Baby Bag

ნამდვილი ბედნიერება არ ნიშნავს, რომ თავს ყოველთვის ბედნიერად უნდა ვგრძნობდეთ

ნამდვილი ბედნიერება არ ნიშნავს, რომ თავს ყოველთვის ბედნიერად უნდა ვგრძნობდეთ
ნამდვილი ბედნიერება იმას სულაც არ ნიშნავს, რომ თავს ყოველთვის ბედნიერად გრძნობთ ან ყოველწამიერად კარგ განწყობაზე ხართ. თანამედროვე ადამიანები კულტურის ზეგავლენით გამუდმებით თავგადასავლების, მოგზაურობის და სიახლეების სურვილით არიან შეპყრობილები. ისინი თვლიან, რომ ბედნიერება მათ უმაღლეს მიზანს წარმოადგენს. ბედნიერების ძიებაში ცუდი არაფერია. ადამიანებს სურთ, რომ ყოველდღიურობაში მეტი სიხალისე და მრავალფეროვნება შეიტანონ. ეს სავსებით ნორმალური მოვლენაა. თუმცა მარადიულად ბედნიერების დევნა და მისი მოპოვების დაუოკებელი სურვილი მიზანს მნიშნელოვნად გვაშორებს.

ადამიანების უდიდესი ნაწილი თვლის, რომ ბედნიერება ყოველდღიურად კარგ განწყობაზე ყოფნას გულისხმობს, რის გამოც ისინი ნებისმიერ უსიამოვნებას ტრაგიკულ მოვლენად აღიქვამენ და სირთულეებთან გამკლავება უძნელდებათ. რა ხდება, როდესაც დროის გარკვეულ მონაკვეთში თავს ბედნიერად არ გრძნობთ? ნიშნავს თუ არა ეს იმას, რომ უბედური ხართ? იქნებ ბედნიერება რეალობის უპირობოდ მიღებასა და საკუთარი ცხოვრებით კმაყოფილებას გულისხმობს? ვფიქრობთ, რომ ბედნიერი ადამიანები ემოციური ავთენტურობის შენარჩუნებას მთელი ცხოვრების მანძილზე ახერხებენ, ისინი უფრო ძლიერები, მყარები და შესაბამისად, სხვებთან შედარებით მეტად ბედნიერებიც არიან.

• ემოციური მოწიფულობა ნებისმიერი სირთულის გადალახვაში დაგეხმარებათ

ადამიანები ემოციური მოწიფულობის მიღწევას რთულად ახერხებენ. სხვებისადმი ემპათიის გამოვლენის უნარი და საკუთარი გრძნობების შეცნობის შესაძლებლობა ემოციურად გზრდით და ძლიერ ადამიანად გაყალიბებთ. ეს სულაც არ გულისხმობს იმას, რომ თქვენ ეჭვები არასდროს შეგაწუხებთ ან არასდროს შეგეშინდებათ. რა თქმა უნდა, თქვენ საკუთარ შესაძლებლობებში არაერთხელ დაეჭვდებით. თუმცა თქვენ თამამად აღიარებთ საკუთარ ეჭვებსა და შიშებს. როდესაც რაღაცის გაგებას ვერ შეძლებთ, ოჯახის წევრებს, მეგობრებსა და ახლობლებს გულწრფელად გამოუტყდებით, რომ მათი არ გესმით და ყველაფრის გარკვევის სურვილი გაქვთ. საკუთარი და სხვების გრძნობების გაგების, ასევე ემოციების სწორად გამოხატვის უნარი ბედნიერებისკენ მიმავალ გზაზე ძალიან დიდ დახმარებას გიწევთ.

• ბედნიერებაზე ზედმეტად კონცენტრირება მის მიღწევაში ხელს გიშლით

ადამიანები, რომლებიც გამუდმებით ბედნიერების მიღწევაზე ფიქრობენ, უმეტეს შემთხვევაში თავს უბედურად გრძნობენ. მოლოდინები თუ არ გაგიმართლდებათ, პესიმიზმმა არ უნდა შემოგიტიოთ. წარუმატებლობის შიში ნებისმიერი ადამიანისთვის დამღუპველია და მისი დაძლევა აუცილებლად უნდა შეძლოთ. პოზიტიური ემოციების განცდის სურვილი მისასალმებელი და დასაფასებელია, მაგრამ მარცხის აუტანლობა და წარუმატებლობის შემთხვევაში თვითშეფასების დაკარგვა თქვენს ყოველდღიურობას ნეგატივით დატვირთავს. მიზნების მიღწევა თუ გსურთ, თითოეულ მიზნამდე მისასვლელი აქტივობები ჩამოწერეთ, აღნიშნული აქტივობები დროში სწორად გადაანაწილეთ, რათა ზემდეტად არ დაისტრესოთ, არ იჩქაროთ და მარცხი არ იწვნიოთ.

