Baby Bag

რა სახის ნაწლავური ინფექციები გვხვდება ბავშვებში და განსაკუთრებით ზაფხულში რომელია უფრო გავრცელებული?

რა სახის ნაწლავური ინფექციები გვხვდება ბავშვებში და განსაკუთრებით ზაფხულში რომელია უფრო გავრცელებული?

რა სახის ნაწლავური ინფექციები გვხვდება ბავშვებში და განსაკუთრებით ზაფხულში რომელია უფრო გავრცელებული? - ამ თემაზე MomsEdu.ge-ს თბილისის ბავშვთა ინფექციური კლინიკური საავადმყოფოს ინფექციონისტი ია ჯალაღანია ესაუბრა.

- ზოგადად რომ ვისაუბროთ, რა არის ნაწლავური ინფექცია?

-ნაწლავური ინფექცია, როგორც სახელი მიგვანიშნებს, ინფექციური პათოლოგიაა, რომლის დროსაც ვითარდება ნაწლავის ანთება. კლინიკურად მისთვის დამახასიათებელია ნაწლავთა მოქმედების ცვლილება, უპირატესად დიარეა (დღის მანძილზე სამჯერ ან მეტჯერ არსებულ ნაწლავთა მოქმედება უპირატესად სითხისშემცველი მასებით),თუმცა დიარეა ყოველთვის არ ნიშნავს, რომ საქმე ნაწლავურ ინფექციასთან გვაქვს.

- რა სახის ნაწლავური ინფექციები გვხვდება ბავშვებში და განსაკუთრებით ზაფხულში რომელი უფრო გავრცელებულია?

დაავადება წლის ყველა პერიოდში გვხვდება, თუმცა ზამთრის პერიოდში განსაკუთრებით ხშირია ნაწლავთა ვირუსული ინფექციები, ზაფხულში - ბაქტერიული ინფექციები. აღნიშნულის ერთ-ერთი მთავარი მიზეზი ბუნებასთან მეტი კონტაქტიაექსკურსიების, ლაშქრობების, დასვენების სახით.ამასთან, ჰიგიენური ნორმების დარღვევა ცნობიერად თუ არაცნობიერად, მოგეხსენებათ, პატარებს დამოუკიდებლად უჭირთ პირადი ჰიგიენის დაცვა.

- რა არისნაწლავური ინფექციების გამომწვევი მიზეზი?

გამომწვევი მიზეზი შესაძლოა იყოს:

  • ბაქტერიები (კამპილობაქტერია, სალმონელა, შიგელა) ;
  • ვირუსები (როტავირუსი და ნოროვირუსი);
  • პარაზიტული აგენტები (კრიპტოსპორიდია და ლამბლია);
  • ჰელმინთები და ზოგიერთი პარაზიტული ინფექციები(Isospora Belli, Strongyloides Stercocalis, Trichuris trichiura, Entamoeba Histolytica).

- რა სიმპტომებით ხასიათდება?

- ძირითადი და მთავარი სიმპტომებია: დიარეა, გულისრევა, ღებინება, მოვლითი ხასიათის მუცლის ტკივილი, უმადობა, საერთო სისუსტე, ინტოქსიკაციის ნიშნები, ტემპერატურის მატება.

- როგორ ხდება დიაგნოსტიკა და მკურნალობა?

- კლინიკური მიმდინარეობის თავისებურებების გათვალისწინებასთან ერთად, ზუსტი დიაგნოსტირებისთვის საჭიროა დამატებით ლაბორატორიული კვლევების ჩატარება.ნებისმიერი ინფექციური აგენტით გამოწვეული დიარეა დაახლოებით ერთნაირი კლინიკით ვლინდება, თუმცა მკურნალობის სწორი ტაქტიკისთვის მნიშვნელოვანია გამომწვევი შესაძლო მიზეზის იდენტიფიცირება (პირველადი და ძირითადი კვლევა განავლის საერთო ანალიზია). ძალიან მნიშვნელოვანი და საყურადღებოა სისხლიანი დიარეის არსებობა, ვინაიდან აღნიშნულის შესაძლო, მძიმე და საშიში გართულებაა ჰემორაგიულ-ურემიული სინდრომი (HUS), რომლისთვისაც დამახასიათებელია თირკმლის მწვავე უკმარისობა, ჰემოლიზური ანემია, თრომბოციტოპენია (თრომბოციტების რაოდენობის შემცირება). რაც შეეხება მკურნალობას, აქ უმთავრესია სწორად და მდგომარეობის შესაბამისად მიწოდებული სარეჰიდრატაციო საშუალებები, სიმპტომური მკურნალობა და მართვა. ბინაზე უმართავი მდგომარეობისა და ჩივილების ინტენსივობის მატების შემთხვევაში აუცილებელია ექიმის კონსულტაცია, რათა დროულად მოხდეს დეჰიდრატაციის რისკის შეფასება და ჰოსპიტალიზაციის ჩვენების არსებობა/არარსებობა.

