Baby Bag

„ყველა ვაქცინა, რომელიც შემოვა, არის კარგი, ამიტომ, რაც იქნება, იმით ავიცრათ,“ - ინფექციონისტი მაია ბუწაშვილი

ინფექციონისტი მაია ბუწაშვილი „სხვა შუადღეში“ კორონავირუსის შემთხვევების მატებას ეხმიანება და აცხადებს, რომ, შესაძლოა, მოვლენები სხვადასხვაგვარად განვითარდეს:

„კორონავირუსის შემთხვევების გააქტიურება ორ რამეზე მიგვანიშნებს, რომ ყველაფერი ან სტაბილიზაციისკენ წავა, ან შეიძლება მოხდეს ის, რასაც ყველა ისედაც ველოდით და დაიწყოს აღმავლობა, იმიტომ, რომ ეს ვნახეთ ძალიან ბევრ ქვეყანაში. 45 ყურს გვჭრის, მაგრამ ეს რეალურად ძალიან პატარა ციფრია, თუ შევადარებთ სომხეთის, თურქეთის ან აზერბაიჯანის სტატისტიკას. ჩვენ მივეჩვიეთ, დიდი კომფორტი იყო ჩვენთვის, რომ ერთეული შემთხვევები იყო. შეიძლება ეს დასტაბილურდეს."

მაია ბუწაშვილის განმარტებით, კორონავირუსით გარდაცვალების შემთხვევების კლება გამოცდილების დაგროვებით არის გამოწვეული:

„კორონავირუსთან ბრძოლაში გამოცდილება დაგროვდა, მეტი ინფორმაცია არსებობს, მართვა უკეთესი გახდა. სამწუხაროდ, ვირუსის ბუნების ცვლილებასა და შესუსტებაზე ლაპარაკი არ არის. ჩვენ აშკარად ვხედავთ, რომ გარდაცვალების პროცენტი მცირდება, მაგრამ ეს გამოიწვია ტესტირების გაფართოებამ. ადრე ტესტირება უტარდებოდათ მხოლოდ იმ ადამიანებს, ვისაც სიმპტომები ჰქონდა, ვინც სტაციონარში ხვდებოდა. მათ შორის გართულებების რიცხვი უფრო მაღალი იყო. ამჟამად ტესტირება ყველა ქვეყანაში გაფართოებულია, მათ შორის, ფართო მასების ტესტირებაც ხდება. ვირუსის გამოვლენა გაუმჯობესებულია, რის გამოც გართულებების პროცენტი მცირდება. ეს იმიტომ არ ხდება, რომ ვირუსი შესუსტდა. ექიმებმაც ბევრად უკეთ ისწავლეს ვირუსის მართვა.“

ინფექციონისტის თქმით, კორონავირუსის გადადების ყველაზე მეტი შემთხვევა ოჯახურ კონტაქტებს უკავშირდება:

„საოჯახო მჭიდრო კონტაქტების შემთხვევაში ინფიცირდება 30-დან 50 %-მდე, სუფრაზე შეხვედრით, ახლოს ჯდომისას, 7-დან 10 % -მდე, მაღაზიაში საყიდლებზე ყოფნისას არაუმეტეს 1 % -ისა. ზომიერება ყოველთვის უნდა დავიცვათ. მე არასდროს გამირეცხავს სახლში მიტანისას შეფუთვები. კარგია ჰიგიენის წესების დაცვა, მაგრამ ექსტრემალურ მდგომარეობაში ვიყავით გადასულები. პანიკამ ბევრი დადებითი შედეგი მოგვცა, მაგრამ ბევრი ნევროზულ მდგომარეობამდე მიიყვანა. მე ვიცი ადამიანები, რომლებიც ყოველდღე პალტოებს რეცხავდნენ, ადეზინფიცირებდნენ. ეს აბსურდია. ზომიერება ამიტომაც არის საჭირო. რაღაც ვადების მერე ადამიანი ამას ვეღარ უძლებს და ყველაზე საჭირო დროს სრული მოდუნება ხდება. შეიძლება ჩვენ ძალიან ადრე დავიწყეთ ეს ყველაფერი. ევროპაში შეეგუენ კოვიდთან თანაცხოვრებას. იქ შემთხვევები ბევრია, მაგრამ ლეტალური შედეგი, საბედნიეროდ, უკვე ძალიან მცირეა.“

მაია ბუწაშვილი აღნიშნავს, რომ ევროპამ უკვე ისწავლა ვირუსის მართვა:

„ევროპაში ძირითად მოწყვლად ჯგუფებში ვირუსმა უკვე გაიარა. რეანიმატოლოგებმა უკეთ ისწავლეს დაავადების მართვა, იციან, როდის უნდა გადაიყვანონ პაციენტი მართვით სუნთქვაზე და როდის - არა. ეს არ არის ტიპიური ვირუსი, არ აქვს ტიპიური მიმდინარეობა და რა თქმა უნდა, პრაქტიკა დაგროვდა.“