• ყოველთვის ყველაფერი ისე არ ხდება, როგორც თქვენ გეგმავდით

ყველაფრის დაგეგმვა თუ გიყვართ, იმედების გაცრუებას და გეგმების ჩაშლას უნდა შეეგუოთ. ცხოვრებაში ყველაფერი ისე არ ხდება, როგორც ჩვენ გვინდა ან წარმოგვიდგენია. ბედნიერების მოპოვებაში წინასწარი მოლოდინებისგან გათავისუფლება დაგეხმარებათ. რა თქმა უნდა, გეგმების ჩაშლა იმედგაცრუებას იწვევს და გაფრთხობთ კიდეც, მაგრამ იმედების გაცრუება ტრაგედიად არ უნდა მიიღოთ. მოლოდინები თუ არ გაგიმართლდათ, თავს ნუ დაიტანჯავთ. მიღებული გამოცდილება მომავალში შეცდომების დაშვებისგან დაგიცავთ.

• ადამიანების რეალური ცხოვრების შესახებ სოციალური ქსელიდან ვერაფერს შეიტყობთ

სოციალური ქსელები ხშირად სხვა ადამიანების ცხოვრებაზე არასწორ წარმოდგენებს გიქმნიან. ახლობლების ან უბრალო ნაცნობების ბედნიერი ფოტოების დანახვისას, თვლით, რომ ყველა ადამიანი, ვისაც იცნობთ, თქვენზე ბედნიერი და წარმატებულია. შესაძლოა, ძალიან კარგად იცით, რომ სოციალურ ქსელებში ადამიანები საკუთარი ცხოვრების უმთავრეს მოვლენებზე არასდროს საუბრობენ და ფალსიფიცირებულ რეალობას ქმნიან, თუმცა მაინც ვერ ახერხებთ საკუთარი ეჭვების დაძლევას. როდესაც სოციალურ ქსელში სხვების გაღიმებულ და ბედნიერ სახეებს უყურებთ, საკუთარ თავზე იფიქრეთ. თქვენ არასდროს ატვირთავთ facebook-ზე მეუღლესთან კონფლიქტის შესახებ უახლეს ცნობებს, თქვენ არც ოჯახურ პრობლემებზე გაამახვილებთ ყურადღებას. მიუხედავად ამისა, თქვენ მაინც სოციალური მედიის გავლენის ქვეშ ექცევით და ყველაფერს იჯერებთ, რასაც ხედავთ. უმჯობესია, თუ საკუთარ ცხოვრებაზე კონცენტრირდებით. მთავარია, თქვენი ყოველდღიურობა თქვენთვის საინტერესო და მრავალფეროვანი იყოს. ყოველდღიურ პრობლემებს კი, სხვების მსგავსად, ვერსად გაექცევით. გახსოვდეთ, რომ კომპიუტერის ეკრანს მიღმა ადამიანებს ერთმანეთთან გაცილებით მეტი საერთო აქვთ, ვიდრე სოციალურ ქსელებში.

• ბედნიერება დანიშნულების პუნქტი არ არის, რომლამდეც აუცილებლად უნდა მიხვიდეთ


ადამიანების უბედურების უმთავრეს მიზეზს ბედნიერების არასწორი ხედვა წარმოადგენს. მათი უდიდესი ნაწილი თვლის, რომ ბედნიერება დანიშნულების ადგილია, რომლამდეც აუცილებლად უნდა მივიდნენ. როგორ ფიქრობთ, სად შეიძლება ბედნიერება იპოვოთ? თუ ჩათვლით, რომ მას რომელიმე კონკრეტულ ადგილას იპოვით, ძალიან ცდებით. გახსოვდეთ, ბედნიერება ყოველდღიურად უნდა განიცადოთ. მისი პოვნა ყველგან და ყველაფერში შეგიძლიათ. ადამიანები ბედნიერებას სხვა დიდ გრძნობებთან ერთად განიცდიან, როგორებიცაა შიში, მღელვარება, სიყვარული, სიძულვილი, მრისხანება ან მარტოსულობა. ცხოვრება უამრავ შესაძლებლობას გაძლევთ, რომელთა დახმარებით ბედნიერების პოვნას აუცილებლად შეძლებთ. თავგასავლებით სავსე მოგზაურობაში, რომელსაც სიცოცხლე ჰქვია, ბედნიერებას მარტივად იპოვით. მთავარია, ამისთვის მზად იყოთ! 

