Baby Bag

„მუცლის ტკივილის ჩივილით ბავშვი აუცილებლად უნდა ინახოს ქირურგის მიერ,“ - ბავშვთა ქირურგი გოგა ბახტაძე

„მუცლის ტკივილის ჩივილით ბავშვი აუცილებლად უნდა ინახოს ქირურგის მიერ,“ - ბავშვთა ქირურგი გოგა ბახტაძე

ბავშვთა ქირურგმა გოგა ბახტაძემ ბავშვებში მუცლის ტკივილის გამომწვევ მიზეზებზე ისაუბრა:

„ქირურგთან საავადმყოფოში ყველაზე ხშირად პატარა პაციენტი შეიძლება მოხვდეს მუცლის ტკივილის ჩივილით. ჩემი აზრით, მსგავსი ჩივილით ბავშვი აუცილებლად უნდა ინახოს ქირურგის მიერ. მუცლის ტკივილების უმრავლესობა ქირურგიული მიზეზებით გამოწვეული არ არის. 10-დან მხოლოდ 1 პაციენტს შეიძლება აღმოაჩნდეს ქირურგიული მიზეზით გამოწვეული მუცლის ტკივილი. ქირურგიული მიზეზით გამოწვეული მუცლის ტკივილი იმდენად საგანგაშოა და შეიძლება საშიში გართულებები მოჰყვეს დაგვიანების შემთხვევაში, რომ ყველა პაციენტი მუცლის ტკივილით, სასურველია, ინახოს ქირურგის მიერ. მისმა გამოცდილმა თვალმა და ხელმა შეამოწმოს, რომ არ მოხდეს რაღაც, არ გაიპაროს ატიპურად მიმდინარე დაავადება და შემდგომში არ მოჰყვეს რაიმე გართულება.

უმეტეს შემთხვევაში მუცლის ტკივილს ბავშვებში იწვევს კვებისმიერი ინტოქსიკაცია, ნაწლავური კოლიკები, ვირუსული ინფექციები და ა.შ. ეს რაიმე ქირურგიულ ჩარევას შემდგომში, როგორც წესი, არ საჭიროებს.

ზოგჯერ არის ქირურგიული მიზეზით ტკივილი. ყველაზე გავრცელებული ბავშვებში არის მწვავე აპენდიციტი, რომელიც აუცილებელ ოპერაციულ მკურნალობას საჭიროებს. შედარებით იშვიათია დივერტიკულის ანთება ნაწლავზე, რომელიც შეიძლება საშიში გართულება იყოს. ხშირი მიზეზი არის ასევე სხვადასხვა სახის თიაქარი. თიაქარი შეიძლება იყოს საზარდულის, ჭიპის, რომელიც თუ არ ჩაიჭედა, იმ წუთში რაიმე საშიშროებას არ წარმოადგენს, მაგრამ საჭიროებს გეგმიურ ოპერაციულ მკურნალობას.

არის რამოდენიმე სიმპტომი, როდესაც დალოდებას და გადადებას მდგომარეობა არ ექვემდებარება. სასურველია, მშობელმა ბავშვი რაც შეიძლება მალე მიიყვანოს ქირურგთან. როდესაც მუცლის ტკივილს ერთვის სხვა დამატებითი სიმპტომები, ვთქვათ, ბავშვი არის მოთენთილი, მივარდნილი, გამოხატულია უმადობა, გულისრევის შეგრძნება, პირღებინება, ტემპერატურის მომატება, იძულებითი მწოლიარე პოზა, ბავშვს უჭირს სიარული, ამ დროს დროულად უნდა მიაკითხონ ქირურგს. ყოფილა შემთხვევები, რომ 3-4 დღე მშობელი ელოდება, რომ იქნებ გაუაროს. შემდეგ მოდის და ჩირქი გავრცელებულია მთელ მუცელში. ეს ამძიმებს ბავშვის მდგომარეობას და მკურნალობის პერიოდს,“- მოცემულ საკითხზე გოგა ბახტაძემ რადიო „ფორტუნას“ ეთერში ისაუბრა.

წყარო: ​რადიო „ფორტუნა“

შეიძლება დაინტერესდეთ

რა გარემოებები უნდა გავითვალისწინოთ აწონვის დროს და დღის რომელი მონაკვეთია ასაწონად რეკომენდებული?

რა გარემოებები უნდა გავითვალისწინოთ აწონვის დროს და დღის რომელი მონაკვეთია ასაწონად რეკომენდებული?

დღეს სამშაბათია და მედიაპორტალი MomsEdu.ge ტრადიციულ რუბრიკას - ენდოკრინოლოგის რეკომენდაციებს წარმოგიდგენთ. რა გარემოებები უნდა გავითვალისწინოთ აწონვის დროს და დღის რომელი მონაკვეთია ასაწონად რეკომენდებული? - ამჯერად ამ თემაზე მოგაწვდით კომპეტენტურ ინფორმაციას ენდოკრინოლოგ-ნუტრიციოლოგი თინათინ კაჭარავა.

წონის კონტროლისთვის რეკომენდებულია  - დილა. დილით, უზმოზე, დილის პროცედურების შემდეგ სასწორი აჩვენებს ადამიანის რეალურ წონას. აწონვისთვის არ უნდა შევარჩიოთ შუადღე ან საღამო, რადგან მთელი დღის მანძილზე ჩვენ ვიღებთ საკვებს, სითხეს, შესაბამისად, სასწორზე წონის სხვაობა დილასა და საღამოს შორის საკმაოდ თვალშისაცემია.

თუმცა დილით აწონვასთან დაკავშირებით უნდა გავითავლისწინოთ რამდენიმე გარემოება: 

1) წინა დღით - განსაკუთრებით დღის მეორე ნახევარში მიღებული მარილიანი საკვები აკავებს სითხეს ორგანიზმში და იწვევს შეშუპებას, ეს კი ხდება მომატებული კილოგრამების მიზეზი;

2) ნაწლავების გამოხატული შებერილობა ასევე შეიძლება გახდეს სასწორზე მომატებული წონის საფუძველი;


3) ქალბატონებში ე.წ ​პრემენსტრუალური დღეები, როდესაც წონის მატება ხდება ისევ სითხის შეკავების ხარჯზე, ამ დროს არ უნდა შევშფოთდეთ, რადგან აღნიშნული დღეების ჩავლის შემდგომ შეშუპება გაივლის და წონაც დაუბრუნდება მის ნიშნულს;

4) ალკოჰოლის მიღება წინა დღით, რომელიც ასევე აკავებს სითხეს და იწვევს შეშუპების ხარჯზე წონის მატებას;

5) გვიანი ვახშამი - ასეთ დროს ორგანიზმი ვერ ახერხებს სრულფასოვნად საკვების გადამუშავებას, რაც ასევე შეიძლება გახდეს დილით მომატებული წონის მიზეზი.

გისურვებთ ჯანმრთელობას!

წაიკითხეთ სრულად