Baby Bag

„ორსულობა აახალგაზრდავებსო, არ არის ასე... ორსულობა არის ძალიან რთული პროცესი,“- მეან-გინეკოლოგი ზაზა სინაურიძე

„ორსულობა აახალგაზრდავებსო, არ არის ასე... ორსულობა არის ძალიან რთული პროცესი,“- მეან-გინეკოლოგი ზაზა სინაურიძე

მეან-გინეკოლოგმა ზაზა სინაურიძემ ქალის ორგანიზმზე ორსულობისა და მშობიარობის ზეგავლენის შესახებ ისაუბრა:

„ორსულობა არის ძალიან რთული პროცესი, ის იწვევს ქალის ორგანიზმში ძალიან ბევრ ცვლილებას. რაც უფრო ასაკში შედის ქალბატონი, მისთვის უფრო რთულად გადასატანია ის ფიზიოლოგიური ცვლილებები და აღდგენა უფრო უჭირს. რომ გითხრათ, 35 წლის შემდეგ გადასარევია ორსულობა და ქალს ოჰ, როგორ მოუხდა, არ არის მართალი. ორსულობა აახალგაზრდავებსო, არ არის ასე. მე ვსაუბრობ იმ სტატისტიკაზე და იმ სამედიცინო კვლევებზე, რომელიც არის გამოქვეყნებული. შეიძლება ვიღაც ქალბატონს ისე მოუხდა 50 წლის შემდეგ ორსულობა, რომ გაახალგაზრდავდა, მაგრამ ეს არის ინდივიდუალური შემთხვევა.

გვიან ორსულობებში ყველაზე ხშირია ორსულობით გამოწვეული წნევები. ვერ ასწრებს ორგანიზმი იმ ცვლილებების მიყოლას, რაც ხდება ორგანიზმში. შესაბამისად, აუცილებელია, რომ სანამ მოხდება დაფეხმძიმება, ჩატარდეს სრული კვლევა. თუ ქალბატონს ისედაც მაღალი წნევა აქვს მის ასაკთან შედარებით, ამ ფონზე დაორსულება და დამატება პრეეკლამფსიის, რა თქმა უნდა, მისთვის იქნება ძალიან რთული. უპირობო პირობაა, რომ ორსულობისთვის ასაკში შესული ქალბატონები, აუცილებლად უნდა მიმართავდნენ ექიმს და გადიოდნენ კვლევებს, რომლებიც ორსულობის წინ არის ჩასატარებელი. აქ უფრო მეტი სპეციალისტია ჩასართავი.

ყველამ ვიცით, რომ კუნთების დრეკადობა, რომელიც გვქონდა 25 წლის ასაკში, ვერცერთ შემთხვევაში ვერ გექნება 40-45 წლის ასაკში. ძირითადი ორგანო, რომელიც მონაწილეობს მშობიარობაში, არის კუნთი. ცხადია, რომ მშობიარობა ასაკთან მიმართებაში უფრო რთულდება და მძიმდება. საკეისრო აქაც არ არის ჩვენება. ხშირად, როდესაც მაღალი წნევებია, გაცილებით სჯობს ქალბატონმა იმშობიაროს, ვიდრე საკეისრო გაუკეთდეს. ოპერაციიდან აღდგენისთვის ქალბატონებს უფრო დიდი ხანი სჭირდებათ, ვიდრე მშობიარობის შემდეგ,“- მოცემულ საკითხზე ზაზა სინაურიძემ ტელეკომპანია „რუსთავი 2“-ის გადაცემაში „სხვა შუადღე“ ისაუბრა.

წყარო: ​„სხვა შუადღე“

შეიძლება დაინტერესდეთ

„მშობელი ადრეულ ასაკში უფრო მეტ ყურადღებას აქცევს ბავშვის სწორ კვებას, შემდეგ კი დუნდება და ამ დროს იწყება არაჯანსაღი პროდუქტების დიდი რაოდენობით მიღება,“ - პედიატრი თემურ მიქელაძე

პედიატრი თემურ მიქელაძე გადაცემაში „იმედის დღე“ ჯანსაღი კვების მნიშვნელობის შესახებ საუბრობს და მშობლებს საინტერესო რჩევებს აძლევს:

