Baby Bag

„მშობლებს სამ წესს დავუწესებ...“

„მშობლებს სამ წესს დავუწესებ...“
აუცილებელია თუ არა ბავშვს წინასწარ შევასწავლოთ სასკოლო პროგრამა? - აღნიშნულ თემაზე აკადემიკოსმა შალვა ამონაშვილმა „დილა მშვიდობისა საქართველოსთან“ ისაუბრა. 

მისი თქმით, რატომღაც ჰგონიათ, რომ სკოლისთვის მომზადება გულისხმობს, როდესაც ბავშვმა ბევრი ლექსი, კითხვა, წერა და ანგარიში იცის. თუ ეცოდინება კარგია, თუმცა თუ არ იცის, საშიში არ არის. არ არის კარგი, როდესაც სპეციალურად ვასწავლით წერა-კითხვას იმისათვის, რომ სკოლაში აღარ დასჭირდეს. თუ ბავშვმა მოითხოვა - ვასწავლოთ, მაგრამ თუ ის ამისკენ არ ისწრაფვის - არ დავაძალოთ. ეს იმას არ ნიშნავს, რომ ჩვენი ბავშვი რამეს ჩამორჩება.

„ერთი წლით ადრე უნდა ვესაუბროთ ბავშვებს სკოლაზე, მასწავლებლებზე, ძალიან უნდა შევაყვაროთ პედაგოგები. ხანდახან ამბობენ, რომ „აი, ამ სკოლაში ასეთი სწავლებაა“, „ამ სკოლაში ინგლისურია გაძლიერებული“ - ამით არ უნდა მოიხიბლოს მშობელი. უმჯობესია გაიკითხოს, ვინ არის „ქალბატონი თამარი“, „ქალბატონი ნინო“ - კეთილი, გულისხმიერი მასწავლებელი, ბავშვები რომ უყვარს. უკეთესია ბავშვს წინასწარ გაეცნოს მასწავლებელი, ტელეფონით ან წერილი გაუგზავნოს, შეიძლება შეხვდნენ კიდეც, ბავშვები უკვე შეგუებულები იქნებიან და არ იუცხოვებენ სკოლას. თუ მაინც გაუცხოვდა, სჯობს ასეთი ბავშვების მშობლები პირველ დღეს სკოლაში დავტოვოთ. დასხდებიან საკლასო ოთახში, დაგვინახავენ, როგორი მასწავლებლები ვართ და იმედი მივცეთ, რომ მათ შვილს ძალიან კარგი პედაგოგი შეხვდა. რაც მთავარია, ბავშვიც მშვიდად იქნება, რადგან დედა ახლოს ეყოლება,“ - აღნიშნა შალვა ამონაშვილმა. 

მისი თქმით, ბავშვმა სწავლა უნდა შეიყვაროს და არა სწავლა რამის გამო, თუნდაც ქულებისთვის. არავითარი საჩუქარი! საკმარისია მასწავლებელმა დაურეკოს მშობელს და შეაქოს ბავშვი - „თქვენმა შვილმა დღეს ძალიან გამახარა, როგორი მაგალითების ამოხსნა სცოდნია“. როდესაც დედა ამას მოისმენს, შვილს მოეფერება და ბავშვს კიდევ გაუჩნდება მოტივაცია, რომ შემდეგ დღესაც წავიდეს სკოლაში.

„პირველკლასელებს თავხედობას ვერ დავაბრალებთ, ისინი შეიძლება უმართავები არიან. თუ კი მაინდამაინც მეორე, მესამე კლასში არის გათავხედებული და უმართავი ბავშვი, მასთან გვმართებს პიროვნული ურთიერთობა, ხომ ვერ გავაგდებთ სკოლიდან?! ყველა ბავშვი ჩვენია. დღეს ასეთია, მაგრამ არ ვიცით, იქნებ გენია შფოთავს მასში და არა თავხედობა?! როცა ნიჭი აქვს ადამიანს, ეს ნიჭი აცახცახებს სხეულს. როცა ბავშვი შენთან ახლოსაა, თავზე ხელი დაადე, დედის თანდასწრებით მასზე კარგი თქვი, ისეთი რამ მიაწერე, რაც არ ახასიათებს, თუმცა გინდა, რომ გამოვლინდეს,“ - დასძინა მან. 

აკადემიკოსმა მშობლებს სამი წესი დაუწესა - „მშობლებს სამ წესს დავუწესებ“: 

პირველი:

უნდა გიყვარდეს შვილი. გიყვარდეს არა შენთვის, არამედ მისთვის. არ დაუყვირო, არ გაარტყა, არ დაემუქრო, კუთხეში არ დააყენო, თითი არ დაუქნიო. ამრიგად, პირველი წესი! გიყვარდეს ბავშვი შენი კარგი ქცევით. ალერსი სიყვარულით, კეთილ საქმეთა გარეშე მკვდარია. ასე უყვართ? თავიანთი სიმშვიდისთვის უყვართ, თუ იმისთვის, რომ ისინი მომავალი მოქალაქეები უნდა გახდნენ მშვენიერი ქვეყნის?!

