Baby Bag

„რა მოხდა მერე, თუ ცუდი ნიშანი მიიღო, თუ რაღაც გააცდინა?! ამ მიდგომით ბავშვი წარმატების იოლად მიღწევას ეჩვევა,“- ფსიქოლოგი ზაზა ქოიავა

„რა მოხდა მერე, თუ ცუდი ნიშანი მიიღო, თუ რაღაც გააცდინა?! ამ მიდგომით ბავშვი წარმატების იოლად მიღწევას ეჩვევა,“- ფსიქოლოგი ზაზა ქოიავა

ფსიქოლოგმა ზაზა ქოიავამ ბავშვისთვის აბსოლუტური თავისუფლების მინიჭების ან მისი ზედმეტად შეზღუდვის მანკიერ მხარეებზე ისაუბრა:

„არის შემთხვევები, როდესაც აბსოლუტური თავისუფლება აქვს ბავშვს. ყველაფერზე ამბობენ: „რა მოხდა მერე?!“ რა მოხდა მერე, თუ ცუდი ნიშანი მიიღო?! რა მოხდა მერე, თუ რაღაც გააცდინა?! რა მოხდა მერე, თუ არ წაიკითხა?! ამ შემთხვევაში ბავშვი ეჩვევა იოლად წარმატების მიღწევას. არცერთი მათგანი აქედან წარმატება არ არის. წიგნს რომ არ კითხულობს, ეს ნამდვილად არ არის წარმატება. საბოლოოდ, როდესაც ის მართლა ეჯახება ცხოვრებისეულ პრობლემებს, მარცხი ძალიან მტკივნეულად აღიქმება.

ხუთ წლამდე ბავშვი არის მეფე. ყველაფერი უნდა გაუკეთო, ყველა სურვილი უნდა შეუსრულო. ის მეფეა ერთადერთი მიზეზის გამო. ჩვენ ორი შემაკავებელი ფაქტორი გვაქვს: ან გვეშინია და ამის გამო არ ვაკეთებთ რაღაცას, ან მორალი და ზნეობა არ გვაძლევს ამის გაკეთების უფლებას. ერთიც და მეორეც ყალიბდება 5 წლის შემდეგ. რაციონალური გონება განვითარებას იწყებს 5 წლის შემდეგ. 5 წლამდე ბავშვს რამდენიც გინდა იმდენი დაუშალეთ, აზრი არ აქვს. რამდენჯერ დღისით ეჩხუბები, იმდენჯერ ღამე დაესიზმრება, გაეღვიძება და წამოგაგდებს შენც.

ამის შემდგომ უკვე ნელ-ნელა იწყება დარიგებები. თუ ჩვენ მას უბრალოდ ავუკრძალავთ, ეს არასწორია. ბავშვს ყველაფერზე უნდა გასცე პასუხი. რამდენჯერაც მისწევ გვერდზე, ეტყვი, რომ არ გცალია და მოიშორებ, მასში იმდენჯერ იკარგება  ცნობისმოყვარეობის მარცვალი, რომელსაც მან პროფესია და პიროვნება უნდა აპოვნინოს. შესაბამისად, როდესაც ბავშვი კითხვების დასმას იწყებს და „მე გავაკეთებ“ განცდა აქვს, ეს არ უნდა დაუშალო. თუ უბრალოდ გაუწყრები, მას ეცოდინება, რომ ეს არ შეიძლება, მაგრამ არ ეცოდინება ,რატომ არ შეიძლება და სანაცვლოდ რა უნდა გააკეთოს,“- მოცემულ საკითხზე ზაზა ქოიავამ ტელეკომპანია „POSTV”-ის გადაცემაში „დღის პოსტი“ ისაუბრა.

წყარო: ​„დღის პოსტი“

შეიძლება დაინტერესდეთ

„ის მამები, რომლებიც მშობიარობას ესწრებიან, უფრო მეტად არიან ჩართულები ბავშვის აღზრდის პროცესში,“ - ნეიროფსიქოლოგი მაია მაჭავარიანი

„ის მამები, რომლებიც მშობიარობას ესწრებიან, უფრო მეტად არიან ჩართულები ბავშვის აღზრდის პროცესში,“ - ნეიროფსიქოლოგი მაია მაჭავარიანი

ნეიროფსიქოლოგმა მაია მაჭავარიანმა მშობიარობის პროცესზე მამის დასწრების მნიშვნელობაზე ისაუბრა და აღნიშნა, მამები, რომლებიც მშობიარობას ესწრებიან აღზრდის პროცესში მეტად ერთვებიან:

„მშობიარობაზე დასწრება ჩვენთან ახალი ტენდენციაა. ბოლო პერიოდია ძალიან ჩართულები არიან მამები, რაც მიხარია. ადრე ბავშვი თუ მხოლოდ დედას მოჰყავდა, ახლა მოდის ორივე მშობელი. ეს ურთიერთობა სამშობიარო ბლოკში არ სრულდება. ის მამები, რომლებიც მშობიარობას ესწრებიან, უფრო მეტად არიან ჩართულები ბავშვის აღზრდის პროცესში.“

მაია მაჭავარიანის თქმით, ქართველი მამები ორსულობის პერიოდში ვიზიტებზე დაჰყვებიან მეუღლეებს და ორსულობის განვითარებას აკვირდებიან:

„მამები მშობიარობამდე პერიოდშიც დაჰყვებიან ორსულებს, აკვირდებიან როგორ ვითარდება ორსულობა. შემდეგ ისინი ძალიან ჩართული მამები არიან, როგორც წესი. მნიშვნელოვანია, რომ ამისთვის მოემზადოს წყვილი. ის მამაკაცები, ვინც ნაკლებად უძლებენ სტრესულ გამოცდილებას ცოტანი არიან. მშობიარობის სხვადასხვა ეტაპია და ამ შემთხვევაში მამაკაცს შეუძლია პირველ ეტაპს მაინც დაესწროს.“

„ბავშვი ჯერ ცნობიერად არ არის ამ ყველაფერში ჩართული, მაგრამ ის არის ახალი მოთამაშე. ამ პროცესში, პირველივე წუთებიდანვე ხდება სამეულის შეკვრა: დედის, მამისა და შვილის. ეს არის ოჯახის ბირთვი. ჩემს გარშემო ყველას ჰქონდა მშობიარობაზე დასწრების სურვილი. ბევრ ევროპულ ქვეყანაში ეს არის კანონმდებლობით განპირობებული. მამას აქვს კანონიერი უფლება მშობიარობას დაესწროს. მას შეუძლია მოითხოვოს, რომ უნდა შვილის დაბადების პროცესზე დასწრება,“ - აღნიშნულ საკითხზე მაია მაჭავარიანმა ტელეკომპანია „ფორმულას“ გადაცემაში „დილა ფორმულაზე“ ისაუბრა.

წყარო: ​„დილა ფორმულაზე“

წაიკითხეთ სრულად