მომზადებულია littlethings.com-ის მიხედვით
თარგმნა ია ნაროუშვილმა 

შეიძლება დაინტერესდეთ

14 გენიალური ფრაზა ევგენი კომაროვსკისგან

14 გენიალური ფრაზა ევგენი კომაროვსკისგან

ევგენი კომაროვსკი ერთ-ერთი ყველაზე პოპულარული და ავტორიტეტული პედიატრია, რომელიც ბავშვთა აღზრდის საკითხებზე თხუთმეტი წიგნის ავტორია. გარდა ამისა, ცნობილ ექიმს საკუთარი ტელეგადაცემაც აქვს, რომლის დახმარებით ის მშობლებს შვილების მოვლის შესახებ ძალიან საინტერესო რჩევებს აძლევს. ჩვენს სტატიაში ევგენი კომაროვსკის 14 გენიალურ გამონათქვამს გაგაცნობთ.

1. ზრდასრული ადამიანების აბსოლუტურმა უმრავლესობამ იცის, როგორ უნდა მოავლინოს ბავშვი ამქვეყნად, თუმცა 99,9 % -ს წარმოდგენა არ აქვს, როგორ უნდა აღზარდოს შვილი.

2. ბავშვის აღზრდით დაკავებული დედის ფსიქიკური ჯანმრთელობისა და კეთილდღეობის უზრუნველყოფა მამის მოვალეობაა. სწორედ მამა განსაზღვრავს, როგორი იქნება მეუღლის ურთიერთობები მის ნათესავებთან და ახლობლებთან.

3. ბედნიერი ბავშვი, პირველ რიგში, ჯანმრთელი უნდა იყოს,მხოლოდ ამის შემდეგ მოდის კითხვისა და ვიოლინოზე დაკვრის ცოდნა.

4. ბედნიერია ბავშვი, რომლის მშობლები არამხოლოდ შვილის მიმართ გამოხატავენ სიყვარულს, არამედ ერთმანეთის მიმართაც.

5. ბავშვთა ჯანმრთელობის პრობლემა პედიატრების გაზრდილი რაოდენობითა და მათი მაღალი პროფესიონალიზმით ვერ გადაწყდება. ბავშვის ჯანმრთელობა მშობლებზეა დამოკიდებული. დედისა და მამის გავლენა შვილის ჯანმრთელობის მდგომარეობაზე იმაზე დიდია, ვიდრე ქვეყნად არსებული ყველა პედიატრისა ერთად.

6. ბავშვი არავისა და არაფრის წინაზე არ არის დავალებული.

7. პირადად მე, ხშირად მოავადე ბავშვის მშობლებს ვურჩევ სახლში ძაღლი იყოლიონ. ძაღლის ყოლა უფროსებს აიძულებს დღეში ორჯერ მაინც გაისეირნონ ბავშვთან ერთად სუფთა ჰაერზე.

8. ბავშვი მთელი წლის განმავლობაში თუ ავადმყოფობდა, ვერ ერთობოდა და მოწყენილი იყო, მას სოფელში, მდინარისა და ტყის პირას დასვენება იმაზე მეტად წაადგება, ვიდრე ზღვის სანაპიროზე ყოფნა, თუნდაც მშობლებმა ის ხუთვარსკვლავიან სასტუმროში დაასვენონ.

9. ნორმალური ბავშვი გამხდარი და აქტიური უნდა იყოს.

10. ბავშვების უდიდესი ნაწილი ჯანმრთელი იბადება, თუმცა მშობლები და ექიმი მათ ჯანმრთელობას ართმევენ.

11. ახალშობილი ისეთივე ბიოლოგიური ობიექტია, როგორიც დათვის ბელი ან მგლის ლეკვი. ბავშვის ცხოვრების საწყის ეტაპზე მის ბიოლოგიურ სიჯანსაღეზე უნდა ვიზრუნოთ, რათა სამომავლოდ მისი სოციალური უნარების განვითარება შევძლოთ.

12. ბავშვის ერთჯერადი საფენების გამოყენების პრინციპი და არსი შემდეგია: ბავშვის საფენების არსებობა არა ბავშვისთვის, არამედ დედებისთვის არის საჭირო.

13. ყველაზე მთავარი ოჯახის ბედნიერება და სიჯანსაღეა. ოჯახი არა ბავშვის, არამედ საკუთარი ინტერესებით უნდა ცხოვრობდეს. ვერ წარმომიდგენია, რომ ჩემს შვილს შოკოლადი აჩუქონ, მან კი ის სამ ნაწილად არ გაყოს.

14. მთავარია გახსოვდეთ, რომ სამყაროს ცენტრი თქვენ არ ხართ. სამყაროს ცენტრი ოჯახია. კარგი ადამიანები ყველასთან და ყოველთვის კარგად იქცევიან. გაუზიარეთ სხვებს კარგი განწყობა, გემრიელი საჭმელი, ძვირფასი ნივთები. ნუ იქნებით უხეში და აგრესიული.                     


მომზადებულია ​adme.ru -ს მიხედვით

თარგმნა ია ნაროუშვილმა​

წაიკითხეთ სრულად