Baby Bag

„დღეს ჩვენ ხშირად არ ვიცნობთ, ვისთან მეგობრობენ ჩვენი შვილები, ვისთან თამაშობენ... ჩვენი თაობის მშობლებმა ეს იცოდნენ ზეპირად,“ - ნეიროფსიქოლოგი თამარ გაგოშიძე

„დღეს ჩვენ ხშირად არ ვიცნობთ, ვისთან მეგობრობენ ჩვენი შვილები, ვისთან თამაშობენ... ჩვენი თაობის მშობლებმა ეს იცოდნენ ზეპირად,“ - ნეიროფსიქოლოგი თამარ გაგოშიძე

ნეიროფსიქოლოგმა თამარ გაგოშიძემ მოზარდების ეკრანდამოკიდებულების პრობლემაზე ისაუბრა:

„გარდატეხის ასაკის ადამიანს უხარია საზრისის ძიება, კომუნიკაცია, ურთიერთობა. დღეს რა არის? სრულიად სერი სკოლა, ძალიან მოსაწყენი გაკვეთილები, კომუნიკაცია ნული. საწყალი მშობლები დარბიან სამსახურებში, რომ შვილებს კარგი მომავალი მისცენ, თანხები იშოვონ. რა ქნას მშობელმა? ურთიერთობის თავი აღარ აქვს. საინტერესო სკოლას ვერ ვთავაზობთ ბავშვს, სადაც სიხარულით გაიქცევა, რომ ექსპერიმენტი ჩაატაროს. ეზოს რაც შეეხება, ჩემს ეზოში, ჩემი ბავშვობისგან განსხვავებით, ახლა დიდი ამბავია-მეთქი რომ გითხრათ, მოგატყუებთ. ზოგ სახლს საერთოდ ეზო არ აქვს. თანამედროვე ურბანულ გარემოში გამოდიხარ პირდაპირ ქუჩაზე, შეიძლება მანქანა დაგეტაკოს.

მე რა გავაკეთო მოზარდი რომ ვარ და საინტერესო ცხოვრება მინდა. სად შეიძლება რეალიზაცია გავუკეთო ამ ჩემს გაქანებას? ცხადია, მე ამას ვაკეთებ ინტერნეტში. ისმის კითხვა: ეს კარგია თუ ცუდია? გააჩნია, ამას საიდან შევხედავთ. ცუდია იმ კონტექსტში, რა კონტექსტშიც ჩვენ ვცხოვრობთ, იმიტომ, რომ ეს არის ერთადერთი საშუალება. „ლურჯი ვეშაპი“ ახსენეს აქ და მსგავსი ტიპის რაღაცები რა ფენომენია? საკუთარი თავის გამოცდა გინდა, სარისკო თავგადასავლები გინდა, გამოწვევაა ეს შენთვის. ადრენალინის აწევა მოზარდობის ასაკში არის სასიამოვნო. ეს არის ანკესი. არის ახალი ურთიერთობები, რომელიც არ არის რეალური ურთიერთობები. ყველა ჩვენგანს ახსოვს თავისი თავი მეათე კლასში, ყველას რომ იცნობ შენ გარშემო. ახლა ამის საშუალება არ ვიცი რატომ არ არის. შენ კოლექციას აგროვებ, გამოცდილებას იღებ. დღეს ჩვენ ხშირად არ ვიცნობთ, ვისთან მეგობრობენ ჩვენი შვილები, ვისთან თამაშობენ, ვისთან ურთიერთობენ. ჩვენ ეს არ ვიცით. ჩვენი თაობის მშობლებმა ეს იცოდნენ ზეპირად თავიანთი ოჯახებით. ჩვენ ერთმანეთთან დავდიოდით ოჯახებში. ახლა ვინ ვისთან მიდის, აღარ ვიცი უკვე როგორ არის ახალ ცხოვრებაში, ეს სჭირდებათ ამ ბავშვებს,“ - აღნიშნა თამარ გაგოშიძემ.

