Baby Bag

„ამ ნიუანსების ცოდნა ურთიერთობის სწორად წარმართვაში დაგეხმარებათ,” - ფსიქოლოგი ზურა მხეიძე

„ამ ნიუანსების ცოდნა ურთიერთობის სწორად წარმართვაში დაგეხმარებათ,” - ფსიქოლოგი ზურა მხეიძე

ფსიქოლოგმა ზურა მხეიძემ მამაკაცებსა და ქალებს შორის არსებულ ფსიქოლოგიურ განსხვავებებზე ისაუბრა, რომლებიც წყვილებში ხშირად გაუგებრობის ან კონფლიქტის მიზეზი ხდება:

„ფსიქოლოგიური განსხვავება ამ ორ სქესს შორის არის და ეს განსხვავება მუდმივად იქნება. ეს ფსიქოლოგიური სხვაობა დამყარებულია ბიოლოგიურ სხვაობებზე. ურთიერთობა რომ კარგი გამოვიდეს ამ ორ სქესს შორის, უკეთესი იქნება, თუ მე მეორე სქესი მეცოდინება. მეორე სქესის ცოდნა არ ნიშნავს ფიზიკურად ვისთან რამდენი ურთიერთობა გქონდათ. ფიზიკური ურთიერთობის გამოცდილება არ არის საკმარისი, რომ გაიგო, რასთან გაქვს საქმე. გავიხსენოთ კაცების მხრიდან გამოთქმები, მაგ. „ქალს ლოგიკა არ აქვს.“ რეალურად ლოგიკა აქვს ქალს. ​ლაპარაკობენ, რომ კაცები უფრო ჭკვიანები არიან. აქვთ კაცებს ეს პრეტენზია. ეს პრეტენზია რომ აქვთ, მთელი სისუსტე მაგაშია.“

ზურა მხეიძის თქმით, მამაკაცები და ქალები სხვადასხვა მოვლენაზე განსხვავებულად რეაგირებენ:

​ამ სპეციფიკიდან გამომდინარე სხვადასხვა ქცევებია, სხვადასხვა რეაქციებია სხვადასხვა რაღაცებზე. ის, რომ ქალი ბუნებით კონსერვატორია, გამომდინარეობს ფიზიოლოგიიდან. ქალმა ბავშვი უნდა გააჩინოს, ამ ბავშვს სჭირდება ყურადღება და მოვლა, ამიტომ ქალს ინსტინქტში აქვს რაღაცების სტაბილურობის განცდა და შენარჩუნება. კაცისთვის ეს ამოცანა არ დგას. კაცი კონსერვატორი არ არის. რატომ არის არსობრივად ამ ფუნქციების გარკვევა კარგი? მერე უკვე ურთიერთობებს ადვილად ალაგებ.“

ზურა მხეიძემ აღნიშნა, რომ ქალს მრავალი საფრთხის ერთდროული ანალიზის უნარი აქვს, რაც მამაკაცს არ შეუძლია:

„იქიდან გამომდინარე, რომ ქალს ბავშვთან ურთიერთობები უწევს და ბავშვისთვის უსაფრთხო გარემო უნდა შექმნას, მას შეუძლია მრავალი საფრთხის ერთდროული ანალიზი. მაგალითად, ბავშვს ბათუმში უშვებთ პირველად. მამამ მაქსიმუმ ორი საფრთხე წარმოიდგინოს: „შორს არ გაცურო და ბევრი არ დალიო.“ დედის კომპონენტია, რომ ტრანსპორტს ბორბალი არ მოსძვრეს, არ გადაიჩეხოს, გველმა არ უკბინოს. ეს ბუნებაში აქვს, ყველაფერს ანგარიშობს. ქალის ჩანთები წარმოადგენს ძალიან საინტერესო რაღაცას. ქალს შეიძლება ჭურჭლის სარეცხი მანქანა აღმოაჩნდეს ჩანთაში. ქალს შეუძლია სწრაფად ყურადღების გადანაცვლება. ჩვენ გვგონია, რომ პარალელურ რეჟიმში აკეთებს, მაგრამ ფსიქოლოგიაში გამორიცხულია ეს. ქალს შეუძლია ტელევიზორს უყურებდეს, აუთოვებდეს, პარალელურად ტელეფონზე საუბრობდეს, ბავშვს ადევნებდეს თვალყურს და ქმარი რომ გადის, რაღაც უთხრას. ​ეს კაცისთვის არის წარმოუდგენელი პროცესი. ქალები ხშირად ამბობენ: „ჩემს ქმარს რომ ველაპარაკები, არ მისმენს." არ გისმენთ იმიტომ, რომ კაცი გისმენთ მაშინ, როდესაც თქვენკენ არის მოტრიალებული. მას პარალელური მოსმენები არ შეუძლია. ქალს ეს შეუძლია. მისთვის ეს ჩვეულებრივია.“