„ჯანსაღი, სწორი კვება სერიოზული პრობლემაა. ბავშვებში ქრონიკული პათოლოგია, მოზარდებისგან განსხვავებით გაცილებით ნაკლებია, შესაბამისად ნებისმიერი ინფექცია, მათ შორის კორონავირუსი, მათთან უფრო მსუბუქად მიმდინარეობს. მინდა ავღნიშნო, რომ რაც უფრო ადრეული ასაკის არის ბავშვი, მით უფრო დიდ ყურადღებას აქცევს მშობელი მის კვებას, ხოლო შემდეგ კი ის მეტ-ნაკლებად დუნდება. სწორედ ამ მოდუნების პერიოდში იწყება ადვილად ასათვისებელი ნახშირწყლები, შოკოლადის ნაწარმი, უჯერი ცხიმოვანი მჟავები, მცენარეული ცხიმი, ნაჯერი ცხოველური ცხიმები, სამი წლის ასაკში ნაყინის და შოკოლადის დიდი რაოდენობით მიღება. მშობლები ვდუნდებით და ისეთ პროდუქტებს ვაძლევთ ბავშვებს, რომლებიც მათი სწორი და ჯანსაღი ცხოვრების წესს უშლის ხელს. სწორედ აქედან მოდის სიმსუქნე, მეტაბოლური დარღვევები, კარიესი, რაც დიდი რაოდენობით ტკბილი საკვების მოხმარებასთან არის დაკავშირებული. ძალიან ძნელია ამ ყველაფრის მართვა, რადგან ბავშვი მიჩვეულია არაჯანსაღ პროდუქტებს და დიდი ძალისხმევა გვიწევს, რომ მას ეს პროდუქტები ავარიდოთ.“

თემურ მიქელაძის თქმით, იმუნიტეტის ასამაღლებლად ძალიან მნიშვნელოვანია ბავშვს ეკოლოგიურად სუფთა პროდუქტები შევთავაზოთ:

„იმუნომოდულაციური და იმუნომასტიმულირებელი საშუალებები, როგორც წესი, არ არსებობს. ჯერ მსგავსი რამ კაცობრიობას არ შეუქმნია. მთავარია სწორი კვება და ცხოვრების ჯანსაღი წესი. ოქროს სტანდარტი ადრეული ასაკის ბავშვის კვებაში არის დედის რძე. ჩვენ მაქსიმალურად უნდა შევუნარჩუნოთ ბავშვს ორ წლამდე მაინც ოქროს სტანდარტი კვების, ანუ დედის რძე. შემდეგ უკვე ნებისმიერი პროდუქტი უნდა იყოს გამდიდრებული ცილებით, ცხიმებით, ნახშირწყლებით, ხორცით, მარცვლეულით, ბოსტნეულით. დაბალგანვითარებულ ქვეყნებში ნაკლებად არის საკვების პრობლემა, რადგან ისინი არ იყენებენ პესტიციდებს, სხვადასხვა მავნე მინარევს საკვები პროდუქტების შესაქმნელად. ევროპის ქვეყნებში ეკოლოგიურად სუფთა პროდუქტების მიღება საკმაოდ ძვირია. ჩვენთან სწორი საკვები პროდუქტის შეძენა საკმაოდ რთულია, ძნელია მისი მოძიება. ჩვენ მაქსიმალურად უნდა ვეცადოთ, რომ ბავშვს სწორი პროდუქტები სწორად გადავუნაწილოთ დღის განმავლობაში. ამასთან ბავშვი სუფთა ჰაერზე უნდა ვასეირნოთ, გავიყვანოთ რეკრეაციულ ზონებში. გამოვიყენოთ სოფელი, აგარაკი, რაც გვაქვს, რომ ბავშვები მომზადებული იმუნური სტატუსით შეხვდნენ ვირუსული ინფექციების სეზონს. საქართველოში გრიპის სეზონი ნოემბრის ბოლოდან დაიწყება. ჩვენთან რისკ ჯგუფებს სახელმწიფო უფასოდაც ცრის.“

„სწორი კვებითი ჩვევების გამომუშავება რთულია. მეც ვერ ვპოულობ ეკოლოგიურად სუფთა პროდუქტებს. სხვადასხვა რეგიონში მიწევს პროდუქტების შეძენა, სამეგრელოს, ქართლის და ა.შ. სწორი პროდუქტების შეძენა საკმაოდ ძვირია, არ არის მარტივად ხელმისაწვდომი.თუ გაქვთ სოფელი ან აგარაკი, მშობელმა ყველაფერი უნდა გააკეთოს, რომ ჯანსაღი პროდუქტები თავისი შვილისთვის სახლის პირობებში მოიყვანოს. მაქსიმალურად ავაცილოთ ბავშვებს ჰერბიციდები და პესტიციდები. სხვებს ვუკრძალავ შოკოლადის, ნაყინის ჭამას, მაგრამ ჩემი შვილებიც მიირთმევენ ამ საკვებს. ვცდილობ, მაქსიმალურად ავუხსნა, რატომ არ შეიძლება ამ პროდუქტების მირთმევა. სწრაფი კვების ობიექტებს მეც ვიყენებ. შეგვიძლია კვირაში ან ორ კვირაში ერთხელ შევიყვანოთ ბავშვი სხვადასხვა კვების ობიექტში, ეს არ არის კატასტროფა,“ - აღნიშნავს თემურ მიქელაძე.

წყარო:​ იმედის დღე

წაიკითხეთ სრულად