Baby Bag

რა არის ნაწლავური აშლილობა და როგორ უნდა ამოიცნოს ის მშობელმა? - პედიატრი თემურ მიქელაძე

​პედიატრმა თემურ მიქელაძემ ბავშვებში ნაწლავური აშლილობის შესახებ ისაუბრა და მისი გამომწვევი მიზეზები დაასახელა:

„ღია სივრცე დაცვაა რესპირატორული ვირუსული ინფექციებისგან, მაგრამ ეს გარემო შეიძლება იყოს ნაწლავთა ინფექციის წყარო. თუ პირადი ჰიგიენის წესები არ დავიცავით ღია სივრცეში, ეს განსაკუთრებით ეხება ზღვის სანაპიროს, ნაწლავთა ინფექციების განვითარების მაღალი რისკი შეიქმნება. მსოფლიო ჯანდაცვის ორგანიზაციის მონაცემებით, ნაწლავთა გახშირებული მოქმედება, დიარეა, ითვლება 3 და მეტი დღის განმავლობაში. ნორმის ლიმიტების განსაზღვრა საკმაოდ რთულია. ერთჯერადი დიარეითაც, შესაძლოა, ელექტროლიტების ისეთი დისბალანსი მივიღოთ, რასაც არ მივიღებთ 10-ჯერ მოქმედებით.

ბავშვებში, განსაკუთრებით ადრეული ასაკის ბავშვებში ჩვენ გვაქვს ფუნქციური დიარეა. ისინი უფრო მეტად იღებენ უჯრედისის შემცველ საკვებს ხილისა თუ ფაფის სახით. ეს ფუნქციური დიარეა არ არის პათოლოგია და არ საჭიროებს მედიკამენტოზურ ჩარევას. ასაკის მატებასთან ერთად ის თავისით გავა. ჩვენ გვეშინია და ყურადღებას ვაქცევთ ნაწლავთა ინფექციას, ნაწლავთა ინფექციებით განპირობებულ დიარეას, რომელიც შეიძლება ელექტროლიტების დისბალანსის მიზეზი იყოს, შეიძლება განვითარდეს მწვავე მოშლილობები, რომლებიც ჰოსპიტალიზაციას საჭიროებს.

 შეგვიძლია გამოვყოთ ნაწლავთა ვირუსული ინფექციები, რომელიც 70-80%-ში გვხვდება. ამ სეზონზე სწორედ ამის გამო მოგვმართავენ. ჩვენს ქვეყანაში 10 წელზე მეტია ტარდება უკვე როტავირუსის საწინააღმდეგო ვაქცინა. ორ წლამდე ასაკის ბავშვებში როტავირუსით განპირობებული ნაწლავთა ინფექციები საკმაოდ შემცირებულია.

ადრეული ასაკის ბავშვებში სხვა რესპირატორულ-ვირუსულ ინფექციებსაც შეიძლება ახლდეს ნაწლავთა გახშირებული მოქმედება, მაგალითად კოვიდს. ეს განსაკუთრებით დელტა შტამს ახასიათებდა, ასევე ალფასაც და ომიკრონსაც. წლამდე ასაკში ძირითადი კლინიკური სიმპტომი შეიძლება ყოფილიყო ნაწლავთა გახშირებული მოქმედება. არ უნდა დაგვავიწყდეს ნაწლავთა ბაქტერიული ინფექციებიც. ნაწლავთა ბაქტერიულ ინფექციებს ველოდებით ხოლმე უფრო ივლისის შუა რიცხვებიდან სექტემბრის შუა რიცხვებამდე. არ უნდა აგვერიოს კვებითი ტოქსიკოინფექციები. სტაფილოკოკის ტოქსინმა შეიძლება გამოიწვიოს როგორც დიარეა, ასევე ღებინება.

ცალკე არის ნაწლავთა პარაზიტული ინფექციები. ეს უფრო იშვიათია. შეიძლება იყოს ნაწლავთა სოკოვანი ინფექციები, რომელიც თითზე ჩამოსათვლელ შემთხვევაში შეიძლება იყოს იმუნოკომპრომეტირებულ პირებში,“- მოცემულ საკითხზე თემურ მიქელაძემ საქართველოს პირველი არხის გადაცემაში „პირადი ექიმი - მარი მალაზონია“ ისაუბრა.

წყარო: ​„პირადი ექიმი - მარი მალაზონია“

შეიძლება დაინტერესდეთ

„ბავშვი 8-12 თვიდან იწყებს ჩვენით მანიპულირებას,“ - ბავშვთა ფსიქოლოგი ანუკა მეუნარგია

„ბავშვი 8-12 თვიდან იწყებს ჩვენით მანიპულირებას,“ - ბავშვთა ფსიქოლოგი ანუკა მეუნარგია

ბავშვთა ფსიქოლოგმა ანუკა მეუნარგიამ ტელეკომპანია „რუსთავი 2“-ის გადაცემაში „დილა მშვიდობისა საქართველო“ ბავშვებისთვის „არას“ თქმის მნიშვნელობაზე ისაუბრა:

„ბავშვი 8-12 თვიდან იწყებს ჩვენით მანიპულირებას. პატარა როდესაც არის მისთვის ჩვეული კომუნიკაციის გზა არის ტირილის ფორმა. 8-12 თვიდან ბავშვი ხვდება, რომ მისი ტირილი ჩვენზე ზეგავლენას ახდენს. ბავშვისთვის ყველა სურვილის დაკმაყოფილება არ არის სწორი. ცხოვრებისეულად რაღაც ლიმიტები გვაქვს. ყველა სურვილი შეიძლება არ იყოს ბავშვის უსაფრთხოებისთვის სასარგებლო. ბავშვური სურვილების დაკმაყოფილებისას, შესაძლოა, ბავშვს მოზარდობაში ფრუსტრაციასთან გამკლავების სირთულე ჰქონდეს.“

ანუკა მეუნარგიას თქმით, როდესაც ბავშვი არასდროს შეჯახებია სიტყვა „არას,“ მას უჭირს უარის მიღებასთან შეგუება:

„როდესაც ბავშვი არასდროს შეჯახებია სიტყვა „არას“, როდესაც ესმის არა, ეს მისთვის პირველი გამოცდილებაა. შეიძლება, მას გაუჭირდეს ამ სიტყვის გაგონებასთან გამკლავება და ამ პერიოდში დაიწყოს გარემოში მანიპულაციური ქცევა. შესაძლოა, მან ძალადობრივი ქცევაც განახორციელოს.“

„ძალიან მნიშვნელოვანია ბავშვმა იცოდეს, რომ ოჯახში გვაქვს წესი და ამ წესის შესრულების შემდეგ შემიძლია მივიღო რაღაც. ჩემი გარემო უნდა იყოს წინასწარმეტყველებადი. ამ შემთხვევაში მშობელი არის ავტორიტეტი. ბავშვი, რომელიც ხედავს, რომ ყველაფერი მასზეა დამოკიდებული, მასზე ბევრი პასუხისმგებლობა გადადის და იმატებს მისი შფოთვის დონე. ის უფრო ჭირვეული შეიძლება გახდეს,“- აღნიშნულ საკითხზე ანუკა მეუნარგიამ ტელეკომპანია „რუსთავი 2“-ის გადაცემაში „დილა მშვიდობისა საქართველო“ ისაუბრა.

წყარო: ​„დილა მშვიდობისა საქართველო“

წაიკითხეთ სრულად