- პრევნეციის საშუალებებზეც რომ ვისაუბროთ.

- მთავარი და ძირითადი ჰიგიენური ნორმების მაქსიმალური დაცვაა, რაც გულისხმობს ხელების ჰიგიენას, საკვები პროდუქტების სწორ დამუშავებას, ინდივიდუალური ჰიგიენური ნივთების გამოყენებას, ინფიცირებულთან კონტაქტის არიდებას.

R. 

შეიძლება დაინტერესდეთ

რომელი ​პროდუქტები უწყობენ ხელს სიმაღლეში ზრდას?

რომელი ​პროდუქტები უწყობენ ხელს სიმაღლეში ზრდას?

მედიაპორტალი MomsEdu.ge ტრადიციულ რუბრიკას - ენდოკრინოლოგის რეკომენდაციებს წარმოგიდგენთ. რომელი პროდუქტები ეხმარება ადამიანს სიმაღლეში ზრდაში? - ამ თემაზე ენდოკრინოლოგ-ნუტრიციოლოგი თინათინ კაჭარავა მოგაწვდით კომპეტენტურ ინფორმაციას.

​დღეს ვისაუბრებ ვიტამინებზე, მინერალებზე და პროდუქტებზე, რომლებიც ადამიანის ზრდაში მნიშვნელოვან როლს ასრულებენ.

​მიუხედავად იმისა, რომ ადამიანის სიმაღლე უმეტესწილად დამოკიდებულია გენეტიკაზე, დღიურ რაციონში აუცილებელია საკმარისი საკვები ნივთიერებების მიღება სათანადო ზრდისა და განვითარების უზრუნველსაყოფად. ვიტამინები და მინერალები პასუხისმგებელია გამართული ძვალსახსროვანი სისტემის არსებობისთვის. მათგან უნდა გამოვყოთ: ვიტამინი D, B ვიტამინების ჯგუფი, კალციუმი, ფოსფორი, რკინა, მაგნიუმი.

​რაც შეეხება პროდუქტებს, თქვენს ყურადღებას შევაჩერებ რამდენიმე მათგანზე:
  • ლობიო - ცილების განსაკუთრებით კარგი წყაროა. ნაჩვენებია, რომ ცილები ზრდიან ინსულინის მსგავსი ზრდის ფაქტორ 1-ის (IGF-1) სინთეზს, რომელიც არეგულირებს ზრდას ბავშვებში. ლობიო ასევე მდიდარია რკინით და B ჯგუფის ვიტამინებით, რაც ხელს შეუწყობს ანემიისგან დაცვას. გარდა ამისა, ლობიო მდიდარია რამდენიმე სხვა მინერალით: სპილენძი, მაგნიუმი, მანგანუმი და თუთია.
  • ხორცეული - ცილებისა და ვიტამინების (განსაკუთრებით B12 ვიტამინი) შეუცვლელი წყარო. სასურველია, ხორცი ბავშვთა ასაკში კვირაში მინიმუმ 4 -5 ჯერ იყოს რაციონში.
  • ნუში - მდიარია ვიტამინებით და მინერალებით. მნიშვნელოვანი როლი უკავია ძვალსახსროვანი სისტემის ფორმირებაში და ზრდის პროცესში.
  • მწვანე ფოთლოვანი მცენარეები: ისპანახი, რუკოლა, კომბოსტო გამოირჩევიან C ვიტამინის, K ვიტამინის, კალციუმის, რკინის, მაგნიუმის და კალიუმის მდიდარი შემცველობით.
  • ქინოა - შეიცავს ორგანიზმისთვის შეუცვლელ ამინომჟავებს, ასევე არის მაგნიუმის, ფოსფორის და კალციუმის შესანიშნავი წყარო, რითაც მნიშვნელოვან როლს იკავებს ძვლის სტრუქტურის სიჯანსაღის შენარჩუნებაში.
  • კვერცხი - ცილებისა და ვიტამინ D-ს საუკეთესო წყარო.
  • კენკროვნები - მოცვი, მარწყვი, მაყვალი და ჟოლო სავსეა მნიშვნელოვანი მინერალებით და ვიტამინებით, განსაკუთრებით მაღალია C ვიტამინის შემცველობა.

​გისურვებთ ჯანმრთელობას!