Baby Bag

„ნაყინი ანგინას არ იწვევს, ანგინა ბაქტერიული ინფექციაა,“ - ოტორინოლარინგოლოგი ქეთევან გოცაძე

ოტორინოლარინგოლოგი ქეთევან გოცაძე გადაცემაში „დილა ფორმულაზე“ ნაყინის, როგორც ანგინის გამომწვევი ტკბილეულის შესახებ მითს ამსხვრევს:

„მინდა გითხრათ, რომ ცივი წყალი და ნაყინი აუცილებელია ბავშვებისთვის, არა მხოლოდ ბავშვებისთვის, არამედ დიდებისთვისაც. ნაყინი ეს არის პოზიტივი, ენდორფინი, ეს იმას ნიშნავს, რომ როდესაც კარგ განწყობაზე ვართ, იმუნიტეტიც კარგი გვაქვს. ნაყინი რეკომენდებულია ბავშვებისთვის. არავითარ შემთხვევაში არ მისცეთ ბავშვს გამთბარი ნაყინი ან გამთბარი წყალი. ვიცი, რომ ახლა საყოველთაოდ ამიჯანყდებიან ბებიები. ნაყინი და ცივი წყალი არის გაკაჟების ერთ-ერთი აუცილებელი პირობა. ხშირად უთბობენ ხოლმე ბავშვებს ნაყინს, რაც საჭირო არ არის.“

„არსებობს კატეგორია ბავშვების, რომლებსაც ყელში ქრონიკული ინფექციის წყარო აქვს. ასეთ ბავშვებს ეკრძალებათ ნაყინის მირთმევა, იმიტომ, რომ, შესაძლებელია, ინფექცია გამწვავდეს. თვითონ ნაყინი ანგინას არ იწვევს, ანგინა ბაქტერიული ინფექციაა, ნაყინმა და ცივმა წყალმა, შესაძლებელია, გააქტიუროს უკვე არსებული ინფექციური კერა. ვინაიდან რძის პროდუქტები მიკრობებისთვის ნოყიერი საკვებია, ნაყინის მირთმევის შემდეგ წყლის გამოვლება კარგია, რათა პირის ღრუში რძის ნარჩენები არ დარჩეს, რომლებიც მიკრობების გამრავლებისთვის ხელსაყრელ გარემოს ქმნიან. ნაყინის მირთმევის შემდეგ კბილების გამოხეხვაც კარგი იქნება,“ - აღნიშნავს ქეთევან გოცაძე.

არ დაგავიწყდეთ !!!

Momsedu.ge-მ თქვენთვის, დედებისთვის შექმნა ახალი სივრცე. მოიწონეთ გვერდი მცოდნე დედები

ევგენი კომაროვსკი აცხადებს, რომ ნაყინი ბავშვისთვის ძალიან სასარგებლო ტკბილეულია
​ცნობილი უკრაინელი პედიატრი ევგენი კომაროვსკი აცხადებს, რომ ნაყინი ბავშვის იმუნიტეტზე დადებითად ზემოქმედებს. ექიმი მშობლებს ურჩევს, რომ პატარებს საყვარელი ნუგბარი ხშირად მიართვან.პედიატრის თქმით, სიცი...

შეიძლება დაინტერესდეთ

„ხშირად მოავადე ბავშვების მხოლოდ 10 პროცენტს აღენიშნება იმუნოდეფიციტი,“ - პედიატრი ნელი სიმონიშვილი

პედიატრმა ნელი სიმონიშვილმა ხშირად მოავადე ბავშვების შესახებ ისაუბრა და ის მიზეზები დაასახელა, რომელიც ბავშვებში ხშირ ავადობას იწვევს:

„რას ნიშნავს ხშირად მოავადე ბავშვი? ეს ნიშნავს ავადობის სიხშირეს წლის განმავლობაში. სიხშირესთან ერთად გასათვალისწინებელია დაავადების მიმდინარეობა, რამდენად გართულდა ის და საჭირო გახდა ანტიბიოტიკის ჩართვა მკურნალობაში. უხშირესი ასაკი, რომელიც მოგვმართავს ამ ჩივილით არის 5 წლამდე ასაკი, რადგან ამ ასაკში იზრდება უცებ კონტაქტები, ბავშვები მიდიან ბაღში და რესპირატორული ინფექციების სიხშირე მატულობს. სასკოლო ასაკში, განსაკუთრებით 10 წლის შემდეგ ინფექციების სიხშირე იკლებს.

ბავშვი, რომელიც არ დადის ბაღში, შესაძლებელია, წელიწადში მხოლოდ ერთხელ ან ორჯერ ავადობდეს. ბაღში ან ადრეულ სასკოლო პერიოდში ბავშვი შეიძლება 10-12-ჯერაც გახდეს ინფექციით ავად და ეს შეიძლება იყოს ნორმა. ამ ინფექციების უმრავლესობა ვირუსულია. გამოჯანმრთელებას საშუალოდ 8 დღე სჭირდება, სრულფასოვან გამოჯანმრთელებას კი 2 კვირაც შეიძლება დასჭირდეს. თუ ამას წელიწადზე გადავთვლით, წელიწადში 4-5-6 თვეც კი შეიძლება გამოგვივიდეს, რომ ბავშვი იყოს ავად. თუ ეს არის მსუბუქი მიმდინარეობა, არის ვირუსული ინფექციები, ბავშვს აღენიშნება ნორმალური ზრდა-განვითარება, მისი ლაბორატორიული მონაცემები არის ნორმაში, ამ ეპიზოდებს შორის ბავშვი არის სრულიად ჯანმრთელი, მაშინ აქ საგანგაშო არაფერი არ არის.

თუ პირიქით ხდება და ბავშვი ავად გამოიყურება, მისი ინფექციები რთულდება, ხშირად არის ანტიბიოტიკების ჩართვის საჭიროება, შესაძლებელია ბავშვი ქრონიკული დაავადებით იყოს ავად და მას მეტი ყურადღება და გამოკვლევა სჭირდება. შესაძლებელია, რომ იყოს იმუნოდეფიციტიც. ეს საკმაოდ მცირე პროცენტში გვხვდება. ხშირად მოავადე ბავშვების მხოლოდ 10 პროცენტს აღენიშნება იმუნოდეფიციტი, თუმცა მშობლებისგან ძალიან ხშირად ისმის კითხვა: ხომ არ აქვს ჩემს შვილს იმუნიტეტი დაქვეითებული? იმ 10 პროცენტთან, რომელშიც არის იმუნოდეფიციტი,  უფრო ღრმა კვლევები და სულ სხვა ტიპის მკურნალობაა საჭირო. იმუნოდეფიციტური მდგომარეობები შეიძლება იყოს პირველადი და მეორადი. მეორადი იმუნოდეფიციტური მდგომარეობები სხვადასხვა გარემო ფაქტორებით, მედიკამენტებით, დღენაკლულობით არის გამოწვეული. ხშირად მოავადე ბავშვების 30% არის ავად ალერგიული დაავადებებით. ძალიან ხშირად ბავშვებს აქვთ ალერგიული რინიტი და ხველა და ეს აღიქმება როგორც რესპირატორული ინფექცია. ალერგიული ბავშვების სასუნთქ გზებში ვირუსი და ბაქტერია ადვილად აღწევს. მწეველების ოჯახში გაზრდილი ბავშვებიც დიდი რისკის ჯგუფია,“- მოცემულ საკითხზე ნელი სიმონიშვილმა რადიო „იმედის“ ეთერში ისაუბრა.

წყარო:​ რადიო „იმედი“ 

წაიკითხეთ სრულად