომები, რომლებიც მშობლებს არ უნდა გამოეპაროთ

სიმსივნური დაავადებები, რომლებიც ბავშვებშია გავრცელებული, მნიშვნელოვნად განსხვავდება ზრდასრულებში გამოვლენილი სიმსივნური დაავადებებისგან. სამკურნალო საშუალებების ზრდის წყალობით, ბავშვების 80 %-ზე მეტი სიმსივნური დაავადების დადგენიდან ხუთი წლის განმავლობაში სიცოცხლეს ახერხებს. თხუთმეტ წლამდე ასაკის ბავშვების გარდაცვალების მიზეზებს შორის სიმსივნე მეორე ადგილს იკავებს, უპირველეს მიზეზად კი უბედური შემთხვევები რჩება.

ბავშვებში სიმსივნის პირველი ნიშნების ამოცნობა საკმაოდ რთულია, რადგან სხვა გავრცელებული დაავადებები ან თამაშისას მიღებული კანის დაზიანებები მნიშვნელოვან სიმპტომებს ფარავს. ჩვენს სტატიაში ბავშვებში ყველაზე გავრცელებულ სიმსივნურ დაავადებებს გაგაცნობთ და მათ გამაფრთხილებელ ნიშნებზეც გესაუბრებით.

1. მწვავე ლიმფობლასტური ლეიკემია

მწვავე ლიმფობლასტური ლეიკემია ბავშვებში ყველაზე გავრცელებული სიმსივნეა. ბავშვებში გავრცელებული სიმსივნური დაავადებების 34 % სწორედ მწვავე ლიმფობლასტურ ლეიკემიაზე მოდის. როგორც წესი, ის ორიდან ოთხ წლამდე ასაკის ბავშვებში ვლინდება და უფრო ხშირია ბიჭებში, ვიდრე გოგონებში. ის ძვლის ტვინიდან იწყება და შემდეგ სისხლში ვრცელდება. შესაძლოა, სიმსივნე სხვა ორგანოებზეც გავრცელდეს. ბავშვებში გამოვლენილი ლეიკემიის ყოველი სამი შემთხვევიდან ორი მწვავე ლიმფობლასტურ ლეიკემიაზე მოდის.

სიმპტომები, რომლებიც მშობლებს არ უნდა გამოეპაროთ:

  • ძვლისა და სახსრების ტკივილი
  • დაღლილობა
  • სისუსტე
  • სისხლდენა
  • ტემპერატურის მატება
  • წონაში კლება

2. თავის ტვინის სიმსივნე

ბავშვებში გავრცელებული სიმსივნეების 27 % სწორედ თავის ტვინის სიმსივნეზე მოდის. თავის ტვინის სიმსივნე სხვადასხვა ფორმით გვხვდება და მათი მკურნალობის მეთოდებიც განსხვავებულია. ბავშვებში თავის ტვინის სიმსივნე ძირითადად ნათხემიდან იწყება.

სიმპტომები, რომლებიც მშობლებს არ უნდა გამოეპაროთ:

  • თავის ტკივილი
  • თავბრუსხვევა
  • ბალანსის დარღვევა
  • მხედველობითი, სმენითი და ლაპარაკის პრობლემები
  • ხშირი პირღებინება

3. ნეირობლასტომა

ნეირობლასტომა ნერვის უმწიფარი უჯრედიდან ვითარდება. ის, როგორც წესი, ხუთ წლამდე ასაკის ბავშვებში ვლინდება და პატარებში გავრცელებული სიმსივნეების 7% სწორედ მასზე მოდის. ნეირობლასტომა უფრო ხშირად ბიჭებს ემართებათ, ვიდრე გოგონებს. დაავადებული ბავშვების მხოლოდ 1-2 %-ს აქვს სიმსივნის ოჯახური ისტორია.

სიმტპომები, რომლებიც მშობლებს არ უნდა გამოეპაროთ:

  • სიარულის უნარის დარღვევები
  • ცვლილებები თვალების გარშემო (ქუთუთოების ჩამოწევა, შეშუპება, სიშავე)
  • სხეულის სხვადასხვა ზონაში ძლიერი ტკივილები
  • დიარეა
  • არტერიული წნევის მატება

4. თირკმლის ადენოსარკომა

თირკმლის ადენოსარკომა თირკმელში ვითარდება და უმეტესად მხოლოდ ერთ თირკმელზე გვხვდება. იშვიათ შემთხვევაში ის ორივე თირკმელზე ვრცელდება. როგორც წესი, ის 3-4 წლამდე ასაკის ბავშვებშია გავრცელებული, ექვსი წლის შემდეგ კი ძალიან იშვიათია. თირკმლის ადენოსარკომით დაავადებული 10 ბავშვიდან 9 იკურნება.

სიმპტომები, რომლებიც მშობლებს არ უნდა გამოეპაროთ:

  • მუცლის ამოზნექილობა
  • ცხელება
  • ტკივილი
  • ღებინება
  • მადის დაქვეითება

5. ლიმფომა

ლიმფომა ლიმფოიდური ქსოვილის დაავადებაა. შესაძლოა, მან ძვლის ტვინიც დააზიანოს. იმის მიხედვით, თუ რომელ ზონებშია ლიმფომა გავრცელებული, მას სხვადასხვა სახის გამოვლინება ახასიათებს. ჰოჯკინის ლიმფომა ბავშვებში იშვიათად გვხვდება. ის უფროსებსა და ბავშვებში ერთგვარი მიმდინარეობით გამოირჩევა. არაჰოჯკინის ლიმფომა უფრო გავრცელებულია სამ წლამდე ასაკის ბავშვებში. ლიმფომას სწრაფი ზრდა ახასიათებს და დროული მკურნალობა ესაჭიროება. როგორც წესი, არაჰოჯკინის ლიმფომა ბავშვებში უფრო მეტად განკურნებადია, ვიდრე ზრდასრულებში.

