Baby Bag

„ქალბატონებო, ნუ შეხედავთ ზერელედ ანორგაზმიას, ეს არის პრობლემა, რომელიც მერე ხდება როგორც გინეკოლოგიური, ასევე ფსიქოლოგიური,“- სექსოლოგი ლევან კობალაძე

„ქალბატონებო, ნუ შეხედავთ ზერელედ ანორგაზმიას, ეს არის პრობლემა, რომელიც მერე ხდება როგორც გინეკოლოგიური, ასევე ფსიქოლოგიური,“- სექსოლოგი ლევან კობალაძე

სექსოლოგმა ლევან კობალაძემ ქალებში გავრცელებული პრობლემის ანორგაზმიის შესახებ ისაუბრა. მისი თქმით, საქართველოში ქალების 50%-ს მსგავსი პრობლემა აწუხებს:

„ანორგაზმია არის, როდესაც ქალი ვერ განიცდის სიამოვნებას. საქართველოში 50%-მდე ქალებს აქვთ ცხოვრების ასეთი სტილი. ეს ქალები ყველა შემთხვევაში ფრიგიდულები არიან, ანუ მათი ბრალია? რასაკვირველია, არა. ეს მათი პარტნიორების ბრალია უმეტეს შემთხვევაში. მამაკაცებმა არ იციან, სწორად როგორ იმოქმედონ. ჩვენ ყოველთვის ვცდილობთ, რომ წყვილთან ვიმუშაოთ. ზოგჯერ ერთი პარტნიორისგან სულ სხვა რამეს ისმენ და სულ სხვა რამეა, როდესაც მეორე პარტნიორს მოუსმენ.“

ლევან კობალაძის თქმით, ბევრი ქალი ანორგაზმიას აგდებულად უდგება, რაც არასწორია:

„ბევრი ქალი აგდებულად უდგება ანორგაზმიას: „რა მოხდა, 50%-ს თუ არ აქვს, მეც თუ არ მექნება რა მოხდა?!“ შეხედეთ ქალაქში რამდენი აგრესიული ქალბატონია, კაცებიც მათ შორის. ჩვენ სამი წლის წინ ჩავატარეთ კვლევა. როდესაც ანორგაზმიაა ქალებში, სექსუალური აქტის დროს სისხლის შემოდინება ხდება მცირე მენჯის ღრუში, ამის უკუგამშვები მექანიზმი არის ორგაზმი. თუ ორგაზმი არ ხდება, ეს სისხლი რჩება შეგუბებული. არ შეიძლება, რომ ეს პათოლოგიას არ იწვევდეს. ჩვენ 600-ზე მეტ ქალზე გამოვიკვლიეთ და აღმოჩნდა, რომ 70%-ში აღმოჩნდა საკვერცხის ვენების ვარიკოზული გაგანიერება. ეს უკვე გინეკოლოგიური პათოლოგიებია, რომელიც, შეიძლება, სხვა პათოლოგიებსაც იწვევდეს. ქალბატონებო, ნუ შეხედავთ ზერელედ ანორგაზმიას. ეს არის პრობლემა, რომელიც მერე ხდება როგორც გინეკოლოგიური, ასევე ფსიქოლოგიური. დროულად მიმართეთ ექიმ სპეციალისტს.“

„სექსუალობა არის მთლიანად ტვინის ფუნქცია, თავიდან ბოლომდე. სურვილი, აღგზნება, ერექცია, ორგაზმი ყველაფერი მოდის ტვინიდან. ნებისმიერმა დეტალმა შეიძლება ხელი შეუშალოს პროცესს, რამემ გაიხმაუროს და დამთავრდა. ზოგჯერ მოდის წყვილი, თავისი ოთახი აქვთ, მაგრამ დიდ ოჯახში ცხოვრობენ, გვერდით დედ-მამა წვანან. იქ რა სექსუალურ სიამოვნებაზეა საუბარი, როდესაც ფიქრობ, რომ ამან არ გაიღვიძოს, იმან არ გაიღვიძოს,- აღნიშნულ საკითხზე ტელეკომპანია „რუსთავი 2“-ის გადაცემაში „სხვა შუადღე“ ისაუბრა.

წყარო: ​„სხვა შუადღე“

შეიძლება დაინტერესდეთ

პანდემიით გამოწვეული იზოლაციის პირობებში განქორწინების მსურველთა რიცხვი მატულობს

პანდემიით გამოწვეული იზოლაციის პირობებში განქორწინების მსურველთა რიცხვი მატულობს

კორონავირუსის გავრცელების გამო მსოფლიოში მილიონობით ადამიანი იზოლაციაში იმყოფება. როგორც აღმოჩნდა, დაოჯახებულ ადამიანებს ცხოვრების ახალ რეჟიმზე გადასვლა გაუჭირდათ. ბევრ წყვილს ფსიქოლოგის დახმარება დასჭირდა, ზოგიერთებმა კი ოჯახის შენარჩუნება ვეღარ მოახერხეს და განქორწინება გადაწყვიტეს.

