Baby Bag

ბავშვთან სწორად მოქცევის გასაღები, როდესაც ბავშვი არ გვისმენს - ფსიქოლოგი მზიკო დალაქიშვილი

ბავშვთან სწორად მოქცევის გასაღები, როდესაც ბავშვი არ გვისმენს - ფსიქოლოგი მზიკო დალაქიშვილი

ფსიქოლოგმა მზიკო დალაქიშვილმა მშობლებსა და შვილებს შორის კომუნიკაციის პრობლემის შესახებ ისაუბრა. მისი თქმით, თანამედროვე მშობლების უმთავრესი პრობლემა ის არის, რომ ბავშვები მათ არ უსმენენ:

„ძალიან ხშირად მშობლები მომმართავენ ხოლმე ჩივილით: „იქნებ თქვენ მაინც იცოდეთ, როგორ შეიძლება, რომ ბავშვი დავიმორჩილო. არ მისმენს, არ აინტერესებს, რას ველაპარაკები. მეცადინეობაზე ხომ ლაპარაკი ზედმეტია.“ ​თითქოს უკვე კლასიკურია ეს მომართვა. ბავშვები არ უსმენენ, არ ემორჩილებიან მშობლებს. საკმაოდ რთულ მდგომარეობაში ვართ ხოლმე მშობლები ამ დროს. თუ ბავშვი არ გვისმენს და დავუყვირებთ, ეს გადაიქცევა ჩვეულებრივ მომენტად, ბავშვი მხოლოდ ყვირილზე გამოიხედავს. მასწავლებლებსაც მოუწევთ ყვირილი, იმიტომ, რომ სხვანაირად ბავშვი არ მოუსმენს. ყველაზე ცუდი ის არის, რომ მერე თვითონაც იყვირებს. ამიტომ ყვირილს უნდა ვუთხრათ არა.“

მზიკო დალაქიშვილის თქმით, ზოგჯერ მშობლები შეცდომებს უშვებენ. მთავარია, რომ მათ ეს შეცდომები დროულად გამოასწორონ:

​ზოგჯერ ყველაფერი ხდება. ვიყოთ რეალისტები. ზოგჯერ მშობელს შეიძლება გქონდეს ისეთი ცუდი დღე, იმდენად გაღიზიანებული იყო, რომ გეყვიროს. იმწუთასვე გამოვასწოროთ შეცდომა. ვუთხრათ ბავშვს: ეს შენ არ გეხება, ეს მე მეხება. მე ვერ გავაკონტროლე ჩემი ემოცია, შენ არაფერ შუაში არ ხარ.“ არსებობენ ცნობიერი მშობლები, რომლებსაც კარგად გაცნობიერებული ქმედებები აქვთ და არიან მშობლები, იმ მომენტს, რომელშიც არიან, კარგად ვერ აცნობიერებენ, თუმცა შეიძლება კიდევ უფრო მეტ ენერგიას ხარჯავდნენ ზრუნვაში. სწორედ აქ მგონია, რომ არის სწორად მოქცევის გასაღები, რას ვაკეთებთ, რისთვის ვაკეთებთ და როგორ ვაკეთებთ.“

მზიკო დალაქიშვილმა აღნიშნა, რომ ბავშვებთან კონტაქტი არ უნდა დავკარგოთ და მათი საჭიროებები სწორად აღვიქვათ:

„როდესაც ბავშვს ვჭირდებით, ამას ბავშვები გამოხატავენ. ყველაზე მთავარია, შევძლოთ არ დავკარგოთ კონტაქტი ჩვენს შვილებთან. ეს კონტაქტი პასუხისმგებლობამ კი არ უნდა მართოს, რომ მე ვიყო კარგი დედა. როდესაც ბავშვი გეძახის და არ გცალია, გავაგონოთ. ​ავტომატური პასუხიც შეგვიძლია ვიქონიოთ ჩვენს შვილებთან. ვუთხრათ ბავშვს: „ახლა ვერ გელაპარაკები, მაგრამ შენზე ძვირფასს ვის უნდა დაველაპარაკო?!“ ეს დამოკიდებულება თუ არსებობს, ესმით ბავშვებს, დამიჯერეთ, რომ ესმით.“

„მნიშვნელოვანია, ბავშვებს ვასწავლოთ საკუთარი თავის მოსმენა. ბავშვმა რომ იცის მისი თავის მოსმენა, მას შეუძლია მეც ისე მომმართოს და მეც მოვუსმინო მას. ჩვენ თუ არ დავასწრებთ შეგონებებით, კარგია. მაგალითად, შია ბავშვს. ვაცადოთ, რომ მან თქვას რომ შია. ვეუბნებით: „ორი საათია, დაჯექი ჭამე!“ ბევრად მირჩევნია, რომ მე მოვიდე და გითხრა, რომ მშია. ​ჩვენ შეგვიძლია ცნობიერება ავუმაღლოთ ბავშვს და კითხვა დავუსვათ: ხომ არ მოგშივდებოდა? მე მომშივდა, შენ?“ - აღნიშნულ საკითხებზე მზიკო დალაქიშვილმა ტელეკომპანია „რუსთავი 2“ -ის გადაცემაში „სხვა შუადღე“ ისაუბრა.