წყარო:​ „პულსი“ 

შეიძლება დაინტერესდეთ

ბავშვი რომ ავად არასდროს გაგვიხდეს - 10 ოქროს წესი ევგენი კომაროვსკისგან

ბავშვი რომ ავად არასდროს გაგვიხდეს - 10 ოქროს წესი  ევგენი კომაროვსკისგან

ნებისმიერი დედა ოცნებობს, რომ ძლიერი და ჯანმრთელი შვილი ჰყავდეს, რომელიც ავად არასდროს ხდება. ძალიან რთულია სკოლასა და ბაღში მოსიარულე ბავშვის ინფექციების, ვირუსებისა და მიკრობებისგან დაცვა. ცნობილი პედიატრი ევგენი კომაროვსკი თვლის, რომ პატარების ჯანმრთელობის დაცვა სავსებით შესაძლებელია, თუ გარკვეულ წესებს დავიცავთ.

1.ბავშვმა სუფთა ჰაერზე დიდი დრო უნდა გაატაროს

ტელევიზორს, კომპიუტერს და სხვა ელექტრონულ მოწყობილობებს მკაცრი უარი უნდა გამოუცხადოთ. ამის ნაცვლად ბავშვთან ერთად სუფთა ჰაერზე ისეირნეთ, პარკი ან სკვერი მოინახულეთ. თქვენს შვილს შესაძლებლობა მიეცით ირბინოს, იხტუნოს, ფეხბურთი ითამაშოს, სასრიალოთი გაერთოს ან დაჭერობანას თამაშით იჯეროს გული. ბავშვს აუცილებლად ისე უნდა ჩააცვათ, რომ მან თავი კომფორტულად იგრძნოს.

2.ბავშვის დასვენება თუ გსურთ, ის ქალაქგარეთ უნდა წაიყვანოთ

სოფელში ახლობლები თუ გყავთ ან აგარაკი თუ გაქვთ, ეს შესანიშნავი ამბავია. ბავშვის იმუნიტეტისთვის სოფლად დასვენებაზე უკეთესი არაფერია. სუფთა ჰაერი, ჯანსაღი ბოსტნეული, სოფლის რძე, მდინარეში ბანაობა, ბალახზე შიშველი ფეხით სირბილი პატარების ორგანიზმს აკაჟებს. ბავშვები მთაში ან ტბაზე წაიყვანეთ. გადატვირთულ და ხალხმრავალ კურორტებზე დასვენებას არ გირჩევთ.

სისუფთავესა და სტერილურობას გადაჭარბებულ ყურადღებას ნუ დაუთმობთ

ბავშვი, რომელიც მეტისმეტად სტერილურ გარემოში იზრდება, ვირუსებისა და მიკრობების სამიზნე მარტივად ხდება. ტალახში თამაში და ცოტაოდენი მტვრის ჩაყლაპვა ბავშვის იმუნურ სისტემაზე ძალიან დადებითად აისახება. თუ შვილთან ერთად ქუჩაში სეირნობთ და მას ვაშლი მიწაზე დაუვარდება, ნუ აღელდებით. ხილი ხელსახოცით გაწმინდეთ და კვლავ ბავშვს დაუბრუნეთ. დამერწმუნეთ, ცუდი არაფერი მოხდება.

4.აფთიაქში ვიტამინებს თვითნებურად ნუ შეიძენთ

საუკეთესო ვიტამინებიც კი ქიმიური პროდუქტებია. სასარგებლო ნივთიერებები ბავშვმა ორგანული პროდუქტების დახმარებით უნდა მიიღოს. თქვენს შვილს ბოსტნეული, ხილი, რძის პროდუქტები და მწვანილეული ხშირად შესთავაზეთ, რათა ვიტამინების ნაკლებობის პრობლემამ არ შეაწუხოს.

5.ბავშვს საჭმელი ძალით არასდროს აჭამოთ

ჯანმრთელი ბავშვი საკვების მიღებაზე უარს თუ გეუბნებათ, დამნაშავე თქვენ ხართ. თქვენი შვილი სუფთა ჰაერზე ველოსიპედით სასეირნოდ გაუშვით, რათა მადაზე მოვიდეს. როდესაც ბავშვი ენერგიას დახარჯავს, ის საჭმელს თავად მოგთხოვთ.

