Baby Bag

საქართველოში პირველად, მარცხენა წინაგულის ყურის დახურვის თანამედროვე პროცედურა „ნიუ ჰოსპიტალსში“ ჩატარდა

საქართველოში პირველად, მარცხენა წინაგულის ყურის დახურვის თანამედროვე პროცედურა „ნიუ ჰოსპიტალსში“ ჩატარდა

„ნიუ ჰოსპიტალსში“ მოციმციმე არითმიის ქრონიკული ფორმის მქონე პაციენტს ინსულტის რისკის შემცირების თანამედროვე ჩარევა ჩაუტარდა. მარცხენა წინაგულის ყურის დახურვის პროცედურა საქართველოში პირველად „ნიუ ჰოსპიტალსის“ ინტერვენციული კარდიოლოგიის სამსახურის ხელმძღვანელმა, ​ლაშა მოსიაშვილმა წარმატებით შეასრულა.

თემის ირგვლივ ​MOMSEDU.GE -ს მკითხველს თავად ლაშა მოსიაშვილი ესაუბრება:

„პროცედურის საშუალებით შესაძლებელია კათეტერიზაციის ლაბორატორიაში, გულმკერდზე განაკვეთის გარეშე მოხდეს გულის მარცხენა წინაგულის ყურის დახურვა. პროცედურის დროს ხდება მარცხენა წინაგულის ყურში იმპლანტის განთავსება, რომელიც ავსებს რა წინაგულს, ხელს უშლის გულის ამ სივრცეში სისხლის შედინებას. შედეგად, მცირდება ინსულტის რისკი, რადგანაც სწორედ მარცხენა წინაგულის ყური წარმოადგენს გულის იმ სივრცეს, სადაც როგორც წესი, მდორე დინების გამო შესაძლებელია მოხდეს სისხლის შედედება, თრომბული მასების ფორმირება და შემდგომ სისხლის ნაკადით ამ მასების სხვადასხვა ორგანოებში მოხვედრა, რაც იწვევს ინსულტს და სხვა ორგანოების თრომბოზებს.“

მოციმციმე არითმია, როგორც წესი, 60 წელს გადაცილებულ პაციენტებს აღენიშნებათ. დაავადების დროს ხდება წინაგულების არასინქრონიზებული შეკუმშვა, ჩვეული რიტმიდან გადახვევა. დაავადებას ჩვეულებრივ მედიკამენტოზურად ან ტრანსკათეტერული გზით მკურნალობენ, თუმცა, არაერთი შემთხვევაა, როდესაც სხვადასხვა ანატომიური თავისებურებისა თუ დაავადებების გამო მოციმციმე არითმია ქრონიკულ ფორმაში გადაჰყავთ. ასეთ დროს, ემბოლიების წარმოქმნის ასარიდებლად, პაციენტებს სხვადასხვა ჯგუფის ანტიკოაგულანტს ანუ სისხლის გამათხელებლებს უნიშნავენ, რომლის გამოყენება სხვადასხვა სისხლდენის გამოწვევის მაღალი რისკფაქტორია, მაღალ ასაკში კი მდგომარეობა სიცოცხლისთვის საშიში შეიძლება აღმოჩნდეს.

- რა ჩვენებების მქონე პაციენტებს უტარდებათ თანამედროვე პროცედურა?

ლაშა მოსიაშვილი: „პაციენტების შერჩევას ორი მაჩვენებელი აქვს, ესენი არიან პაციენტები მოციმციმე არითმიის მუდმივი ფორმით, რომლებსაც აქვთ თავის ტვინში სისხლის მიმოქცევის დარღვევის, ანუ ინსულტის განვითარების მაღალი რისკი და პაციენტები, რომლებსაც მოციმციმე არითმიის ფონზე ვერ ენიშნებათ ანტიკოაგულაციური თერაპია.“

აღნიშნული პროცედურა მსოფლიოში რამდენიმე წელია დაინერგა და ახლა უკვე საქართველოშიც წარმატებით ტარდება. მიდგომა მნიშვნელოვან მიღწევას წარმოადგენს ინტერვენციულ კარდიოლოგიაში და პაციენტების სიცოცხლის გადარჩენის შესაძლებლობას ქმნის. პროცედურა მინიმალურად ინვაზიურია, შესაბამისად, რეაბილიტაციის პროცესიც სწრაფად და მარტივად მიმდინარეობს.

