Baby Bag

„მადლიერი ადამიანი არის უფრო ბედნიერი, ჯანმრთელი, აქვს უკეთესი იმუნური სისტემა, ძილიც უფრო კარგი აქვს,“- გვანცა ბარაბაძე

„მადლიერი ადამიანი არის უფრო ბედნიერი, ჯანმრთელი, აქვს უკეთესი იმუნური სისტემა, ძილიც უფრო კარგი აქვს,“- გვანცა ბარაბაძე

ფსიქოკონსულტანტმა გვანცა ბარაბაძემ ადამიანის ცხოვრებაში მადლიერების მნიშვნელობაზე ისაუბრა:

„მადლიერება დღეს ძალიან აქტუალური თემაა. ფსიქოლოგიური კვლევებით დადასტურდა, რომ მადლიერება პირდაპირ არის დაკავშირებული ბედნიერებასთან, კარგად ყოფნასთან. ფსიქოლოგები გვირჩევენ, რომ ვიყოთ მადლიერები. მადლიერი ადამიანი არის უფრო ბედნიერი, ჯანმრთელი, აქვს უკეთესი იმუნური სისტემა, ნაკლებ სტრესს განიცდის, ძილიც უფრო კარგი აქვს. ამიტომ ვურჩევთ ადამიანებს, რომ იყვნენ უფრო მადლიერები და ეს გამოხატონ.

მადლიერება რა არის? ჩვენს ცხოვრებაში კარგი მომენტების აღიარება და დანახვა. კარგი რამ როდესაც ხდება ჩვენს ცხოვრებაში, თითქოს ეს ჩვეულებრივი რამ არის და ასეც უნდა იყოს. როდესაც საფრთხის წინაშე ვდგებით, მაშინ ვიწყებთ დაფასებას. ყოვედღიურობაში თუ ამის აღნიშვნას აკეთებ, კარგია. დღეს რომ გათენდა, წვიმიანი ამინდია და პირველი შეიძლება ეს ფიქრი მოგივიდეს: „აუ, როგორი ამინდია,“ მაგრამ გათენდა. დღე გაგვითენდა. წარმოიდგინეთ, რამდენი ადამიანია, ვისაც არ გაუთენდა დღე. მთავარია, რაზე გავაკეთებთ აქცენტს. თუ მინდა, რომ რეალურად ვიყო ბედნიერი, უნდა ვიყო გაცემაზე ორიენტირებული და არ უნდა დაველოდო. მე თუ ველოდები მადლიერებას, ეს ნიშნავს, რომ რაღაცის გამო ვუკეთებ ამას ადამიანს. ასე გამოდის ხოლმე, რომ როდესაც არ ელოდები, უფრო მეტად იღებ მერე მადლიერებას. როდესაც ელოდები, გულისტკივილია, რომ შეიძლება ისე არ დაგიბრუნონ. მე თქვენ გაგიკეთებთ სიკეთეს, მაგრამ არ დაველოდები, რომ თქვენ მადლობას გადამიხდით. თუ მოხდება ეს, მე კარგად ვიგრძნობ თავს. ჩვენი მადლიერება მხოლოდ ჩვენი პასუხისმგებლობის სივრცეა. სხვა ადამიანების პასუხისმგებლობის სივრცეში არ უნდა შევიჭრათ,“- მოცემულ საკითხზე გვანცა ბარაბაძემ ტელეკომპანია „იმედის“ გადაცემაში „ჩვენი ოჯახი“ ისაუბრა.