სახლში ერთსა და იმავე ადამიანებთან ერთად გამოკეტვამ, შეიძლება, ყველაზე მყარი ოჯახებიც კი დაანგრიოს. იზოლაციას ფინანსური კრიზისით გამოწვეული სტრესიც ემატება, რაც წყვილების ურთიერთობაზე ნეგატიურად აისახება. თუ თვითიზოლაციაში ხართ და მეუღლესთან კონფლიქტი ხშირად გაქვთ, მარტო არ ხართ. მას შემდეგ, რაც ქვეყნების უმრავლესობა საგანგებო რეჟიმის პირობებში ცხოვრობს, მსოფლიო მასშტაბით განქორწინების მსურველთა რიცხვი იმატებს. ადვოკატები, რომლებიც განქორწინების საკითხებზე მუშაობენ, ღიად აცხადებენ, რომ მდგომარეობა საგანგაშოა.

„ფინანსური კრიზისი უთანხმოების მთავარი მიზეზია, ამას ემატება იზოლაციით გამოწვეული სტრესი. მეუღლეები სახლიდან მუშაობენ, განტვირთვას კი ვერ ახერხებენ, ვერ მიდიან კაფეებსა და რესტორნებში, რაც ყველაფერს ართულებს.“ - აცხადებს ცნობილი ავსტრალიელი ადვოკატი ფიონა რეიდი.

ჩინეთში სრული კარანტინის გაუქმების შემდეგ განქორწინებათა რიცხვმა კატასტროფულად მოიმატა. მას შემდეგ, რაც წყვილებმა იზოლაციას თავი დააღწიეს, მათ უდიდეს ნაწილს ერთად ცხოვრების სურვილი აღარ ჰქონდა. განქორწინების ყველაზე მაღალი მაჩვენებელი მარტის თვეში დაფიქსირდა.

მსოფლიო მასშტაბით იმატა ოჯახური ძალადობის შემთხვევებმაც. ჰუნანში, ჩინეთის ერთ-ერთ პროვინციაში, ადგილობრივი მუნიციპალიტეტის წარმომადგენელთა ცნობით, განქორწინების მსურველთა რიცხვი იმდენად მაღალი იყო, რომ განაცხადის შესატანად ადამიანებს გრძელ რიგებში დგომა უწევდათ.

იზოლაცია განსაკუთრებით რთული იმ ოჯახებისთვის არის, რომლებსაც არასრულწლოვანი შვილები ჰყავთ. ბავშვები სკოლაში აღარ დადიან. ისინი სწავლას დისტანციურად აგრძელებენ. პატარებიც სტრესულ გარემოში ცხოვრობენ. ოჯახური ძალადობის გაზრდილი რიცხვი ვითარებას კიდევ უფრო ამძიმებს. დაუშვებელია, რომ ბავშვები ან ზრდასრულები მოძალადესთან ერთად იზოლაციაში ხანგრძლივად დარჩნენ.

ადვოკატები მეუღლეებს წინდახედულობისკენ მოუწოდებენ და ურჩევენ, რომ განქორწინებამდე კარგად დაფიქრდნენ. მათი თქმით, ბავშვების სურვილები, საჭიროებები და ინტერესები უფროსებმა აუცილებლად უნდა გაითვალისწინონ. მეუღლეებმა ისეთი გადაწყვეტილებები უნდა მიიღონ, რომლებიც ოჯახის ყველა წევრისთვის საუკეთესო შედეგის მომტანი იქნება.

ადვოკატების მტკიცებით, წყვილებისთვის განქორწინება საკმაოდ ძვირადღირებული და ამავე დროს სტრესული გამოსავალია. მათი თქმით, პანდემიისა და იზოლაციის პირობებში, კამათი, ჩხუბი და დაძაბულობა ჩვეულებრივი მოვლენაა. ადამიანებმა სირთულეები კატასტროფად არ უნდა აღიქვან. თუ მეუღლესთან ხშირად კამათობთ და ურთიერთობა ჩიხში შედის, უმჯობესია, დახმარებისთვის პროფესიონალს მიმართოთ.

ავსტრალიაში წყვილებისთვის სპეციალური დახმარების ცენტრი შეიქმნა. მეუღლეებს, რომლებსაც რჩევა და თანაგრძნობა სჭირდებათ, სპეციალურ ცხელ ხაზზე დარეკვა შეუძლიათ, სადაც მათ პროფესიონალები ეხმარებიან. ადამიანებს კრიზისულ ვითარებაში რადიკალური გადაწყვეტილებების მიღება ახასიათებთ, რაც ყოველთვის გამართლებული არ არის. უმჯობესია, თუ განქორწინებაზე განაცხადის შეტანამდე კარგად დაფიქრდებით. მსგავსი გადაწყვეტილებები ერთ ღამეში არ უნდა მიიღოთ. 

მომზადებულია ​thenewdaily.com-ის მიხედვით
თარგმნა ია ნაროუშვილმა
წაიკითხეთ სრულად