Baby Bag

​როდის არის საშიში გაძლიერებული წყურვილი და შარდის ჭარბი გამოყოფა ბავშვებში და რას მივაქციოთ ყურადღება ექიმთან ვიზიტამდე

​როდის არის საშიში გაძლიერებული წყურვილი და შარდის ჭარბი გამოყოფა ბავშვებში და რას მივაქციოთ ყურადღება ექიმთან ვიზიტამდე

როდის არის საშიში გაძლიერებული წყურვილი და შარდის ჭარბი გამოყოფა ბავშვებში და რას მივაქციოთ ყურადღება ექიმთან ვიზიტამდე, - აღნიშნულ თემაზე ბავშვთა ენდოკრინოლოგი ნინო ხელაძე საუ​ბრობს. გთავაზობთ მის ნათქვამს სიტყვა-სიტყვით:

პოლიდიფსია სამედიცინო ტერმინია და გაძლიერებული წყურვილის გამო სითხის ჭარბად მიღებას ნიშნავს. ჯანმრთელ ბავშვს მომატებული წყურვილი შესაძლოა, ჰქონდეს ძალიან ცხელ ამინდში, მარილიანი საკვების მიღების ან ინტენსიური ფიზიკური დატვირთვის შემდეგ. თუმცა, თუკი ჭარბი წყურვილის მიზეზი არაა თვალსაჩინო და წყლის ჭარბად მიღება რამდენიმე დღე მაინც გრძელდება, განსაკუთრებით თუ შარდიც ჭარბად გამოიყოფა, საჭიროა დაუყოვნებლივ კონსულტაცია ექიმთან.

პოლიურიაც სამედიცინო ტერმინია და შარდის ჭარბად გამოყოფას ნიშნავს. თუკი ბავშვი შარდავს 3-4 მლ/კგ/24 საათში და მეტს, საჭიროა, გაიაროთ კონსულტაცია ექიმთან.

მაგალითისათვის: თუკი თქვენ გყავთ 5 წლის ბავშვი, რომელიც 20 კგ-ს იწონის და 2000 მლ-ზე მეტს შარდავს 24 საათის განმავლობაში ან/და სვამს 2 ლიტრზე მეტ წყალს, აუცილებელია დაუკავშირდეთ ექიმს და შეატყობინოთ ამის შესახებ.

როგორ შევაფასოთ სწორად?

სითხის ჭარბ მიღებასა და შარდის ჭარბ გამოყოფაზე ეჭვის დროს აუცილებლია დაკვირვება და სწორად შეფასება. სასურველია, სანამ ექიმს მიმართავთ, გქონდეთ შესაბამისი ინფორმაცია: რამდენი მიიღო და გამოყო ბავშვმა სითხე ბოლო 24 საათის მანძილზე.
აღრიცხვა დაიწყეთ დილით გაღვიძებისთანავე, ჩაიწერეთ როგორც მიღებული წყლის რაოდენობა, ასევე სხვა სითხეები, როგორიცაა წვნიანი და წვენი. შეეცადეთ, ყოველთვის გამოიყენოთ ერთი და იგივე საზომიანი ჭიქა ან ბოთლი. აღრიცხვა აწარმოეთ მეორე დილამდე, ღამის ჩათვლით. განსაკუთრებით ყურადღება მიაქციეთ, თუ ბავშვი ღამით სპეციალურად რამდენჯერმე იღვიძებს წყურვილის ან მოშარდვის აუცილებლობის გამო.
შედარებით უფრო რთული, მაგრამ შესაძლებელია გამოყოფილი შარდის რაოდენობის განსაზღვრაც, იმ შემთხვევაშიც კი თუკი ბავშვი ჯერ კიდევ საფენებს იყენებს.
ათვლა დაიწყეთ დილის პირველი საფენის გამოცვლის შემდეგ. მოაგროვეთ ყველა მომდევნო საფენი მეორე დილით გამოცვლილის ჩათვლით, აწონეთ და გამოაკელით იგივე რაოდენობის გამოუყენებელი საფენების წონა. 24 საათის განმავლობაში მიღებული და გამოყოფილი სითხის რაოდენობა თითქმის უნდა ემთხვეოდეს ერთმანეთს.

განსაკუთრებით ყურადღება მიაქციეთ, თუ:

  • ბავშვი ღამით აღარ ისველებდა და უცებ კვლავ დაიწყო ჩასველება, არ იღვიძებდა ღამე მოსაშარდად და უკვე რამდენჯერმე უწევს ადგომა,
  • თუკი შარდის ფერი ძალიან ღია ან პირიქით უჩვეულოდ მუქია;
  • თუკი აღნიშნულ სიმპტომებს თან ახლავს წონის კლება, ზოგადი სისუსტე და ადინამია, ტემპერატურის მატება, გულისრევა-ღებინება, პირიდან აცეტონის სუნი, ცნობიერების შეცვლა და აშ.