მეორე:

უნდა გამოიჩინოთ მოთმინება. ბავშვი კიდეც იცელქებს, კიდეც იყვირებს, კიდეც განმარტოვდება. თუ ესენი არ მოხდა მის ცხოვრებაში, ვერ გაიზრდება. დედაა დასასჯელი, როცა მოთმინებას კარგავს, რადგან ბავშვმა თუ არ იცის, მშობელმა იცის, რომ სიმშვიდე ზრდის მის შვილს.

მესამე:

მესამე არის ნდობა. ჰუმანურობა ეს იქნება - „მე მჯერა, ჩემი სიყვარული ბავშვს გამოასწორებს“, „მიყვარს გზასაცდენილი სიყვარულით გამოვასწორო“.

მოდი, შევასმინოთ ჩვენს კეთილ მშობლებს ილია ჭავჭავაძის სიტყვები, რომელშიც აღზრდის მიზანიც არის ჩადებული, პროგრამაც და მეთოდიც:

„დედავ! ისმინე ქართვლის ვედრება:

ისე აღზარდე შენ შვილის სული,

რომ წინ გაუძღვეს ჭეშმარიტება,

უკან ჰრჩეს კვალი განათლებული.“

წყარო: ​„დილა მშვიდობისა საქართველო“

შეიძლება დაინტერესდეთ

6 მნიშვნელოვანი რამ, რასაც ბავშვები ბაღში სწავლობენ

6 მნიშვნელოვანი რამ, რასაც ბავშვები ბაღში სწავლობენ

ბაღში ბავშვები ბევრ მნიშვნელოვან რამეს სწავლობენ. ჩვენს სტატიაში იმ ექვს უნარს გაგაცნობთ, რომლის განვითარებაში ბავშვს ბაღში სიარული ძალიან ეხმარება.

1. საკლასო ოთახში მოქცევის წესები

ბავშვები ბაღში თვითკონტროლს, კონფლიქტის გადაჭრის უნარსა და მოთმინებას სწავლობენ. სამივე ეს უნარი საკლასო ოთახში საჭირო ქცევის წესების ასათვისებლად ძალიან მნიშვნელოვანია. სასკოლო ასაკისთვის ბავშვები უკვე ფლობენ თვითკონტროლის, კონფლიქტის გადაჭრისა და მოთმინების გარკვეულ უნარებს.

2. ჰიგიენის წესების დაცვა

ხუთი-ექვსი წლის ასაკის ბავშვებს ჯერ კიდევ ესაჭიროებათ იმის შეხსენება, რომ მათ ეზოში თამაშის, აბაზანიდან გამოსვლის ან ჭამის დაწყების წინ ხელები უნდა დაიბანონ. ბაღი ბავშვს ამ უნარის ათვისებასა და განმტკიცებაში ეხმარება.

3. კითხვის უნარის გაუმჯობესება

ბავშვები ბაღში სიტყვების სწორად წარმოთქმას, მისი გამოყენებისთვის საჭირო კონტექსტს, წაკითხულის გააზრებასა და გამეორებას სწავლობენ. ეს უნარები ბავშვს სკოლაში კითხვის ათვისებაში ეხმარება.

4. თვლა

ბაღის დასრულების შემდეგ ბავშვებმა გარკვეულ რიცხვებამდე თვლა უკვე იციან. ბაღში ბავშვები არამხოლოდ თვლას , არამედ რიცხვების მნიშვნელობასაც ითვისებენ. თითების გამოყენებით თვლა, 10-მდე დათვლა და სხვა სავარჯიშოები ბავშვებს რიცხვების სამყაროში გზის გაკვალვაში ეხმარება.

5. სპორტული უნარების განვითარება

ბაღში ბავშვებს სპორტული უნარებიც უვითარდებათ. ამასთან, მნიშვნელოვანია, მასწავლებლებმა ბავშვებს ასწავლონ, რომ სპორტულ ღონისძიებებში მონაწილეობისას პირველ ადგილზე გასვლა გადამწყვეტი მნიშვნელობის მქონე არ არის. მთავარია, ბავშვმა გააცნობიეროს, რომ მნიშვნელოვანია წარმატების მისაღწევად მცდელობა არ დაიშუროს.

6. დროის აღქმის უნარის განვითარება

ბავშვები ბაღში კვირის დღეების და თვეების დასახელებებს სწავლობენ. ისინი აცნობიერებენ, რომელ საათზე უნდა იყვნენ ბაღში, როდის უნდა დაბრუნდნენ სახლში. ამ უნარის განვითარებას საბავშვო ბაღში სიარული ხელს მნიშვნელოვნად უწყობს.

მომზადებულია ​moms.com-ის მიხედვით

წაიკითხეთ სრულად