Baby Bag

ლეიკემიის ადრეული ნიშნები ბავშვებში

ლეიკემიის ადრეული ნიშნები ბავშვებში

ლეიკემია ბავშვებში ყველაზე გავრცელებული დაავადებაა. ლეიკემიის დროს ორგანიზმში ანომალიური თეთრი უჯრედები სისხლში ძალიან დიდი რაოდენობით წარმოიქმნება. თეთრი უჯრედები უმეტესად ძვლის ტვინში იწარმოება. ლეიკემიის განვითარებასთან ერთად სიმსივნური უჯრედების წარმოქმნა აჭარბებს სისხლის სხვა უჯრედების წარმოებას. ჭარბი ლეიკოციტები ნორმალურად ვეღარ ფუქნციონირებს. სისხლში არსებული ჯანსაღი უჯრედების დეფიციტი ორგანიზმს უამრავ პრობლემას უქმნის, იწყება სისხლდენა, ანემია, ზიანდება ორგანოთა უდიდესი ნაწილი.

ბავშვებში ლეიკემია, როგორც წესი, ათ წლამდე ასაკში ვითარდება. პირველი სიმპტომები, რომლებიც ამ სიმსივნურ დაავადებას ახასიათებს, გაციებისა და გრიპის დამახასიათებელი ნიშნებია. გაციების სიმპტომები ხანგრძლივად რჩება ან ხშირად მეორდება. ბავშვის სხეულზე მოულოდნელად ჩნდება ჩალურჯებები. აღნიშნული ტიპის სიმპტომები, შესაძლოა, ჯანმრთელობის სხვა პრობლემებითაც იყოს გამოწვეული და არ ახასიათებს მხოლოდ ლეიკემიას. ბავშვის მდგომარეობის შესაფასებლად აუცილებლად მიმართეთ ექიმს, რათა მძიმე გართულებების თავიდან აცილება შეძლოთ.

  • ლეიკემიის ნიშნები და სიმპტომები ბავშვებში

ლეიკემიის სიმპტომატიკა ჭარბი სიმსივნური უჯრედების გავრცელებისა და ჯანსაღი უჯრედების ნაკლებობის გამო ჩნდება. ლეიკემიისთვის დამახასიათებელი ადრეული ნიშნები შემდეგია:

  • თავბრუსხვევა
  • სიცივის შეგრძნება, კანკალი
  • სისუსტისა და დაღლილობის შეგრძნება
  • სუნთქვის უკმარისობა
  • თავის ტკივილი
  • ფერმკრთალი კანი

სიმსივნური უჯრედების მომრავლება ინფექციების განვითარებას უწყობს ხელს, რის შედეგადაც ვლინდება შემდეგი სიმპტომები:

  • ცხელება
  • გაციებისა და გრიპის სიმპტომები, რომლებიც მოულოდნელად ჩნდება
  • ინფექციები
  • ლიმფური კვანძების შეშუპება

თრომბოციტების ნაკლებობა სისხლდენის გამომწვევი მიზეზი ხდება. სიმპტომები, რომლებიც ამ დროს ვლინდება შემდეგია:

  • სისხლდენა ღრძილებიდან
  • ჭრილობიდან ან ნაკაწრიდან ხანგრძლივი სისხლდენები
  • კანზე სისხლჩაქცევების მარტივად წარმოქმნა
  • სისხლდენა ცხვირიდან

სიმსივნურმა უჯრედებმა შესაძლოა ძვლებშიც შეაღწიონ, ან ისეთი ორგანოები დააზიანონ, როგორებიცაა: ღვიძლი და ელენთა. სიმსივნის პროგრესირებით გამოწვეული სიმპტომები უფრო მოგვიანებით ჩნდება. ლეიკემიის გართულებული ფორმის სიმპტომები შემდეგია:

  • სახსრებისა და ძვლების ტკივილი
  • ხველება, სუნთქვის გაძნელება
  • მადის დაქვეითება
  • მუცლის შებერილობა
  • ლიმფური კვანძების შეშუპება
  • წონაში კლება

ლეიკემიის ადრეული ნიშნებიდან რომელიმე მათგანის შემჩნევისთანავე ბავშვი პედიატრთან მიიყვანეთ. თითოეული სიმპტომი, შესაძლოა, სხვა სახის ჯანმრთელობის პრობლემით იყოს გამოწვეული. მიუხედავად ამისა, ექიმთან ვიზიტი აუცილებელია, რადგან ბავშვის უსაფრთხოება ყველაზე მთავარია. ლეიკემიის ადრეული დიაგნოსტიკა მკურნალობის დროულად დაწყების საწინდარია, რაც გამოჯანმრთელების ალბათობას მნიშვნელოვნად ზრდის.