წყარო: ​„სხვა შუადღე“

არ დაგავიწყდეთ !!!

დაემატეთ ჯგუფში საბავშვო რეცეპტები

„თუ ბავშვს რცხვენია, სირცხვილზე ნუ ვამახვილებთ ყურადღებას, გავამახვილოთ ყურადღება შიშზე,“...
​ფსიქოთერაპევტმა მზიკო დალაქიშვილმა მორცხვ ბავშვთან ურთიერთობის სტრატეგიებზე ისაუბრა. მან აღნიშნა, რომ ზოგჯერ ბავშვი მორცხვი სულაც არ არის და მისი ქცევა ტემპერამენტითაა განპირობებული:„გავმიჯნავდი ბავშ...

შეიძლება დაინტერესდეთ

სუფთა და დალაგებული სახლი ბავშვის მენტალურ ჯანმრთელობაზე ძალიან დადებითად ზემოქმედებს

სუფთა და დალაგებული სახლი ბავშვის მენტალურ ჯანმრთელობაზე ძალიან დადებითად ზემოქმედებს

დედები სახლის მოწესრიგებას და დალაგებას გამუდმებით ცდილობენ, რაშიც ხშირად ბავშვები ხელს უშლიან. პატარებს საკუთარი სივრცის მოწესრიგება ნაკლებად ახარებთ და მშობლებს იშვიათად ეხმარებიან. ბავშვებმა არ იციან, რომ დალაგებული და სუფთა სახლი მათ მენატალურ ჯანმრთელობაზე ძალიან დადებითად აისახება.

1. სუფთა და მოწესრიგებული სივრცე კონცენტრაციის უნარს აუმჯობესებს

სახლში თუ უწესრიგობა და ქაოსია, მშობლებს და ბავშვებს საქმეზე კონცენტრირება ძალიან უჭირთ. არეულობა გონებას კონკრეტულ ამოცანაზე კონცენტრაციაში ხელს უშლის. არეულობა განსაკუთრებით უშლის ხელს ბავშვებს, როდესაც ისინი საშინაო დავალების მომზადებას ცდილობენ ან ძილის წინ გარკვეულ რუტინას ასრულებენ. პრობლემის მარტივად მოგვარებისთვის, სახლის დალაგება საუკეთესო გადაწყვეტილებაა. საჭირო არ არის, რომ ყველაფერი ძირფესვიანად მოაწესრიგოთ. 10-წუთიანი დალაგების პროცესი თქვენი შვილის კონცენტრაციის უნარს მნიშვნელოვნად გააუმჯობესებს.

2. სუფთა სახლი განწყობას მნიშვნელოვნად აუმჯობესებს

შესაძლოა, სახლის დალაგების პროცესი სტრესული იყოს, მაგრამ სუფთა და მოწესრიგებული სახლი ყველა ადამიანის განწყობას აუმჯობესებს. არაერთმა კვლევამ აჩვენა, რომ სუფთა საცხოვრებელი სახლი ადამიანებში დეპრესიის განვითარების რისკებს ამცირებს და დაღლილობას ხსნის. დალაგებულ სახლში განტვირთვისა და დამშვიდების მეტი შესაძლებლობაა. ქაოსი კი ბევრ ადამიანში შფოთვას და გაღიზიანებას იწვევს. გარდა ამისა, თავად დალაგების პროცესიც ბევრისთვის განტვირთვის ერთ-ერთი გზაა. ბავშვებზე განმეორებითი მოქმედებები: ტილოთი ზედაპირის გაწმენდა, ნივთების დალაგება დამამშვიდებლად მოქმედებს.

3. მოწესრიგებული ოთახი ბავშვს თავდაჯერებას სძენს

მოწესრიგებულ და სუფთა ოთახში ბავშვს თავდაჯერება ემატება. ის ფიქრობს, რომ საკუთარ ცხოვრებას მეტად აკონტროლებს. ქაოსში მყოფი ბავშვი კი გაურკვევლობაშია და უსიამოვნო განცდები აწუხებს. მაშინაც კი, თუ თქვენს შვილებს დალაგება თავად არ უყვართ, დალაგებული და სუფთა სახლი მათთვის ბევრი სარგებლის მომტანია. დროა, ყველამ შესაბამისი ინვენტარი მოიმარჯვოთ, თქვენი საყვარელი მუსიკა ჩართოთ და სახლი ერთად დაალაგოთ. ასე თქვენს საცხოვრებელ გარემოს მარტივად და სწრაფად მოაწესრიგებთ, რაც გადაღლას აგარიდებთ.

წყარო: ​moms.com

წაიკითხეთ სრულად