სიმპტომები, რომლებიც მშობლებს არ უნდა გამოეპაროთ:

  • ლიმფური კვანძების გადიდება
  • სისუსტე
  • წონაში კლება
  • ოფლიანობა
  • ცხელება

იმ შემთხვევაში, თუ ბავშვს საეჭვო სიმპტომებსა და ნიშნებს ამჩნევთ, აუცილებლად მიაკითხეთ პედიატრს.

მომზადებულია ​roswellpark.org - ის მიხედვით

თარგმნა ია ნაროუშვილმა

არ დაგავიწყდეთ !!!

დაემატეთ ჯგუფში საბავშვო რეცეპტები

ბავშვებში სიმსივნის პრევენცია სავსებით შესაძლებელია, თუ მშობლები გარკვეულ წესებს მკაცრად დ...
​ბავშვებში სიმსივნის განვითარება მშობლების ცხოვრების წესზე მნიშვნელოვნად არის დამოკიდებული. სიმსივნის რისკი მაღალია იმ პატარებში, რომლებიც თავადაც არაჯანსაღ კვებაზე იმყოფებიან და დღის მოუწესრიგებელი რ...

შეიძლება დაინტერესდეთ

„არასწორია კონტექსტი, რომ ენტეროვირუსი ასოცირებულია დიარეით და ფაღარათით მიმდინარე დაავადებებთან,“ - ინფექციონისტი მეგი კობახიძე

„არასწორია კონტექსტი, რომ ენტეროვირუსი ასოცირებულია დიარეით და ფაღარათით მიმდინარე დაავადებებთან,“ - ინფექციონისტი მეგი კობახიძე

ინფექციონისტმა მეგი კობახიძემ ენრეტოვირუსებისა და მოწამვლის განმასხვავებელი და საერთო ნიშნების შესახებ ისაუბრა. მან აღნიშნა, რომ არასწორია ენტეროვირუსის ასოცირება დიარეით და ფაღარათით მიმდინარე დაავადებებთან:

„არასწორია კონტექსტი, რომ ენტეროვირუსი ასოცირებულია დიარეით და ფაღარათით მიმდინარე დაავადებებთან. ენტეროვირუსები იწვევენ დაავადებას, რომელიც იწვევს ნერვული სისტემის დაზიანებას. ზაფხულის პერიოდში არის დაავადებები, რომლებიც მიმდინარეობს დიარეით ან ფაღარათით. მათი გამომწვევი შეიძლება იყოს როგორც ​ბაქტერიული, პარაზიტული, ასევე ვირ​უსული აგენტები. განსაკუთრებით საყურადღებო ტემპერატურული რეაქცია, შეუპოვარი ღებინება, დიარეა შეიძლება იყოს ბავშვებში, ხანდაზმულებსა და იმუნოკომპრომეტირებულ პირებში.“

მეგი კობახიძის თქმით, ბავშვები უფრო მგრძნობიარეები არიან გაუწყლოვნების მიმართ, რის გამოც სიმპტომების არსებობის შემთხვევაში მათთვის დიდი რაოდენობით სითხის მიღება აუცილებელია:

​ბავშვები უფრო მგრძნობიარეები არიან გაუწყლოვნების მიმართ. შეუპოვარი ღებინება და დიარეა იწვევს დიდი რაოდენობით სითხისა და ელექტროლიტების დანაკარგს. ბავშვებში ეს განსაკუთრებით მძიმე მიმდინარეობით ხასიათდება. როგორც კი მშობელი შენიშნავს, რომ ბავშვს აქვს დიარეა, ღებინება, ტემპერატურული რეაქცია, აუცილებლად უნდა მოხდეს დიდი რაოდენობით სითხის მიღება. იმ შემთხვევაში, თუ ბავშვი ვერ სვამს წყალს, საჭიროა გადასხმები.“

„ბავშვი, შესაძლოა, იყოს მივარდნილი, ძილიანი, იყოს მაღალი ჰექტიური ცხელება. ენა იყოს გამომშრალი და ბავშვს უძნელდებოდეს კონტაქტში შემოსვლა. ეს უკვე არის ის საგანგაშო სიმპტომები, როდესაც დაუყოვნებლივ უნდა მოხდეს საავადმყოფოში ბავშვის გადაყვანა. ბაქტერიული გამომწვევები უფრო საკვებით ვრცელდებიან. ესეც იწვევს მუცლის ტკივილს, დიარეას, პირღებინებას, ინტოქსიკაციას. დიფერენცირებისთვის, რათა გავიგოთ ​ეს არის ვირუსული, პარაზიტული თუ ბაქტერიული წარმოშობის, საჭიროა ბაქტერიული კვლევები,“ - აღნიშნულ საკითხებზე მეგი კობახიძემ ტელეკომპანია „რუსთავი 2“-ის გადაცემაში „დილა მშვიდობისა საქართველო“ ისაუბრა.

წყარო:  ​„დილა მშვიდობისა საქართველო“

წაიკითხეთ სრულად