„სიმპტომებით ჩვეულებრივ გრიპს და კოვიდს ერთმანეთისგან ვერ განვასხვავებთ. საბედნიეროდ, არსებობს ტესტირება. ეპიდემიის კერაში ნამყოფი ადამიანის ტესტირებას სახელმფიწო პროგრამა აფინანსებს. რამდენიმე ვაქცინა მესამე ფაზაშია, ორი ფაზა წარმატებით გაიარა. არსად იქნება ჯერჯერობით რუსული ვაქცინა, რომელიც თითქოს დასრულდა, მაგრამ მასზე არ არის საკმარისი ინფორმაცია. ჯერჯერობით არ არსებობს მტკიცებულებები, რომ მან წარმატებით გაიარა გამოცდა. ეს ვაქცინა ჰაერშია გამოკიდებული, ეს ფაზები გავლილი არ აქვს. ჯამში ოთხი ვაქცინაა ძალიან კარგ პოზიციებზე. მათგან მინიმუმ ერთი მაინც დაასრულებს კარგად. წელს ყველა ქვეყანა მობილიზებულია, რომ სტანდარტული გრიპის ვაქცინები ცოტა ადრე შემოიტანოს. როგორც კი გაჩნდება გრიპის ვაქცინები, მაშინვე შეგიძლიათ გაკეთება. ყველა ვაქცინა, რომელიც შემოვა, არის კარგი, ამიტომ, რაც იქნება, იმით ავიცრათ,“ - აცხადებს მაია ბუწაშვილი.


არ დაგავიწყდეთ !!!

Momsedu.ge-მ თქვენთვის, დედებისთვის შექმნა ახალი სივრცე. მოიწონეთ გვერდი მცოდნე დედები

​Covid-19 და ხელახალი დაბრუნება სკოლებსა და საბავშვო ბაღებში - რა რჩევებს გვაძლევს აშშ პედ...
​Covid-19 და ხელახალი დაბრუნება სკოლებსა და საბავშვო ბაღებში - რა რჩევებს გვაძლევს აშშ პედიატრიის აკადემია - აღნიშნულ თემაზე გთავაზობთ პედიატრი თამარ ობგაიძის​ ბლოგს. საგაზაფხულო სემესტრმა კარანტ...

შეიძლება დაინტერესდეთ

„არ გამოიყენოთ სხვისი თვალის ფანქარი, ტუში, ფუნჯები, ამას ნამდვილად აქვს მნიშვნელობა,“- ოფთალმოლოგი თამარ ჩიტაძე

„არ გამოიყენოთ სხვისი თვალის ფანქარი, ტუში, ფუნჯები, ამას ნამდვილად აქვს მნიშვნელობა,“- ოფთალმოლოგი თამარ ჩიტაძე

ოფთალმოლოგმა თამარ ჩიტაძემ თვალის სილამაზესა და ჯანმრთელობას შორის არსებული მჭიდრო ურთიერთკავშირის შესახებ ისაუბრა:

„თვალის სილამაზე მჭიდრო კავშირშია ჯანმრთელ თვალთან. თვალი, რომელიც გამოიყურება ესთეტიურად ლამაზად, ჯანმრთელია. ჯანმრთელი თვალის ზედაპირი უკვე ლამაზი გამომეტყველების წინაპირობაა. თვალის ზედაპირის დაავადებებში ბევრი პათოლოგია ერთიანდება. დღეს ვისაუბროთ ქუთუთუოების ჯანმრთელობაზე. შესაძლოა, გსმენიათ პარაზიტების შესახებ წამწამების ძირებზე რომ ბინადრობს. ეს გადამდები დაავადებაა. ამ დროს აქტიურად მრავლდებიან პარაზიტები. მათ ძალიან კარგი პირობები აქვთ წამწამების ძირებზე, მშვენივრად იკვებებიან.“

„არ გამოიყენოთ სხვისი თვალის ფანქარი, ტუში, ფუნჯები. ამას ნამდვილად აქვს მნიშვნელობა. პარაზიტები იწვევენ ძალიან არასასიამოვნო ჩივილებს. ქავილს, გამონადენს, სიწითლეს, შეშუპებას. ამას სჭირდება სპეციალიზებული მოვლის მეთოდები, რომელსაც ექიმი სახლში უნიშნავს პაციენტს. რთულია ამის მკურნალობა. ვერ ვნიშნავთ აგრესიულ მკურნალობას, რომელიც პარაზიტებს გაანადგურებს, იმიტომ, რომ ეს ეხება ლორწოვან გარსსაც და შეიძლება მნიშვნელოვნად დააზიანოს. კლინიკის პირობებში მკურნალობა გაცილებით მარტივი და იოლია. არსებობს აპარატული მკურნალობა, რომელიც ახალი მეთოდია და ძალიან კარგ შედეგებს გვაძლევს. ის პირდაპირ ანადგურებს ამ პარაზიტებს. მნიშვნელოვანია ასევე ქუთოთოების ჰიგიენა. ზოგჯერ გვჭირდება ქუთუთოების დამატებითი წმენდა აპარატული მეთოდით. როგორც კბილების ჰიგიენური წმენდა სტომატოლოგთან, ასეთივე ტიპის მანიპულაციაა, როდესაც ხდება წამწამებიდან ნადების მოშორება აპარატულად. ეს საქართველოში ახალი მეთოდია და ვიზუალურად იძლევა ეფექტს. ბევრად უფრო მოწესრიგებულად გამოიყურება ქუთუთოები. ხსნის თვალზე სიწითლეს, აღარ არის აქერცლილი და ნადები ქუთუთოებზე,“- აღნიშნულ საკითხზე თამარ ჩიტაძემ საპატრიარქოს ტელევიზიის გადაცემაში „განთიადი“ ისაუბრა.

წყარო:​ „განთიადი“

წაიკითხეთ სრულად