შეგახსენებთ, რომ „ნიუ ჰოსპიტალსი“ ევროპული სტანდარტების დაცვით აშენებული, ულტრათანამედროვე ტექნოლოგიებით აღჭურვილი, მრავალპროფილური კლინიკაა, რომელიც 2011 წლიდან უმაღლესი ხარისხის სტაციონარულ და ამბულატორიულ სერვისებს სთავაზობს პაციენტებს. კარდიოლოგიური დეპარტამენტის მაღალკვალიფიციური გუნდი უახლესი აპარატურის გამოყენებით, თანამედროვე სტანდარტების შესაბამისად უზრუნველყოფს გულის დაავადებათა სრული სპექტრის დიაგნოსტირებასა და მკურნალობას.

R.

​„ექვსსაათ-ნახევრის განმავლობაში ნარკოზში ვიყავი“ - ვინ აიღო ურთულესი ოპერაცია საკუთარ თავ...
ახალგაზრდა ქალი სასწრაფო დახმარების ჯგუფმა „ნიუ ჰოსპიტალსში“ მიიყვანა, პაციენტისთვის გაუგებარი იყო, რატომ ეთრომბებოდა ფეხები, მაშინ, როდესაც სისხლში ყველაფერი ნორმაში ჰქონდა. არაერთი კვლევის...

შეიძლება დაინტერესდეთ

გონების სავარჯიშოები მეხსიერების გასაუმჯობესებლად ოთარ ტატიშვილისგან

გონების სავარჯიშოები მეხსიერების გასაუმჯობესებლად  ოთარ ტატიშვილისგან

ტელეკომპანია „იმედის“ გადაცემაში „იმედის დღე“ ექიმმა ​ოთარ ტატიშვილმა და თამარ კობახიძემ მეხსიერების გასაუმჯობესებელი სპეციალური ვარჯიშები შემოგვთავაზეს. კოვიდ-19-ის გადატანის შემდეგ პაციენტებს მეხსიერების დაქვეითების პრობლემა ხშირად აწუხებთ. თუ მსგავსი პრობლემის წინაშე დგახართ, შემდეგი ვარჯიშები აუცილებლად გამოგადგებათ:

„შევეცდებით გასწავლოთ სავარჯიშოები, რომლითაც ავარჯიშებთ გონებას და შეამოწმებთ თქვენს მეხსიერებას. ​ეს ყოველდღიურადაც რომ გავაკეთოთ, არანაირი პრობლემა არ იქნება, ჩვენი მეხსიერება ამით მხოლოდ გაუმჯობესდება. პირველი სავარჯიშო შემდეგია: ეკრანზე გამოჩნდება სიტყვები: წითელი, ყვითელი, ლურჯი. თითოეული ეს სიტყვა სხვადასხვა ფერში განათდება, თქვენ უნდა თქვათ ის, რასაც დაინახავთ.თქვენ უნდა დაასახელოთ ფერები და არა სიტყვები.“

მეხსიერების გასაუმჯობესებლად ეფექტიანია ნახატების სავარჯიშოს შესრულებაც. თქვენ ყურადღებით უნდა დააკვირდეთ ნახატებს და შემდგომ შესაბამის კითხვებს გასცეთ პასუხი:

„მეორე სავარჯიშო ნახატების სავარჯიშოა. ეკრანზე გამოჩნდება ნახატები და შეგიძლიათ ამ ფოტოებს 20 წამი დააკვირდეთ. მერე დაიმახსოვრეთ და უნდა უპასუხოთ კითხვებს: რამდენი ნახატი იყო? რა ნახატი იყო მარცხნივ ზედა კუთხეში? ჩამოთვალეთ ეკრანზე არსებული ცოცხალი არსებები.“

„მესამე სავარჯიშოს ჰქვია 10 წუთი ბნელ ოთახში. ოთახს წრე უნდა დაარტყათ თვალებახვეულმა და ნახოთ, რამდენად გაქვთ დამახსოვრებული თქვენი ოთახი,“ - ​აღნიშნული სავარჯიშო​ების დახმარებით მეხსიერების გაუმჯობესებას წარმატებით შეძლებთ.

წყარო: ​„იმედის დღე“

წაიკითხეთ სრულად