მომზადებულია ​healthgrades.com-ის მიხედვით

თარგმნა ია ნაროუშვილმა

არ დაგავიწყდეთ !!!

Momsedu.ge-მ თქვენთვის, ქალებისთვის შექმნა ახალი სივრცე, „ფასდაკლებები დედებისთვის“ (ჯგუფში გასაწევრიანებლად ნახეთ ბმული - „ფასდაკლებები დედებისთვ​ის“)

შეიძლება დაინტერესდეთ

„ზურგზე წოლა არ იწვევს თავის გაბრტყელებას, ეს არის მითი,“ - პედიატრი ია გოგებაშვილი

„ზურგზე წოლა არ იწვევს თავის გაბრტყელებას, ეს არის მითი,“ - პედიატრი ია გოგებაშვილი

პედიატრმა ია გოგებაშვილმა ბავშვის წოლისა და ძილის სწორი პოზიციების შესახებ ისაუბრა და აღნიშნა, რომ მუცელზე წოლა აღარ მიიჩნევა ჩვილისთვის უსაფრთხო პოზად:

​როგორია წოლის და ძილის სწორი პოზიცირება? იყო დრო, როდესაც ამერიკის გავლენით სწორი იყო ცალკე ოთახში მუცელზე წოლა. ეს ჩვენ ავიტაცეთ, მოგვეწონა. დადგა დრო, როდესაც ამ მიდგომაზე თქვეს უარი. არსებობს ჩვილთა უეცარი სიკვდილის სინდრომი. სამწუხაროდ, საქართველოში სტატისტიკა არ არის, შესაძლოა, საბედნიეროდაც. თუმცა ეს იმას არ ნიშნავს, რომ ჩვენ შემთხვევები არ გვაქვს.“

ია გოგებაშვილმა ის მიზეზები ჩამოთვალა, რომლებიც ჩვილთა უეცარი სიკვდილის ყველაზე ხშირი გამომწვევია:

„ამერიკაში, როდესაც მრავალი კვლევის შედეგად გამოიძიეს ჩვილთა უეცარი სიკვდილის სინდრომის მიზეზები, დადგინდა, რომ ერთ-ერთი მიზეზი იყო მუცელზე წოლა. მიზეზებს შორის იყო ცალკე ოთახში წოლა. მესამე მიზეზი კი იყო გადახურება ძილის დროს, როდესაც ბავშვები ძალიან იყვნენ ჩათბუნებულები. მიზეზთა შორის იყო დასახელებული მწეველი მშობლებიც.“

​მუცელზე წოლა ასოცირებულია ჩვილთა უეცარი სიკვდილის სინდრომთან. შევთანხმდით, რომ ზურგზე წოლა არის ძილის საუკეთესო პოზიცია, აუცილებლად დედ-მამის ახლოს. ბავშვი, შესაძლოა, იწვეს საკუთარ საწოლში, მაგრამ არა საკუთარ ოთახში და განცალკევებით. თავის ფორმაც რაც შეეხება, ზურგზე წოლა არ იწვევს თავის გაბრტყელებას. ეს არის მითი. თავის ფორმის შეცვლას აქვს მიზეზი. ეს არის მინერალური ცვლის დარღვევა, კალცის ცვლის მოშლა. პირველი ნიშანი არის ჭარბი ოფლიანობა. ბავშვი იძულებულია მოიქავოს თავის მოძრაობით. ვიდრე თავის ფორმა შეიცვლება, სწორედ ამიტომ არის სიმელოტე,“ - აღნიშნულ საკითხებზე ია გოგებაშვილმა ტელეკომპანია GDS-ის გადაცემაში „შუადღე GDS“ ისაუბრა.

წყარო: ​„შუადღე GDS”

წაიკითხეთ სრულად