ქალი ნებისმიერ საუბარში ცდილობს კონტექსტი დაინახოს. ცდილობს მიხვდეს რას გულისხმობდა მისი დაქალი ან კაცი. ამის გამო ქალები ერთ პრობლემას აწყდებიან, ცდილობენ გაიგონ, რატომ თქვა ეს კაცმა. მაგალითად, კაცმა თქვა: „მშია.“ ეს ფიქრობს, რატომ თქვა, რას ნიშნავდა. შეიძლება მთელი დღე ამაზე იფიქროს. არაფერს არ ნიშნავდა, რაც მოადგა პირზე, კაცმა ის თქვა. ეს თვისებაც გენეტიკური კომპონენტია. ქალს რომ ბავშვი უჩნდება, ბავშვი ვერ ლაპარაკობს. ის მომართულია გამოიცნოს, ბავშვს რა აწუხებს. ამიტომ ქალი საუბრის დროს ავტომატურ რეჟიმში ყოველთვის აანალიზებს იმის იქით რა იგულისხმება. პრობლემა ის არის, რომ ​კაცთან თუ ურთიერთობ, არაფერი არ უგულისხმია, რაც თქვა ეგ იყო. შენ ფიქრობ მთელი ღამე ეს რატომ ქნა. ასეთი ნიუანსების ცოდნა ურთიერთობის სწორად წარმართვაში დაგეხმარებათ,“ - აღნიშნა ზურა მხეიძემ.

წყარო: ​„აზროვნების აკადემია“

არ დაგავიწყდეთ !!!

დაემატეთ ჯგუფში საბავშვო რეცეპტები

„როდესაც გაიაზრებ, თვითონვე ხვდები, რომ ძალიან ბევრ შეცდომას უშვებ ურთიერთობაში," - ზურა მ...
​ფსიქოლოგი ზურა მხეიძე იმ შეცდომებზე საუბრობს, რომლებსაც ადამიანები ერთმანეთთან ურთიერთობაში ხშირად უშვებენ:„დედმამიშვილებს შორის ხშირია ქონებრივი დავა. ხშირად ამბობენ: „მე მეტი მეკუთვნოდა, იმან...

შეიძლება დაინტერესდეთ

„ბავშვის 27-ლარიანი საკვები რამოდენიმე დღეა 32 ლარი გახდა, თითქმის ყოველ კვირაში ემატება ფასები,“- მშობლები ბავშვთა კვების სიძვირეზე საუბრობენ

„ბავშვის 27-ლარიანი საკვები რამოდენიმე დღეა 32 ლარი გახდა, თითქმის ყოველ კვირაში ემატება ფასები,“- მშობლები ბავშვთა კვების სიძვირეზე საუბრობენ

პედიატრმა, ნუტრიციოლოგმა ნინო თოთაძემ ბავშვის სრულფასოვანი კვების მნიშვნელობაზე ისაუბრა. მან აღნიშნა, რომ ბავშვის ფიზიკური და ფსიქომოტორული განვითარებისთვის სწორ კვებას დიდი მნიშვნელობა ენიჭება:

„სრულფასოვანი კვება ყველა ასაკობრივი კატეგორიისთვის მნიშვნელოვანია, მაგრამ როდესაც საქმე ეხება ბავშვთა საკითხს, როგორც მშობლები, ასევე ექიმები განსაკუთრებულ სიფრთხილეს ვიჩენთ. 0-დან 2 წლამდე სრულფასოვანი კვების მნიშვნელობა განსაკუთრებით დიდია ბავშვის ფიზიკური და ფსიქომოტორული განვითარებისთვის. ბუნებრივია, რეკომენდაციას ვუწევთ სწორედ იმ პროდუქტს, რომელიც არის ასაკობრივად შესაბამისობაში, არის ქარხნულად დამუშავებული წესით. იქ თითოეული მარცვალი დამუშავებულია ისე, რომ ასაკისთვის იყოს მისაღები. ის გამდიდრებული უნდა იყოს აუცილებლად ისეთი ვიტამინებით, რომელიც იმავე ასაკობრივი ჯგუფისთვის მნიშვნელოვანია. სახლის პირობებში ზუსტად ასეთი ფორმატით მომზადება შეუძლებელია.“

ქართველი მშობლების ნაწილს ბავშვების სრულფასოვნად გამოკვების პრობლემა აქვს, რაც საბავშვო საკვების მაღალი ღირებულებითა და მშობლების დაბალი შემოსავლებით არის განპირობებული. ტელეკომპანია „ფორმულას“ გადაცემაში „დილა ფორმულაზე“ მშობლებმა ბავშვის კვების სიძვირის პრობლემაზე ისაუბრეს.

ნათია ჩხიროძე, რომელიც მცირეწლოვანი ბავშვის მშობელია, აცხადებს, რომ ბავშვის საკვების ფასი ყოველკვირეულად იმატებს:

„ბავშვს ალერგია აქვს და ჯერ კიდევ სჭირდება ხელოვნური კვება. ეს 27-ლარიანი საკვები რამოდენიმე დღეა 32 ლარი გახდა. თითქმის ყოველ კვირაში ემატება ფასები. უკვე ბავშვის გაჩენა და მოვლა არის ძალიან დიდ თანხებთან დაკავშირებული.“

„ბავშვი მოიხმარს რძის შემცველ პროდუქტს, იმის გამო, რომ ჩემი რძე არ მიიღო. სამი დღის განმავლობაში არ ჰყოფნის და ყოველ მესამე დღეს გვინდა 40 ლარი თანხა, რომ ბავშვი გამოვკვებოთ. არის საშუალო ხარისხის და არ არის მარგებელი ბავშვისთვის. მშობელს ნამდვილად არ აქვს იმის ფუფუნება, რომ ყოველ მესამე დღეს ბავშვი რძის პროდუქტით გამოკვებოს,“ - აღნიშნა კიდევ ერთმა მშობელმა თეონა მჟავიამ.

წყარო: ​„დილა ფორმულაზე“

წაიკითხეთ სრულად