წყარო: ​„ჩვენი ოჯახი“ 

შეიძლება დაინტერესდეთ

„დაბომბვის ხმაზე ინსტინქტურად მოვკიდე ბავშვს ხელი, ჟილეტში გავახვიე, მივიხუტე და ასე გადმოვხტი სამშობიაროს ფანჯრიდან,“- ქართველი დედა 2008 წლის აგვისტოს მძიმე დღეებს იხსენებს

„დაბომბვის ხმაზე ინსტინქტურად მოვკიდე ბავშვს ხელი, ჟილეტში გავახვიე, მივიხუტე და ასე გადმოვხტი სამშობიაროს ფანჯრიდან,“- ქართველი დედა 2008 წლის აგვისტოს მძიმე დღეებს იხსენებს

2008 წლის აგვისტოს ომის დროს ქართველი დედები არაერთი მძიმე განსაცდელის წინაშე აღმოჩნდნენ. ერთ-ერთი დედა, რომელსაც ომის პერიოდში უდიდეს სირთულეებთან მოუხდა შეჯახება სოფელ ერგნეთში მცხოვრები მაგული ოქროპირიძეა. ის 14 წლის წინანდელ მძიმე ამბებს ტელეკომპანია „იმედის“ გადაცემაში „იმედის დღე“ იხსენებს და ყვება, როგორ გადახტა სამშობიაროს ფანჯრიდან ახალშობილთან ერთად, როდესაც საფრთხის მოახლოება იგრძნო:

„2008 წლის 7 აგვისტოს ღამე მეყოლა მეხუთე შვილი. ზუსტად როდესაც გავაჩინე ქეთი, ის პერიოდი იყო შორ მანძილზე რომ ისროდნენ. ისეთი ხმა ჰქონდა, მთელი სამშობიარო ზანზარებდა. სამხედრო ნაწილი და გორის სამშობიარო ძალიან ახლოს არის. ფანჯრები, მინები სულ ჩამომსხვრეული იყო საავადმყოფოში. ამ ხმაზე ინსტინქტურად მოვკიდე ამ ბავშვს ხელი, ჟილეტში გავახვიე, მივიხუტე და ასე გადმოვხტი ფანჯრიდან. რამოდენიმე წელი იმ საავადმყოფოს ეზოშიც კი ვერ შევდიოდი. ქეთო, როგორც ომი, ისეთი დაუმორჩილებელია. ვიტყოდი, რომ გმირია, იმიტომ, რომ პირველმა დაამარცხა სიკვდილი თავისი დაბადებით. მშობიარობის დროს „ვაიმე დედა“ არ მითქვამს. მარტო ვლოცულობდი: „ღმერთო, ჩემი შვილები კარგად იყვნენ, ღმერთო, გადაგვარჩინე.“

მაგული ოქროპირიძის თქმით, ომმა ბავშვებზე უმძიმესი გავლენა მოახდინა და პატარებს მდგომარეობიდან გამოსვლა დიდხანს უჭირდათ:

„ჩემი შვილი, მეორე გოგო დედაჩემის გვერდით იყო, როდესაც მე ბავშვით ხელში გადმოვხტი. მთელი ორი კვირა არ ლაპარაკობდა. ხალხს რომ დაინახავდა, გზაზე ვერ გადადიოდა. ომის შემდეგ პირველად რომ შემოვედი ერგნეთში და დავინახე პირველი სახლი დამწვარი, ერთი ამოსუნთქვით დამთავრდა ყველაფერი. ჩემში ყველა ემოცია გაიყინა. პიანინო მაქვს ჩემი ასაკის. ჩექმიანი ფეხით იყო ჩაქუჩები და სიმები ჩამტვრეული, ნაფეხური ეტყობოდა ძირს დაყრილ ხატებს.“

2008 წლის 7 აგვისტოს დაბადებული ქეთევან დოჯაშვილი რუსულ ბომბდამშენებს გადაურჩა და 14 წლის წინანდელი ომის შესახებ მხოლოდ დედის მონაყოლიდან იცის.

„დედა რომ ყვება ხოლმე, მეც თვალწინ მიდგას ყველაფერი, რაც ომის დროს ხდებოდა. დედა სულ ამბობს, რომ დაიბადე, გმირი ხარ და სიკვდილს პირველი უთხარი არაო,“ - ამბობს ქეთევან დოჯაშვილი.

წყარო: ​„იმედის დღე“

წაიკითხეთ სრულად