​პოლიურია და პოლიდიფსია უმეტესად შაქრიანი ან უშაქრო დიაბეტისათვის დამახასიათებელი ნიშნებია და მოითხოვს დროულ შეფასებას.
აღნიშნული სიმპტომების არსებობის შემთხვევაში, პირველ რიგში, უნდა განისაზღვროს სისხლში გლუკოზის დონე, გაკეთდეს შარდის საერთო ანალიზი და მიმართოთ თქვენს პედიატრს ან ბავშვთა ენდოკრინოლოგს.

წყარო: პედიატრ თამარ ობგაიძის ბლოგი 

შეიძლება დაინტერესდეთ

„ის, რაც საქართველოში დატრიალდა ნოემბერსა და დეკემბერში, ასეთი ძლიერი ტალღა წესით აღარ უნდა იყოს,“ - მაია ბუწაშვილი

„ის, რაც საქართველოში დატრიალდა ნოემბერსა და დეკემბერში, ასეთი ძლიერი ტალღა წესით აღარ უნდა იყოს,“ - მაია ბუწაშვილი

ინფექციონისტმა მაია ბუწაშვილმა მოსახლეობაში ვაქცინაციისადმი მზაობის შესახებ ისაუბრა. მან აღნიშნა, რომ ვაქცინასთან დაკავშირებით შეთქმულების თეორიები აქტიურად ვრცელდება:

„ალბათ, მოსახლეობის ნახევარი აპირებს ვაქცინის გაკეთებას. არ დაგვავიწყდეს ის ნაწილიც, რომელმაც უკვე გადაიტანა კოვიდი. ​ეს ადამია​ნები პირველი რიგის ასაცრელთა კონტიგენტში არ მოხვდებიან და არც არის ამის აუცილებლობა. ადამიანებს სულ ეჩვენებათ, რომ რაღაცას უმალავენ. ბევრი შეთქმულების თეორია ტრიალებს. თუ ზუსტად ავუხსნით, რა ვიცით, რა არ ვიცით, სასწორი რომელ მხარეს იხრება. ზოგიერთი ჯგუფისთვის ეს სიკვდილ-სიცოცხლის საკითხია. ესეთი აქცენტები ძალიან მკაფიოდ, გამჭვირვალედ უნდა გაკეთდეს, რომ ადამიანებმა შეძლონ თავიანთი არჩევანის სწორად გაკეთება.“

მაია ბუწაშვილის თქმით, კორონავირუსით რეინფიცირების შემთხვევები ძალიან იშვიათია:

„კორონავირუსზე ილუზია, რომ სრულად მყარ იმუნიტეტს იძლევა არ გვაქვს. 7-8 თვე არის კვლევების ვადები, რა ხანგრძლივობით არსებობს ინფორმაცია. უკვე ერთ წელზე მეტი გავიდა. ფაქტი ის არის, რომ რეინფექციები ძალიან ხშირი მაინც არ არის. მხოლოდ იმიტომ, რომ ხელახლა იყო სიმპტომები და ტესტიც ხელახლა დადებითია, ეს არ ნიშნავს რეინფიცირებას. ნამდვილად დადასტურებული რეინფიცირების მხოლოდ რამდენიმე ათეული შემთხვევაა დადასტურებული. რაც ჯერ ვიცით, შეიძლება იყოს უფრო მსუბუქი და უფრო მძიმე შემთხვევებიც.“

მაია ბუწაშვილმა აღნიშნა, რომ ის, რაც საქართველოში ნოემბერ-დეკემბერში მოხდა, სავარაუდოდ, არ განმეორდება:

„ჩვენ ვფიქრობთ, რომ ​ის, რაც საქართველოში დატრიალდა ნოემბერსა და დეკემბერში, იმედი გაქვს, რომ არ უნდა განმეორდეს, თუნდაც იმიტომ, მოსახლეობის მინიმუმ მეხუთედი მაინც ანტისხეულებს ატარებს. რაღაც წრეში ერთ ადამიანს მაინც თუ აქვს ანტისხეულები, იმაზე მაინც წყდება გადაცემა და ის აღარ ხდება წყარო. ასეთი ძლიერი ტალღა წესით აღარ უნდა იყოს, ამის იმედი გვაქვს.“

„სავარაუდოდ ეს პანდემია ყველაზე გრძელი იქნება. იმის საფუძველი, რომ დასასრული ძალიან სწრაფად გამოცხადდება ჯანდაცვის მსოფლიო ორგანიზაციის მიერ, არ ჩანს.​ ჯერჯერობით პროგნოზირებაც კი არ შეგვიძლია, რომ დარჩა მაგალითად, ​თვეები,“ - აღნიშნულ საკითხებზე მაია ბუწაშვილმა ტელეკომპანია „ფორმულას“ გადაცემაში „დილა ფორმულაზე“ ისაუბრა.

წყარო: ​„დილა ფორმულაზე“

წაიკითხეთ სრულად