Baby Bag

რომელია ბავშვის ჩონჩხის სწორად ჩამოყალიბებისთვის საუკეთესო სპორტი? - ორთოპედ-ტრავმატოლოგის ნინო ჭოლოკავას რეკომენდაციები

ბავშვთა ორთოპედ-ტრავმატოლოგმა ნინო ჭოლოკავამ ბავშვის ჩონჩხის სწორად ჩამოყალიბებისთვის მშობლებს საინტერესო რეკომენდაციები მისცა:

„მშობელმა ყურადღება უნდა მიაქციოს ორ ფაქტორს. ერთი არის სწორი კვება. მეორე, რაზეც მე ძალიან მინდა ყურადღება გავამახვილო და ხაზი გავუსვა, არის მოძრაობა. ძვალ-სახსროვანი სისტემის ჩამოყალიბება არ ხერხდება ნორმალურად საკადრისი, კანონზომიერი და ზომიერი მოძრაობის გარეშე. ეს მოძრაობა უნდა იყოს ძალიან ნორმირებული. ბევრ მშობელს ეშლება და თვლის, რომ რაც უფრო მეტად დატვირთავს ბავშვს, ეს მით უფრო კარგ შედეგს მოიტანს, არა! მოძრაობა უნდა იყოს ნორმირებული: არც მეტი, არც ნაკლები.

ძალიან ბევრ მშობელს აქვს კითხვა, რომელი სპორტით დაკავდეს ბავშვი, რომ მისი ჩონჩხი სწორად ჩამოყალიბდეს. აქაც შემიძლია მშობელს ვუთხრა, რომ ყველაზე კარგი სპორტი არის თამაში. ამიტომ მაქსიმალური კომფორტი შეუქმენით თქვენს შვილებს, რომ რაც შეიძლება მეტი ითამაშონ. რაც უფრო პატარაა ბავშვი, ეს მით უფრო მნიშვნელოვანია. არ არსებობს იდეალური სპორტი. ნებისმიერი სპორტი არის რუტინული მოძრაობები, რომელიც იმ სპორტისთვის არის დამახასიათებელი. თუ გინდათ, რომ ბავშვი დაკავებული იყოს რაიმე სპორტით, ეცადეთ, ცვალოთ წრეები: ტანვარჯიში, მერე ფეხბურთი, შემდეგ კალათბურთი, რომ ჩონჩხის ჩამოყალიბება მოხდეს სწორად. გახსოვდეთ, რომ ძვალ-სახსროვანი სისტემა არის ჩარჩო, რომელიც გაჩვენებთ, თქვენი შვილი რამდენად სწორად იზრდება და რამდენად კარგად იზრდება,- მოცემულ საკითხზე ნინო ჭოლოკავამ საქართველოს პირველი არხის გადაცემაში „პირადი ექიმი - მარი მალაზონია“ ისაუბრა.

წყარო:​ „პირადი ექიმი - მარი მალაზონია“ 

შეიძლება დაინტერესდეთ

„შეხედეთ თქვენს საყვარელ ქალებს ამ თვალით, ცოლებმაც სხვა თვალით შეხედეთ თქვენს ქმრებს,“ - შალვა ამონაშვილი

„შეხედეთ თქვენს საყვარელ ქალებს ამ თვალით, ცოლებმაც სხვა თვალით შეხედეთ თქვენს ქმრებს,“ - შალვა ამონაშვილი

აკადემიკოსმა შალვა ამონაშვილმა ადამიანებს ურჩია კოვიდ-19-ის პანდემიას სხვა კუთხით შეხედოთ და კრიზისი თავიანთ სასარგებლოდ გამოიყენონ:

„კორონავირუსი ერთი მხრივ უბედურებაა. ვის უხარია ვირუსი? ეს არის ყველასთვის უბედურება. მოდი, შევხედოთ ამას სხვა მხრივ, სხვა თვალით. აგერ კაცმა ჩემი ცოლი დავინახე, თურმე რა კარგი ცოლი მყოლია. მე სამუშაოზე გავრბოდი, მოვრბოდი. ვუყურებდი თითო-ოროლა საათით და თურმე რამდენი სათნოება ყოფილა მასში. შეხედეთ თქვენს საყვარელ ქალებს ამ თვალით. ცოლებმაც სხვა თვალით შეხედეთ თქვენს ქმრებს. იქნებ აქვთ იმათ ისეთი ღირსებანი, რაც ვერ მოასწარით, რომ დაგენახათ მათში.“

შალვა ამონაშვილის თქმით, მან მეუღლის ბოლომდე გაცნობა თანაცხოვრების მაძილზე ვერ შეძლო:

​30 წელიწადი ვიცხოვრე ვალერიასთან, მაგრამ მაინც ვერ ამოვწურე მასში მისი ამოუწურავი, საოცარი თვისებები. მისი კეთილი თვისებები ამოუწურავი იყო ჩემთვის. შეხედეთ ერთმანეთს ასე და დაინახავთ, რომ ერთმანეთისთვის ახლები ხართ. კაცი ამ კორონავირუსის პირობებში გადაიფიქრებს თავის ძველ აღრენილობებს ოჯახის მიმართ.“

„ცოლიც ცოტა სხვა თვალით შეხედავს გარემოს, გამოიყვანს ოჯახს გაჭირვებიდან. თუ გაჭირვებული ხარ და გინდა, რომ გაჭირვება მოგცილდეს შენ, სხვას გაუწოდე შენი გაჭირვებული ხელი, იმას დაეხმარე. ნახე რამდენი მოგივა! თუ დარდი შემოგეყარა გულს, სხვას გადაუყარე დარდი და ნახე, როგორ გადაგეყრება შენ დარდი,“ - აღნიშნა შალვა ამონაშვილმა.

წყარო:​ „ამონაშვილის აკადემია“

წაიკითხეთ სრულად