Baby Bag

„ცოლ-ქმრულ ურთიერთობას სჭირდება სულის შებერვა, აუცილებელია რომანტიკული საღამოები, შიდა რიტუალები,“ - ფსიქოლოგი მარინა კაჭარავა

„ცოლ-ქმრულ ურთიერთობას სჭირდება სულის შებერვა, აუცილებელია რომანტიკული საღამოები, შიდა რიტუალები,“ - ფსიქოლოგი მარინა კაჭარავა

ფსიქოლოგმა მარინა კაჭარავამ ცოლ-ქმრულ ურთიერთობაში რომანტიკისა და ურთიერთგაგების მნიშვნელობაზე ისაუბრა:

„როგორც კოცონს სჭირდება სულის შებერვა, ისე სჭირდება ურთიერთობას, მით უფრო ცოლ-ქმრულ ურთიერთობას. ამისთვის უნდა გავისარჯოთ. ზოგს ჰგონია, რომ გავთხოვდი და მორჩა. მხოლოდ ზღაპრებშია, რომ გათხოვდა და სამუდამოდ ბედნიერია. ოჯახში აუცილებელია შიდა რიტუალები, რომანტიკული საღამოები, 2-3 დღის წასვლა კურორტზე, განრიდება ყველასგან, მარტო ყოფნა, ერთმანეთის თვალებში ჩახედვა, მოსმენა, მეტი კონტაქტი.

ამას წინათ ერთ ბიჭს ვკითხე, რა ფერის თვალები აქვს შენს ცოლს-მეთქი და ვერ მიპასუხა. არ დავკვირვებივარო. როგორ ვცხოვრობთ, რომ თვალებშიც კი არ ჩაგვიხედავს ერთმანეთისთვის და თვალის კონტაქტიც არ გვაქვს. ძალიან მნიშვნელოვანია პატარ-პატარა შიდა დღესასწაულები. ქალიც და მამაკაციც ყოველთვის უნდა იყოს რაღაცით მომხიბვლელი.

რას ნიშნავს ფუნქციური ოჯახი? როდესაც ოჯახი იქმნება, ორი სხვადასხვა ადამიანი ხვდება ერთმანეთს, განსხვავებული ოჯახებიდან. თუ ადამიანმა, პირველ რიგში, თავის თავზე არ იმუშავა, ძალიან უჭირს ურთიერთობა. თავიდან, როდესაც ეიფორიაშია, ბევრ პრობლემას ვერ ხედავს. დრო რომ გადის, ეჯახება რაღაც ისეთს, რაც მისთვის გაუგებარი და მიუღებელია. იწყება ურთიერთბრალდება, შეურაცხყოფა, უპატიებლობა, წამოძახება, მუდმივი დიდაქტიკური ტონი: მე ასეთი მინდოდა, მე ეს არ მეკადრება, ჩემი ქმარი ასეთი უნდა იყოს, ჩემი ცოლი ისეთი. წყვილი სივრცეს არ აძლევს ერთმანეთს. ფუნქციური ოჯახი ნიშნავს სიყვარულით შექმნილ ოჯახს, სადაც არის ღირებულებითი თახნვედრა. მნიშვნელოვანია, რამდენად შეუძლია წყვილს ემპათიურობა, რამდენად შემიძლია, რომ მიუხედავად ყველაფრისა პატივი ვცე მას, არ ვცადო მისი გადაკეთება. პატივისცემა არის უალტერნატივო,“- მოცემულ საკითხზე მარინა კაჭარავამ რადიო „ფორტუნას“ ეთერში ისაუბრა.

წყარო: ​რადიო „ფორტუნა“

შეიძლება დაინტერესდეთ

„ერთმა ცნობილმა მხატვარმა ჩემი მეუღლე დახატა. ეს სურათი აქ დარჩა, ბელა წავიდა,“ - კახი კავსაძე ბელა მირიანაშვილზე

ცნობილ ქართველ მსახიობს, კახი კავსაძეს „იმედის დღემ“ იუბილე მიულოცა. მსახიობის თქმით, 85 წელი ხშირად საკმარისი არ არის იმისთვის, რომ ადამიანმა საკუთარი თავი კარგად გაიცნოს:

„ზოგიერთ ადამიანს ორჯერ და ხუთჯერ 90 წელი სჭირდება იმისთვის, რომ ცხოვრების აზრზე მოვიდეს, გაიგოს, რატომ დაიბადა, რატომ ცხოვრობს და საერთოდ ვინ არის. ზოგმა დაბადებიდანვე ყველაფერი იცის, ასეც ხდება ხოლმე. მე არ ვიცი, რომელ კატეგორიას ვეკუთვნი. ვცდილობ, აზრზე ვიყო, მაგრამ გამომდის? გამომივა? ეს ჯერ არ ვიცი. გავიგე, რომ იუბილეს ყველა სიყვარულით მილოცავს. მე მეშინია, რომ თავში არ ამივარდეს ქება. კაცს, რომ თავში დაარტყამს, იქ ყველაფერი მთავრდება. სცენის გარეშე ჩემთვის ცხოვრება ძნელია. არტისტისთვის, რომელიც მთელი ცხოვრება სცენაზე დგას, ძალიან რთულია, რომ დაჰკრას ფეხი და წავიდეს. მსახიობი გიჟდება და თავს იკლავს, რომ სხვას, მაყურებელს, ბედნიერება და სიხარული მიანიჭოს. წარმოგიდგენიათ, რა არის მსახიობის პროფესია?!“

კახი კავსაძე აღნიშნავს, რომ ის კორონავირუსის ინფექციას არ შეუშინებია და პანდემიას ზედმეტად მშვიდადაც შეხვდა:

„მგონი, ძალიან სასხვათაშორისოდ მოვიქეცი. დარწმუნებული ვიყავი, რომ ჩვენთან ყველაფერს კარგად გააკეთებდნენ. ასეც მოხდება, რა თქმა უნდა. შიშით ნამდვილად არ შემშინებია.“

მსახიობის თქმით, მას ყველაზე მეტად დიდი სცენა და შვილიშვილები ენატრება:

„შვილიშვილებთან მინდა ხოლმე ყოფნა. ისე სწრაფად გადის დრო, მენატრებიან. არტისტი ვარ და უნდა ვთქვა, რომ სცენაზე ყოფნა მენატრება. მაინც, არტისტისთვის სცენაზე ყოფნა არის ყველაფერი.“

კახი კავსაძემ აღნიშნა, რომ საკუთარ იუბილეზე ზედმეტი სენტიმენტების გამომჟღავნება არ სურდა, რის გამოც საყვარელ მეუღლეზე საუბარს მოერიდა. მან მხოლოდ ის ნახატი გაიხსენა, რომელზეც ბელა მირიანაშვილია გამოსახული:

„ერთმა ცნობილმა მხატვარმა ჩემი მეუღლე დახატა. ეს სურათი აქ დარჩა. ბელა წავიდა, ის მხატვარი ქალიც წავიდა, სურათი კი დარჩა.“

წაიკითხეთ სრულად