6.ბავშვს ბევრ ტკბილეულს ნუ მისცემთ

სწრაფი ნახშირწყლები ნივთიერებათა ცვლის დარღვევასა და გაცხიმოვნებას იწვევს. კოკა-კოლა, შოკოლადები და კანფეტები ბავშვს ზომიერი რაოდენობით უნდა მისცეთ. გირჩევთ, ტკბილეულის ნაცვლად ბავშვს ბანანი, ყურძენი, ვაშლი და სხვა სახის ხილი უყიდოთ.

7.ყურადღება მიაქციეთ ბავშვის საჭმლის მომნელებელი სისტემის მუშაობას

ხშირი დიარეა ან ყაბზობა ბავშვის იმუნიტეტს მნიშვნელოვნად აზიანებს. პატარას საჭმლის მომნელებელი სისტემა საათივით გამართულად უნდა მუშაობდეს და ნაწლავის დაცლა არ უნდა დაგვიანდეს. ამისთვის საჭიროა, რომ ის უჯრედისით მდიდარი პროდუქტებით გამოკვებოთ. ბავშვის რაციონში ჩართეთ დიდი რაოდენობით ფაფები, ბოსტნეული და წვნიანი კერძები. მშრალ კვებაზე ყოფნა საჭმლის მომნელებელი სისტემის გამართულ მუშაობას აფერხებს.

8.ბავშვის ოთახში ოპტიმალური ტემპერატურა უნდა შეინარჩუნოთ

ბავშვის ოთახისთვის ნორმალური ტემპერატურა 20 გრადუსია, ჰაერის ტენიანობა 50 %-ზე დაბლა არ უნდა დაეცეს. ბავშვის ოთახი სველი წესით ხშირად დაალაგეთ. ვიდრე პატარას დასაძინებლად დააწვენთ, საძინებელი აუცილებლად გაანიავეთ. ბავშვის ოთახი არ უნდა იყოს რბილი ავეჯით, ხალიჩებითა და სქელი ქსოვილისგან დამზადებული ფარდებით გადატვირთული, რათა ის ალერგიისგან მაქსიმალურად იყოს დაცული.

9.„ბავშვთა ასაკის“ დაავადებებმა არ უნდა შეგაშინოთ

მშობლებს ძალიან ეშინიათ, რომ ბავშვს სკოლასა და ბაღში, შესაძლოა, წითელა ან ჩუტყვავილა გადაედოს. აღნიშნული ტიპის დაავადებების უფროს ასაკში გადატანა საკმაოდ ძნელია და გართულებებსაც იწვევს. შესაბამისად, უმჯობესია ბავშვმა მსგავსი ინფექციები ადრეულ ასაკშივე მშვიდობიანად დაამარცხოს.

10.ბავშვი საბავშვო ბაღში წასასვლელად წინასწარ უნდა მოამზადოთ

ბავშვი წინასწარ გადაიყვანეთ ბაღის კვებისა და ძილის რეჟიმზე. პატარას შესაძლებლობა მიეცით, რომ თანატოლებთან იურთიერთოს. თქვენი შვილი ბებიებსა და ბაბუებს ხშირად დაუტოვეთ. ამგვარად ის საბავშვო ბაღს სწრაფად და მარტივად შეეგუება. ფსიქოლოგიური სტრესი იმუნიტეტზე ძალიან უარყოფითად ზემოქმედებს და სხვადასხვა დაავადების გამომწვევი მიზეზია.

ევგენი კომაროსვკის მიერ შემოთავაზებული ოქროს წესები საკმაოდ მარტივი შესასრულებელია, მიღებული შედეგი კი ნამდვილად თვალსაჩინოა: ბედნიერი და ჯანმრთელი ბავშვები, რომლებიც ავად არასდროს ხდებიან.

მომზადებულია​ lifter.com.ua-ს მიხედვით

თარგმნა ია ნაროუშვილმა


წაიკითხეთ სრულად